.jpg)
ការបោះឆ្នោតនៅរដ្ឋ ១ នៃប្រទេសឥណ្ឌា កាលពីថ្ងៃទី ៥ ដល់ថ្ងៃទី ៧ ខែវិច្ឆិកា។ រូបថត គជប
ភ្នំពេញៈ គណៈកម្មការជាតិរៀបចំការបោះឆ្នោត (គ.ជ.ប) បានលើកឡើងពីបទពិសោធនៃការបោះឆ្នោតជ្រើសតាំងសមាជិកសភានៅរដ្ឋប៊ីហា (Bihar) ប្រទេសឥណ្ឌា តាមប្រព័ន្ធអនឡាញចាប់ពីថ្ងៃទី ៥ ដល់ថ្ងៃទី ៧ ខែវិច្ឆិកា បន្ទាប់ពីបានចូលរួមសង្កេតការណ៍ ការបោះឆ្នោតនេះតាមប្រព័ន្ធអនឡាញ។
លោក ឌឹម សុវណ្ណារុំ អ្នកនាំពាក្យ គ.ជ.ប ប្រាប់ ភ្នំពេញ ប៉ុស្តិ៍ កាលពីម្សិលមិញថា ការចូលរួមសង្កេតការណ៍តាមប្រព័ន្ធអនឡាញគឺជាឱកាសក្នុងការស្វែងយល់អំពីការអនុវត្តល្អៗក្នុងការបោះឆ្នោតនៅរដ្ឋប៊ីហាក្នុងសម័យកូវីដ១៩ និងការប្រើប្រាស់ប្រព័ន្ធបច្ចេកវិទ្យាព័ត៌មាន កម្រិតខ្ពស់គួរឱ្យចាប់អារម្មណ៍។
លោកថ្លែងថា បន្ទាប់ពីបានសង្កេតការណ៍បោះឆ្នោតយ៉ាងយកចិត្តទុកដាក់តាមប្រព័ន្ធអនឡាញពីប្រទេសកម្ពុជារយៈពេល ៣ ថ្ងៃ កន្លងមក គ.ជ.ប យល់ឃើញថា ប្រព័ន្ធព័ត៌មានវិទ្យាបានដើរតួនាទីយ៉ាងសំខាន់ក្នុងដំណើរការបោះឆ្នោតនៅប្រទេសឥណ្ឌា ខណៈប្រទេសមួយនេះ និងពិភពលោកកំពុងប្រឈមនឹងការរាតត្បាតដោយជំងឺកូវីដ ១៩។
តាមការសង្កេតមើល ស្ទើរតែគ្រប់ដំណាក់កាលនៃការបោះឆ្នោតមានការបំពាក់សម្ភារបច្ចេកវិទ្យាព័ត៌មាន (ICT) ដោយមានកម្មវិធីអប់រំអ្នកបោះឆ្នោត និងការចូលរួមបោះឆ្នោតដោយប្រព័ន្ធ (SVEEP)។ ម៉ាស៊ីនបោះឆ្នោតតាមប្រព័ន្ធអេឡិចត្រូនិក (EVM) ត្រូវប្រើសម្រាប់ការបោះឆ្នោតដែលដំណើរការបោះឆ្នោតនេះជួយសម្រួលដល់អ្នកបោះឆ្នោតជាង ៧៣ លាននាក់ អាចទៅបោះឆ្នោតបានដោយប្រើរយៈពេលខ្លីជាពិសេសគឺវាជួយកាត់បន្ថយហានិភ័យនៃការលួចបន្លំសន្លឹកឆ្នោត។
