ភ្នំពេញៈ ប្រមាណជាង ១ ម៉ោងក្រោយបិទការិយាល័យបោះឆ្នោតនៅទូទាំងប្រទេសកាលពីថ្ងៃម្សិលមិញ គណៈកម្មាធិការជាតិរៀបចំការបោះឆ្នោត (គជប)បានប្រកាសលទ្ធផលបឋមចំពោះការជ្រើសតាំងតំណាងរាស្ត្រក្នុងនីតិកាលទី ៦ គឺជាជោគជ័យរបស់កម្ពុជាដែលមានអ្នកមានសិទ្ធិបោះឆ្នោតបានចេញទៅបោះឆ្នោតចំនួនជាង ៨២ ភាគរយបើប្រៀបធៀបចំនួនអ្នកទៅបោះឆ្នោតក្នុងឆ្នាំ ២០១៣ មានចំនួនតែជាង ៦៩ ភាគរយ បើទោះបីមានការរិះគន់ខ្លាំងពីគូប្រជែងរបស់បក្សកាន់អំណាចក៏ដោយ។
ប្រធាន គ.ជ.ប លោក ស៊ិក ប៊ុនហុក បានថ្លែងថា៖ «នេះជាជោគជ័យការបោះឆ្នោតរបស់យើង»។
យោងតាមសេចក្ដីប្រកាសព័ត៌មានរបស់ គជប ដែលភ្នំពេញប៉ុស្តិ៍ទទួលបានចុងក្រោយអំពីលទ្ធផលបណ្ដោះអាសន្នចំនួនអ្នកបោះឆ្នោតជ្រើសតាំងតំណាងរាស្ត្រនៅថ្ងៃទី ២៩ ខែកក្កដាវេលាម៉ោង ៥ ល្ងាចបានឲ្យដឹងថា ចំនួនអ្នកបោះឆ្នោតបានបោះឆ្នោតមាន ៦ ៨៨៥ ៧២៩ ស្មើ ៨២,១៧ ភាគរយ ក្នុងចំណោមអ្នកមានសិទ្ធិបោះឆ្នោតចំនួន ៨ ៣៨០ ២១៧។ ចំណែកនៅឆ្នាំ ២០១៣ អ្នកមានសិទ្ធិបោះឆ្នោតមានចំនួន ៩ ៥០៩ ៧៣២ តែអ្នកបោះឆ្នោតមានតែ ៦៩,៦១ ភាគរយប៉ុណ្ណោះ។
លោក ស៊ិក ប៊ុនហុក ថ្លែងថា លទ្ធផលបឋមនឹងត្រូវប្រកាសនៅថ្ងៃទី ១១ សីហា ២០១៨ ប្រសិនបើមិនមានករណីបោះឆ្នោតឡើងវិញ ហើយលទ្ធផលផ្លូវការនឹងប្រកាសនៅថ្ងៃទី ១៥ សីហា ២០១៨។
លទ្ធផលនេះត្រូវបានលោក ស៊ិក ប៊ុនហុក ថ្លែងថាជាជោគជ័យនៃការបោះឆ្នោតនីតិកាលទី ៦ នេះ។
លោកថ្លែងថា៖ «យើងឃើញថាមនោសញ្ចេតនារបស់ប្រជាពលរដ្ឋខ្មែរដូចអ្នកប្រឆាំងថាឬទេ? គេសប្បាយរីករាយប៉ុនណា ហើយកន្លែងណាដែលថាមានការគំរាម? គឺអស់លោកឃើញនូវទឹកមុខ សម្តីដែលគេបានស្រែកនៅគ្រប់ការផ្សាយនៅពេលគេសួរអំពីមនោសញ្ចេតនានៃការបោះឆ្នោត។ នេះហើយជាចម្លើយ មិនចាំបាច់ខ្ញុំឆ្លើយទេចំពោះគណបក្សប្រឆាំង។ រឿងនេះហើយកុំយល់ថា មតិរបស់គណបក្សប្រឆាំងសុទ្ធត្រូវ។ ត្រូវ ឬមិនត្រូវ គ្រាន់តែឃើញភាគរយ ហ្នឹងហើយការពិតរបស់កម្ពុជា»។
