ភ្នំពេញៈ គណបក្សភ្លើងទៀននឹងប្រារព្ធពិធីរំឭកវិញ្ញាណក្ខន្ធនៅថ្ងៃសុក្រនេះ ដល់ជនរងគ្រោះដែលបានស្លាប់ដោយសារការគប់គ្រាប់បែកកាលពីឆ្នាំ ១៩៩៧ ទៅលើការប្រមូលផ្តុំរបស់គណបក្សប្រឆាំងនៅសួនច្បារមុខវត្តបទុម ដែលបានបណ្តាលឲ្យមនុស្សយ៉ាងហោចណាស់ ១៦ នាក់ស្លាប់ និងជាង ១២០ នាក់ទៀតបានរងរបួសក្នុងនោះរួមទាំងលោក សម រង្ស៊ី អតីតមេដឹកនាំគណបក្សប្រឆាំងផងដែរ។
គ្រាប់បែកចំនួន ៤ គ្រាប់ត្រូវបានគប់ចូលទៅក្នុងក្រុមអ្នកគាំទ្រគណបក្សជាតិខ្មែរដែលកាលពេលនោះដឹកនាំដោយលោក សម រង្ស៊ី ដែលកំពុងធ្វើការប្រមូលផ្តុំនៅម្តុំវត្តបទុមដើម្បីទាមទារឲ្យមានតុលាការឯករាជ្យ។
នៅក្នុងការវាយប្រហារនេះដែលលោក សម រង្ស៊ី ស្ទើរតែមិនអាចគេចផុតពីការស្លាប់ និងបានបណ្តាលឲ្យមនុស្សយ៉ាងហោចណាស់ ១៦ នាក់ស្លាប់ និងរបួសប្រមាណ ១២០ នាក់។
មន្ត្រីគណបក្សភ្លើងទៀនដែលជាគណបក្សកើតចេញពីគណបក្ស សម រង្ស៊ី និងជាអតីតសមាជិកព្រឹទ្ធសភាលោក យូ សៀងហេង ថ្លែងថាសាលារាជធានីបានផ្តល់ការអនុញ្ញាតដល់គណបក្សសម្រាប់មនុស្ស ១០០ នាក់ក្នុងការជួបជុំគ្នានៅថ្ងៃសុក្រនៅទីតាំងស្តូបរំឭកវិញ្ញាណក្ខន្ធជនរងគ្រោះ។ «វាគ្រាន់តែជាព្រឹត្តិការណ៍តូចមួយ ហើយគ្មានអ្វីពាក់ព័ន្ធនឹងនយោបាយទេ។ វានឹងមិនមានការថ្លែងសុន្ទរកថា និងអ្វីក្រៅពីសាសនានោះទេ»។
នេះនឹងជាព្រឹត្តិការណ៍សាធារណៈលើកទី ១ របស់គណបក្សប្រឆាំងចាប់តាំងពីការចាប់ខ្លួនលោក កឹម សុខា អតីតប្រធានគណបក្សសង្គ្រោះជាតិកាលពីខែកញ្ញា និងការរំលាយគណបក្សនេះកាលពីខែវិច្ឆិកា។
ការស៊ើបអង្កេតអំពីការវាយប្រហារគប់គ្រាប់បែកឆ្នាំ ១៩៩៧ មិនទទួលបានលទ្ធផលទេ។
អ្នកនាំពាក្យសាលារាជធានីលោក ម៉េត មាសភក្តី បានថ្លែងថាពិធីសាសនាត្រូវបានអនុញ្ញាតឲ្យប្រារព្ធធ្វើ ប៉ុន្តែអ្នកចូលរួមមិនត្រូវបានអនុញ្ញាតឲ្យចល័តចេញពីស្តូបរំឭកវិញ្ញាណក្ខន្ធទេ។ លោកបានថ្លែងបន្តថា៖ «វានឹងមិនមានវេទិកាបញ្ចេញមតិយោបល់ និងវាយប្រហារស្ថាប័នកំពូលៗរបស់រដ្ឋាភិបាល ព្រះមហាក្សត្រ និងឥស្សរជនដទៃៗទេ បើមិនដូច្នោះទេ វានឹងខុសពីសំណើសុំការអនុញ្ញាត»។
លោកបន្តថា បដា និងឧគ្ឃោសនស័ព្ទត្រូវបានហាមប្រាមផងដែរ ហើយអាចមានវត្តមានសន្តិសុខដើម្បីរក្សាសណ្តាប់ធ្នាប់សាធារណៈ។
លោកស្រី មូរ សុខហួរ អតីតអនុប្រធានគណបក្សសង្គ្រោះជាតិថ្លែងថា ការវាយប្រហារគ្រាប់បែកនេះគឺនៅតែត្រូវបានចងចាំដោយពលរដ្ឋខ្មែរទូទាំងពិភពលោកហើយថា «វាសំខាន់ណាស់ដែលត្រូវគោរពវិញ្ញាណក្ខន្ធជនរងគ្រោះ និងស្វែងរកយុត្តិធម៌ដល់ពួកគេ»៕ PS