ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចអនុញ្ញាតឱ្យអង្គការឃ្លាំមើលការបោះឆ្នោតនៅកម្ពុជាហៅកាត់ថា ខុមហ្វ្រែល (COMFREL) បន្តធ្វើសវនកម្មលើបញ្ជីបោះឆ្នោតឆ្នាំ ២០២០ ដើម្បីចូលរួមធ្វើឱ្យបញ្ជីឈ្មោះបោះឆ្នោតរឹតតែមានគុណភាព រីឯដំណើរការសវនកម្មនេះនឹងត្រូវចាប់ផ្ដើមនៅពាក់កណ្ដាលខែធ្នូឆ្នាំនេះ រហូតដល់ខែមករាឆ្នាំក្រោយ។
លោក សោម សូរិដា អគ្គលេខាធិការរង គ.ជ.ប ប្រាប់ ភ្នំពេញ ប៉ុស្ដិ៍ ពីម្សិលមិញថា គ.ជ.ប អនុញ្ញាតឱ្យអង្គការខុមហ្វ្រែលធ្វើសវនកម្មលើបញ្ជីបោះឆ្នោត ឆ្នាំនេះគឺជាកិច្ចសហការ និងជាដៃគូក្នុងការរៀបចំបញ្ជីបោះឆ្នោតឱ្យមានសុក្រឹតភាព និងត្រឹមត្រូវ ព្រោះរាល់ការងារអ្វីៗដែល គ.ជ.ប បានខិតខំធ្វើមិនប្រាកដថាល្អឥតខ្ចោះនោះទេ។
លោក សោម សូរិដា បានថ្លែងថា អង្គការខុមហ្វ្រែល ជាអង្គការមួយដែលមានវិជ្ជាជីវៈ ហើយបានរកឃើញនូវភាពមិនប្រក្រតីមួយចំនួនកាលពីកន្លងមកនេះ ដូចជា ករណីឈ្មោះ ស្ទួន និងការប្រើប្រាស់ឯកសារបញ្ជាក់ និងអត្តសញ្ញាណសញ្ជាតិខ្មែរ សម្រាប់ចុះឈ្មោះបោះឆ្នោតជាដើម។
លោកថា៖ «អង្គការនេះបានជួយ គ.ជ.ប ច្រើនក្នុងការរកឃើញ ហើយ គ.ជ.ប បានកែសម្រួលដោយផ្អែកលើរបាយការណ៍របស់អង្គការនេះ។ ទោះជាយ៉ាងណាអង្គការ COMFREL នៅតែទទួលស្គាល់ថា បញ្ជីបោះឆ្នោតរបស់ គ.ជ.ប គឺមានគុណភាពល្អជាង ៩០% បន្ទាប់ពីបានធ្វើសវនកម្ម»។
លោក កង សាវ៉ាង្ស មន្ត្រីជាន់ខ្ពស់នៃអង្គការខុមហ្វ្រែលបានថ្លែងពីម្សិលមិញថា អង្គការរបស់លោកតែងធ្វើសវនកម្មបញ្ជីបោះឆ្នោតរបស់ គ.ជ.ប ជារៀងរាល់ឆ្នាំ ដើម្បីឱ្យកាន់តែមានភាពពេញលេញ គុណភាពត្រឹមត្រូវ និងមានបច្ចុប្បន្នភាព ប៉ុន្តែលោកថា ឃុំសង្កាត់មួយចំនួនហាក់មិនទាន់យល់ពីកិច្ចការនេះ ទើបលោកស្នើទៅ គ.ជ.ប ជួយសម្រួល។