លោក ស៊ិក ប៊ុនហុក បានថ្លែងថាការចេញទៅបោះឆ្នោតក្នុងភាគរយច្រើននេះបង្ហាញពីភាពចាស់ទុំផ្នែកនយោបាយរបស់ប្រជាពលរដ្ឋខ្មែរទូទាំងប្រទេស។ លោកថាគ្មានកើតឡើងការគំរាមកំហែងអ្វីឡើយ។ លោក ស៊ិក ប៊ុនហុក ថ្លែងថាឆ្នាំ ២០១៨ នេះពលរដ្ឋក៏មានការសប្បាយរីករាយក្នុងការបោះឆ្នោតដូចឆ្នាំមុនដែរ។
លោក ស៊ិក ប៊ុនហុក ថ្លែងថា៖ «គេកាន់តែយល់អំពីភារកិច្ច និងកាតព្វកិច្ចរបស់គេ គេចេះប្រើសិទ្ធិរបស់គេក្នុងការជ្រើសរើសថ្នាក់ដឹកនាំរបស់គេក្នុង ៥ ឆ្នាំម្ដងនេះហើយលទ្ធិប្រជាធិបតេយ្យកាន់តែដុះកាន់តែរឹងមាំនៅក្នុងប្រទេសកម្ពុជា យើងគួរតែមានមោទនភាពហើយ»។
ប្រធាន គ.ជ.ប បានថ្លែងថាការបោះឆ្នោតនេះធ្វើឡើងក្រោមការឃ្លាំមើលរបស់អន្តរជាតិមិនមានសម្ពាធអន្តរជាតិណាទៀតព្រោះអន្តរជាតិទាំងនេះបានឃ្លាំមើលការបោះឆ្នោត ហើយអន្តរជាតិណាដែលមិនទទួលស្គាល់គឺជា ការប្រមាថឆន្ទៈពលរដ្ឋខ្មែរ។
លោកថ្លែងថា៖ «ឆន្ទៈខ្មែរនេះវាស្ដែងចេញពីតួលេខនេះឯងទៅដល់អន្តរជាតិដែលចង់បង្ហាញនូវភាពវាយតម្លៃទាបចំពោះឆន្ទៈរបស់ប្រជាពលរដ្ឋខ្មែរ។ នេះជាចម្លើយហើយចំពោះមជ្ឈដ្ឋានអន្តរជាតិដែលអន្តរជាតិមួយចំនួនឆ្លើយហើយថា ខ្មែរគេស្រឡាញ់លទ្ធិប្រជាធិបតេយ្យទេ ដែលអស់លោកថា ក្លែងក្លាយ។ គេនឹងមិនល្ងង់ផ្កាប់មុខទេ។ គេជាប្រទេសជឿនលឿន ហើយគេជាប្រទេសមួយដែលមានបញ្ញវន្តច្រើនណាស់។ មនសិការក្នុងនាមបញ្ញវន្ត គេមិនចេះតែធ្វើអ្វីតាមងងឹតងងុលទេ»។
បរិយាកាសនៃការិយាល័យបោះឆ្នោតមួយចំនួនៈ
គណបក្សប្រជាជនកម្ពុជា
លោក ហ៊ុន សែន នាយករដ្ឋមន្ត្រីចាំផ្ទះជាប្រធានគណបក្សប្រជាជនកម្ពុជា និងភរិយាកាលពីម្សិលមិញបានមកដល់ការិយាល័យបោះឆ្នោត ១៦៩៧ នៅក្នុងសាលាគរុកោសល្យ និងវិក្រឹត្យការ ក្រុងតាខ្មៅ ខេត្តកណ្ដាលក្នុងប្រមាណជាម៉ោង ៧ និង ១៥ នាទីព្រឹកបានទម្លាក់សន្លឹកឆ្នោតនៅចំពោះមុខអ្នកសារព័ត៌មានជាតិ និងអន្តរជាតិប្រមាណជិត ១០០ នាក់ ដើម្បីជ្រើសតាំងតំណាងរាស្ត្រនៅក្នុងនីតិកាលទី ៦ ។
