.jpg)
កិច្ចប្រជុំក្រុមប្រឹក្សាជាតិគណនេយ្យ (ក.ជ.គ ) ពីម្សិលមិញ។ រូប ក.ជ.គ
ភ្នំពេញៈ រាជរដ្ឋាភិបាលកម្ពុជាបានចេញអនុក្រឹត្យស្ដីពីការពិន័យអន្ដរការណ៍ចំពោះអំពើល្មើសច្បាប់ស្ដីពីគណនេយ្យ និងសវនកម្ម ខណៈច្បាប់នេះនឹងដាក់ពិន័យ គណនេយ្យករ និងសវនករ ឬសហគ្រាស អង្គភាពមិនស្វែងរកប្រាក់ចំណេញរហូតដល់ជាង ៣០ លានរៀល ឬច្រើនជាងនេះទៅតាមកំហុសដែលបានប្រព្រឹត្តផ្ទុយនឹងច្បាប់។
តាមអនុក្រឹត្យនេះ ចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃចន្ទដោយមានបំណងលើកកម្ពស់ការទទួលខុសត្រូវរបស់សហគ្រាស អង្គភាពមិនស្វែងរកប្រាក់ចំណេញ គណនេយ្យករ និងសវនករ ដើម្បីធានាប្រសិទ្ធភាពនៃការអនុវត្តច្បាប់ស្ដីពីគណនេយ្យ និងសវនកម្ម។
អនុក្រឹត្យដែលមាន ៨ ទំព័រនេះបានឲ្យដឹងទៀតថា ក្នុងករណីសហគ្រាស អង្គភាពមិនស្វែងរកប្រាក់ចំណេញ គណនេយ្យករ និងសវនករ ប្រព្រឹត្តកំហុសដែលភាគច្រើនជានីតិវិធីរដ្ឋបាល ដូចជា ការប្រើកាលបរិច្ឆេទ អក្សរ លេខ ឬការគេចវេះ និងភាពយឺតយ៉ាវក្នុងការដាក់ឯកសារនឹងរងការពិន័យចន្លោះពី ៨ សែនរៀលរហូតដល់ ៣០ លានរៀល ឬច្រើនជាងនេះ។
មិនត្រឹមតែប៉ុណ្ណោះ ប្រសិនបើនៅតែប្រព្រឹត្តកំហុសដដែលនោះនឹងត្រូវទទួលរងការពិន័យអន្តរការណ៍គុណនឹង ២ ឬឈានដល់ការព្យួរ ឬដកហូតអាជ្ញាប័ណ្ណប្រកបវិជ្ជាជីវៈគណនេយ្យ និងសវនកម្ម រួមទាំងវិធានការតាមផ្លូវតុលាការផងដែរ។
អនុក្រឹត្យដដែលបញ្ជាក់ថា៖ «ការពិន័យអន្តរការណ៍នេះជាសមត្ថកិច្ចរបស់ក្រុមប្រឹក្សាជាតិគណនេយ្យ ឬ ក.ជ.គ។ ប្រធាន ក.ជ.គ ជាអ្នកមានសិទ្ធិសម្រេចក្នុងនាម ក.ជ.គ។ អគ្គលេខាធិការដ្ឋាននៃ ក.ជ.គ លើកសំណើ និងរៀបចំសេចក្តីសម្រេចដាក់ពិន័យអន្តរការណ៍ជូនប្រធាន ក.ជ.គ ដើម្បីពិនិត្យ និងសម្រេច។ ទឹកប្រាក់ពិន័យអន្តរការណ៍នឹងជាកម្មវត្ថុនៃចំណូលថវិកាជាតិរបស់ ក.ជ.គ»។
