The Phnom Penh Post Search

Search form




Logo of Phnom Penh Post newspaper Phnom Penh Post - គណបក្ស​ធំ​ពីរ​ការពារ​សេចក្តី​ព្រាង​ច្បាប់​បោះ​ឆ្នោត​ ខណៈ ERA ធ្វើ​ពហិការ​និង​រិះគន់​ខ្លាំងៗ

គណបក្ស​ធំ​ពីរ​ការពារ​សេចក្តី​ព្រាង​ច្បាប់​បោះ​ឆ្នោត​ ខណៈ ERA ធ្វើ​ពហិការ​និង​រិះគន់​ខ្លាំងៗ

Content image - Phnom Penh Post
ប្រធាន​ក្រុម​កំណែ​ទម្រ​ង់​ការ​បោះ​ឆ្នោត​គណបក្ស​ទាំង​ពីរ​ធ្វើ​សិក្ខា​សាលា​ពិគ្រោះ​យោបល់​សេចក្តី​ព្រាង​ច្បាប់​បោះ​ឆ្នោត​ថ្មី។ ហេង ជីវ័ន

គណបក្ស​ធំ​ពីរ​ការពារ​សេចក្តី​ព្រាង​ច្បាប់​បោះ​ឆ្នោត​ ខណៈ ERA ធ្វើ​ពហិការ​និង​រិះគន់​ខ្លាំងៗ

ភ្នំពេញៈ គណបក្ស​ធំៗ​ទាំង​ពីរ​កាល​ម្សិល​មិញ បាន​ចំណាយ​ពេល​ជាច្រើន​ម៉ោង​នៅ​សភា ដើម្បី​ការពារ​សេចក្តី​ព្រាង​ច្បាប់​ពាក់ព័ន្ធ​នឹង​ការ​បោះឆ្នោត​ចំនួន​ពីរ ដែល​អង្គការ​ឃ្លាំ​មើល​ការ​បោះឆ្នោត​បាន​រិះគន់​ថា នៅ​មាន​គុណវិបត្តិ​ច្រើន។

ប៉ុន្តែ​សម្ព័ន្ធ​ក្រុម​អង្គការ​ក្រៅ​រដ្ឋាភិបាល​ហៅ​សម្ព័ន្ធ​កំណែ​ទម្រង់​ការ​បោះ​ឆ្នោត (ERA) ដែល​ជា​អ្នក​រិះគន់​ខ្លាំង​បំផុត​លើ​សេចក្តី​ព្រាង​ច្បាប់​ទាំង​ពីរ​នេះ មិន​មាន​វត្តមាន​ក្នុង​សិក្ខាសាលា​របស់​គណបក្ស​ទាំង​ពីរ​នេះ​ទេ ដោយ​ធ្វើ​ពហិការ​ចំពោះ​ការ​ប្រជុំ​នេះ​ហើយ​បាន​រិះគន់​ថា ជា​ការ​ពិគ្រោះ​យោបល់​បែប​ប្រញាប់​ប្រញាល់។

ទោះ​យ៉ាង​ណា សិក្ខាសាលា​នេះ​ក៏មាន​ការ​ចូល​រួម​ពី​មន្ត្រី អង្គទូត តំណាង​សង្គម​ស៊ីវិល ប្រព័ន្ធ​ផ្សព្វ​ផ្សាយ និង​សាធារណ​ជន​ជាង ៥០០ នាក់។

សមាជិក​ក្រុម​ការងារ​កំណែ​ទម្រង់​ការ​បោះ​ឆ្នោត​របស់​គណបក្ស​ប្រឆាំង លោក អេង ឆៃអ៊ាង ថ្លែង​ទៅ​កាន់​អ្នក​ចូល​រួម​ថា៖ «ខ្ញុំ​ឮ​ថា សេចក្តី​ព្រាង​ច្បាប់​ស្តីពី​ការ​បោះ​ឆ្នោត​នេះ​អាក្រក់​ជាង​ច្បាប់​ចាស់។ ប៉ុន្តែ​អ្នក​និយាយ​នោះ មិន​ទាន់​បាន​អាន​ច្បាប់​ចាស់​ទេ»។ លោក​បន្ត​ថា៖ «ច្បាប់​ចាស់​អាក្រក់​ខ្លាំង​ណាស់»។

