.jpg)
លោក ហង្ស ពុទ្ធា អ្នកនាំពាក្យ គ.ជ.ប កាលពីពេលកន្លងមក។ ហុង មិនា
ភ្នំពេញៈ សន្លឹកឆ្នោតជិត ៥ ម៉ឺនសន្លឹក នឹងត្រូវបានបោះពុម្ពចេញ ក្រោយមានការឯកភាពដើម្បីត្រៀមសម្រាប់ការប្រើប្រាស់ក្នុង ការបោះឆ្នោតជ្រើសរើសក្រុប្រឹក្សារាជធានី-ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៣ ដែលនឹងប្រព្រឹត្តទៅនាថ្ងៃអាទិត្យទី ២៦ ខែ ឧសភា ខាងមុខនេះ។
អ្នកនាំពាក្យគណៈកម្មាធិការជាតិរៀបចំការបោះឆ្នោត (គជប) លោក ហង្ស ពុទ្ធា ថ្លែងម្សិលមិញ ក្នុងពិធីបង្ហាញដំណើរការបោះពុម្ពសន្លឹកឆ្នោតនៅរោងពុម្ព ១ កន្លែង ក្នុងសង្កាត់បឹងកក់ទី១ ថា សន្លឹកឆ្នោតនឹងត្រូវរៀបចំជាសៀវភៅដោយក្នុង ១ ក្បាលៗ មានចំនួន ៥០ សន្លឹក ហើយបែងចែកជា ២ ពណ៌ គឺពណ៌ ស និងពណ៌ លឿង សម្រាប់បញ្ជូនឲ្យទាន់ពេលថ្ងៃបោះឆ្នោតមកដល់។
លោកនិយាយថា៖ «ជំហានទី១ គឺយើងធ្វើការរចនាសន្លឹកឆ្នោត ដែលមាន ២ ពណ៌ គឺពណ៌ស ដែលជាសន្លឹកឆ្នោតសម្រាប់ធ្វើការជ្រើសរើសក្រុមប្រឹក្សារាជធានីខេត្ត ចំណែកសន្លឹកឆ្នោតពណ៌លឿង សម្រាប់ប្រើប្រាស់ក្នុងការជ្រើសរើសក្រុមប្រឹក្សាក្រុង ស្រុក ខណ្ឌ។
លោក គង់ មុនីកា ប្រធានគណបក្សឆន្ទៈខ្មែរ ដែលចូលរួមប្រកួតក្នុងការបោះឆ្នោតប្រាប់ភ្នំពេញប៉ុស្តិ៍ម្សិលមិញថា គ្មានសង្ស័យអ្វីជាមួយនឹងការបោះពុម្ពសន្លឹកឆ្នោតនេះទេ ព្រោះភាគីពាក់ព័ន្ធបានឯកភាពគ្នារួចហើយ។
លោកថា៖ «យើងចូលរួមការបោះឆ្នោតនេះដើម្បីបង្ហាញមុខទៅដល់សាធារណជន ឲ្យប្រជាពលរដ្ឋកាន់តែឆាប់បានស្គាល់គណបក្សឆន្ទៈខ្មែរ ដើម្បីយើងធ្វើការត្រៀមខ្លួនក្នុងការបោះឆ្នោតឃុំសង្កាត់ និងការបោះឆ្នោតតំណាងរាស្ត្រនៅអាណត្តិក្រោយ»។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ថ្លែងថា កន្លងមក និងនៅពេលនេះ អង្គការលោកមិនធ្លាប់បានចូលរួមសង្កេតការណ៍ក្នុងការបោះឆ្នោតអសកលនេះទេ ព្រោះលទ្ធផលបាន បញ្ជាក់យ៉ាងច្បាស់ថា គ្មានអ្វីប្រែប្រួល ហើយគណបក្សណាជាអ្នកឈ្នះ ក៏ដឹងរួចជាស្រេចដែរ។
លោកបន្តថា៖ «ដូច្នេះយើងមិនមានអីត្រូវបារម្ភខ្លាំងចំពោះការបោះពុម្ពទេ»៕
