The Phnom Penh Post Search

Search form




Logo of Phnom Penh Post newspaper Phnom Penh Post - គណបក្ស​ថ្មី​មួយ​ទៀត​ត្រូវ​​ក្រសួង​មហាផ្ទៃ​ចុះ​បញ្ជី

គណបក្ស​ថ្មី​មួយ​ទៀត​ត្រូវ​​ក្រសួង​មហាផ្ទៃ​ចុះ​បញ្ជី

លោក ពេជ្រ ស្រស់ ប្រធាន​គណបក្ស​យុវជន​កម្ពុជា​។
លោក ពេជ្រ ស្រស់ ប្រធាន​គណបក្ស​យុវជន​កម្ពុជា​។ រូបថត ហ្វេសប៊ុក

គណបក្ស​ថ្មី​មួយ​ទៀត​ត្រូវ​​ក្រសួង​មហាផ្ទៃ​ចុះ​បញ្ជី

ភ្នំពេញៈ គណបក្ស​ថ្មី​មួយ​​ទៀត​ដែល​ទើប​ទទួល​បាន​សុពលភាព​ពី​ក្រសួង​មហាផ្ទៃ​បាន​ប្រកាស​ចុះ​ជួប​ប្រជាពលរដ្ឋ​នៅ​តាម​មូលដ្ឋាន​នៅពេល​ដែល​មេដឹកនាំ​គណបក្ស​​វ័យ​ក្មេង​​មួយ​នេះ​បាន​ប្រកាស​ថា​ការ​បង្កើត​គណបក្ស​នេះ​ឡើង​គឺ​ដោយសារ​តែ​មើល​ឃើញ​ពី​ភាព​ទន់ខ្សោយ​របស់​គណបក្ស​ប្រឆាំង និង​ភាព​ឃោរឃៅ​របស់​គណបក្ស​កាន់​អំណាច​។

កាល​ពី​ថ្ងៃ​ទី ១៥ ខែ​កុម្ភៈ​រដ្ឋមន្ត្រី​ក្រសួង​មហាផ្ទៃ​លោក ស ខេង បាន​សម្រេច​ថា៖ «​ត្រូវ​បាន​​ចុះ​ឈ្មោះ​គណបក្ស​យុវជន​កម្ពុជា (គ.យ.ក) ដែល​មាន​អាសយដ្ឋាន​នៃ​ទីស្នាក់ការ​កណ្តាល​បក្ស​នៅ​សង្កាត់​ទំនប់ទឹក ខណ្ឌ​ចំការមន រាជធានី​ភ្នំពេញ​ចូល​ក្នុង​​បញ្ជី​គណបក្ស​នយោបាយ​នៅក្នុង​ក្រសួង​មហាផ្ទៃ»។

ប្រធាន​គណបក្ស​យុវជន​កម្ពុជា​លោក ពេជ្រ ស្រស់ បាន​ប្រាប់​​ភ្នំពេញ​ប៉ុស្តិ៍​កាលពី​ម្សិលមិញ​ថា​ក្រោយពី​គណបក្ស​របស់​លោក​ត្រូវ​បាន​ក្រសួង​មហាផ្ទៃ​ទទួល​ស្គាល់​​ហើយ​ការងារ​​ដំបូង​ដែល​ត្រូវ​ធ្វើ​គឺ​ចាប់ផ្តើម​ចុះ​ជួប​ជាមួយ​ប្រជាពលរដ្ឋ និង​មន្ត្រី​នៅ​តាម​មូលដ្ឋាន​ដើម្បី​បញ្ច្រាប និង​ឃោសនា​ពី​គោល​នយោបាយ​​របស់​គណបក្ស​។

លោក​ថា៖ ​«ទី​មួយ​រៀបចំ​មន្ត្រី​តាម​​មូលដ្ឋាន​តំណាង​ខេត្ត ឃុំ និង​ស្រុក​ទី​ពីរ​ចុះ​ជួប​អ្នក​ដែល​មាន​ចេតនា​គាំទ្រ​គណបក្ស​យុវជន​កម្ពុជា​ដើម្បី​ឱ្យ​គាត់​យល់​ដឹង​បន្ថែម​ពី​គោលនយោបាយ និង​ជំហរ​របស់​បក្ស​ដើម្បី​ដោះស្រាយ​បញ្ហា​ជាតិ»។

លោក​ឱ្យ​ដឹង​ថា​បច្ចុប្បន្ន​នេះ​លោក​មាន​តំណាង​មន្ត្រី​គណបក្ស​ប្រចាំ​ខេត្ត​ចំនួន ៣ ហើយ​គឺ​ខេត្ត​កំពត កំពង់ចាម និង​ត្បូងឃ្មុំ ហើយ​ត្រៀម​ចាត់​តំណាង​សមាជិក​បក្ស​នៅ​ខេត្ត​បន្ទាយមានជ័យ និង​បាត់ដំបង​បន្ត​ទៀត។ មូលហេតុ​​ដែល​លោក​​​បង្កើត​គណបក្ស​ថ្មី​ដោយសារ​តែ​​លោក​សង្កេត​ឃើញ​គោល​នយោបាយ​​របស់​គណបក្ស​មួយ​ចំនួន​មិន​ទាន់​មាន​ភាព​ច្បាស់លាស់​នៅ​ឡើយ​ជាពិសេស​សង្កេត​ឃើញ​ភាព​កំសោយ​របស់​មេដឹកនាំ​គណបក្ស​សង្គ្រោះ​ជាតិ និង​ភាព​ឃោរឃៅ​របស់​​បក្ស​កាន់​អំណាច​។

