The Phnom Penh Post Search

Search form




Logo of Phnom Penh Post newspaper Phnom Penh Post - គណបក្ស​សង្គ្រោះ​ជាតិ​រិះគន់​រដ្ឋសភា​ថា ​ជា​ស្ថាប័ន​មួយ​ដែល​ទន់ខ្សោយ




គណបក្ស​សង្គ្រោះ​ជាតិ​រិះគន់​រដ្ឋសភា​ថា ​ជា​ស្ថាប័ន​មួយ​ដែល​ទន់ខ្សោយ

Content image - Phnom Penh Post
ទិដ្ឋភាព អគារ​រដ្ឋសភា។

គណបក្ស​សង្គ្រោះ​ជាតិ​រិះគន់​រដ្ឋសភា​ថា ​ជា​ស្ថាប័ន​មួយ​ដែល​ទន់ខ្សោយ

ភ្នំពេញៈ គណបក្ស​ប្រឆាំង​បាន​ចាត់​ទុក​រដ្ឋសភា​​ជា​​ស្ថានប័ន​ទន់ខ្សោយ​​មួយ​ បន្ទាប់ពី​បាន​សម្រេច​ជា​ផ្លូវការ​ថា​នឹង​លុប​​តំណែង​​​​លោក កឹម សុខា មេដឹកនាំ​គណបក្ស​ប្រឆាំង​ពី​ប្រធាន​តំណាងរាស្រ្ត​សំឡេង​ភាគ​តិច​មាន​ឋានៈ​ស្មើ​​នាយក​រដ្ឋមន្រ្តី​​​​នៅ​សប្តាហ៍​​ក្រោយ​។

បន្ទាប់ពី​ការ​ពិភាក្សា​អស់​ពេល​ជិត​មួយ​ម៉ោង​កាលពី​​ថ្ងៃ​ម្សិលមិញ​​​ដោយ​មាន​ការ​ចូលរួម​ពី​តំណាងរាស្រ្ត​​ ១២ ​រូប​ដែល​​ ១ រូប​មកពី​គណបក្ស​សង្គ្រោះ​ជាតិ​គណៈកម្មាធិការ​​អចិន្រៃ្តយ៍​នៃ​រដ្ឋសភា​​បាន​សម្រេច​ជា​ផ្លូវការ​ឲ្យ​​​រដ្ឋសភា​​បើក​សម័យ​ប្រជុំ​​ពេញអង្គ​​នៅ​ថ្ងៃ​ទី​ ៣១ ខែ​មករា​ដើម្បី​ធ្វើ​វិសោធនកម្ម​​មាត្រា​​ ៤៨ ​ថ្មី​( ៣) ​​នៃ​បទបញ្ជា​ផ្ទៃក្នុង​រដ្ឋសភា​​​ទៅ​ក្នុង​មាត្រា​​ ៤៨ ​ថ្មី​ (៤) ​​​ដើម្បី​ដក​តំណែង​ពី​​លោក កឹម សុខា ​តាម​សំណើ​​របស់​លោក​​នាយករដ្ឋមន្រ្តី ហ៊ុន សែន ដោយ​គណបក្ស​ប្រជាជន​ (CPP) ចោទ​ថា​ក្នុង​ការ​​​ពិភាក្សា​គ្នា​រវាង​​លោក​នាយក​រដ្ឋមន្រ្តី ហ៊ុន សែន និង​លោក កឹម សុខា គណបក្ស​សង្គ្រោះ​ជាតិ​ (CNRP) តែង​ស្នើ​​ឲ្យ​មាន​ការ​ដោះលែង​​មន្រ្តី​សិទ្ធិ​មនុស្ស​​ ៤ ​​នាក់​ មន្រ្តី​បោះឆ្នោត​ម្នាក់​​ និង​សមាជិក​ជាង​ ១០ ​នាក់​​ទៀត​របស់​ CNRP ​ដែល​កំពុង​ជាប់​ពន្ធនាគារ​។

