.jpg)
ក្រុមមន្ត្រី គជប ក្នុងវគ្គបណ្តុះបណ្តាលពីម្សិលមិញ។ រូបថត សហការី
ភ្នំពេញៈ គណៈកម្មាធិការជាតិរៀបចំការបោះឆ្នោតកាលពីម្សិលមិញបានបើកវគ្គបណ្ដុះបណ្ដាលដល់មន្ត្រីក្រោមឱវាទមកពីគ្រប់រាជធានី-ខេត្តអំពីរបៀបចុះស្រង់ស្ថិតិប្រជាពលរដ្ឋ ដែលមានសិទ្ធិចូលរួមបោះឆ្នោតដែលការចុះស្រង់នេះ គឺតែងតែធ្វើឡើងជារៀងរាល់ឆ្នាំ។
វគ្គបណ្ដុះបណ្ដាលនេះធ្វើឡើងតែរយៈពេល ១ ព្រឹកថ្ងៃអង្គារប៉ុណ្ណោះនៅទីស្ដីការ គ.ជ.ប។
លោក សោម សូលីដា អគ្គលេខាធិការរង គ.ជ.ប បានប្រាប់ភ្នំពេញប៉ុស្ដិ៍ ថា ការបើកវគ្គបណ្ដុះបណ្ដាលស្ដីពីការស្រង់ស្ថិតិប្រជាពលរដ្ឋ ប៉ាន់ស្មានអ្នកចុះឈ្មោះបោះឆ្នោតនេះគឺធ្វើឡើងសម្រាប់មន្ត្រីជាប្រធាន និងអនុប្រធានលេខាធិការដ្ឋានរាជធានី-ខេត្ត អំពីលក្ខណៈត្រៀមចុះស្រង់ស្ថិតិអំពីចំនួនប្រជាពលរដ្ឋបោះឆ្នោតចាប់ពីខែមីនាដល់ខែមេសា ឆ្នាំ ២០២០ ដើម្បីធ្វើយ៉ាងណាឱ្យតួលេខអ្នកបោះឆ្នោតមានភាពត្រឹមត្រូវ និងពេញលេញតាមបច្ចុប្បន្នភាពចំពោះឈ្មោះដែលត្រូវលុបចេញពីបញ្ជីបោះឆ្នោត និងឈ្មោះត្រូវបញ្ចូលបន្ថែមក្នុងបញ្ជីបោះឆ្នោត។
លោកថា៖ «អ្នកដែលត្រូវលុបឈ្មោះចេញពីបញ្ជីបោះឆ្នោត គឺមាន ៣ មុខសញ្ញា មុខសញ្ញាទី ១ គឺអ្នកស្លាប់ មុខសញ្ញាទី ២ អ្នកដែលផ្លាស់ទីលំនៅចេញពីឃុំ-សង្កាត់ និងមុខសញ្ញាទី ៣ អ្នកដែលត្រូវបានដកហូតសិទ្ធិបោះឆ្នោតដែលយើងផ្អែកទៅលើបញ្ជីឈ្មោះបោះឆ្នោតផ្លូវការរបស់ គ.ជ.ប ឆ្នាំ ២០១៩ អានេះគឺជាការងារទី ១។ ចំណែកការងារទី ២ គឺស្រង់អ្នកដែលមិនទាន់បានចុះឈ្មោះបោះឆ្នោតកន្លងមក អ្នកទើបមានអាយុ ១៨ ឆ្នាំ និងអ្នកចំណូលស្រុកថ្មី»។
លោក សោម សូលីដា បន្តថា ក្រោយពីបញ្ចប់ការចុះស្រង់ស្ថិតិពលរដ្ឋទាំងនេះហើយគឺចំនួនពលរដ្ឋទាំងនោះនឹងត្រូវយកធ្វើជាតួលេខស្ថិតិប៉ាន់ស្មាន ដើម្បីបម្រើឱ្យការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ ២០២០។ ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២០ គឺធ្វើឡើងចាប់ពីថ្ងៃទី ១ ខែឧសភា ដល់ថ្ងៃទី ៣១ ខែកក្កដា។
សេចក្ដីជូនដំណឹងមួយរបស់ គ.ជ.ប ចុះថ្ងៃទី ២៧ ខែមករាឆ្នាំ ២០២០ បានបញ្ជាក់ថា ប្រជាពលរដ្ឋដែលមានឈ្មោះក្នុងបញ្ជីបោះឆ្នោតផ្លូវការឆ្នាំ ២០១៩ មានចំនួនជាង ៨ លាន(៨ ៦២៩ ៣៥៧) នាក់ ស្មើនឹង ៨៤,៧៨% ធៀបនឹងចំនួនប្រជាពលរដ្ឋប៉ាន់ស្មានសរុបដែលមានអាយុចាប់ពី ១៨ ឆ្នាំឡើងក្នុងនោះពលរដ្ឋដែលបានចុះឈ្មោះបោះឆ្នោតថ្មីមានចំនួនជាង ១ សែន (១០៨២៧២) នាក់។
លោក សោម សូលីដា បានបន្ថែមថា មន្ត្រី គ.ជ.ប នៅតាមរាជធានី-ខេត្តនឹងចុះស្រង់ស្ថិតិពលរដ្ឋតាមរយៈមេភូមិ ស្មៀនឃុំ មេប៉ុស្ដិ៍នគរបាលឃុំ មេឃុំ និងចៅសង្កាត់ដែលអ្នកទាំងនេះគឺជាតួអង្គដ៏សំខាន់បំផុតដែលដឹងច្បាស់ជាងគេអំពីចំនួនប្រជាពលរដ្ឋពិតប្រាកដដែលកំពុងរស់នៅក្នុងមូលដ្ឋានរបស់ពួកគេ។
លោកបញ្ជាក់ទៀតថា ចាប់ពីឆ្នាំ ២០២០ នេះទៅគឺច្បាប់នឹងតម្រូវឱ្យ គ.ជ.ប ចុះស្រង់ស្ថិតិបែបនេះគឺក្នុងរយៈពេល ២ ខែត្រូវចុះស្រង់ម្ដង ដែលមានគោលបំណងដើម្បីលុបឈ្មោះ និងចុះឈ្មោះថ្មី។ លោកថា៖ «យើងធ្វើបែបនេះ ពីព្រោះនៅត្រង់មាត្រា ៥១ ក្នុងច្បាប់ស្ដីពីការបោះឆ្នោតជ្រើសតាំងតំណាងរាស្ដ្រហ្នឹងគឺបានដាក់ភារកិច្ចឱ្យ គ.ជ.ប ត្រូវស្រង់ស្ថិតិរៀងរាល់ ២ ខែម្ដងនៅពេលបញ្ជីបោះឆ្នោតឆ្នាំ ២០២០ ត្រូវបានផ្ដល់សុពលភាពជាផ្លូវការ»៕