ក្រោយពីបានទម្លាក់សន្លឹកឆ្នោតចូលទៅក្នុងហិបឆ្នោតលោកក៏បានធ្វើដំណើរត្រឡប់ទៅរថយន្តដោយមិនបានថ្លែងសារនយោបាយទៅកាន់អ្នកសារព័ត៌មាននោះទេ។
លោក ហ៊ុន សែន ថ្លែងថា៖ «យើងគោរពច្បាប់ណា៎ កន្លែងនេះគេមិនឲ្យយើងនិយាយ មិនឲ្យយើងសួរហើយមិនឲ្យយើងនិយាយដែរ។ ខ្ញុំបានប្រាប់ហើយថាកុំនិយាយអីនៅកន្លែងនេះ យើងត្រូវគោរពច្បាប់ ហើយខ្ញុំមិនឆ្លើយតបសំណួរទាំងអស់»។
ទោះយ៉ាងណាក៏ដោយលោក ហ៊ុន សែន បានសរសេរនៅក្នុងហ្វេសប៊ុក ក្រោយបិទការិយាល័យថា៖ «អរគុណបងប្អូន កូនក្មួយ ជនរួមជាតិដែលបានទៅបោះឆ្នោតនៅថ្ងៃនេះដ៏ច្រើនលើសលប់! បងប្អូនពិតជាបានជ្រើសរើសផ្លូវប្រជាធិបតេយ្យ និងបានប្រើប្រាស់សិទ្ធិរបស់បងប្អូនដូចមានចែងក្នុងរដ្ឋធម្មនុញ្ញដែលជាច្បាប់កំពូលរបស់ប្រទេស។ ខ្ញុំសូមអរគុណបងប្អូនប្រជាពលរដ្ឋ និងកូនក្មួយដែលបានចូលរួមបោះឆ្នោតជ្រើសតាំងតំណាងរាស្ត្រ និងបានគូសសន្លឹកឆ្នោតនៃគណបក្សនយោបាយដែលខ្លួនពេញចិត្ត»។
លោក ព្រីង សត្យា ប្រធានការិយាល័យបោះឆ្នោត ១៦៩៧ បានថ្លែងឲ្យដឹងថា នៅក្នុងការិយាល័យដែលលោកប្រធានគណបក្សប្រជាជនមកបោះឆ្នោតនេះមានបញ្ជីឈ្មោះអ្នកបោះឆ្នោត ៦៥៣ នាក់ដែលគណបក្សប្រជាជនតែងឈ្នះនៅការិយាល័យមួយនេះរាល់ការបោះឆ្នោត។
លោក ម៉ៅ ភិរុណ អភិបាលខេត្តកណ្ដាលដែលបានមកដល់ការិយាល័យនេះហើយបានបោះឆ្នោតមុនគេថ្លែងទៅកាន់អ្នកសារព័ត៌មានថា៖ «ខ្ញុំបានបោះឆ្នោតឲ្យគណបក្សប្រជាជនកម្ពុជាហើយ ការបោះឆ្នោតនីតិកាលទី ៦ នៃរដ្ឋសភា គោលបំណងសំខាន់គឺពង្រឹងលទ្ធិប្រជាធិបតេយ្យនៅកម្ពុជា។ ដើម្បីរួមចំណែកការកសាងកម្ពុជាដែលប្រកាន់យកលទ្ធិប្រជាធិបតេយ្យសេរីពហុបក្ស និងដើម្បីឲ្យកម្ពុជាមានសន្តិភាពរឹងមាំ និងមានការអភិវឌ្ឍ»។
នៅការិយាល័យដែលលោក ហ៊ុន សែន បានចូលរួមបោះឆ្នោតនេះមានសភាពអ៊ូអរតាំងពីព្រលឹមដោយនៅក្នុងបរិយាកាសល្អដោយមិនមានភាពមិនប្រក្រតីត្រូវបានមន្ត្រីរៀបចំការបោះឆ្នោតរាយការណ៍ឲ្យដឹងនោះទេកាលពីម្សិលមិញ។
