ភ្នំពេញៈ លោក សុខ សុវណ្ណវឌ្ឍនា សារពង្ស ប្រធានគណបក្សខ្មែរក្រោកបានឲ្យដឹងកាលពីម្សិលមិញថា នៅក្នុងខែមិថុនាលោកបានស្រាវជ្រាវទៅលើបញ្ហាជម្លោះដីធ្លីនៅក្នុងខេត្តព្រះសីហនុចំនួន ១៤ ករណី ក្នុងខែមិថុនា ក្នុងចំណោមជម្លោះដីធ្លីប្រមាណ ២០០ ករណីដែលមាននៅក្នុងដៃ។
លោក សារពង្ស ជាសមាជិកម្នាក់ នៃឧត្តមក្រុមប្រឹក្សាពិគ្រោះ និងផ្ដល់យោបល់ ដែលជាស្ថាប័នមួយដែលមានសមាសភាពចូលរួមពីគណបក្សក្រៅរដ្ឋាភិបាលត្រូវបានបង្កើតឡើងដោយរាជរដ្ឋាភិបាលសម្រាប់ស្រាវជ្រាវ និងពិគ្រោះយោបល់ ទៅលើភាពមិនប្រក្រតី ចន្លោះប្រហោងនៅក្នុងសង្គម។
លោក សារពង្ស បានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា ក្រោយចុះសិក្សាស្រាវជ្រាវប្រមូលតម្រុយតាមពាក្យបណ្ដឹងរបស់ពលរដ្ឋ លើករណីវិវាទដីធ្លីទាំងនោះ និងកំពុងរៀបចំកិច្ចប្រជុំ ដើម្បីសរុបរបាយការណ៍ដាក់ទៅរាជរដ្ឋាភិបាលពិនិត្យ និងសម្រេច។
លោក សារពង្ស បានថ្លែងថា៖ «ករណីវិវាទដីធ្លីនេះយើងនឹងធ្វើរបាយការណ៍ដាក់ទៅលោកនាយករដ្ឋមន្រ្ដីជាបន្តបន្ទាប់ទៀត ហើយយើងនឹងតាមដានបន្តទៀតថានឹងមានដំណោះស្រាយបែបណា រួមនឹងសញ្ញាវិជ្ជមានបែបណា»។
លោក សារពង្ស បានអះអាងថា ករណីវិវាទដីធ្លីរបស់ប្រជាពលរដ្ឋនេះ កើតឡើងដោយភាគច្រើនភាគីប្រជាពលរដ្ឋជាម្ចាស់ដីមិនទាន់បានចុះបញ្ជីក្បាលដី ខណៈនោះមន្រ្ដីយោធាដែលប្រដាប់ដោយអាវុធបាននាំគ្នាទៅធ្វើរបងលើដីរបស់ប្រជាពលរដ្ឋតែម្ដង ដែលករណីបែបនេះកើតឡើងច្រើន។
លោកបន្ដថា៖ «មកប្ដឹងសុទ្ធតែប្រជាពលរដ្ឋផ្សេងៗគ្នា មិនស្គាល់គ្នា ប៉ុន្ដែដីស្ថិតនៅទីតាំងខេត្តព្រះសីហនុដូចគ្នា។ ពលរដ្ឋសុទ្ធតែបានអះអាងថា មានការប្រើប្រាស់កងកម្លាំងប្រដាប់អាវុធចុះទៅឡោមព័ទ្ធដីគាត់ (ពលរដ្ឋ) ពេលយប់ឡើងធ្វើរបងទាំងយប់តែម្ដង ព្រលឹមឡើងធ្វើហើយអស់»។
លោក សារពង្ស បានអះអាងថា ករណីជម្លោះដីធ្លីទាំង ១៤ ករណីនោះត្រូវបានស្រាវជ្រាវតាមពាក្យបណ្ដឹងរបស់ប្រជាពលរដ្ឋរស់នៅក្នុងខេត្តព្រះសីហនុដែលមានឈ្មោះដូចជា ហីង ម៉ូលី, ឃួន រឿប, ង៉េត វឿន, ហុំ ធឿន, អិន ម៉ាស៊ីវន, ម៉ម សុខវិសាល, ឈុន សុផល, លុយ មករា, ប៉ែន សីហា, ថន ចាន់ដារា, និងគឹម ចន្ថន។ នៅក្នុងករណីទាំងនោះមានករណីខ្លះ ម្ចាស់បណ្ដឹងតំណាងឲ្យពលរដ្ឋច្រើនគ្រួសារ។
លោកបញ្ជាក់ថា៖ «បន្ទាប់ពីសិក្សារួចសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ ប្រមូលតម្រុយជាមូលដ្ឋានឈានដល់ការដាក់របាយការណ៍ជូនសម្ដេចតេជោ តាមនីតិវិធី ដើម្បីពិនិត្យសម្រេច»។
លោក សារពង្ស ឲ្យដឹងថា ក្នុងការចុះអន្តរាគមន៍បញ្ហានីមួយៗ ដោយយោងពាក្យបណ្ដឹង ទាញហេតុផលផ្ទាល់មាត់ និងឈានដល់ការពិនិត្យផ្ទៀងផ្ទាត់ ឯកសារបទដ្ឋានគតិយុត្តដើម្បីថ្លឹងនឹងមូលដ្ឋានច្បាប់ ទើបចម្រាញ់យកទៅសរសេររបាយការណ៍ជូនលោកនាយករដ្ឋមន្រ្ដី។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុ បានឲ្យដឹងកាលពីម្សិលមិញដែរថា កន្លងមកករណីវិវាទដីធ្លីនៅក្នុងខេត្ដព្រះសីហនុនេះមានច្រើនករណី ហើយករណីដែលកើតឡើងភាគច្រើនបំផុត គឺទំនាស់ដែលកើតឡើងទៅលើដីដែលនៅមិនទាន់មានបណ្ណកម្មសិទ្ធិ ដីរបស់រដ្ឋ។
លោកថា៖ «ក្រុមការងារឧត្ដមក្រុមប្រឹក្សានេះ ពេលដែលគាត់ចុះមកក៏បានជូនដំណឹងមកអាជ្ញាធរខេត្ដដែរ ដូច្នេះពេលខ្លះក៏មានការឆកល្វែងមិនបានដឹងដែរ។ ការចុះទៅដោះស្រាយរបស់គាត់គឺចុះទៅដោយខ្លួនគាត់រវាងប្រជាពលរដ្ឋ ប៉ុន្ដែនេះជាសិទ្ធិ ក្នុងភារកិច្ចរបស់ពួកគាត់ដែលអាចធ្វើបាន ក្នុងនាមខេត្ដនៅតែទទួលដោះស្រាយទៅតាមភាពជាក់ស្ដែងដោយយកច្បាប់ជាគោល»៕