The Phnom Penh Post Search

Search form




Logo of Phnom Penh Post newspaper Phnom Penh Post - គ.ជ.ប នឹង​ជួប​សហគមន៍​អឺរ៉ុប​ជា​ថ្មី​មុន​នឹង​ស្នើ​សុំ​ជំនួយ

គ.ជ.ប នឹង​ជួប​សហគមន៍​អឺរ៉ុប​ជា​ថ្មី​មុន​នឹង​ស្នើ​សុំ​ជំនួយ

លោក ហង្ស ពុទ្ធា អ្នក​នាំពាក្យ​គណៈកម្មាធិការ​ជាតិ​រៀបចំ​ការ​បោះឆ្នោត​ថ្មី​។
លោក ហង្ស ពុទ្ធា អ្នក​នាំពាក្យ​គណៈកម្មាធិការ​ជាតិ​រៀបចំ​ការ​បោះឆ្នោត​ថ្មី​។ ផា លីណា

គ.ជ.ប នឹង​ជួប​សហគមន៍​អឺរ៉ុប​ជា​ថ្មី​មុន​នឹង​ស្នើ​សុំ​ជំនួយ

ភ្នំពេញៈ គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប​) នឹង​ស្នើ​ធ្វើការ​ចរចា​ជាថ្មី​ជាមួយ​ក្រុម​ការងារ​បច្ចេកទេស​បោះឆ្នោត​របស់​សហគមន៍​អឺរ៉ុប មុន​នឹង​ស្នើសុំ​ជំនួយ​សម្រាប់​ដំណើរការ​កិច្ចការ​ចុះ​ឈ្មោះ​បោះឆ្នោត​សាកល្បង តាម​ផែនការ​គ្រោង​ទុក​នៅ​ខែ​កញ្ញា​ខាង​មុខ​នេះ។

សេចក្តី​សម្រេច​នេះ បាន​ធ្វើ​ឡើង ក្នុង​កិច្ចប្រជុំ​មួយ​របស់​សមាជិក គ.ជ.ប កាលពី​ម្សិលមិញ បន្ទាប់ពី​ភាគី​សហគមន៍​អឺរ៉ុប បាន​បង្ហាញ​ជំហរ​កាលពី​ថ្ងៃ​ពុធ​ថា ខ្លួន​ប្រហែល​មិន​អាច​ផ្តល់​ជំនួយ​សម្រាប់​ការ​ចុះ​ឈ្មោះ​សាកល្បង ដែល គ.ជ.ប គ្រោង​នឹង​ធ្វើ​នៅ​ខែ​សីហា ឬ​កញ្ញា ឆ្នាំ​ ២០១៥​ ខាង​មុខ​នេះ​ទេ ដោយ​​សហគមន៍​អឺរ៉ុប​យល់​ឃើញ​ថា​ ផែនការ​សកម្មភាព​របស់ គ.ជ.ប ពេល​ខ្លះ មិន​សមស្រប​​តាម​ពេលវេលា​នៃ​ស្ថានភាព​ជំនួយ​ហើយ​សហគមន៍​​អឺរ៉ុប អាច​នឹង​ផ្តល់​ជំនួយ​ចាប់ពី​ខែ​មករា​ឆ្នាំ ២០១៦ តទៅ​។

សមាជិក និង​ជា​អ្នក​នាំពាក្យ គ.ជ.ប លោក ហង្ស ពុទ្ធា បាន​ឲ្យ​ដឹង​ក្រោយ​កិច្ចប្រជុំ​ផ្ទៃក្នុង​រួច​ថា គ.ជ.ប ថ្មី ដែល​ទើប​បង្កើត​ឡើង​បាន​ជិត ១ ខែ​កន្លះ​នេះ នៅ​តែ​ចង់​ដំណើរការ​ការងារ​ចុះ​បញ្ជី​ឈ្មោះ​សាកល្បង​តាម​បច្ចេកទេស​ថ្មី ដោយ​ប្រើ​ប្រព័ន្ធ​កុំព្យូទ័រ តាម​ផែនការ​ឲ្យ​បាន​រួចរាល់​នៅ​ចុង​ឆ្នាំ​ ២០១៥ ​នេះ បើ​ទោះ​​ជា​សហគមន៍​​អឺរ៉ុប​ថ្មីៗ​នេះ បាន​ពន្យារ​ការ​ផ្តល់​ជំនួយ​ក្តី។

លោក​ថា៖ «សហគមន៍​អឺរ៉ុប ថា អាច​អ៊ីចឹង​យើង​មិន​អស់​សង្ឃឹម​ទាំង​ស្រុង​ទេ​ហើយ​ក្រុម​ការងារ​របស់​យើង​នឹង​ពន្លឿន​ការ​ចរចា​ ដើម្បី​ឲ្យ​គាត់​អាច​រក​វិធី​ផ្សេង​ទៀត។ សម្រាប់​ជប៉ុន​គឺ​មិន​ទាន់​មាន​ការ​ឆ្លើយតប​ទេ​លើ​រឿង​នេះ ក្នុង​ករណី​ដែល​ខ្វះខាត យើង​នឹង​ពិចារណា​ស្នើ​ជំនួយ​ពី​រដ្ឋាភិបាល​ផង​ដែរ»។