លោក ឌឹម សុវណ្ណារុំ អ្នកនាំពាក្យ គ.ជ.ប ក៏បានមកការិយាល័យនេះបានថ្លែងទៅកាន់អ្នកសារព័ត៌មានអំពីការធានាការបោះឆ្នោតមួយដែលមានលទ្ធិប្រជាធិបតេយ្យ។
លោក ឌឹម សុវណ្ណារុំ បានថ្លែងថា៖ «ងាយស្រួលណាស់ ទី ១ គឺយើងមានគណបក្សនយោបាយចូលរួម ២០ បក្សដែលប្រកួតនៅថ្ងៃទី ២៩ កក្កដា តែ ១ ថ្ងៃទេ។ ទី ២ គឺយើងគោរពរដ្ឋធម្មនុញ្ញ និងច្បាប់»។
លោក ឌឹម សុវណ្ណារុំ បានថ្លែងបន្តថាការបោះឆ្នោតនេះធ្វើឡើងក្រោមការឃ្លាំមើលរបស់អ្នកសង្កេតការណ៍ជាតិ និងអន្តរជាតិជាង ៨ ម៉ឺននាក់ដែលក្នុងចំនួននេះមានអ្នកសង្កេតការណ៍អន្តរជាតិ ៥៣៩ នាក់មកពីស្ថាប័នមួយដែលមានឈ្មោះថា «សន្និសីទអន្តរជាតិនៃគណបក្សនយោបាយនៅអាស៊ី» ឬហៅកាត់ថា ICAPP។
លោក ឌឹម សុវណ្ណារុំ បានបញ្ជាក់ថាពលរដ្ឋមានសិទ្ធិទៅបោះឆ្នោត ឬមិនទៅ ព្រោះវាស្ថិតនៅលើគោលការណ៍ស្ម័គ្រចិត្ត។ លោកថ្លែងបន្តថា៖ «ធ្វើដូច្នេះមានន័យថាជាការរារាំងការបោះឆ្នោត។ ការរារាំងការបោះឆ្នោតត្រូវបានហាមឃាត់ដោយច្បាប់ស្តីពីការបោះឆ្នោតមត្រា ១៤២»។
គណបក្សឆន្ទៈខ្មែរ
លោក គង់ មុនីកា ជាមន្ត្រីជាន់ខ្ពស់នៃអតីតគណបក្សសង្គ្រោះជាតិក្រោយពីគណបក្សនេះត្រូវបានរំលាយចោលដោយតុលាការកំពូលកាលពីចុងឆ្នាំ ២០១៧ និងជាប្រធានគណបក្សឆន្ទៈខ្មែរ ដែលបានមកដល់ការិយាល័យបោះឆ្នោតនៅក្នុងសាលាបឋមសិក្សាសុធារសក្នុងរាជធានីបានទម្លាក់សន្លឹកឆ្នោតទៅក្នុងហិបឆ្នោតកាលពីម្សិលមិញដោយបានបង្ហាញក្ដីសង្ឃឹមដល់អ្នកបោះឆ្នោតនឹងបោះឲ្យគណបក្សនេះដើម្បីការផ្លាស់ប្ដូរជាវិជ្ជមាន។
លោក មុនីកា ថ្លែងថា៖ «យើងសង្កេតឃើញថាអ្នកមកបោះឆ្នោតនេះមានភាពកុះករហើយសង្ឃឹមថាប្រជាពលរដ្ឋគាត់នឹងបោះឆ្នោតធ្វើការផ្លាស់ប្តូរជាវិជ្ជមាននៅកម្ពុជាថ្ងៃនេះគឺជាថ្ងៃប្រវត្តិសាស្ត្រមួយដែលប្រជាពលរដ្ឋកម្ពុជា យើងត្រូវតែចេញមកទាំងអស់ បោះឆ្នោតជូនគណបក្សឆន្ទៈខ្មែរដើម្បីសម្រេចឲ្យបានការផ្លាស់ប្តូរដោយវិជ្ជមាន»។
