ភ្នំពេញៈ បន្ទាប់ពីពន្យារពេលអស់ជាច្រើនខែ គណបក្សប្រជាជនកម្ពុជាគ្រោងកោះប្រជុំគណៈអចិន្ត្រៃយ៍លើកទី៤១របស់ខ្លួននៅក្នុងខែធ្នូខាងមុខនេះ ជាអ្វីដែលមន្ត្រីជាន់ខ្ពស់គណបក្សថា ដើម្បីត្រួតពិនិត្យសភាពការណ៍ការងារកន្លងទៅ និងដាក់ទិសដៅនាពេលខាងមុខ ខណៈអ្នកវិភាគយល់ថា អាចផ្ដោតលើបញ្ហានយោបាយក្នុងពេលកម្ពុជាកំពុងរងសម្ពាធពីអន្ដរជាតិ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានថ្លែងនៅថ្ងៃទី៦ ខែវិច្ឆិកានេះ ថា កម្មវិធីនេះ គឺជាការប្រជុំធម្មតាស្របតាមលក្ខន្តិកៈដែលតែងធ្វើរយៈពេល៦ខែម្ដង ប៉ុន្តែការពន្យារពេលកន្លងមក ដោយសារ រវល់ការងារបោះឆ្នោត។
លោកបានបញ្ជាក់ថា៖«វាជាកម្មវិធីប្រជុំធម្មតារបស់គណបក្សតាមលក្ខតិកៈ៦ខែត្រូវប្រជុំម្តងហើយដោយសារតែយើងរវល់បោះឆ្នោតបានជាយើងពន្យារពេលរហូតដល់ចុងខែ១២ទើបគណបក្សកោះប្រជុំដើម្បីត្រួតពិនិត្យសភាពការការងារកន្លងទៅនិងដាក់ទិសដៅការងារ នៅពេលខាងមុខហើយនេះជារឿងធម្មតារបស់គណបក្សគ្មានអ្វីចម្លែកទេ»។
បើតាមលោក សុខ ឥសាន ការប្រជុំនេះនឹងធ្វើឡើងចាប់ពីថ្ងៃទី ១៨ ដល់ថ្ងៃទី ២០ ខែធ្នូ ដោយមានសមាជិកគណៈកម្មាធិការកណ្តាលចូលរួមជាង ៨០០នាក់ ហើយអង្គប្រជុំនឹងវាយតម្លៃរបាយការណ៍និងមានចេញគោលការណ៍ផ្សេង។
យ៉ាងណាក្ដី ការកោះប្រជុំនេះធ្វើឡើង ខណៈកម្ពុជាកំពុងរងសម្ពាធពីអន្តរជាតិទាក់ទងនឹងការអនុគ្រោះពន្ធEBAពីសហភាពអឺរ៉ុបដើម្បីស្នើឲ្យរដ្ឋាភិបាលស្វែងរកដំណោះស្រាយនយោបាយដើម្បីស្តារប្រជាធិបតេយ្យឡើងវិញនិងទម្លាក់បទចោទលើលោក កឹម សុខា អតីតប្រធានគណបក្សប្រឆាំង ជាអ្វីដែលរដ្ឋាបានចាត់ទុកការព្រមាននោះថា ជាការជ្រែតជ្រែកកិច្ចការផ្ទៃក្នុងកម្ពុជា។
អ្នកវិភាគបញ្ហាសង្គម និងនយោបាយ លោក បណ្ឌិត មាស នី នៅថ្ងៃទី៦ ខែវិច្ឆិកានេះ បានយល់ឃើញថា ការកោះប្រជុំនាខែធ្នូ ខាងមុខនេះ អាចផ្តោតលើបញ្ហានយោបាយទាក់ទងនឹងការកំណែទម្រង់និងរកវិធីសាស្ត្រទាក់ទាញប្រជាប្រិយភាពពីពលរដ្ឋដើម្បីបន្តដឹកនាំរដ្ឋាភិបាលខណៈកម្ពុជាកំពុងរងសម្ពាធអន្តរជាតិ។
លោកបានបញ្ជក់ថា៖ «ខ្ញុំគិតថា ការប្រជុំនឹងជាប្រជុំពិសេសមួយ ដើម្បីពិនិត្យមើលស្ថានភាពទូទៅរួមទាំងការធ្វើកំណែទម្រង់និងយុទ្ធសាស្ត្រធ្វើម៉េចដើម្បីដណ្តើមប្រជាប្រិយភាពឡើងវិញ…គេនឹងលើកយកនូវស្ថានការណ៍នយោបាយបច្ចុប្បន្ន ទៅពិភាក្សានិងការទប់ទល់នឹងសម្ពាធអន្តរជាតិនិងវិធីសាស្ត្រដើម្បីបន្តកាន់អំណាច»។
គួរបញ្ជាក់ថា តាមកាលវិភាគ កិច្ចប្រជុំនេះទំនងជាត្រូវធ្វើតាំងពីខែកក្កដាមកម្លេ៉ះ បើគិតរយៈពេល៦ខែម្ដង ចាប់តាំងពីប្រជុំចុងក្រោយកាលពីថ្ងៃទី២១ខែមករាឆ្នាំ២០១៨ កន្លងទៅ៕