លោក​ថា៖ «ខ្ញុំ​មិន​អាច​​ចូលរួម​ជាមួយ​គណបក្ស​ទាំង​នោះ​ដោយសារ​គណបក្ស​សង្គ្រោះ​ជាតិ​មាន​សំឡេង​គាំទ្រ​លើសលប់​ប៉ុន្តែ​អត់​ចេះ​យក​សំឡេង​គាំទ្រ​នោះ​ធ្វើការ​ត្រឹមត្រូវ​ដើម្បី​អភិវឌ្ឍ​ជាតិ និង​កែ​តម្រូវ​អ្នក​ឃោរឃៅ»។ «បក្ស​កាន់​អំណាច​វិញ​ដឹកនាំ​ដោយ​ភាព​ឃោរឃៅ​ធ្វើឱ្យ​ប្រជាពលរដ្ឋ​រងគ្រោះ​ដោយសារ​ដីធ្លី ផ្តល់​ដី​សម្បទាន​ខុស​បច្ចេកទេស និង​ប្រើ​អំពើ​ហិង្សា​បង្ក្រាប​ក្រុម​បាតុករ​ជាដើម»។

លោក​ ស្រស់ ​បាន​គូសបញ្ជាក់​ថា​នៅពេល​គណបក្ស​យុវជន​កម្ពុជា​ឈ្នះ​ឆ្នោត​លោក​នឹង​ធ្វើ​វិសោធនកម្ម​ច្បាប់​ដោយ​កំណត់​អាណត្តិ​នាយក​រដ្ឋមន្ត្រី​​នៅ​ត្រឹម​តែ ២ អាណត្តិ​ពោល​គឺ​ ១០ ឆ្នាំ។

លោក​ថ្លែង​ថា៖ «ប្រទេស​នីមួយៗ​តែងតែ​មាន​គំនិត​ចម្រុះ​អ៊ីចឹង​មិន​អាច​យក​គំនិត​មនុស្ស​ម្នាក់​មក​ដឹកនាំ​ប្រទេស​រហូត​នោះ​ទេ។ ចំណែក​មួយ​ទៀត​យើង​នឹង​កាត់​បន្ថយ​អ្នក​​ការពារ​នាយក​រដ្ឋមន្ត្រី​ដើម្បី​កាត់​បន្ថយ​លុយ​រដ្ឋ និង​ឥទ្ធិពល​គាត់​ព្រោះ​​នៅ​ពេល​គាត់​មាន​អង្គរក្ស​ច្រើន​ដុះ​ស្នឹម​ហើយ​ពិបាក​នឹង​ផ្ទេរ​អំណាច​ណាស់»។

លោក​បាន​បញ្ជាក់​ជាថ្មី​ថា​ការ​បង្កើត​​គណបក្ស​ថ្មី​នេះ​ពុំ​មាន​បំណង​ចង់​​បំបែក​សំឡេង​ពី​គណបក្ស​ណា​មួយ​ទេ និង​គ្មាន​ការ​ជ្រោមជ្រែង​ពី​អ្នក​ណា​ឡើយ​តែ​បង្កើត​ឡើង​ដើម្បី​បង្រួប​បង្រួម​ប្រជាជាតិ​ខ្មែរ​តែ​មួយ។

បើ​តាម​ប្រធាន​បក្ស​នេះ​បច្ចុប្បន្ន​នេះ​មាន​អ្នក​គាំទ្រ​គណបក្ស​របស់​លោក​ជិត ២ ម៉ឺន​នាក់​ហើយ​ដែល​ភាគច្រើន​ជា​យុវជន​ប្រមាណ ៦០ ភាគរយ។

ប្រធាន​នាយកដ្ឋាន​រដ្ឋបាល​សរុប​នៃ​ក្រសួង​មហាផ្ទៃ​លោក ឆាន់ ច័ន្ទសុភ័ក្តិ បាន​ឲ្យ​ដឹង​ថា​តាំងពី​ឆ្នាំ ១៩៩៣ រហូត​មក​ទល់​បច្ចុប្បន្ន​គណបក្ស​ដែល​ត្រូវ​បាន​ចុះ​បញ្ជី​នៅ​ក្រសួង​មហាផ្ទៃ​មាន​ចំនួន ៤១ គណបក្ស​ហើយ ហើយ​នៅ​ក្នុង​​ឆ្នាំ ២០១៦ នេះ​ទើប​តែ​មាន​គណបក្ស​តែ​មួយ​​ប៉ុណ្ណោះ​ដែល​ត្រូវ​បាន​ចុះ​បញ្ជី​។

បើ​តាម​លោក​​ ស្រស់​ ថវិកា​សម្រាប់​ដំណើរការ​គណបក្ស​​គឺជា​ប្រាក់​ផ្ទាល់​ខ្លួន​របស់​លោក​ និង​ប្រាក់​ឧបត្ថម្ភ​ពី​សមាជិក​គណបក្ស​ទាំង​នៅ​ក្នុង​ប្រទេស​ និង​នៅ​ក្រៅ​ប្រទេស៕

អត្ថបទគួរចាប់អារម្មណ៍