.jpg)
សពអ្នកម្នាង អ៊ុក ផល្លា ត្រូវបានបូជា នៅខាងមុខវត្តបទុម ក្នុងរាជធានីភ្នំពេញ នៅថ្ងៃទី ២០ ខែមិថុនា ឆ្នាំ ២០១៨។ ផា លីណា
ភ្នំពេញៈ នៅក្នុងពិធីបូជាសពអ្នកម្នាង អ៊ុក ផល្លា នៅថ្ងៃទី ២០ ខែមិថុនា គណបក្ស ហ៊្វុនស៊ិនប៉ិច បានសម្តែងការសោកស្តាយ ចំពោះការទទួលមរណភាពរបស់អ្នកម្នាង ដោយសារគ្រោះថ្នាក់ចរាចរណ៍ ថាជាការបាត់បង់យ៉ាងធំសម្រាប់សមាជិក សមាជិការ គណបក្ស ជាពិសេសសម្រាប់ព្រះអង្គម្ចាស់នរោត្តម រណឫទ្ធិ ព្រមទាំងបុត្រា និងប្រជាពលរដ្ឋកម្ពុជា។
ក្នុងពិធីបូជាសព របស់អ្នកម្នាង នៅខាងមុខវត្តបទុម កាលពីម្សិលមិញ ដោយមិនមានវត្តមាន ព្រះអង្គម្ចាស់ រណឫទ្ធិ ខណៈដែលមានការអញ្ជើញចូលរួម ពីសមាជិកព្រះរាជវង្សានុវង្ស ថ្នាក់ដឹកនាំគណបក្ស សមាជិក ព្រឹទ្ធសភា រដ្ឋសភា មន្ត្រីរាជការ និងពលរដ្ឋជាច្រើនផងដែរ ដោយមានសម្តេចព្រះមហិស្សរា នរោត្តម ចក្រពង្ស់ ឧត្តមក្រុមប្រឹក្សាព្រះមហាក្សត្រ តំណាងសម្តេចព្រះ មហាក្សត្រិយ៍ នរោត្តម មុនិនាថ សីហនុ ជាអ្នកថ្វាយព្រះភ្លើងបូជា។
លោក ប៉ាន់ សុធី អគ្គលេខាធិការរង គណបក្ស ហ៊្វុនស៊ិនប៉ិចបានថ្លែងថា មរណភាពរបស់អ្នកម្នាង អ៊ុក ផល្លា គឺជាការបាត់បង់ព្រះជាយាជាទីស្រលាញ់ របស់ព្រះអង្គម្ចាស់ រណឫទ្ធិ ជាការបាត់បង់ មាតា បង ប្អូន បាត់បង់សាច់ញាតិ មិត្តជិតឆ្ងាយ បាត់បង់ ប្រជារាស្ត្រ ជាការបាត់បង់សមាជិក សមាជិការនៃ គណបក្សហ៊្វុនសិុនប៉ិច។
លោកបានបញ្ជាក់ដូច្នេះថា៖«មរណភាពរបស់អ្នកម្នាង អ៊ុក ផល្លា រណប្ញទ្ធិ គឺជាការបាត់បង់នូវស្រ្តីខ្មែរដ៏ឧដ្តុងឧត្តមមួយរូប ដែលបានចំណាយពេលវេលាជាច្រើន ក្នុងការសិក្សាលើ វិស័យសិល្បៈជាតិ ជាការរួមចំណែក បម្រើប្រទេសជាតិ និងប្រជារាស្ត្រឥតនឿយណាយលុះដល់ថ្ងៃ ឱសាននៃជីវិត។ យើងខ្ញុំទាំងអស់គ្នា មានការសោកស្តាយ ស្រណោះ អាឡោះអាឡៃ ក្រៀមក្រម និងរន្ធត់ចិត្តឥតឧបមា រកពាក្យអ្វីមកថ្លែងរៀបរាប់ដូចបានឡើយ»។
