The Phnom Penh Post Search

Search form

Logo of Phnom Penh Post newspaper Phnom Penh Post - គណបក្ស​សង្គ្រោះ​ជាតិ​ឆ្លើយ​តប​ទៅ​នឹង​បាតុកម្ម​ដឹក​នាំ​ដោយ​លោក​ជុំ ម៉ី

គណបក្ស​សង្គ្រោះ​ជាតិ​ឆ្លើយ​តប​ទៅ​នឹង​បាតុកម្ម​ដឹក​នាំ​ដោយ​លោក​ជុំ ម៉ី

គណបក្ស​សង្គ្រោះ​ជាតិ​ឆ្លើយ​តប​ទៅ​នឹង​បាតុកម្ម​ដឹក​នាំ​ដោយ​លោក​ជុំ ម៉ី

130611_04a
ក្បួនបាតុកម្មដង្ហែទៅកាន់គណបក្សប្រឆាំងកាលពីថ្ងៃអាទិត្យ

ភ្នំពេញៈ គណបក្ស​សង្គ្រោះ​ជាតិ កាល​ពី​ម្សិលមិញ បាន​ចេញ​សេចក្ដី​ថ្លែង​ការណ៍​មួយ ដោយ​ធ្វើ​ការ​ឆ្លើយ​តប ទៅ​កាន់​ក្រុម​បាតុករ​លោក ជុំ ម៉ី អ្នក​រួច​រស់​ជីវិត​ម្នាក់​ពី​គុក​ទួលស្លែង ដែល​បាន​ដង្ហែ​យក​ញត្តិ​ទៅ​ដាក់​នៅ​គណបក្ស​នេះ​កាលពី​ថ្ងៃ​អាទិត្យ ថា​ខ្លួន​មិន​ដែល​បាន​បដិសេធ​ថា គ្មាន​ការ​កាប់​សម្លាប់​ឬ​ការ​ធ្វើ​ទារុណកម្ម​នៅ​គុក​ទួលស្លែង​របស់​ក្រុម​ខ្មែរ​ក្រហម នៅ​ក្នុង​របប​កម្ពុជា​ប្រជាធិបតេយ្យ​នោះ​ឡើយ។

កាល​ពី​ថ្ងៃ​អាទិត្យ​ក្រុម​បាតុករ​ប្រមាណ​១ម៉ឺន​នាក់ ដែល​អ្នក​តាម​ដាន​បាន​និយាយ​ថា ត្រូវ​បាន​ដុត​កម្តៅ​និង​ជួយ​ឧបត្ថម្ភ​ដោយ​គណបក្ស​ប្រជាជន បាន​ដង្ហែ​យក​ញត្តិ​ទៅ​ដាក់​នៅ​ទី​ស្នាក់ការ​គណបក្ស​សង្គ្រោះ​ជាតិ ទាមទារ​ឲ្យ​លោក​កឹម សុខា ប្រធាន​ស្តី​ទី​គណបក្ស​នេះ ធ្វើ​ការ​សុំទោស ចំពោះ​ការ​ថ្លែង​ដែល​ត្រូវ​បាន​គេ​យក​មក​ផ្សព្វ​ផ្សាយ​ថា ទួលស្លែង​គឺ​ជា​គុក​សិប្បនិម្មិត។

នៅ​ក្នុង​សេចក្ដី​ថ្លែង​ការណ៍​ចេញ​កាល​ពី​ម្សិលមិញ គណបក្ស​សង្គ្រោះ​ជាតិ បាន​បញ្ជាក់​ថា គណបក្ស​នេះ និង​លោក​កឹម សុខា​មិន​ដែល​បាន​ប្រមាថ​លើ​វិញ្ញាណក្ខន្ធ​ប្រជា​ពលរដ្ឋ ដែល​បាន​បាត់​បង់​ជីវិត​ក្នុង​របប​ខ្មែរ​ក្រហម​នោះ​ទេ​។ ផ្ទុយ​ទៅ​វិញ ទាំង​គណបក្ស​សង្គ្រោះ​ជាតិ ទាំង​លោក កឹម សុខា នា​ពេល​កន្លង​មក តែង​តែ​គោរព​វិញ្ញាណក្ខន្ធ​ជន​រងគ្រោះ ក្នុង​របប​ប្រល័យ​ពូជ​សាសន៍​ជា​រៀង​រាល់​ឆ្នាំ នា​ថ្ងៃ ១៧ ខែ​មេសា ហើយ​នឹង​នៅ​តែ​បន្ត​ធ្វើ​ការ​គោរព​នឹង​រំឭក​ដល់​វិញ្ញាណក្ខន្ធ​ជន​រងគ្រោះ​ទាំង​នោះ​ជានិច្ច។