លោកថ្លែងបន្តថា៖ «ការបោះឆ្នោតនេះប្រព្រឹត្តទៅសមស្របតាមនីតិវិធីជាពិសេសតាមការរៀបចំរបស់គណៈកម្មាធិការជាតិរៀបចំការបោះឆ្នោត និងបែបបទត្រឹមត្រូវហើយ បើប្រៀបធៀបការបោះឆ្នោតឆ្នាំ ២០១៧ បរិមាណ និងចំនួនអ្នកបោះឆ្នោតមានភាពប្រហាក់ប្រហែលគ្នា»។
លោក គង់ គាំ ទីប្រឹក្សាអតីត CNRP ដែលជាទីប្រឹក្សាដល់កូនរបស់លោកគឺ មុនីកា ហើយបានបោះឆ្នោតក្នុងការិយាល័យជាមួយកូនបានថ្លែងថាលោកមិនបណ្តោយឲ្យសិទ្ធិប្រជាពលរដ្ឋត្រូវអ្នកបង្ខិតបង្ខំ មិនឲ្យទៅបោះឆ្នោតទេ។
លោកថ្លែងថា៖ «ថ្ងៃនេះខ្ញុំប្រើសិទ្ធិផ្ទាល់ខ្លួនខ្ញុំមើលឃើញថា អ្នកមកបោះឆ្នោតច្រើនដូចរៀងរាល់អាណត្តិតាមធម្មតា។ សង្ឃឹមថាក្រោយការបោះឆ្នោតនេះប្រជាពលរដ្ឋនឹងមានសេចក្តីសុខ និងបានរីកចម្រើនតទៅទៀត។ យើងសូមអរគុណអ្នកអង្កេតការណ៍ជាតិ និងអន្តរជាតិដែលបានមកជួយជាសាក្សីថា បរិយាកាសបោះឆ្នោតនេះពិតជាសេរី ហើយលទ្ធផលអាចទទួលយកបាន»។
គណបក្ស LDP
លោក ខឹម វាសនា ប្រធានគណបក្ស LDP បោះឆ្នោតនៅការិយាល័យក្នុងសាលារចនា ខណ្ឌសែនសុខ រាជធានីភ្នំពេញបានថ្លែងថា៖ «ខ្ញុំមកបោះឆ្នោត ខ្ញុំយល់ថា វាមិនអីទេ ក៏ប៉ុន្តែបញ្ហាធំដែលជាការតវ៉ារបស់យើងអត់បានសម្រេច អំពីសន្លឹកឆ្នោតដែលចាត់ទុកជាបានការ និងមិនបានការដូច្នេះអាហ្នុងហើយដែលជាចំណុចធំ»។ បរិយាកាសទូទៅក្នុងការបោះឆ្នោតសម្រាប់ការិយាល័យមួយនេះគឺអត់អីទេ ក៏ប៉ុន្តែភ្នាក់ងារសង្កេតការណ៍របស់យើងនៅការិយាល័យផ្សេងៗទៀតនៅតាមស្រុកអី គឺថាវាមានការទិញដូរនៅហ្នឹង។ នៅក្បែរៗការិយាល័យមានដាក់តុឲ្យលុយឲ្យអ៊ីចឹង វាទើបតែជាព្រឹត្តិការណ៍ដែលយើងបានទទួលនៅព្រឹកហ្នឹង»។
អតីតគណបក្សប្រឆាំង
ទោះយ៉ាងណាក៏ដោយលោក សម រង្ស៊ី ប្រធានចលនាសង្គ្រោះជាតិដែលកំពុងនិរទេសខ្លួនឯងនៅក្រៅប្រទេសបានបង្ហោះសារតាមហ្វេសប៊ុកថា ជ័យជម្នះណាដែលបានមកដោយគ្មានការប្រកួតប្រជែងពិតប្រាកដគឺជាជ័យជម្នះក្លែងក្លាយ។
