ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) បានចាប់ផ្ដើមទទួលចុះបញ្ជីគណបក្សនយោបាយ និងចុះឈ្មោះបេក្ខជនចាប់ពីថ្ងៃទី ៧ ដល់ថ្ងៃទី ១១ ខែមីនាដើម្បីត្រៀមចូលរួមប្រកួតប្រជែងការបោះឆ្នោតជ្រើសរើសក្រុមប្រឹក្សារាជ-ធានី ខេត្ត ក្រុង ស្រុក ខណ្ឌ អាណត្តិទី៣ ដែលនឹងប្រព្រឹត្តទៅនៅថ្ងៃអាទិត្យទី ២៦ ខែ ឧសភា ឆ្នាំ ២០១៩ ខាងមុខនេះ។
លោក ហង្ស ពុទ្ធា សមាជិកនិងជាអ្នកនាំពាក្យ គ.ជ.ប បានប្រាប់ភ្នំពេញប៉ុស្ដិ៍ម្សិលមិញថា ការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុង ស្រុក ខណ្ឌ គឺជាការបោះឆ្នោតអសកល ដែលមានអង្គអ្នកបោះឆ្នោតគឺជាសមាជិកក្រុមប្រឹក្សាឃុំ សង្កាត់ ហើយរាល់គណបក្សដែលទទួលស្គាល់ដោយក្រសួងមហាផ្ទៃប៉ុន្តែគ្មានអាសនៈនៅក្រុមប្រឹក្សាឃុំសង្កាត់ និងរដ្ឋសភា ក៏អាចចុះបញ្ជីប្រកួតបានដែរ។
លោកថា៖ «ទី១ គណបក្សហ្នឹងឯងអាចមកយកពាក្យសុំចុះឈ្មោះដើម្បីចុះបញ្ជីគណបក្សនិងបេក្ខជននៅ គ.ជ.ប។ ទី២ អាចចូលក្នុងវេបសាយរបស់ គ.ជ.ប ដើម្បីដោនឡូដយកទម្រង់ចុះបញ្ជីហ្នឹងតែម្ដង»។
តាមសេចក្ដីណែនាំ គ.ជ.ប ក៏បានបញ្ជាក់ថា ការបោះឆ្នោតជ្រើសរើសក្រុមប្រឹក្សាអាណត្តិទី៣ នេះគឺមានមណ្ឌលបោះឆ្នោតសរុបចំនួន ២២៨ ក្នុងនោះ ២៥ គឺជាមណ្ឌលបោះឆ្នោតជ្រើសរើសក្រុមប្រឹក្សារាជធានីនិងខេត្ត ចំណែក ២០៣ មណ្ឌលទៀត គឺជាមណ្ឌលបោះឆ្នោតជ្រើសរើសក្រុមប្រឹក្សាក្រុងស្រុកនិងខណ្ឌ។
ចំនួនអាសនៈសម្រាប់ក្រុមប្រឹក្សារាជធានីភ្នំពេញគឺមានចំនួនសមាជិកមិនលើសពី ២៧ រូប ក្រុមប្រឹក្សាខេត្តមានសមាជិកពី ១៥ ដល់ ២៧ រូប ក្រុមប្រឹក្សាក្រុងមានចំនួនសមាជិកពី ១១ ទៅដល់ ២១ រូបនិងក្រុមប្រឹក្សាស្រុកខណ្ឌមានសមាជិកពី ១១ ដល់ ២១ រូប។
រដ្ឋាភិបាលបានកំណត់យកចំនួនក្រុមប្រឹក្សាអាណត្តិទី៣ គឺរាជធានី-ខេត្ត មានចំនួនសមាជិកសរុប ៥៥៩ រូប និងក្រុង ស្រុក ខណ្ឌ មានចំនួនសមាជិកសរុប ៣ ៥៥៥ រូប។
លោក ពេជ្រ ស្រស់ ប្រធានគណបក្សយុវជនកម្ពុជាដែលជាគណបក្សមួយមិនបានគ្រប់គ្រងឃុំសង្កាត់ណាមួយ បានថ្លែងថា គណបក្សលោកនឹងចុះបញ្ជីចូលរួមការបោះឆ្នោតក្រុមប្រឹក្សាអាណត្តិទី៣ នេះ ហើយបានត្រៀមបេក្ខជនសរុបជាង ១ ៣០០ នាក់ ដើម្បីឈរឈ្មោះនៅតាមខេត្តក្រុងចំនួន ១០។
លោកបានបញ្ជាក់ថា៖ «ក្នុងនាមជាកីឡាយើងកុំខ្លាចសង្វៀន យើងចូលរួមប្រកួតប្រជែងដើម្បីបង្ហាញពីសក្ដានុពលរបស់គណបក្សដែលយើងមានធនធានមនុស្ស មានសមាសភាពចូលរួមប្រកួតប្រជែង។ ទី២ យើងមានក្រុមប្រឹក្សាឃុំសង្កាត់យើងដែរ ដើម្បីត្រៀមខ្លួនបោះឆ្នោតជូនគណបក្សយុវជនកម្ពុជា។ អ៊ីចឹងយើងមិនអាចបោះចោលទីលានប្រកួតបានទេ ទោះបីជាមានលទ្ធភាពប៉ុនណាក៏យើងនៅតែចូលរួម ដើម្បីបង្ហាញទៅពលរដ្ឋថា យើងស្វិតស្វាញទីលានប្រកួតប្រជែងនយោបាយហើយយើងមានសមត្ថភាពនឹងឆ្ពោះទៅរកការដឹកនាំប្រទេសផងដែរនៅថ្ងៃអនាគត»។
ចំណែកលោក សុខ ឥសាន មន្ត្រីនាំពាក្យគណបក្សប្រជាជនកម្ពុជាដែលជាគណបក្សកំពុងគ្រប់គ្រងឃុំ-សង្កាត់ទាំងអស់ ១១៥៦ បានបញ្ជាក់ដែរថា គណបក្សកាន់អំណាចមិនដែលយឺតយ៉ាវក្នុងការគោរពទៅតាមលក្ខខណ្ឌការងាររបស់ គ.ជ.ប នោះទេ ហើយក៏បានត្រៀមបេក្ខជនពេញសិទ្ធិ និងបេក្ខជនបម្រុងគ្រប់ចំនួនអស់ហើយទៅតាមចំនួនអាសនៈដែលបានកំណត់ដោយគ.ជ.ប។
លោកថា៖ «ត្រៀមអស់ហើយគ្រប់លក្ខណសម្បត្តិ តាំងពីបេក្ខជនគឺមានអស់ហើយ»។
លោក សុខ ឥសាន បានចាត់ទុកការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ថា ជាការចូលរួមចំណែកគ្រប់គ្រងផ្នែកវិមជ្ឈការតាមបែបប្រជាធិបតេយ្យនិងសេរីពហុបក្ស ហើយលោកថាការចូរួមប្រកួតប្រជែងក្នុងការបោះឆ្នោតរបស់គណបក្សផ្សេងៗគឺជាសិទ្ធិនិងលទ្ធភាពរបស់ពួកគេ៕