.jpg)
គ.ជ.ប នឹងបំផ្លាញសន្លឹកឆ្នោតដែលប្រើរួចកន្លងមកជាង ២១ លានសន្លឹក ដែលបានប្រើប្រាស់កាន់ពីឆ្នាំ ២០១៨។ ហុង មិនា
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) នឹងបំផ្លាញសន្លឹកឆ្នោតដែលបានប្រើប្រាស់រួចក្នុងការបោះឆ្នោតចំនួន ៤ លើកកន្លងមកចំនួនជាង ២១ លានសន្លឹក និងឯកសារចាស់ៗមួយចំនួនទៀតដោយអំពាវនាវអ្នកសង្កេតការណ៍នានា មកពីខាងគណបក្សនយោបាយសង្គមស៊ីវិលចូលរួមក្នុងពិធីនេះ ដើម្បីតម្លាភាព។
បើតាមសេចក្តីជូនដំណឹងរបស់ គ.ជ.ប អនុលោមតាមច្បាប់ គ.ជ.ប មានសមត្ថកិច្ច សិទ្ធិអំណាច និងមានភារកិច្ចរៀបចំគណៈកម្មការ ដើម្បីបំផ្លាញសន្លឹកឆ្នោតដែលបានប្រើប្រាស់ក្នុងការបោះឆ្នោតជ្រើសរើសតំណាងរាស្ត្រតាមអាណត្តិនីមួយៗ បន្ទាប់ពីបានរក្សាទុកដោយសុវត្ថិភាពនូវសន្លឹកឆ្នោតទាំងនោះអស់រយៈពេល ៦ ឆ្នាំ។
គ.ជ.ប បានឲ្យដឹងទៀតថា ចំពោះការកម្ទេចចោលនូវសន្លឹកឆ្នោតដែលបានប្រើប្រាស់ក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ តាមអាណត្តិនីមួយៗវិញ គឺធ្វើឡើងបន្ទាប់ពីបានរក្សាទុកដោយសុវត្ថិភាព នូវសន្លឹកឆ្នោតទាំងនោះរយៈពេល ៣ ឆ្នាំ។
សេចក្តីជូនដំណឹងដដែលបញ្ជាក់ថា៖ «អនុវត្តនៃច្បាប់នៅថ្ងៃទី ២៤ ខែមិថុនា ឆ្នាំ ២០២០ វេលាម៉ោង ៨:៣០ នាទីព្រឹក គ.ជ.ប នឹងរៀបចំពិធីបំផ្លាញសន្លឹកឆ្នោតដែលបានប្រើប្រាស់រួចក្នុងការបោះឆ្នោតឆ្នាំ ២០១២ ឆ្នាំ ២០១៣ ឆ្នាំ ២០១៤ ឆ្នាំ ២០១៧ និងឯកសារចាស់ៗមួយចំនួននៅទីតាំងផ្ទះលេខ ៩ ផ្លូវ ៣៤៥ ខណ្ឌទួលគោក រាជធានីភ្នំពេញ»។
លោក ហង្ស ពុទ្ធា អ្នកនាំពាក្យ គ.ជ.ប ប្រាប់ភ្នំពេញប៉ុស្តិ៍កាលពីថ្ងៃអាទិត្យថា នេះគឺជាលើកទី ៤ ហើយដែល គ.ជ.ប បានបំផ្លាញសន្លឹកឆ្នោតចាប់តាំងពី គ.ជ.ប រៀបចំការបោះឆ្នោតដោយខ្លួនឯងនៅឆ្នាំ ១៩៩៨ មកដល់បច្ចុប្បន្ន។
លោកបន្តថា ចំពោះសន្លឹកឆ្នោតសរុបទាំង ៤ ឆ្នាំដែលគ្រោងនឹងបំផ្លាញចោលនេះគឺមានជាង ២១ លានសន្លឹក ឬស្មើ ២៤ ០៣៧ កញ្ចប់ដោយក្នុងនោះឆ្នាំ ២០១២ មានជាង ២ ម៉ឺនសន្លឹកឆ្នាំ ២០១៣ មានជាង ១២ លានសន្លឹក ឆ្នាំ ២០១៤ មានជាង ២ ម៉ឺនសន្លឹក និងឆ្នាំ ២០១៧ មានជាង ៩ លានសន្លឹក។