ឯក​អគ្គ​រដ្ឋ​ទូត​សហភាព​អឺរ៉ុប លោក Jean-Francois Cautain បាន​ទទួល​រង សម្តី​ខ្លាំងៗ​ពី​តំណាង​រាស្ត្រ​គណបក្ស​កាន់​អំណាច លោក ឈាង វុន បន្ទាប់​ពី​បង្ហាញ​ពី​ក្តី​បារម្ភ​របស់​សង្គម​ស៊ីវិល​អំពី​ការ​ដាក់​កំហិត​នៃ​ច្បាប់​នេះ​ទៅ​លើ​អ្វី​ដែល​អង្គការ​ក្រៅ​រដ្ឋាភិបាល​លើក​ឡើង​ក្នុង​អំឡុង​ពេល​នៃ​ការ​បោះ​ឆ្នោត។

លោក​ថ្លែង​ក្នុង​ពេល​ចោទ​សួរ​សំណួរ​ថា៖ «វា​ហាក់​ដូច​ជា​ថា ក្នុង​កម្រិត​ណា​មួយ មាត្រា ៨៤ អាច​ផ្ទុយ​ឬ​យ៉ាង​ហោច​ប្រឆាំង​នឹង​មាត្រា ៤១ នៃ​រដ្ឋ​ធម្មនុញ្ញ​ប្រទេស ដែល​ធានា​អំពី​សេរីភាព​នៃ​ការ​បញ្ចេញ​មតិ ព្រម​ទាំង​ការ​ប្តេជ្ញា​របស់​កម្ពុជា​នៅ​ក្នុង​កតិកា​សញ្ញា​អន្តរជាតិ​ស្តីពី​សិទ្ធិ​ជន​ស៊ីវិល​និង​នយោបាយ»។ ជាង​នេះ​ទៀត​លោក​បាន​សួរ​គណបក្ស​ទាំង​ពីរ​ថា តើ​ក្តី​បារម្ភ​របស់​អង្គការ​ក្រៅ​រដ្ឋាភិបាល​នឹង​ត្រូវ​ពិចារណា​យ៉ាង​ដូច​ម្តេច​ដែរ?

មាត្រា ៨៤ ហាម​អង្គការ​ក្រៅ​រដ្ឋាភិបាល​មិន​ឲ្យ​ប្រមាថ គណបក្ស​ណា​មួយ បេក្ខជន​ណា​ម្នាក់​ឬក៏​ចេញ​សេចក្តី​ថ្លែង​ការណ៍​បង្ហាញ​ពី​ភាព​លម្អៀង​ទៅ​គណបក្ស​ណា​មួយ​ដែរ ដែល​ការណ៍​នេះ​ត្រូវ​អង្គការ​សង្គម​ស៊ីវិល​យល់​ថា នឹង​មាន​ផល​ប៉ះពាល់​ទៅ​លើ​ការ​រិះគន់​ក្នុង​ពេល​បោះ​ឆ្នោត។

លោក ឈាង វុន តំណាង​រាស្ត្រ​ពី​គណបក្ស​ប្រជាជន​បាន​ឆ្លើយ​តប​បែប​កំហឹង​ទៅ​លោក Cautain បើ​ទោះ​ជា​លោក​មិន​ស្ថិត​ក្នុង​ក្រុម​ការងារ​ធ្វើ​ច្បាប់​នេះ​របស់​គណបក្ស​លោក​ក្តី។

