.jpg)
លោក សោម សូរិដា (កណ្ដាល) អគ្គលេខាធិការរង គ.ជ.ប ក្នុងសន្និសីទសារព័ត៌កាលពីម្សិលមិញ។ ហេង ជីវ័ន
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) បានស្នើឱ្យគណបក្សនយោបាយ ជាពិសេសគណបក្សសម្ព័ន្ធដើម្បីប្រជាធិបតេយ្យ (LDP) ត្រូវស្វែងរកអ្នកច្បាប់ធ្វើការសិក្សានូវបណ្តឹងដែលបានប្តឹងស្នើឱ្យមានការលុបឈ្មោះពលរដ្ឋចេញពីបញ្ជីបោះឆ្នោត ឆ្នាំ ២០២០ មុននឹងសម្រេចប្តឹងមក គ.ជ.ប។
លោក សោម សូរិដា អគ្គលេខាធិការរង គ.ជ.ប បានថ្លែងនៅក្នុងសន្និសីទសារព័ត៌មានមួយកាលពីម្សិលមិញថា យោងតាមច្បាប់ស្តីពីការបោះឆ្នោត មាត្រា ៦១ បានចែងថា អ្នកដែលមានបំណងប្តឹងជំទាស់ឱ្យមានការលុបឈ្មោះចេញពីបញ្ជីបោះឆ្នោត ឬ នៅក្នុងលក្ខខណ្ឌណាមួយត្រូវទៅរកឯកសារភ័ស្តុតាងដែលឯកសារទាំងនោះជាឯកសារយថាភូត ដែលចេញដោយអាជ្ញាធរដើម្បីនិរាករណ៍នូវឯកសារដែលពលរដ្ឋប្រើប្រាស់បំពេញលក្ខខណ្ឌសម្រាប់ចុះឈ្មោះបោះឆ្នោត។
លោកបន្តថា ប៉ុន្តែអ្វីដែលជាភ័ស្តុតាងរបស់ LDP ដែលរកឃើញនោះមានតែភ័ស្តុតាងដោយយកតែសាក្សីម្នាក់ ឬ ២ នាក់ ឬ ១ ក្រុម ហើយអះអាងថា ពលរដ្ឋដែលបានចុះឈ្មោះនោះ គឺមិនមានឯកសារគ្រប់គ្រាន់ ដែលចំណុចទាំងនេះគឺជាចំណុចខុសឆ្គងមួយដែលមិនឆ្លើយតបទៅនឹងមាត្រា ៦១ នៃច្បាប់ស្តីពីការបោះឆ្នោតដែលចែងថា ដើម្បីប្តឹងជំទាស់ទៅនឹងជនណាម្នាក់អ្នកប្តឹងជំទាស់ត្រូវមានឯកសារភ័ស្តុតាងបញ្ជាក់ថា ជននោះពុំមានលក្ខខណ្ឌគ្រប់គ្រាន់ដើម្បីមានឈ្មោះនៅក្នុងបញ្ជីបោះឆ្នោត ហើយកម្មវត្ថុនៃបណ្តឹងរបស់ LDP ពាក់ព័ន្ធតែនឹងទីសំណាក់របស់ប្រជាពលរដ្ឋប៉ុណ្ណោះ។
លោក អ៊ី សាំងឡេង អ្នកនាំពាក្យ LDP បានបដិសេធចំពោះការលើកឡើងរបស់ គ.ជ.ប ដែលថា LDP គ្មានឯកសារផ្លូវច្បាប់ សម្រាប់ប្តឹងជំទាស់នោះ។ លោកថា វាគឺជារឿងមិនត្រឹមត្រូវនោះទេ ព្រោះ LDP បានចុះទៅសួរនាំ និងស្វែងរកជនដែលស្នើសុំចុះឈ្មោះនោះមិនមានលំនៅជាក់ស្តែងក្នុងឃុំ-សង្កាត់ដែលពួកគេបានស្នើសុំចុះឈ្មោះបោះឆ្នោតទេ៕