លោកបានបន្តថា៖«ត្បិតរូបកាយអ្នកម្នាង បានបាត់បង់ទៅក៏ពិតមែន តែគំរូវីរៈភាពដ៏ថ្លៃថ្លា ក្នុងការបូជាជីវិត ដង្ហែរសម្តេចក្រុមព្រះ ព្រះប្រធានគណបក្សហ៊្វុនស៊ិនប៉ិចក្នុងការបម្រើជាតិ សាសនា ព្រះមហាក្សត្រឥតនឿយហត់...សមាជិកសមាជិការគណបក្សហ្វុ៊នស៊ីនបិុច ជាពិសេសសម្តេចក្រុមព្រះនរោត្តម រណឫទ្ធិ ព្រមទាំងបុត្រាទាំងទ្វេ មិនអាចបំភ្លេចបានឡើយ»។
លោក ញ៉េប ប៊ុនជិន អ្នកនាំពាក្យគណបក្សហ៊្វុនស៊ិនប៉ិចបានថ្លែងទាំងអួលដើមក ជាមួយនឹងទឹកភ្នែករលីងរលោង ប្រាប់អ្នកសារព័ត៌មានបន្ទាប់ពិធីនោះថា ព្រះអង្គម្ចាស់ រណឫទ្ធិ មិនទាន់បានជ្រាបថា អ្នកម្នាង អ៊ុក ផល្លា បានទទួលមរណភាព ហើយត្រូវបានបូជានៅឡើយទេ ដោយសារតែគណបក្សមិនទាន់ទូលប្រាប់ព្រះអង្គ ពីព្រោះមានការព្រួយបារម្ភ ពីសុខភាពរបស់ទ្រង់។
លោកបានបញ្ជាក់ថា៖ «យើងបារម្ភខ្លាំង ដូច្នេះយើងមិនចង់ឲ្យលោកជ្រាបពីសពអ្នកម្នាង ដែលបានបូជាទេ រហូតដល់ម៉ោងនេះ។ សូមជំរាប ពលរដ្ឋប្រជានុរាស្ត្រ ជនរួមជាតិទាំងអស់ ក៏ដូចជាបងប្អូនដែលជាសមាជិក សមាជិកាដែលលោកតាមដានព្រឹត្តិការណ៍នេះថា យើងអត់មានទូលថ្វាយសម្តេចព្រះប្រធាន អំពីមរណភាពរបស់អ្នកម្នាងជាដាច់ខាត ដោយសារយើងយល់ថា ទុកឲ្យព្រះអង្គលោកថែព្រះសុខភាព ដោយយកចិត្តទុកដាក់ ឆាប់បានជាសះស្បើយ»។
លោកបានបន្ដថា៖ «ម្យ៉ាងទៀតយើងបារម្ភក្រោយពីលោកជាសះស្បើយ ហើយលោកយាងត្រឡប់មកវិញ ហើយនៅសួររកព្រះជាយារបស់លោក យើងទាំងអស់គ្នា កំពុងគិត ហើយគិតទៀតថា តើយើងគួរទូលថ្វាយនៅក្នុងពេលណា ឬស្ថានភាពណាមួយ នេះដែលយើងមានការព្រួយបារម្ភ»។ បើតាមលោក ប៊ុនជិន នៅពេលនេះ តំណាក់របស់ព្រះអង្គម្ចាស់ រណឫទ្ធិ អត់មានអ្នកណានៅទេ គឺមានតែព្រះរាជបុត្រាតូចពីរព្រះអង្គ និងអ្នកមើលថែ ធ្វើឲ្យលោកមានការខ្លោចផ្សារយ៉ាងខ្លាំង។
ទាក់ទងនឹងព្រះសុខភាព ព្រះអង្គម្ចាស់ រណឫទ្ធិ លោក ប៊ុនជិន បានឲ្យដឹងថា លោកអាចមានបន្ទូលបានហើយដោយលោកចង់ទូរស័ព្ទមកអ្នកម្នាងផល្លា តែអ្នកនៅមើលថែ ទូលថ្វាយលោកថា អ្នកម្នាងមិនអីទេ ដោយសារចង់ឲ្យព្រះអង្គថែព្រះកាយ ឲ្យឆាប់ជាសះស្បើយ។