តំណាងរាស្រ្ត​ CNRP ​លោក ហូរ វ៉ាន់ ប្រធាន​គណៈកម្មការ​ប្រឆាំង​អំពើ​ពុករលួយ​នៃ​រដ្ឋសភា​​ដែល​បាន​ចូលរួម​ប្រជុំ​ជាមួយ​តំណាងរាស្រ្ត CPP ១១ ​រូប​បាន​សម្ដែង​ការ​សោកស្តាយ​ចំពោះ​ការ​សម្រេច​ឲ្យ​​លុប​ចោល​យន្តការ​​​សំឡេង​ភាគច្រើន ​និង​សំឡេង​ភាគតិច​ពី​ CNRP ​និង​ CPP ដែល​ជា​យន្តការ​មួយ​សម្រាប់​​​ដោះស្រាយ​បញ្ហា​នយោបាយ​​តាម​គោលការណ៍​ប្រជាធិបតេយ្យ​។

លោក​បាន​ថ្លែង​ថា​៖ «​​ខ្ញុំ​សោកស្តាយ​ខ្លាំង​។ ខ្ញុំ​មិន​ចង់​ឲ្យ​មាន​វិសោធនកម្ម​ ឬ​ការ​លុប​​មាត្រា​ ៤៨ ​​ទេ។ ខ្ញុំ​បាន​លើក​ឡើង​យ៉ាង​ច្បាស់​អម្បាញ់មិញ​។ ដូច្នេះ​វា​ពិបាក​សម្រាប់​ [យើង​] ​មក​ប្រជុំ​»។

លោក​បាន​បន្ត​ថា៖ «​ខ្ញុំ​បាន​ប្រាប់​រួច​ហើយ​នៅ​ក្នុង [​គណៈកម្មាធិការ​] អចិន្រៃ្តយ៍​​​...នេះ​បង្ហាញ​អំពី​ភាព​ខ្សោយ​​នៃ​រដ្ឋសភា​​យើង​។ យន្តការ​​នេះ​ទើប​តែ​បង្កើត​ឡើង​​មិន​ទាន់​បាន ២ ឆ្នាំ​ផង​ឥឡូវ​លុប​ចោល​។សូម​ពលរដ្ឋ​​​មើល​នេះ​ជា​ភាព​ទន់ខ្សោយ​​​របស់​រដ្ឋសភា...»។

អ្នក​នាំពាក្យ​តំណាងរាស្រ្ត​ CPP លោក ឈាង វុន បាន​ប្រាប់​​អ្នក​កាសែត​បន្ទាប់ពី​កិច្ចប្រជុំ​នោះ​​ថា​របៀបវារៈ​ដែល​លើក​ឡើង​ដោយ​​ CNRP ​​​ដើម្បី​ចរចា​ជាមួយ CPP ​តែងតែ​មាន​​សំណើ​សុំ​ឲ្យ​មាន​ការ​ដោះលែង​ក្រុម​អ្នក​ទោស​។

លោក​បាន​បន្ត​ថា​៖ «​​អ្វី​ដែល​ [គណបក្ស​សង្គ្រោះ​ជាតិ​] ​បាន​លើក​ឡើង​ទី​មួយ [សម្រាប់​ការ​ចរចា​] យើង​មិន​ទទួល​យក​ដូច្នេះ​គាត់​​ប្តូរ​ទៅ​ប្រធានបទ​​មួយ​ទៀត​​ ប៉ុន្តែ​នៅ​ពេល​ [យើង​] ​និយាយ​គាត់​បាន​លើក​ឡើង​ម្តង​ទៀត​។ ដូច្នេះ​ទិចនិក​បែប​នេះ​គឺ​មិន​ស្មោះត្រង់​»។

ប៉ុន្តែ CNRP ​​កាលពី​ថ្មីៗ​នេះ​បាន​អះអាង​ថា​នៅ​ក្នុង​របៀបវារៈ​​របស់​ខ្លួន​គឺ​​មិន​បាន​លើក​ឡើង​ពី​សំណើ​​ដោះលែង​អ្នក​ទោស​នយោបាយ​​ទេ​គ្រាន់តែ​ស្នើឲ្យ​ពិភាក្សា​​​អំពី​ដំណើរការ​បោះឆ្នោត​​ដើម្បី​ស្វែងរក​ផ្លូវ​​ឲ្យ​ពលរដ្ឋ​ដែល​នៅ​បរទេស​​អាច​មាន​សិទ្ធិ​បោះឆ្នោត​​ និង​លើក​ពី​​បរិយាកាស​នយោបាយ​មុន​ការ​បោះឆ្នោត។

