.jpg)
លោកនាយករដ្ឋមន្រ្តី ហ៊ុន សែន និងមន្រ្តីជាន់ខ្ពស់ផ្សេងទៀត នៅក្នុងកិច្ចប្រជុំគណៈកម្មាធិការកណ្ដាល គណបក្សប្រជាជនកម្ពុជា ពីម្សិលមិញ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា និងសមាជិកគណៈកម្មាធិការកណ្តាលរបស់គណបក្សនេះ បានសម្រេចដាក់ចេញទិសដៅការងារសំខាន់ៗមួយចំនួនក្នុងការថែរក្សាសន្តិភាព ស្ថិរភាព នយោបាយ និងសន្តិសុខជាតិក្នុងកិច្ចប្រជុំគណៈកម្មាធិការកណ្តាលកាលពីម្សិលមិញ។ នេះ បើតាមព័ត៌មានដែលភ្នំពេញប៉ុស្តិ៍ទទួលបាន។
បើតាមព័ត៌មានបានឲ្យដឹង ថា នៅក្នុងកិច្ចប្រជុំគណៈកម្មាធិការកណ្តាលដែលដឹកនាំដោយលោក ហ៊ុន សែន និងមានការចូលរួមពីសមាជិកគណៈកម្មាធិការកណ្តាលទាំងអស់ប្រមាណ ១ ០៥៨ នាក់ នៅមជ្ឈមណ្ឌលសន្និបាត និងពិព័រណ៍កោះពេជ្រនាព្រឹកថ្ងៃព្រហស្បតិ៍ទី ២២ ខែ សីហា ឆ្នាំ ២០១៩ បានសម្រេចឲ្យមន្ត្រីគណបក្សគ្រប់ជាន់ថ្នាក់ត្រូវខិតខំអនុវត្តនូវទិសដៅការងារសំខាន់ៗ។
ទិសដៅការងារទាំងនោះគឺ «បន្តលើកកម្ពស់មនសិការស្នេហាជាតិបរិសុទ្ធ ពង្រឹងសាមគ្គីជាតិ ការពារយ៉ាងរឹងមាំនូវឯករាជ្យអធិបតេយ្យ និងបូរណភាពទឹកដី ប្រឆាំងការជ្រៀតជ្រែករបស់បរទេសចូលកិច្ចការផ្ទៃក្នុងកម្ពុជា ដោយមិនឱនក្បាលចំពោះការគាបសង្កត់ណាមួយពីខាងក្រៅ។ ប្តូរផ្តាច់ថែរក្សាសន្តិភាព ស្ថិរភាពនយោបាយ សន្តិសុខជាតិ មិនឲ្យកម្លាំងណាមកបំផ្លាញបាន»។
ទិសដៅបន្ទាប់គឺ «បន្តពង្រឹងលទ្ធិប្រជាធិបតេយ្យសេរី ពហុបក្ស និងនីតិរដ្ឋដែលស្របជាមួយនឹង ស្ថានភាពជាក់ស្តែងរបស់កម្ពុជា។ រាំងស្កាត់រាល់សកម្មភាពដែលប៉ុនប៉ង ច្រានកម្ពុជាឱ្យឃ្លាតចេញពីមាគ៌ា ប្រជាធិបតេយ្យ និងនីតិរដ្ឋ។ លើកទឹកចិត្តប្រជាពលរដ្ឋស្វែងយល់អំពីសិទ្ធិ និងករណីយកិច្ចក្នុងការចូលរួមអភិវឌ្ឍប្រទេស និងការគោរពអនុវត្តច្បាប់»។ ទន្ទឹមនឹងនេះទិសដៅការងារបញ្ជាក់ថា មន្ត្រីគណបក្សគ្រប់ជាន់ថ្នាក់ត្រូវលើកកម្ពស់សុវត្ថិភាពសន្តិសុខសង្គមតាមរយៈការធ្វើឱ្យបទល្មើសព្រហ្មទណ្ឌគ្រប់ប្រភេទមានការថយចុះ។
ពង្រឹងបរិយាកាសសង្គមកម្ពុជា ជាសង្គមថ្លៃថ្នូរ គ្មានក្រុមសង្គមងងឹត គ្មានជនពាល និងជំរុញការផ្តល់សេវានានាជូនប្រជាជនជាពិសេសសៀវភៅស្នាក់នៅ សៀវភៅគ្រួសារ អត្តសញ្ញាណប័ណ្ណ និងសេវាចាំបាច់ផ្សេងៗឱ្យបានលឿន និងតម្លាភាព។