លោក​លើក​ពី​ឧទាហរណ៍​នៃ​អង្គការ ខុម ហ្វ្រែល ថា បាន​ផលិត​វីដេអូ​មុន​បោះ​ឆ្នោត ឆ្នាំ​២០១៣ ដើម្បី​បង្ហាញ​ថា ទឹក​ជ្រលក់​ម្រាម​ដៃ​អ្នក​បោះ​ឆ្នោត​មិន​អាច​ជឿ​ជាក់​បាន។

លោក​បន្ត​ថា៖ «ប្រសិន​បើ​សង្គម​ស៊ីវិល​ធ្វើ​ដូច​នេះ វា​មិន​ត្រឹម​ត្រូវ​ទេ។ យើង​មិន​ចង់​មាន​ជម្លោះ​ទេ យើង​គ្រាន់​តែ​ចង់​ជម្រាប​ឯកឧត្តម ឯក​អគ្គ​រដ្ឋ​ទូត​សហភាព​អឺរ៉ុប​ឲ្យ​ដឹង​ពី​ចំណុច​នេះ»។ លោក​បន្ត​លើក​ឡើង​ថា អង្គការ​ក្រៅ​រដ្ឋាភិបាល​ជាច្រើន​ទទួល​ថវិកា​ពី​បរទេស​ដើម្បី​វាយ​ប្រហារ​គណបក្ស​ប្រជាជន។

លោក​បន្ថែម​ថា៖ «យើង​ដឹង យើង​គាំទ្រ​ច្បាប់​នេះ​ទាំង​ស្រុង ហើយ​យើង​នឹង​ធ្វើ​ច្បាប់​មួយ​ទៀត ដើម្បី​គ្រប់​គ្រង​សង្គម​ស៊ីវិល»។ ដោយ​ដៅ​ទៅ​ច្បាប់​ស្តីពី​ការ​អង្គការ​ក្រៅ​រដ្ឋាភិបាល​ដែល​មាន​ភាព​ចម្រូង​ចម្រាស។

នៅ​ក្នុង​អ៊ីមែល​កាល​ពី​ល្ងាច​ម្សិល​មិញ​លោក Cautain ថ្លែង​ថា សហភាព​អឺរ៉ុប​ស្វាគមន៍ «ការ​ពិត​ណា​ដែល​គណៈកម្មការ​ចម្រុះ​រវាង​គណបក្ស​ប្រជាជន​និង​គណបក្ស​សង្គ្រោះ​ជាតិ​នឹង​ពិនិត្យ​ទៅ​លើ​សំណួរ​និង​បញ្ហា​ទាំង​អស់​ដែល​លើក​ឡើង ហើយ​នឹង​បញ្ជូន​បញ្ហា​ទាំង​អស់​នោះ​ទៅ​មេ​ដឹក​នាំ​របស់​ពួក​គេ»។

លោក ព្រុំ សុខា សមាជិក​ក្រុម​ការងារ​គណបក្ស​ប្រជាជន បាន​ការពារ​ចំណុច​ហាម​អ្នក​មាន​សញ្ជាតិ​ពីរ​មិន​ឲ្យ​នៅ​ក្នុង គ.ជ.ប ថា ទោះ​លោក​ស្រី ពុង ឈីវកេក ជា​បេក្ខជន​ដែល​បក្ស​ទាំង​ពីរ​ព្រម​ព្រៀង​ផ្តល់​កៅអី ទី៩ ខណៈ​គាត់​មាន​លិខិត​ឆ្លង​ដែន​បី​ផ្សេង​គ្នា​ក្តី​ក៏ «គោល​បំណង​ចម្បង​នៃ​ការ​កំណត់​ឲ្យ​មាន​សញ្ជាតិ​តែ​មួយ គឺ​ដើម្បី​អព្យាក្រឹត​សម្រាប់ គ.ជ.ប»៕

អត្ថបទគួរចាប់អារម្មណ៍