.jpg)
ជំនន់ទឹកលិចផ្លូវ បណ្តាលមកពីបាក់ទំនប់ ពីឡាវ នៅខេត្តស្ទឹងត្រែង។ រូប ក្រសួងធនធានទឹក និងឧតុនិយម
ភ្នំពេញៈ បើទោះជាទឹកជំនន់នៅតែបន្ដជន់លិចតាមបណ្ដាខេត្ដមួយចំនួនក្តី ប៉ុន្តែគណៈកម្មាធិការជាតិរៀបចំការបោះឆ្នោត (គជប) បានអះអាងថា មិនមានផលប៉ះពាល់ដល់ការិយាល័យបោះឆ្នោតនោះទេ ហើយការបោះឆ្នោតនឹងប្រព្រឹត្ដទៅតាមធម្មតា ដូចការគ្រោងទុក។
លោក ឌឹម សុវណ្ណារុំ អ្នកនាំពាក្យ គ.ជ.ប. បានឲ្យដឹងថា គិតមកដល់ត្រឹមថ្ងៃពុធ ទី ២៥ ខែកក្កដានេះ គ.ជ.ប. នៅមិនទាន់ទទួលបានរបាយការណ៍ណាមួយនៅឡើយទេទាក់ទងនឹងទឹកជំនន់ជន់លិច ការិយាល័យបោះឆ្នោត។ ប៉ុន្តែ បើទោះបីជាមានការជន់លិចខ្លះក៏ដោយ ក៏ការបោះឆ្នោតនៅតែប្រព្រឹត្តទៅ តាមការគ្រោងទុក ថ្ងៃទី២៩ ខែកក្កដា ចាប់ពីម៉ោង៧ព្រឹក ដល់ម៉ោង៣រសៀល នៅក្នុងការិយាល័យបោះឆ្នោតសរុបចំនួន២២៩៦៧ការិយាល័យទូទាំងប្រទេស។
លោកសុវណ្ណារុំ អះអាងថា៖«យើងមិនទាន់មានរបាយការណ៍អ្វីទេ ឥឡូវកំពុងរង់ចាំរបាយការណ៍ពីខេត្ដ។ ចំពោះការត្រៀមលក្ខណៈនៃគ្រោះទឹកជំនន់នេះ យើងនឹងធ្វើទៅតាមនីតិវិធីបោះឆ្នោត»។
លោកថា៖«នៅពេលដែលយើងធ្វើបច្ចុប្បន្នភាពទៅលើបញ្ជីបោះឆ្នោតឆ្នាំ ២០១៧ ពេលយើងសម្រេចកំណត់លេខការិយាល័យ និងទីតាំងការិយាល័យបោះឆ្នោត ក៏យើងបានប្រមើលមើលដែរអំពីឧបសគ្គក្នុងការកំណត់ឲ្យមានការិយាល័យបោះឆ្នោតនេះ។ ការបោះឆ្នោតកន្លងមក គ.ជ.ប. មានបទពិសោធហើយ ចំពោះការបោះឆ្នោតនៅក្នុងរដូវវស្សានេះ អ៊ីចឹងគ.ជ.ប មានបទពិសោធគ្រប់គ្រាន់ក្នុងការរៀបចំឲ្យមានការិយាល័យបោះឆ្នោតឲ្យបានប្រព្រឹត្ដទៅនៅទូទាំងប្រទេស»។
លោក ប៉ែន ឈុនឌី ប្រធានគណៈកម្មការៀបចំការបោះឆ្នោតខេត្ដរតនគិរីបានឲ្យដឹងថា៖«ទឹកឡើងខ្លាំងនៅទន្លេសេសាន តែនៅមិនទាន់លិចដល់ការិយាល័យបោះឆ្នោតនៅឡើយទេ។ ប៉ុន្ដែផ្លូវមានការលំបាកក្នុងការធ្វើដំណើរខ្លះដែរ ព្រោះមេឃភ្លៀងអ៊ីចឹងផ្លូវរអិល តែយើងនៅតែទៅបានមិនអីទេ» ខណៈការិយាល័យបោះឆ្នោតនៅខេត្ដរតនគិរី មានចំនួនសរុប ២៧៥ ការិយាល័យ។
