ភ្នំពេញ៖ គណៈកម្មាធិការជាតិរៀបចំការបោះឆ្នោត (គ ជ ប) បានសម្រេចទទួលស្គាល់ជាផ្លូវការចំពោះការចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះបោះឆ្នោតសម្រាប់ការបោះឆ្នោតជ្រើសរើសក្រុមប្រឹក្សាក្រុងបូកគោ នៃខេត្តកំពតចំនួន ៣ គណបក្ស បន្ទាប់ពីមានគណបក្សចំនួន ៤ បានដាក់ពាក្យសុំ។
កាលពីថ្ងៃទី ១៦ ខែ មីនា ឆ្នាំ ២០២១ រាជរដ្ឋាភិបាលបានសម្រេចបង្កើតតំបន់បូកគោនៃខេត្តកំពតជាក្រុងបូកគោថ្មីដោយបានកាត់យកឃុំចំនួន ៣ ចេញពីស្រុកទឹកឈូ ខេត្តកំពត គឺឃុំបឹងទូក ឃុំកោះតូច និងឃុំព្រែកត្នោត ដើម្បីឱ្យមានភាពងាយស្រួលក្នុងការគ្រប់គ្រង និងអភិវឌ្ឍឱ្យកាន់តែរីកចម្រើនថែមទៀត។
សេចក្តីប្រកាសព័ត៌មានថ្ងៃទី ៥ [ថ្ងៃចុងក្រោយ] នៃការចុះឈ្មោះគណបក្សនយោបាយ និងបញ្ជីបេក្ខជនឈរឈ្មោះបោះឆ្នោតសម្រាប់ការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោ នៃខេត្តកំពត របស់ គ ជ ប ចុះថ្ងៃទី ១០ ឧសភា បានឲ្យដឹងថា នៅថ្ងៃទី ១០ ខែឧសភា គិតត្រឹមម៉ោង ១៧:៣០ នាទី គឺជាថ្ងៃចុងក្រោយនៃការចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះបោះឆ្នោតសម្រាប់ការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោ នៃខេត្តកំពត។
គ ជ ប បានបញ្ជាក់ថា៖ «ក្នុងរយៈពេល ៥ ថ្ងៃ នៃការដាក់ពាក្យសុំចុះបញ្ជីទាំងពីរនេះ គណៈកម្មការរៀបចំការបោះឆ្នោតខេត្តកំពត បានទទួលពាក្យសុំពីគណបក្សនយោបាយចំនួន ៤ ដែលបានដាក់ពាក្យសុំចូលរួមប្រកួតប្រជែងការបោះឆ្នោតជ្រើសរើសក្រុមប្រឹក្សាក្រុងបូកគោ ដែលនឹងប្រព្រឹត្តទៅនៅថ្ងៃទី ២៥ ខែ កក្កដា ឆ្នាំ ២០២១»។
គជប បានឲ្យដឹងទៀតថា គណបក្សទាំង ៤ ដែលបានដាក់ពាក្យស្នើសុំនេះ គឺមានគណបក្សប្រជាជនកម្ពុជាគណបក្សសញ្ជាតិកម្ពុជា និងគណបក្សយុវជនកម្ពុជាដែលគណៈកម្មការរៀបចំការបោះឆ្នោតខេត្តកំពត បានសម្រេចទទួលស្គាល់ជាផ្លូវការចំពោះការចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះបោះឆ្នោត។
ចំណែកគណបក្សហ៊្វុនស៊ិនប៉ិច គណៈកម្មការរៀបចំការបោះឆ្នោតខេត្តកំពត នឹងពិនិត្យសម្រេចលើពាក្យសុំចុះបញ្ជីគណបក្សនយោបាយឈរឈ្មោះបោះឆ្នោតក្នុងរយៈពេលយ៉ាងយូរ ៥ (ប្រាំ) ថ្ងៃ បន្ទាប់ពីបានទទួលពាក្យសុំចុះបញ្ជីនៅថ្ងៃចន្ទ។ សេចក្តីប្រកាសរបស់ គ ជ ប ក៏បានដឹងដែរថា ក្នុងការដាក់ពាក្យស្នើសុំនេះ គណបក្សនីមួយៗបានដាក់បេក្ខជនពេញសិទ្ធិ និងបេក្ខជនបម្រុងចន្លោះពី ២៦ នាក់ ទៅ ២៨ នាក់។
លោក សេង សុខេង ប្រធានគណបក្សសញ្ជាតិកម្ពុជាបានលើកឡើងថា ដោយឈរលើរដ្ឋធម្មនុញ្ញកម្ពុជា បើទោះគណបក្សលោកមិនមានអាសនៈនៅក្នុងរដ្ឋសភា ឬអង្គបោះឆ្នោតនៅក្នុងតំបន់នេះ ក៏គណបក្សលោករីករាយនឹងចូលរួមគ្រប់សកម្មភាព ដើម្បីគាំទ្រដល់ការបោះឆ្នោតប្រកបដោយសេរី និងយុត្តិធម៌។
លោកបានបន្តថា ក្នុងប្រទេសប្រកាន់លទ្ធិប្រជាធិបតេយ្យសេរីពហុបក្សប្រជាពលរដ្ឋច្បាស់ជាចង់ឃើញមានការចូលរួមបោះឆ្នោតពីគ្រប់គណបក្ស ហើយអង្គបោះឆ្នោតក្នុងតំបន់នោះ នឹងជ្រើសរើសគណបក្សដែលបានចូលរួមក្នុងពេលនេះ។
លោកបានបញ្ជាក់ថា៖ «បេក្ខជនរបស់យើងទាំងអស់នឹងទៅឃោសនា ឬសុំការគាំទ្រពីអង្គបោះឆ្នោតក្នុងសង្កាត់ទាំង ៣ នោះ ដោយផ្ទាល់ ព្រោះការបោះឆ្នោតនេះ គឺមិនមែនជាការបោះឆ្នោតជាទូទៅទេ។ យើងឲ្យបេក្ខជនរបស់យើងទៅឃោសនាជាមួយអង្គបោះឆ្នោតតែម្តង ហើយអង្គបោះឆ្នោតលើកនេះ មានតែ ៣ សង្កាត់ ដែលមិនមានអ្វីច្រើនទេ»។
សូមជម្រាបថា នៅក្នុងមូលដ្ឋានខេត្តកំពតកន្លងទៅ គឺមានក្រុងស្រុកចំនួន ៨ ក្នុងនោះក្រុង ១ និងស្រុក ៧ ប៉ុន្តែបន្ទាប់ពីរាជរដ្ឋាភិបាលសម្រេចបង្កើតក្រុងថ្មីនេះ នឹងធ្វើឱ្យខេត្តនេះមានក្រុងចំនួន ២ និងស្រុកចំនួន ៦ វិញ៕