លោក ពុទ្ធា បន្ថែមថាក្រៅពីសន្លឹកឆ្នោតទាំងនេះក៏មានឯកសារជាច្រើនទៀត ដែល គ.ជ.ប បានរក្សាទុកជាង ១០ ឆ្នាំមកហើយក៏នឹងត្រូវយកមកបំផ្លាញចោលក្នុងពេលជាមួយគ្នានេះផងដែរ ខណៈ គ.ជ.ប បានប្រកាសអញ្ជើញតំណាងគណបក្សនយោបាយ អ្នកសង្កេតការណ៍ជាតិ-អន្តរជាតិ និងប្រព័ន្ធផ្សព្វផ្សាយព័ត៌មានជាតិ និងអន្តរជាតិចូលរួមធ្វើជាសាក្សី និងយកព័ត៌មានក្នុងពិធីបំផ្លាញសន្លឹកឆ្នោតនេះ ដើម្បីបង្ហាញតម្លាភាព។
លោកបញ្ជាក់ថា៖ «បើសិនជា គ.ជ.ប មិនរៀបចំការបំផ្លាញសន្លឹកឆ្នោតហ្នឹងទេមានន័យថា គ.ជ.ប ហ្នឹងមិនអនុវត្តច្បាប់ ព្រោះយើងមានតួនាទីក្នុងការបំផ្លាញសន្លឹកឆ្នោតទាំងនេះ ហើយក៏ដើម្បីកុំឲ្យមានភាពចង្អៀតណែន ដែលពិបាកស្វែងរកទីតាំងរក្សាទុកឯកសារទាំងនេះ»។
លោក សេង សុខេង ប្រធានគណបក្សសញ្ជាតិកម្ពុជាបានប្រាប់ភ្នំពេញ-ប៉ុស្តិ៍កាលពីថ្ងៃអាទិត្យថា ការបំផ្លាញសន្លឹកឆ្នោត និងឯកសារទាំងនេះគឺមិនមានភាពមិនប្រក្រតី ឬសង្ស័យអ្វីនោះទេ ព្រោះ គ.ជ.ប បានធ្វើឡើងដោយត្រឹមត្រូវ ហើយក៏បានប្រកាសឡើងជាសាធារណៈ។
ម្យ៉ាងទៀតលោកយល់ថា៖ «តាមយើងសង្កេតជាក់ស្តែងក្នុងអំឡុងពេលបោះឆ្នោតហ្នឹងគ្រប់ភាគីទាំងអស់ដែលបានយល់ព្រមទាំងអស់គ្នាក្នុងការទទួលយក (លទ្ធផលឆ្នោត) ដោយមានតំណាងគេនីមួយៗចូលរួមគ្រប់ជំនាន់។ អ៊ីចឹងខ្ញុំគិតថា ការបំផ្លាញនេះដូចជាអត់មានពាក់ព័ន្ធអ្វី ទៅហ្នឹងភាពចម្រូងចម្រាស ដែលកើតមានអំឡុងពេលបោះឆ្នោតកន្លងមកទេ ព្រោះបើគ្មានការយល់ព្រមក៏មិនមានការបែងចែកអាសនៈ ចែកកៅអីនោះដែរ»។
លោក កន សាវាង្ស អ្នកសម្របសម្រួលផ្នែកអង្កេត និងតស៊ូមតិរបស់អង្គការឃ្លាំមើលការបោះឆ្នោត ខុមហ្វ្រែលថ្លែងថា ដោយយោងទៅតាមច្បាប់ដែលកម្ពុជាមានការបំផ្លាញសន្លឹកឆ្នោតទាំងនេះ គឺត្រឹមត្រូវ និងស្របទៅតាមច្បាប់ ហើយក៏មិនមានភាពមន្ទិលសង្ស័យអ្វីនោះដែរ។ ប៉ុន្តែលោកស្នើឲ្យ គ.ជ.ប គួររក្សាឯកសារនៃការបោះឆ្នោតទាំងនោះទុកជាសាធារណៈសម្រាប់អ្នកជំនាន់ក្រោយ។
លោកបញ្ជាក់ថា៖ «បើទោះបីជាការបំផ្លាញនូវឯកសារជា (ក្រដាស) ក៏ដោយ គ.ជ.ប គួរតែរក្សាព័ត៌មានដែលមានទាំងអស់នេះទាក់ទងនឹងលទ្ធផលឆ្នោតទាំងការិយាល័យ ទាំងភូមិក៏ដោយ និងសំណុំឯកសារពាក្យបណ្តឹងទាំងឡាយដែលបានធ្វើការដោះស្រាយ និងកាត់សេចក្តី។ ឯកសារទាំងអស់នេះគួរតែរក្សានៅលើបណ្តាញទំនាក់ទំនងសង្គម ឬគេហទំព័រប្រព័ន្ធទិន្នន័យណាមួយរបស់ គ.ជ.ប ហើយបង្ហាញជាសាធារណៈ ព្រោះឯកសារនេះគឺជារឿងមួយល្អដ៏មានប្រយោជន៍ខ្លាំងមែនទែនសម្រាប់អ្នកសិក្សា ឬក៏អ្នកពាក់ព័ន្ធ គាត់បានទទួលព័ត៌មានទាំងនេះ»៕