ទិសដៅការងារមួយទៀតគឺ «ពង្រឹងការកៀរគរចំណូល និងការវិភាជ និងប្រើប្រាស់ថវិកា ឱ្យមានប្រសិទ្ធភាព និងចំគោលដៅ ព្រមទាំងរក្សាស្ថិរភាពក្នុងវិស័យហិរញ្ញវត្ថុដើម្បីបញ្ចៀសនូវវិបត្តិដោយយថាហេតុ»។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ប្រាប់អ្នកសារព័ត៌មាន បន្ទាប់ពីកិច្ចប្រជុំនោះថា កិច្ចប្រជុំបានផ្តោតទៅលើការវិវឌ្ឍនៃការដឹកនាំរបស់រាជរដ្ឋាភិបាល។ លោកថា បន្ទាប់ពីបង្កើតរាជរដ្ឋាភិបាលនីតិកាលទី៦ រាជរដ្ឋាភិបាលមានការខិតខំប្រឹងក្នុងការជំរុញការងារអន្តរជាតិ និងការងារដែលពាក់ព័ន្ធផ្ទៃក្នុងដើម្បីកសាងអភិវឌ្ឍប្រទេស។
លោកបញ្ជាក់ថា៖ «យើងលើកឡើងអំពីចំណុចខ្លាំងចំណុចខ្សោយ មួយចំនួនដែលយើងត្រូវតែរួមគ្នាដើម្បីដោះស្រាយ នាពេលខាងមុខនេះ។ ចំណុចដែលពេញចិត្តរបស់យើង គឺយើងរក្សាបាននូវសន្តិភាព និងស្ថិរភាពនយោបាយក៏ដូចជាការរីកចម្រើនក្នុងសង្គមជាតិកម្ពុជា។ ចំណុចនៅតែជាការប្រឈមត្រូវខិតខំថែមទៀត គឺជាចំណុចដែលមិនទាន់ពេញចិត្តយើង»។
ជាមួយគ្នានេះលោក សុខ ឥសាន ថ្លែងថា លោកនាយករដ្ឋមន្ត្រី ហ៊ុន សែន បានប្រាប់សមាជិកគណៈកម្មាធិការកណ្តាល របស់គណបក្សប្រជាជនកម្ពុជាថា បើទោះបីជាគ្មាន EBA ក៏ប្រទេស កម្ពុជា មិនស្លាប់ដែរ ហើយលោកបានស្នើឲ្យសមាជិកទាំងអស់ត្រូវរួមគ្នាដោះស្រាយបញ្ហាប្រឈមនាពេលខាងមុខ។
លោកថា៖ «ផ្អែកទៅតាមឋានៈ និងការរីកចម្រើនរបស់ជាតិយើង យើងយល់ថា យូរនិងឆាប់ EBA គង់តែបាត់ទេ។ មានEBA ក៏មិនអាចធ្វើឲ្យកម្ពុជាមានភ្លាមៗដែរ ហើយបើអត់ EBA ក៏មិនអាចធ្វើឲ្យកម្ពុជាស្លាប់ដែរ។ ដូច្នេះបញ្ហាសំខាន់ គឺយើងត្រៀមលក្ខណសម្បត្តិគ្រប់គ្រាន់ដើម្បីធ្វើយ៉ាងណា ទោះបីជាអត់ EBA ក៏យើងអាចដំណើរការរស់បានដែរ»។
ពេលចោទសួរទាក់ទងនឹងក្រុមញុះញង់របស់គណបក្សប្រឆាំងលោក សុខ ឥសាន បានទទួលស្គាល់ថា ពិតជា មានការប្រកួតប្រជែងយ៉ាងស្វិតស្វាញរវាងគណបក្សប្រជាជន និងគណបក្សប្រឆាំង ដោយចោទគណបក្សប្រឆាំងបានប្រើប្រាស់វិធីសាស្ត្រញុះញង់ ភូតកុហក និងមួលបង្កាច់ ដូច្នេះបានជាលោក ហ៊ុន សែន បានចាត់ឲ្យមន្ត្រីគ្រប់ជាន់ថ្នាក់ខិតខំជួយពន្យល់ និងផ្សព្វផ្សាយប្រជាពលរដ្ឋនៅមូលដ្ឋានឲ្យដឹងពីសភាពការណ៍ពិត។
កិច្ចប្រជុំនេះ បានកំណត់ទិសដៅការងារគណៈកម្មាធិការសម្រាប់រយៈពេល ៦ ខែ ហើយបានត្រួតពិនិត្យវាយតម្លៃលើអ្វីដែលគណបក្សបានអនុវត្តរយៈពេល ៦ ខែកន្លងមក។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា និងជាអ្នកវិភាគនយោបាយលើកឡើងថា ធម្មតាការប្រជុំគណៈកម្មាធិការកណ្តាលរបស់គណបក្សប្រជាជន តែងតែធ្វើជារៀងរាល់ឆ្នាំ ដើម្បីរៀបចំផែនការយុទ្ធសាស្រ្ដប្រចាំឆ្នាំរបស់បក្ស មិនមានអ្វីជាការប្លែកទេ។