ទន្ទឹមនឹងនេះ លោក ប៊ុនជិន ក៏បានស្នើឲ្យសមត្ថកិច្ច ធ្វើការស៊ើបអង្កេតឲ្យបានស៊ីជម្រៅ ចំពោះឧបទ្ទវហេតុគ្រោះថ្នាក់ចរាចរណ៍ដែលបានកើតឡើងជាបន្តបន្ទាប់មកនេះ។
លោកបានបន្តថា៖«ក្រសួងមហាផ្ទៃ និងអាជ្ញាធរមូលដ្ឋាន មានកាតព្វកិច្ច សមត្ថកិច្ច និងភារកិច្ច ស៊ើបអង្កេតឲ្យស៊ីជម្រៅដើម្បីឲ្យជនរងគ្រោះ និងគណបក្សហ៊្វុនស៊ិនប៉ិចអាចទទួលយកបានដោយអស់ចិត្ត»។
លោក ឆៃ ចៅ អាយុ ៤១ ឆ្នាំ សមាជិកគណបក្សមកពីស្រុកវ៉ារិន ខេត្តសៀមរាប បានមានប្រសាសន៍ថា៖«ករណីចរចរណ៍នេះ អាចពាក់ព័ន្ធនិងរឿងនយោបាយ ដោយសារតែថា សកម្មភាពនយោបាយ វាប្រែប្រួល និងមានបញ្ហាច្រើន នៅក្នុងប្រទេសកម្ពុជាយើង។ នេះជាវិបត្តិដ៏មហាធំធេង»។
លោក អ៊ុក ខាំ អាយុ ៦៨ ឆ្នាំ សមាជិកមួយរូបផ្សេងទៀត បានមានប្រសាសន៍ថា សមាជិក គណបក្សមានការសោកស្តាយណាស់ នៅពេលដែលបានបាត់បង់អ្នកម្នាងដោយសារ គាត់គឺជាបុគ្គលដ៏ឆ្នើមមួយរូប នៅក្នុងបក្សដោយគាត់តែងជំរុញសម្តេចក្រុមព្រះ ឲ្យខិតខំធ្វើសកម្មភាព និងចុះជួយប្រជាជន។
លោកបានបញ្ជាក់ថា៖«យើងសោកស្តាយដែលបានបាត់បង់រូបគាត់ ដោយសារគាត់ជាថ្នាក់ដឹកនាំឆ្នើម។ យើងមាន អារម្មណ៍ក្តុកក្តួលយ៉ាងខ្លាំង»។
អ្នកម្នាង អ៊ុក ផល្លា ដែលជាបេក្ខជនតំណាងរាស្ត្រលេខរៀងទី១ មណ្ឌលខេត្តព្រៃវែង របស់គណបក្សហ៊្វុនស៊ិនប៉ិចបានទទួលមរណភាពនៅមន្ទីរពេទ្យខេត្តព្រះសីហនុ នៅវេលាម៉ោងជាង ១២ ថ្ងៃទី ១៧ ខែមិថុនា ឆ្នាំ ២០១៨ គឺប្រមាណជា ៣ ម៉ោង បន្ទាប់ពីជួបគ្រោះថ្នាក់ចរាចរណ៍ដ៏រន្ធត់នៅស្រុកព្រៃនប់ ខណៈព្រះអង្គម្ចាស់ នរោត្តម រណឫទ្ធិ ព្រះប្រធាន ហ៊្វុនស៊ិនប៉ិចនិងមនុស្ស ៦ នាក់ផ្សេងទៀតរងរបួសធ្ងន់។
អ្នកម្នាង អ៊ុក ផល្លា និងព្រះអង្គម្ចាស់ នរោត្តម រណឫទ្ធិ មានបុត្រា ២ ព្រះអង្គ គឺបុត្រច្បង មាននាម នរោត្តម សុធាឫទ្ធិ ប្រសូតក្នុងឆ្នាំ ២០០៣ និងបុត្រទី ២ មាននាម នរោត្តម រណវង្ស ប្រសូតក្នុងឆ្នាំ ២០១១៕