លោកបន្ថែមថា ការធ្វើតេស្តដោយម៉ាស៊ីន EVM មុនពេលបោះឆ្នោតត្រូវទទួលស្គាល់ដោយភា្នក់ងារគណបក្សនយោបាយ និងអ្នកសង្កេតការណ៍ដែលមានវត្តមាននៅក្នុងការិយាល័យបោះឆ្នោត។ លោក សុវណ្ណារុំ បញ្ជាក់ថា ជាលើកទី ១ ហើយ ដែល គ.ជ.ប ទទួលបានមេរៀន និងបទពិសោធល្អៗពីការចូលរួមសង្កេតការណ៍បោះឆ្នោតតាមប្រព័ន្ធអនឡាញ។ កម្មវិធីសង្កេតការណ៍អន្តរជាតិតាមប្រព័ន្ធអនឡាញនេះ ក្រៅពីមានការចូលរួមពី គ.ជ.ប ក៏មានការចូលរួមសង្កេតការណ៍ពីប្រទេសជាង ៤០ ក្នុងពិភពលោកផងដែរ។
លោក កង សាវ៉ាង មន្ដ្រីជាន់ខ្ពស់ផ្នែកអង្កេតនៃអង្គការឃ្លាំមើលការបោះឆ្នោត ខុម ហ្វ្រែល ថ្លែងថានៅក្នុងប្រទេសនីមួយៗ តែងតែមានការបោះឆ្នោតតាមប្រព័ន្ធអនឡាញដោយមានស្ថានភាពខុសៗគ្នា ប៉ុន្តែសម្រាប់ គ.ជ.ប គួរតែរៀនសូត្រពីបទពិសោធពីប្រទេសផ្សេងៗ ដែលបានរៀបចំការបោះឆ្នោតមានលទ្ធិប្រជាធិបតេយ្យ សេរី និងពហុបក្យ គឺជារឿងមួយដ៏សំខាន់។
លោកថ្លែងថា៖ «គ.ជ.ប គួរតែរៀនសូត្រនូវចំណុចល្អៗបន្ថែមទៀតជាពិសេសពីបទពិសោធនៃការបោះឆ្នោត នៅក្នុងអំឡុងពេលដែលមានការរាតត្បាតនូវជំងឺកូវីដ១៩។ ប៉ុន្តែសម្រាប់ការសង្កេតការណ៍ចង់ដឹងខុស ឬត្រូវតាមប្រព័ន្ធអនឡាញនេះមិនអាចធ្វើបានទេ បើគ្រាន់តែសង្កេតការណ៍ដើម្បីរៀនសូត្រទទួលយកបទពិសោធមិនមែនជាបញ្ហានោះទេ»។ លោកថានេះគឺជាបទពិសោធដ៏ល្អមួយក្នុងការយកមករៀបចំការបោះឆ្នោតនៅក្នុងប្រទេសកម្ពុជានាពេលខាងមុខ។
យោងតាមសេចក្តីថ្លែងការណ៍របស់ គ.ជ.ប សមាជិកសភានៅរដ្ឋប៊ីហាមានចំនួន ២៤៣ រូប ដោយក្នុងនោះសមាជិកសភាចំនួន ៧១ រូបត្រូវបានជ្រើសតាំងពីពលរដ្ឋនៅថ្ងៃទី ២៨ ខែ តុលា ឆ្នាំ ២០២០ សមាជិកសភាចំនួន ៩៤ រូប ត្រូវជ្រើសតាំងពីពលរដ្ឋនៅថ្ងៃទី ៣ ខែ វិច្ឆិកា ឆ្នាំ ២០២០ និងសមាជិកសភា ចំនួន ៧៨ រូប ត្រូវបានជ្រើសតាំងពីប្រជាពលរដ្ឋនៅថ្ងៃទី ៧ ខែ វិច្ឆិកា ឆ្នាំ ២០២០។
លទ្ធផលនៃការបោះឆ្នោតនៅរដ្ឋប៊ីហារដែលត្រូវបានប្រកាសតាមរយៈការបូកសរុបសន្លឹកឆ្នោត ដោយគណៈកម្មាធិការជាតិរៀបចំការបោះឆ្នោតជាតិឥណ្ឌានៅថ្ងៃទី ១០ ខែ វិច្ឆិកា ឆ្នាំ ២០២០ បង្ហាញថា គណបក្ស Bharatiya Janata Party (BJP) ទទួលបានអាសនៈច្រើនជាងគេក្នុងរដ្ឋសភាប៊ីហាក្នុងចំណោមអាសនៈសរុបចំនួន ២៤៣៕