លោកថ្លែងថា៖ «ការប្រជុំនេះមិនមានដើម្បីដោះស្រាយករណីពិសេសណាមួយទេ។ ប៉ុន្ដែជាការចេញនូវគោលនយោបាយរបស់បក្សព្រោះជាទូទៅគណបក្សប្រជាជន តែងតែរៀបចំផែនការយុទ្ធសាស្រ្ដប្រចាំឆ្នាំ និងផែនការយូរអង្វែងសម្រាប់ការដឹកនាំប្រទេសជាតិ»។
លោកបន្ថែមថា ដូច្នេះ ដើម្បីថែរក្សាសន្តិភាព ស្ថិរភាពនយោបាយ និងសន្តិសុខជាតិ ការរៀបចំផែនការយុទ្ធសាស្រ្ដជាការចាំបាច់ទាំងពេលបច្ចុប្បន្ន និងទៅពេលអនាគត ព្រោះប្រទេស កម្ពុជា ធ្លាប់មានបទពិសោធឆ្លងកាត់សង្រ្គាមច្រើនមកហើយផលវិបាកនៃសង្គ្រាមនោះបានបន្សល់ទុករហូតមកដល់បច្ចុប្បន្ននេះ។
លោក គិន ភា បន្តថា៖ «ដូច្នេះអ្វីៗទាំងអស់ ក្នុងតម្លៃណាក៏ដោយ ការរក្សាសន្តិភាព ស្ថិរភាព គឺជាការសំខាន់ដែលគណបក្សប្រជាជនចាំបាច់ត្រូវតែធ្វើឲ្យបាន។ ចំណែកការដាក់ចេញនូវផែនការយុទ្ធសាស្រ្ដ និងគោលនយោបាយនេះ សង្កត់ធ្ងន់លើការរក្សាសន្តិភាព ស្ថិរភាពនយោបាយនេះ វាក៏អាចជាសារមួយដែលបានកើតឡើង ជាភាពបន្ទាន់នៃសភាពការណ៍ដែលយើងឃើញថា ក្រុមអតីតគណបក្សសង្គ្រោះជាតិនៅតែមានចេតនាទុច្ចរិតបង្កឲ្យមានចលាចលសង្គម»។
លោក ឯម សុវណ្ណារ៉ា អ្នកវិភាគនយោបាយលើកឡើងថា ជាទូទៅសមាជិកនៅក្នុងជួររាជរដ្ឋាភិបាល មានភារកិច្ចក្នុងការរក្សាសន្ដិភាព សុវត្ថិភាពសង្គម បើពលរដ្ឋចូលរួមនៅក្នុងចលនាណាមួយដែលមិនស្របច្បាប់។
លោកថ្លែងថា៖ «ពាក់ព័ន្ធទៅនឹងចលនាបក្សប្រឆាំង មានអតីតគណបក្សសង្គ្រោះជាតិ ដែលលោក សម រង្ស៊ី គាត់អំពាវនាវនោះបើសិនជាពលរដ្ឋគាត់ធ្វើទៅតាមគោលការណ៍ស្របច្បាប់ បែបប្រជាធិបតេយ្យ ខ្ញុំគិតថាមិនមានអ្វីខុសឆ្គងទេ។ កុំឲ្យតែវាជាបញ្ហាណាមួយដែលខុសនឹងគោលការណ៍ច្បាប់»។
សមាជិកជាន់ខ្ពស់គណបក្សប្រជាជនមួយរូបសុំមិនបញ្ចេញឈ្មោះប្រាប់ភ្នំពេញប៉ុស្ដិ៍ថា៖ «មិត្ដមកពីបណ្តាប្រទេសណាក៏ដោយឱ្យតែចង់ចងមិត្ដជាមួយកម្ពុជា សម្ដេចប្រាប់មិនឱ្យយើងបោះបង់ចោលមិត្ដណាទាំងអស់។ មិនមែនរើសអើងទៅរាប់អានតែចិន បោះបង់អាមេរិកទេ។ គឺសម្តេច (ហ៊ុន សែន) បានណែនាំឲ្យយើងពង្រឹងគ្រប់យន្តការទាំងអស់ ដើម្បីទាក់ទាញមិត្ដទាំងអស់»។
លោក អ៊ូ ច័ន្ទរ័ត្ន អតីតតំណាងរាស្ត្រនៃអតីតបក្សប្រឆាំង ចាត់ទុកកិច្ចប្រជុំរបស់បក្សកាន់អំណាច អាចនឹងជួយបន្ធូរបន្ថយភាពតានតឹង និងដោះស្រាយបញ្ហានយោបាយដែលកម្ពុជាកំពុងប្រឈម។
លោកថា៖ «ខ្ញុំសង្ឃឹមថា អាចនឹងមានភាពវិជ្ជមានខ្លះ ដោយយើងតែងតែអំពាវនាវឲ្យរាជរដ្ឋាភិបាល ធ្វើយ៉ាងណាដើម្បីឲ្យគេចផុតពីសម្ពាធអន្តរជាតិ ហើយវាមានវិធីសាស្ត្រច្រើនក្នុងការជជែកគ្នាដើម្បីស្វែងរកដំណោះស្រាយ»៕
