.jpg)
លោក ទេព នីថា (ស្ដាំ) អគ្គលេខាធិការ គ.ជ.ប នាពេលកន្លងមក។ ភ្នំពេញ ប៉ុសិ៍្ត
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) ប្តេជ្ញាអនុវត្តឲ្យបានសម្រេចនូវភារកិច្ចសំខាន់ៗចំនួន ៣ ព្រមគ្នាក្នុងឆ្នាំនេះ ស្របពេលកម្ពុជានឹងធ្វើការ បោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ នៅខែឧសភាខាងមុខ ដែលសង្គមស៊ីវិលមើលឃើញថា គណបក្សកាន់អំណាចនៅតែបន្តឈ្នះភ្លូកទឹកភ្លូក ដី។
លោក ទេព នីថា អគ្គលេខាធិការ គ.ជ.ប. បានថ្លែងក្នុងពិធីបិទវគ្គបណ្តុះបណ្តាលកាលពីថ្ងៃអង្គារថា ការងារសំខាន់ៗ ទាំង ៣ ដែល គ.ជ.ប. នឹងសម្រេចឲ្យបានក្នុងឆ្នាំនេះ គឺការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០១៩ ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី ៣ និងការប្រឡងប្រជែងជ្រើសរើសសមាជិកលេខាធិការដ្ឋាននៃរាជធានី-ខេត្ត។
លោក ទេព នីថា បញ្ជាក់ថា៖ «ការងារទាំង៣ខាងលើនេះត្រូវបាន គ.ជ.ប. ត្រៀមទាំងក្របខ័ណ្ឌច្បាប់ និងផែនការដែលត្រូវធ្វើព្រមគ្នាតាំងពីចុងឆ្នាំ ២០១៨។ ការងារនេះចាប់ផ្តើមពីខែកុម្ភៈ ហើយត្រូវបញ្ចប់ជាបន្តបន្ទាប់ ទៅតាមប្រតិទិនកំណត់»។
ជាមួយគ្នានេះ លោក នីថា បានណែនាំសមាជិករបស់ខ្លួន ព្រមទាំងភាគីពាក់ព័ន្ធទាំងអស់ត្រូវយកចិត្តទុកដាក់ក្នុងការផ្ទៀងផ្ទាត់ទិន្នន័យអ្នកបោះឆ្នោតឱ្យបានត្រឹមត្រូវ រវាងបញ្ជីបោះឆ្នោត និងឯកសារបញ្ជាក់អត្តសញ្ញាណផ្លូវការ ដែលត្រូវប្រើសម្រាប់បោះឆ្នោត និងសំខាន់ទៀតក្នុងករណីមានការផ្លាស់ប្តូរសមាជិកក្រុមប្រឹក្សាឃុំ-សង្កាត់ (កបឃ.ស) ព្រោះពេលវេលាមានកំណត់។
លោកបន្តថា៖ «ត្រូវរៀបចំផែនការប្រតិទិនឱ្យបានត្រឹមត្រូវ ទាន់ពេលវេលា និងមានប្រសិទ្ធភាពសម្រាប់ការបណ្តុះបណ្តាលបន្តក្នុងរាជធានី-ខេត្ត។ ត្រូវកំណត់ភារកិច្ចច្បាស់លាស់រវាងគណៈកម្មការរាជធានី ខេត្តរៀបចំការបោះឆ្នោត (គធ.ខប) និងលេខាធិការដ្ឋានរាជធានី ខេត្តរៀបចំការបោះឆ្នោត (លធ.ខប)។ ត្រូវពង្រឹងកិច្ចសហការតាមតួនាទីជាមួយភាគីពាក់ព័ន្ធ ជាពិសេសជាមួយអាជ្ញាធរមានសមត្ថកិច្ចលើសេវាគាំទ្រ និងការងារសន្តិសុខ»។
ការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៣ នឹងត្រូវរៀបចំឡើងក្នុងក្របខ័ណ្ឌទូទាំងប្រទេសនៅថ្ងៃអាទិត្យ ទី ២៦ ខែឧសភា ឆ្នាំ ២០១៩ ដែលមានចំនួនអ្នកបោះឆ្នោត ១១ ៥៧២ នាក់ ដែលពួកគេជាប់ឆ្នោតជាក្រុមប្រឹក្សាឃុំសង្កាត់ នៅក្នុងការបោះឆ្នោតក្រុមប្រឹក្សាឃុំ-សង្កាត់ នាពេលកន្លងមក។ ពួកគេនឹងចូលរួមបោះឆ្នោតជ្រើសរើស សមាជិកក្រុមប្រឹក្សារាជធានី-ខេត្ត ចំនួន ៥៥៩ នាក់ និងសមាជិកក្រុមប្រឹក្សាក្រុង ស្រុក ខណ្ឌ ចំនួន ៣ ៥៥៥ នាក់។
លោក ហង្ស ពុទ្ធា អ្នកនាំពាក្យ គ.ជ.ប. ប្រាប់ភ្នំពេញប៉ុស្តិ៍ពីម្សិលមិញថា រហូតមកដល់ថ្ងៃនេះ គឺមិនទាន់មានគណបក្សនយោបាយ ឬក្រុមអង្គការសង្គមស៊ីវិលណាមួយបានចុះឈ្មោះដាក់បេក្ខភាពរបស់ខ្លួនមកសង្កេតការណ៍ក្នុងការបោះឆ្នោតអសកលនោះទេ ខណៈដែលការទទួលចុះឈ្មោះគណបក្សនយោបាយ ក្នុងការប្រកួតប្រជែងការបោះឆ្នោតមានរយៈពេល ៥ ថ្ងៃ គឺចាប់ផ្តើមនៅថ្ងៃទី ៧ ដល់ថ្ងៃទី ១១ ខែមីនា ខាងមុខនេះ។
លោកអំពាវនាវថា៖ «សូមគណបក្សទាំងអស់គ្នា មកធ្វើការចុះបញ្ជីគណបក្ស ហើយនិងបេក្ខជនរបស់ខ្លួនទៅតាមប្រតិទិនដែលប្រកាសផ្សាយ ក្នុងនោះគណបក្សនយោបាយដែលមិនមានអាសនៈនៅក្នុងសភា ឬក៏ក្នុងក្រុមប្រឹក្សាឃុំ សង្កាត់ ក៏អាចមានសិទ្ធិក្នុងការដាក់ពាក្យដើម្បីប្រកួតប្រជែងក្នុងការបោះឆ្នោតខាងមុខនេះផងដែរ»។
លោក សំ គន្ធាមី នាយកប្រតិបត្តិអង្គការនិកហ្វិច ដែលឃ្លាំមើលការបោះឆ្នោត ថ្លែងថា បើទោះជាគណបក្សនយោបាយដទៃចូលរួមដាក់បេក្ខភាពប្រកួតប្រជែងក្នុងការបោះឆ្នោតនេះ ក៏គ្មានអ្វីប្រែប្រួលដែរ ព្រោះលទ្ធផលបានបង្ហាញយ៉ាងច្បាស់ ថា គ្មានគណបក្សណា អាចប្រកួតប្រជែងឈ្នះគណបក្សកាន់អំណាចនោះទេ ដោយសារអង្គបោះឆ្នោតទាំងអស់ គឺសុទ្ធតែមកពីគណបក្សកាន់អំណាច។
លោកថា៖ «គណបក្សដទៃចុះឈ្មោះប្រកួតប្រជែង គឺគ្រាន់តែធ្វើដើម្បីបង្គ្រប់កិច្ចប៉ុណ្ណោះ ឲ្យមើលទៅឃើញមានពហុបក្សហ្នឹង តែលទ្ធផលអត់មានអីទេ។ ព្រោះគ្មានអ្វីផ្លាស់ប្តូរនោះទេ គឺគណបក្សកាន់អំណាច នៅតែគ្រប់គ្រងអាសនៈទាំងអស់ ដូចគ្នានឹងការគ្រប់គ្រងអាសនៈនៅរដ្ឋសភា ព្រឹទ្ធសភា និងឃុំ សង្កាត់ ហើយគណបក្សប្រជាជនហ្នឹង នឹងទទួលជ័យជម្នះ ១០០%»។
ប៉ុន្តែ លោក ហង្ស ពុទ្ធា ចាត់ទុកថា នេះគ្រាន់តែជាទស្សនៈដែលមិនអាចថា ត្រឹមត្រូវទេ ព្រោះការទស្សន៍ទាយបែបនេះគឺគ្មានភាពប្រាកដប្រជា ដែលលទ្ធផលជាក់ស្តែងនឹងបង្ហាញក្រោយការបោះឆ្នោត៕