សេចក្ដី​ថ្លែង​ការណ៍​ដដែល​បាន​សរសេរ​ទៀត​ថា គណបក្ស​សង្គ្រោះ​ជាតិ និង​លោក កឹម សុខា បាន​យក​ចិត្ត​ទុក​ដាក់​ជា​ខ្លាំង ចំពោះ​ការ​ទាមទារ​រក​យុត្តិធម៌​ពិត​ជូន​ប្រជា​ពលរដ្ឋ​ខ្មែរ ដើម្បី​ឲ្យ​មាន​ការ​កាត់​ទោស​ជន​ឧក្រិដ្ឋ ដែល​បាន​ប្រព្រឹត្ត​នៅ​ក្នុង​របប​ប្រល័យ​ពូជ​សាសន៍​នោះ។ មិន​តែ​ប៉ុណ្ណោះ​សេចក្តី​ថ្លែង​ការណ៍​គូស​បញ្ជាក់​ទៀត​ថា៖«គណបក្ស​សង្គ្រោះ​ជាតិ គោរព​រដ្ឋធម្មនុញ្ញ របប​រាជា​និយម​អាស្រ័យ​រដ្ឋធម្មនុញ្ញ នីតិរដ្ឋ ប្រជាធិបតេយ្យ សេរី​ពហុបក្ស ឥត​ងាក​រេ។

គណបក្ស​សង្គ្រោះ​ជាតិ​មាន​គោលការណ៍​ខ្មែរ​តែ​មួយ មិន​គុំកួន មិន​សង​សឹក មិន​យក​ខ្មែរ​ណា​ធ្វើ​ជា​សត្រូវ​ឡើយ»។ ជា​មួយ​គ្នា​នោះ​គណបក្ស​សង្គ្រោះ​ជាតិ ក៏​បាន​អំពាវនាវ​ឲ្យ​ខ្មែរ​គ្រប់​រូប​មាន​ស្មារតី​ជាតិ បង្រួប​បង្រួម​ជាតិ ផ្សះ​ផ្សា​ជាតិ​ដើម្បី​ឈាន​ទៅ​រក​ការ​ឯកភាព​ជាតិ​និង​កុំ​ចាញ់​កល​ល្បិច​ការ​ញុះ​ញង់ បំបែក​បំបាក់​ខ្មែរ​ដើម្បី​គេ​ងាយ​ស្រួល​ក្នុង​ការ​ត្រួត​ត្រា​ខែ្មរ​ឲ្យ​សោះ។

លោក ជុំ ម៉ី មិន​អាច​ទាក់​ទង​សុំ​ការ​អធិប្បាយ​បាន​ទេ កាល​ពី​ម្សិលមិញ ដោយ​ទូរស័ព្ទ​របស់​លោក​មិន​អាច​ទាក់​ទង​បាន។

លោក ឈាង វុន តំណាង​រាស្ត្រ​គណបក្ស​ប្រជាជន​កម្ពុជា បាន​ថ្លែង​នៅ​ក្នុង​សន្និសីទ​កាសែត​មួយ​នៅ​រដ្ឋសភា​កាល​ពី​ម្សិលមិញ ថា បាតុកម្ម​ប្រឆាំង​នឹង​លោក កឹម សុខា មិន​មែន​ជា​ការ​រៀបចំ​ឡើង​ដោយ​គណបក្ស​ប្រជាជន​ទេ​។ លោក បាន​បញ្ជាក់​ថា បើ​សិន​ជា​គណបក្ស​ប្រជាជន រៀប​ចំ​បាតុកម្ម​នោះ គឺ​មិន​មែន​មាន​មនុស្ស​ត្រឹម​១​សែន ឬ ២ សែន​នាក់​ចូល​រួម​នោះ​ទេ គឺ​អាច​មាន​អ្នក​ចូល​រួម​មិន​តិច​ជាង​៣លាន​នាក់​ឡើយ។

យ៉ាង​ណា​ក៏​ដោយ មេ​ក្រុម មេ​ភូមិ និង​ចៅ​សង្កាត់ ដែល​ជា​សកម្មជន​របស់​គណបក្ស​ប្រជាជន ត្រូវ​បាន​គេ​ឃើញ​នៅ​ក្នុង​ក្បួន​បាតុកម្ម​ដែល​ដឹក​នាំ​ដោយ​លោក​ជុំ ម៉ី កាល​ពី​ថ្ងៃ​អាទិត្យ៕

អត្ថបទគួរចាប់អារម្មណ៍