យ៉ាងណាក្ដី អនុក្រឹត្យនេះបានបើកផ្លូវឲ្យមានការប្តឹងតវ៉ាទៅ ក.ជ.គ ក្នុងរយៈពេល ១៥ ថ្ងៃ និងទៅរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងស្ថាប័នតុលាការក្នុងរយៈពេល ៣០ ថ្ងៃស្របតាមនីតិវិធីជាបន្តបន្ទាប់ក្នុងករណីគណនេយ្យករ ឬសវនករ មិនសុខចិត្តនឹងសេចក្តីសម្រេចណាមួយ។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានប្រាប់ភ្នំពេញ-ប៉ុស្តិ៍ពីម្សិលមិញថា ការបង្កើតអនុក្រឹត្យស្ដីពីពិន័យអន្តរការណ៍នេះក៏ព្រោះតែការវិវឌ្ឍប្រែប្រួលយ៉ាងឆាប់រហ័សនៃសេដ្ឋកិច្ចធ្វើឲ្យវិស័យគណនេយ្យ និងសវនកម្ម មានការប្រែប្រួលដូចគ្នាទាំងក្នុងបរិបទអន្តរជាតិ និងតំបន់។ ដូច្នេះការវិវឌ្ឍនេះតម្រូវឲ្យប្រទេសនីមួយៗធ្វើបច្ចុប្បន្នភាពបទប្បញ្ញត្តិគ្រប់គ្រងវិស័យគណនេយ្យឡើងវិញ។
លោកថា៖ «សម្រាប់កម្ពុជាជាលទ្ធផលច្បាប់ និងលិខិតបទដ្ឋានសម្រាប់គ្រប់គ្រងវិស័យនេះត្រូវបានរៀបចំឡើងវិញទាំងស្រុងក្នុងនោះមានលិខិតបទដ្ឋានគតិយុត្តជាសារវន្ត ច្បាប់ស្ដីពីគណនេយ្យ និងសវនកម្ម និងអនុក្រឹត្យស្តីពីពិន័យអន្តរការណ៍ចំពោះអំពើល្មើសទៅនឹងច្បាប់ស្តីពីគណនេយ្យ និងសវនកម្មត្រូវបានដាក់ឲ្យអនុវត្ត។ល»។
អ្នកស្រី ហ៊ាង ភិរម្យ ជាបុគ្គលិកផ្នែកគណនេយ្យក្នុងក្រុមហ៊ុនឯកជនមួយនៅរាជធានី-ភ្នំពេញបានប្រាប់ភ្នំពេញប៉ុស្តិ៍ពីម្សិលមិញថា នេះជាច្បាប់ដែលបានកំណត់ដោយរដ្ឋាភិបាល បើទោះជាការពិន័យមានកម្រិតខ្ពស់ ប៉ុន្តែគ្រប់ស្ថាប័នក្រោមបង្គាប់ទាំងអស់ត្រូវតែគោរព។
អ្នកស្រីរំពឹងថា នៅពេលច្បាប់នេះប្រកាសឲ្យប្រើប្រាស់នឹងមានការអនុវត្តឲ្យបានទូលំទូលាយ និងស្មើភាពគ្នា។
អ្នកស្រីបញ្ជាក់ថា៖ «ដូចបានដឹងហើយរាជរដ្ឋាភិបាលជាអ្នកចេញច្បាប់ ហើយវាក៏មានការពិន័យកម្រិតខ្ពស់ដែរ។ អនុក្រឹត្យនេះល្អបើអនុវត្តបានទូទាំងប្រទេស។ គ្រាន់តែថាពេលខ្លះប្រជាជនយើងមិនសូវមានអ្នកជំនាញ (ផ្នែកគណនេយ្យ ឬសវនកម្ម) ទេពិបាករកអ្នកចេះផ្នែកហ្នឹងណាស់។ ណាមួយបើមាន (អ្នកចេះផ្នែកគណនេយ្យ ឬសវនករ) ក្រុមហ៊ុនមិនសូវហ៊ានជ្រើសរើសទេ ព្រោះចំណាយច្រើន»៕
វីដេអូ៖