លោក រង្ស៊ី ថ្លែងថា៖ «យើងអាចអត្ថាធិប្បាយបែបនេះពីជ័យជម្នះរបស់លោកនាយករដ្ឋមន្ត្រី ហ៊ុន សែន ក្នុងការបោះឆ្នោតថ្ងៃអាទិត្យនេះ ពីព្រោះគាត់ទទួលបានជ័យជម្នះនេះយ៉ាងងាយស្រួល បន្ទាប់ពីគាត់បានរំលាយគណបក្សសង្គ្រោះជាតិដែលជាគណបក្សប្រឆាំងតែមួយគត់ដែលអាចដណ្តើមយកជ័យជម្នះលើគណបក្សរបស់គាត់»។
លោកថ្លែងបន្តថា៖ «ជ័យជម្នះនេះគ្មានន័យអ្វីទេ ហើយមិនអាចដោះស្រាយវិបត្តិនយោបាយដែលប្រទេសកម្ពុជាកំពុងតែប្រឈម។ សម្រាប់មហាជន ដែលមិនមានជម្រើសក្នុងការបញ្ចេញមតិ ដោយសារតែអវត្តមានគណបក្សសង្គ្រោះជាតិលទ្ធផលនៃការបោះឆ្នោតនេះមិនអាចឆ្លុះបញ្ចាំងឆន្ទៈប្រជារាស្ត្រខ្មែរបានទេ»។
ភាពមិនប្រក្រតី
លោក ហង្ស ពុទ្ធា អ្នកនាំពាក្យ គ.ជ.ប បានអះអាងថា យុវជនចំនួន ៤ នាក់ត្រូវបានសមត្ថកិច្ចឃាត់ខ្លួនបានភ្លាមៗបន្ទាប់ពីពួកគេយកដែកកេះដែលមានរាងដូចគ្រាប់បែកដៃមួយគ្រាប់ចូលទៅការិយាល័យរៀបចំការបោះឆ្នោតមួយកន្លែងនៅខេត្តព្រះវិហារកាលពីសៅរ៍ ទី ២៨ កក្កដានេះ។ បើតាមសមត្ថកិច្ច ករណីនេះបានកើតឡើងនៅការិយាល័យបោះឆ្នោតលេខ ០៣១៧ ស្ថិតនៅក្នុងសាលារៀនចំរើនផល ឃុំឈានមុខ ស្រុកត្បែងមានជ័យ។ ប៉ុន្តែអ្នកនាំពាក្យគណៈកម្មាធិការជាតិរៀបចំការបោះឆ្នោតអះអាងថា នេះមិនមែនជាករណីធ្ងន់ធ្ងរប៉ះពាល់ដំណើរការបោះឆ្នោតនោះទេ។
លោក គៀត ច័ន្ទថារិទ្ធ អ្នកនាំពាក្យនគរបាលជាតិថ្លែងថាជារឿងយល់ច្រឡំដោយសារតែពេលយប់ងងឹត ហើយគ្រាប់បែកដែលគេសង្ស័យនោះគឺជាដែកកេះដែលមានរូបរាងជាគ្រប់បែកហើយយុវជន ៤ នាក់នោះត្រូវបាននគរបាលធ្វើកំណត់ហេតុ និងអប់រំរួចដោះលែងទៅផ្ទះរៀងខ្លួនវិញ។
លោក ពុទ្ធា បានអះអាងថាមានស្ត្រីម្នាក់ជាអនុប្រធានការិយាល័យបោះឆ្នោតក្នុងរាជធានីភ្នំពេញត្រូវបានឃាត់ខ្លួន បន្ទាប់ពីគាត់បានព្យាយាមលួចផ្ទេរទឹកខ្មៅ ជ្រលក់ដៃកាលពីថ្ងៃសៅរ៍ក្នុងខណ្ឌពោធិ៍សែនជ័យដើម្បីយកចេញមកក្រៅ ប៉ុន្តែត្រូវបានមន្ត្រីដទៃផ្សេងទៀតធ្វើការឃាត់ ហើយនិងសាកសួរ។
លោកបន្ថែមថា៖ «ប្រសិនបើរកឃើញថាមានការប្រព្រឹត្តបែបហ្នឹង គាត់នឹងទទួលការផាកពិន័យ»។