ទោះបី​ជា​យ៉ាង​ណា​ក្តី CNRP​​មិន​បាន​ឆ្លើយតប​​​នឹង​ការ​ចោទប្រកាន់​ដែល​ថា​មិន​ស្មោះត្រង់​​នោះ​ដោយ​​ថា​ CNRP ទុក​ឲ្យ​មតិ​សាធារណៈ និង​ពលរដ្ឋ​ជា​អ្នក​ពិចារណា​​ និង​វិនិច្ឆ័យ​។

ប្រធាន​ក្រុម​តំណាងរាស្រ្ត​ CNRP​ លោក សុន ឆ័យ ​បាន​ប្រាប់​កាសែត​ភ្នំពេញ​ប៉ុស្តិ៍​​ពី​ម្សិលមិញ​ថា​លោក​មិន​យល់​ដែល​ CPP​​ សម្រេច​លុប​​យន្តការ​នេះ​ហើយ​​ថា​តំណាងរាស្រ្ត​ CNRP ​​មិន​ប្រាកដ​ថា​​នឹង​ចូល​រួម​ប្រជុំ​​រដ្ឋសភា​ ឬ​អត់​នោះ​ទេ​តែ​លោក​ថា CNRP ​នឹង​​ជួប​ប្រជុំ​​សម្រេច​នៅ​ថ្ងៃ​ចន្ទ។

លោក សុន ឆ័យ បាន​បន្ត​ថា​៖ «​​វា​ជា​រឿង​​មួយ​​​​ដែល​មិន​​គួរ​ធ្វើ​។ ​​ជាធម្មតា​ការ​សម្រេច​រៀបចំ​ក្រុម​​សំឡេង​ភាគច្រើន​ក្រុម​ភាគតិច​​គឺ​ដើម្បី​​ឲ្យ​ងាយស្រួល​សម្រាប់​ការងារ​របស់​​រដ្ឋសភា​ និង​ការងារ​របស់​ជាតិ​ដោយសារ​​យើង​យល់​ថា​វា​ចាំបាច់​​​ដើម្បី​ជជែក​ជា​ជាង​​ប្រើ​វេទិកា​​សាធារណៈ​​​វាយប្រហារ​គ្នា​ទៅវិញ​ទៅមក និង​ធ្វើ​ឲ្យ​មាន​បញ្ហា​​ក្នុង​សង្គម​»។

ទន្ទឹម​នឹង​នេះ​ដែរ​ប្រធាន​ CNRP ​លោក សម រង្ស៊ី ​ដែល​កំពុង​និរទេស​​នៅ​បារាំង​​ក៏​កំពុង​ប្រឈម​​នឹង​បណ្តឹង​ពី​បទ​​បរិហារកេរ្តិ៍​​ប្តឹង​ដោយ​លោក​នាយក​រដ្ឋមន្រ្តី​ ហ៊ុន សែន ​បន្ទាប់ពី​លោក សម រង្ស៊ី ចោទ លោក​ថា​បាន​សូកប៉ាន់​ប្រាក់​ ១ ​លាន​ដុល្លារ​ទៅ​ឲ្យ កញ្ញា ធី សុវណ្ណថា ដើម្បី​ឲ្យ​បង្ក​រឿង​​ CNRP ហើយ​​បាន​​ទាមទារ​ជំងឺ​ចិត្ត​ ១ ​លាន​ដុល្លារ​។

កាលពី​ម្សិលមិញ​លោក គី តិច ដែល​ជា​មេធាវី​លោក​​នាយករដ្ឋមន្ត្រី ហ៊ុន សែន ​ត្រូវ​បាន​កោះ​ហៅ​ទៅ​សាលា​ដំបូង​រាជធានី​ភ្នំពេញ​ដើម្បី​ការពារ​បណ្តឹង​របស់​លោក​។ ​