លោក សេង ណេង ប្រធានគណៈកម្មការរៀបចំការបោះឆ្នោតខេត្ដកោះកុង បានឲ្យដឹងដែរថា គ្រោះទឹកជំនន់នេះ បានប៉ះពាល់តែការធ្វើដំណើរ និងការដឹកជញ្ជូនប៉ុណ្ណោះ មិនមានប៉ះពាល់ដល់ការិយាល័យបោះឆ្នោតទេ។
លោកថា៖ «យើងមិនមានផលប៉ះពាល់ និងការដូរទីតាំងអ្វីទេ ក្នុងចំណោមការិយាល័យសរុបចំនួន១៨២ការិយាល័យនេះ។ ខាងខ្ញុំនេះទោះភ្លៀងខ្លាំងយ៉ាងម៉េច ក៏ការិយាល័យនៅដំណើរការបានដែរ ព្រោះទីតាំងការិយាល័យយើងបានដាក់នៅទីតាំងសុវត្ថិភាព នៅវត្ដអារាម និងសាលារៀន»។
ជាមួយគ្នានេះដែរ លោក វន ថន ប្រធានគណៈកម្មការរៀបចំការបោះឆ្នោតខេត្ដបាត់ដំបង បានឲ្យដឹងថា ទឹកនៅបាត់ដំបង់បានស្រកចុះច្រើនហើយ ចំពោះការិយាល័យបោះឆ្នោត ក៏មិនមានផលប៉ះពាល់អ្វីដែរ ប៉ុន្ដែផ្លូវធ្វើដំណើរទៅការិយាល័យ នៅមានភក់ល្បាប់ខ្លះ។
លោក មាង ម៉េង ហ៊ួន ប្រធានគណៈកម្មការរៀបចំការបោះឆ្នោតខេត្ដកំពង់ចាម ថ្លែងថា មកដល់ថ្ងៃទី២៥ ខែកក្កដា មិនមានបញ្ហាទឹកជំនន់អ្វីទេនៅខេត្ដកំពង់ចាមទោះទឹកទន្លេបន្ដឡើងក៏ដោយ ប៉ុន្ដែមានការលំបាកចំពោះការធ្វើដំណើរ ព្រោះរដូវនេះជារដូវភ្លៀង។
លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បានថ្លែងថា វាជាការទទួលខុសត្រូវរបស់ គ.ជ.ប.។
លោកបានបន្ដថា៖«ពិតជាបញ្ហា ចំពោះការលិចទឹកអ៊ីចឹង តែជាការទទួលខុសត្រូវរបស់ គ.ជ.ប.។ យើងបានស្នើហើយទៅ គ.ជ.ប. ប៉ុន្ដែមិនដែលបានទេ អ៊ីចឹងទុកឲ្យ គ.ជ.ប. ជាអ្នកទទួលខុសត្រូវទៅ»។
លោក សុខ ឥសាន អ្នកនាំពាក្យគណបក្សប្រជាជន បានថ្លែងថា បើទឹកលិចកន្លែងណា នឹងផ្លាស់កន្លែងនោះទៅទីទួលសុវត្ថិភាពវិញ។
លោកបានថ្លែងថា៖«ដែបើប៉ះពាល់កន្លែងណា គេនឹងផ្លាស់កន្លែងនោះទៅទីទួលសុវត្ថិភាពវិញហើយ។ ប៉ះពាល់បន្តិចបន្តួច បួនដប់ការិយាល័យ គេមិនចាត់ទុកជាមូលដ្ឋានទេ»។