លោក គៀត ច័ន្ទថារិទ្ធ បានបន្ថែមថា៖ «គេនៅសួរនាំគាត់ថា តើនរណាជាអ្នកបង្គាប់បញ្ជាគាត់ និងថាគាត់ធ្វើហ្នឹងក្នុងគោលបំណងដើម្បីអ្វី? គាត់កំពុងសួរនាំនៅអធិការដ្ឋានខណ្ឌពោធិ៍សែនជ័យ»។
អ្នកសង្កេតការណ៍
អ្នកសង្កេតការណ៍បរទេសមកពីអង្គការអន្តរជាតិដែលមានឈ្មោះ International Conference of the Asian Political Parties (ICAPP) បានចេញសេចក្ដីថ្លែងការណ៍ក្រោយពីបិទការិយាល័យបោះឆ្នោតកាលពីថ្ងៃម្សិលមិញដោយបានថ្លែងថា បរិយាកាសជារួមរបស់ស្ថានភាពនៃការបោះឆ្នោតត្រូវបានគេចាត់ទុកថាមានសភាពស្ងប់ស្ងាត់ សន្តិសុខ និងគ្មានអំពើហិង្សា។
អ្នកសង្កេតការណ៍បរទេសបានថ្លែងទៀតថា ការបោះឆ្នោតត្រូវបានប្រព្រឹត្តទៅក្នុងស្មារតីប្រកួតប្រជែង និងតម្លាភាពជាមួយនឹងការចូលរួមយ៉ាងសកម្មពីសំណាក់គណបក្សនយោបាយជាច្រើន។
អាជ្ញាធរបានជួយបង្កើតឲ្យបាននូវលក្ខខណ្ឌសំខាន់ៗជាច្រើនសម្រាប់គណបក្សនយោបាយដើម្បីឲ្យគណបក្សនយោបាយទាំងអស់អាចចូលរួមដោយសេរីក្នុងការបោះឆ្នោតទូទាំងប្រទេស។ ការបោះឆ្នោតនៅថ្ងៃទី ២៩ ខែកក្កដាឆ្នាំ ២០១៨ ត្រូវបានរៀបចំឡើងស្របទៅតាមការបោះឆ្នោតដោយផ្ទាល់ជាសកលដោយការប្រើប្រាស់សន្លឹកឆ្នោតសម្ងាត់ និងផ្អែកទៅលើសេរីភាព និងការប្រើប្រាស់សិទ្ធិនយោបាយដោយប្រជាពលរដ្ឋកម្ពុជា។
សេចក្ដីថ្លែងការណ៍ ICAPP បានឲ្យដឹងថា៖ «យើងសូមថ្លែងកោតសរសើរចំពោះប្រជាជនកម្ពុជាសម្រាប់ការចូលរួមយ៉ាងសកម្មនៅក្នុងការបោះឆ្នោត និងសូមជូនពរឲ្យកម្ពុជាទទួលបានជោគជ័យក្នុងការពង្រឹងលទ្ធិប្រជាធិបតេយ្យ និងការអភិវឌ្ឍរបស់ខ្លួន»។
ទោះជាយ៉ាងណាក៏ដោយលោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងដោយប៉ាន់ប្រមាណថា CPP នឹងទទួលបានកៅអីនៅក្នុងរដ្ឋសភាយ៉ាងតិចមិនលើសពី ៩០ ក្នុងចំណោមកៅអីសរុបចំនួន ១២៥ កៅអីដែលអាចបង្កើតរាជរដ្ឋាភិបាលបានដោយមិនមានបញ្ហាអ្វីរាំងស្ទះក្នុងបរិយាកាសមួយសន្តិភាព ស្ថិរភាពនយោបាយ សុវត្ថិភាព និងសណ្ដាប់ធ្នាប់សាធារណៈរបស់ប្រទេសជាតិ៕