លោកបន្តថា៖ «អ្វីដែលយើងធ្វើជាមួយ គជប នេះពាក់ព័ន្ធនឹងគុណភាពបញ្ជីឈ្មោះបោះឆ្នោតដែលសំដៅដល់ឈ្មោះនៅក្នុងបញ្ជីនេះ មានវត្តមានពិតប្រាកដ ឬស្ទួនដែរទេ ឬក៏មានឈ្មោះខ្មោចនៅក្នុងបញ្ជី...នៅក្នុងឆ្នាំនេះខុមហ្វ្រែលធ្វើបានតែ ១០ ខេត្ត អាស្រ័យលើធនធានដែលមាន ប៉ុន្តែបើសិក្សាអំពីឈ្មោះស្ទួន ឬភាពមិនប្រក្រតីនៃឯកសារ យើងនឹងសិក្សាលើបញ្ជីឈ្មោះចុងក្រោយ ឬបញ្ជីឈ្មោះដំបូងរបស់ គ.ជ.ប ទាំងអស់»។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានថ្លែងពីម្សិលមិញថា ការធ្វើសវនកម្មបញ្ជីបោះឆ្នោតរបស់ខុមហ្វ្រែលនេះជាចំណុចល្អមួយធ្វើឱ្យមានភាពត្រឹមត្រូវ ខណៈ គ.ជ.ប របស់កម្ពុជាចង់មានតម្លាភាព។
លោកថា៖ «បើគាត់បានទៅមើល ហើយបញ្ជាក់ច្បាស់ហើយ គួរតែមានការចេញសេចក្តីថ្លែងការណ៍ ឬផ្តល់ព័ត៌មានដល់អ្នកសារព័ត៌មានឱ្យគេជួយផ្សាយផង ទើបមានតម្លាភាព...»។
តាមសេចក្តីប្រកាសព័ត៌មានរបស់ គ.ជ.ប ដែលបានផ្សព្វផ្សាយពីថ្ងៃទី ១១ ធ្នូ ថា អង្គការខុមហ្វ្រែលពីថ្ងៃទី ៦ វិច្ឆិកា ឆ្នាំនេះបានស្នើដល់ គ.ជ.ប សុំបញ្ជីឈ្មោះបោះឆ្នោតដំបូងឆ្នាំនេះ និងសុំកិច្ចសម្របសម្រួលជាមួយថ្នាក់ក្រោមជាតិ ដើម្បីធ្វើសវនកម្មបញ្ជីបោះឆ្នោត ឆ្នាំ ២០២០។ ចំពោះការធ្វើសវនកម្មនេះអង្គការខុមហ្វ្រែលនឹងចាប់ផ្ដើមដំណើរការក្នុងចន្លោះពាក់កណ្ដាលខែធ្នូ ឆ្នាំនេះដល់ខែមករា ឆ្នាំ ២០២១។
បើតាមសេចក្តីប្រកាសនេះឆ្នាំមុន COMFREL ក៏បានធ្វើសវនកម្មលើបញ្ជីបោះឆ្នោតដែរ ដោយបានវាយតម្លៃថា បញ្ជីបោះឆ្នោត គ.ជ.ប មានភាពល្អប្រសើររហូតដល់ ៩៩,៧% ហើយបានរកឃើញឈ្មោះ ស្ទួន តែ ៤៤ នាក់ប៉ុណ្ណោះ ហើយ គ.ជ.ប ក៏បានដោះស្រាយករណីនេះរួចរាល់ហើយដែរ។
កាលពីថ្ងៃទី ១០ ខែធ្នូ គ.ជ.ប បានបញ្ចប់ការដោះស្រាយពាក្យបណ្តឹងពាក់ព័ន្ធនឹងបញ្ជីបោះឆ្នោត ឆ្នាំ ២០២០ ដែលទទួលបានពីតំណាងគណបក្សនយោបាយឃុំសង្កាត់ និងពលរដ្ឋ។
ប៉ុន្តែមានដំណោះស្រាយខ្លះខាងគណបក្សនយោបាយមិនពេញចិត្តទេ ហើយបានបន្តទៅក្រុមប្រឹក្សាធម្មនុញ្ញ ស្របពេល គ.ជ.ប គ្រោងបិទផ្សាយបញ្ជីឈ្មោះផ្លូវការសម្រាប់ឆ្នាំ ២០២០ នៅថ្ងៃ ៣១ ធ្នូ ខាងមុខ៕