នាយក​ប្រតិបត្តិ​នៃ​គណៈកម្មាធិការ ដើម្បី​ការ​បោះឆ្នោត​ដោយ​សេរី និង​យុត្តិធម៌​នៅ​កម្ពុជា លោក គល់ បញ្ញា ចាត់​ទុក​ថា ការ​ចុះ​បញ្ជី​ឈ្មោះ​សាកល្បង តាម​បច្ចេកវិទ្យា​កុំព្យូទ័រ ​គឺជា​រឿង​សំខាន់​មួយ ដែល​អាច​ឲ្យ គ.ជ.ប សាកល្បង​ការងារ និង​កែ​តម្រូវ​ចំណុច​ខ្វះខាត ឬ​កំហុស ដែល​អាច​កើត​មាន​ក្នុង​ដំណាក់​កាល​នេះ​មុន​ឈាន​ដល់​ការ​ចុះ​ឈ្មោះ​ថ្មី​ជា​ផ្លូវការ។

លោក​ថា៖ «ប្រសិន​បើ​អ្នក​ជំនាញ​បដិសេធ​ផ្តល់​ជំនួយ​លើ​ការងារ​សាកល្បង​នេះ ខ្ញុំ​គិត​ថា គ.ជ.ប អាច​ប្រើប្រាស់​កញ្ចប់​ថវិកា​ប្រចាំ​ឆ្នាំ​ដែល​ខ្លួន​មាន ឬ​ស្នើ​ទៅ​រដ្ឋាភិបាល​សុំ​ជំនួយ​តែ​ម្តង ដើម្បី​ដំណើរការ​ការងារ​នេះ​ព្រោះ​ការ​សាកល្បង ធ្វើ​ឡើង​តែ​លើ​ឃុំ​សង្កាត់​គោលដៅ​មួយ​ចំនួន​តែ​ប៉ុណ្ណោះ អ៊ីចឹង​ចំណាយ​ក៏​មិន​ច្រើន​ដែរ»​។

តាមរយៈ​សេចក្តី​ប្រកាស​ព័ត៌មាន​ចុះ​ថ្ងៃ​ទី ២៧ ខែ​ឧសភា ស្តីពី​លទ្ធផល​ជំនួប​រវាង​ក្រុម​ការងារ​បច្ចេកទេស​បោះឆ្នោត​មកពី​សហគមន៍​អឺរ៉ុប ដឹកនាំ​ដោយ​លោក Mact Stevens និង លោក គួយ ប៊ុនរឿន អនុប្រធាន គ.ជ.ប និង​ជា​ប្រធាន​គណៈកម្មការ​ចំពោះ​កិច្ច បាន​ឲ្យ​ដឹង​ថា អ្នក​ជំនាញ​បោះឆ្នោត​មកពី​សហគមន៍​អឺរ៉ុប​ម្នាក់​ទៀត នឹង​មក​ដល់​កម្ពុជា ដើម្បី​សហការ​ជាមួយ គ.ជ.ប ហើយ​ថា សហគមន៍​អឺរ៉ុប​អាច​សហការ​ជាមួយ គ.ជ.ប ជាច្រើន​ចំណុច​។

តាម​គម្រោង​នៅ​ចុង​ឆ្នាំ​នេះ គ.ជ.ប នឹង​មាន​ការ​រៀបចំ​ការ​ចុះ​បញ្ជី​ឈ្មោះ​សាកល្បង តាម​បច្ចេកទេស​ថ្មី​ប្រព័ន្ធ​កុំព្យូទ័រ ដោយ​ប្រើ​រយៈពេល ៤ ខែ ខណៈ​បញ្ជី​ឈ្មោះ​អ្នក​បោះឆ្នោត​ចាស់ មាន​អ្នក​ចុះឈ្មោះ​រួច​ហើយ​ចំនួន ១០ លាន​នាក់ ហើយ​នៅ​ឆ្នាំ​ ២០១៦ គ.ជ.ប នឹង​រៀបចំ​បញ្ជី​បោះឆ្នោត​ថ្មី សម្រាប់​ការ​បោះឆ្នោត​ឃុំ​សង្កាត់​នៅ​ឆ្នាំ​ ២០១៧​។

យ៉ាង​នេះ​ក្តី លោក ហង្ស ពុទ្ធា ថា គ.ជ.ប កំពុង​រង់ចាំ​នូវ​កាលបរិច្ឆេទ​បោះឆ្នោត​ពិតប្រាកដ ដែល​នឹង​ត្រូវ​ប្រកាស​ដោយ​លោក​នាយករដ្ឋមន្ត្រី ដើម្បី​ពិនិត្យ​លើ​ពេលវេលា ឲ្យ​បាន​កាន់តែ​ច្បាស់លាស់​ក្នុង​ការងារ​ទាំងនេះ។

តាម​ផែនការ នៅ​ថ្ងៃ​ទី ២ ខែ​មិថុនា ​គ.ជ.ប នឹង​ប្រគល់​ជូន​សហគមន៍​អឺរ៉ុប និង​ជប៉ុន នូវ​សេចក្តី​ព្រាង​បទបញ្ជា និង​នីតិវិធី​សម្រាប់​ការ​ចុះ​ឈ្មោះ​បោះឆ្នោត ដើម្បី​រៀបចំ​បញ្ជី​បោះឆ្នោត​ថ្មី កម្រាស់​ប្រមាណ ៨០ ​ទំព័រ ដែល​ក្រុម​ការងារ​បច្ចេកទេស គ.ជ.ប បាន​ធ្វើ​រួចរាល់ ១០០ ​ភាគរយ និង​ស្នើសុំ​ឲ្យ​ភាគី​ផ្តល់​ជំនួយ​ទាំង​ពីរ ផ្តល់​អនុសាសន៍​ត្រឡប់​មក​វិញ ក្នុង​រយៈពេល​ ៣ ​សប្តាហ៍​បន្ទាប់៕

អត្ថបទគួរចាប់អារម្មណ៍