លោក​ គី តិច ​បាន​​ប្រាប់​អ្នក​យក​ព័ត៌មាន​​នៅ​ក្រៅ​តុលាការ​​ថា​ព្រះរាជអាជ្ញារង សៀង សុខ បាន​សួរ​លោក​ថា​ តើ​លោក​​ត្រូវ​ការ​​បន្ថែម​ភ័ស្តុតាង​​ ឬ​អត្ថន័យ​​ និង​សំណើ​​សម្រាប់​បណ្តឹង​នេះ​ឬ​អត់​?លោក គី តិច​ បាន​ថ្លែង​ថា​លោក​បាន​បន្ថែម​​​ភ័ស្តុតាង​​សម្រាប់​​បណ្តឹង​នេះ​។

លោក​បាន​បញ្ជាក់​ថា​៖ «​​ខ្ញុំ​ក៏​បាន​ដាក់​​ភ័ស្តុតាង​បន្ថែម​ផង​ដែរ​ភ័ស្តុតាង​នោះ​គឺ​រូបភាព​ និង​សំឡេង​ថត​​ក្នុង​វីស៊ីឌី​​សំឡេង​ដែល​ត្រូវ​បាន​ផ្សាយ​នៅ​លើ​ទំព័រ​ហ្វេសប៊ុក​ចំនួន​ ៣ ​​ខ្ញុំ​បាន​ដាក់​​​​ទៅ​តុលាការ​​រួច​ហើយ​អម្បាញ់​មិញ​​»។ «​ច្បាប់​គឺជា​ច្បាប់​។ ​ប្រសិន​បើ​តុលាការ​សម្រេច​​​ឲ្យ​បង់​សំណង​ហើយ​​ខាង​នោះ​​​​ត្រូវ​បង់​ ឬ​​មិន​បង់​​តុលាការ​​មាន​នីតិវិធី​ច្រើន​​​ដើម្បី​ធ្វើ​​បន្ត​ទៀត​មិន​អនុញ្ញាត​ឲ្យ​​អ្នក​ធ្វើ​ខុស​​​រួច​ខ្លួន​​ទេ​»។

ប៉ុន្តែ​ថ្លែង​ប្រាប់​ភ្នំពេញ​ប៉ុស្តិ៍​ពី​ប្រទេស​បារាំង​នាពេល​ថ្មីៗ​កន្លង​ទៅ​នេះ​លោក សម រង្ស៊ី ហាក់បី​ដូចជា​មិន​បាន​អើពើ​​ចំពោះ​បណ្តឹង​ទាំង​នេះ​ទេ​ដោយ​លោក​បាន​ថា​ប្រសិន​បើ​លោក ហ៊ុន សែន ​ប្តឹង​កាន់​តែ​ច្រើន​ការពិត​​​នឹង​ត្រូវ​បាន​បង្ហាញ​ទៅ​កាន់​សាធារណជន​ហើយ​លោក​មិន​ខ្វល់​ពី​បញ្ហា​នេះ​ទេ​។

លោក​បាន​បញ្ជាក់​បន្ថែម​ថា​៖ «​​ប្តឹង​កាន់​តែ​ច្រើន កាន់តែ​ល្អ​ដោយសារ​​មាន​ឱកាស​ឲ្យ​សាធារណជន​​យក​ករណី​នេះ​ជជែក​វែកញែក​ទូលំ​ទូលាយ​។ ដោយសារ​រឿង​លើក​ឡើង​ដូចនេះ​វា​មាន​មូលដ្ឋាន​ពិត​​របស់​​វា​។ ​ខ្ញុំ​មិន​​បារម្ភ​ទេ​...ដោយសារ​ខ្ញុំ​និយាយ​​ការពិត​ដរាប​ណា​​ខ្ញុំ​និយាយ​​ការពិត ខ្ញុំ​មិន​បារម្ភ​​»៕ PS

អត្ថបទគួរចាប់អារម្មណ៍