ភ្នំពេញៈ បើទោះបីជាធ្លាប់បង្ហាញជំហរចូលរួមជាមួយ«ឧត្តមក្រុមប្រឹក្សាពិគ្រោះនិងផ្តល់យោបល់»ដែលផ្តួចផ្តើមដោយលោកនាយករដ្ឋមន្ត្រី ហ៊ុន សែនក្ដី ក៏មន្ត្រីជាន់ខ្ពស់គណបក្សចំនួន ២ ក្នុងចំណោមគណបក្សដែលមិនបានចូលរួមផ្សេងទៀតបានប្រកាសជំហរជាថ្មីនៅថ្ងៃទី២៩តុលានេះថា មិនចូលរួមឡើយខណៈនៅបន្តការខ្វែងគំនិតគ្នារវាងគណបក្សចូលរួមនិងមិនបានចូលក្នុងឧត្តមក្រុមប្រឹក្សានេះ។
គណបក្សក្រៅរដ្ឋាភិបាលចំនួន១៥បានព្រមព្រៀង ជាមួយគណបក្សប្រជាជនកម្ពុជា (CPP) កាលពីថ្ងៃទី ២១ ខែសីហា ដើម្បីបង្កើត «ឧត្តមក្រុមប្រឹក្សាពិគ្រោះ និង ផ្តល់យោបល់» ក្រោមគំនិតផ្តួចផ្តើមពីលោកនាយករដ្ឋមន្ត្រី ហ៊ុន សែន ដែលមានសមាសភាពចម្រុះសម្រាប់តាមដានភាពចន្លោះប្រហោងនៃការអនុវត្តច្បាប់របស់រាជរដ្ឋាភិបាលអាណត្តិទី ៦។
កាលនោះគណបក្សចំនួន៤គឺគណបក្សសម្ព័ន្ធដើម្បីប្រជាធិបតេយ្យ (LDP) គណបក្សប្រជាធិបតេយ្យមូលដ្ឋាន (GDP) គណបក្សខ្មែរឈប់ក្រ (KAPP) និងគណបក្សមាតុភូមិយើង (OMLP) បានបដិសេធមិនចូលរួមបង្កើតទេ។
ប៉ុន្តែកាលពីចុងខែសីហាមានគណ២ទៀតបានបង្ហាញជំហរចូលរួមគឺ GDP និង OMLP តែមិនទាន់សម្រេចផ្លូវការហើយត្រូវបានលោកនាយករដ្ឋមន្ត្រីស្វាគមន៍ និងស្នើឲ្យពួកគេដាក់លិខិតស្នើសុំជាមុន។
លោក ចាន់ ប៊ុនហន ប្រធានគណបក្សមាតុភូមយើង (OMLP) ថ្លែងប្រាប់ភ្នំពេញ ប៉ុស្តិ៍ នៅថ្ងៃទី ២៩ តុលានេះថា គណបក្សរបស់លោកបានជួបប្រជុំគ្នាកន្លងមកហើយបានសម្រេចមិនចូលរួមជាមួយ«ឧត្តមក្រុមប្រឹក្សាពិគ្រោះនិងផ្តល់យោបល់»ឡើយបើទោះបីជាខ្លួនធ្លាប់បង្ហាញជំហរចូលរួមកាលពីដំបូងក្ដី។ លោកថាបើការអនុវត្តរបស់រដ្ឋាភិបាលមានការកែធ្វើកំណែទម្រង់ឲ្យមានប្រសិទ្ធភាពជាងមុនលោកក៏សម្ដែងការស្វាគមន៍ផងដែរ។
លោកថាបើទោះបីជាគណបក្សលោកមិនចូលរួមក្ដីក៏លោកអាចបំពេញនៅខាងក្រៅឧត្តមក្រុមប្រឹក្សានេះបានដូចធម្មតាប៉ុន្តែលោកនឹងនៅឃ្លាំមើលសភាពការណ៍បន្តទៀត។
លោកថា៖ «ទោះខ្ញុំធ្វើ (ចូលរួម) ក៏គ្មានអ្នកណាយកចិត្តទុកដាក់ផ្តល់ជាកម្លាំងចិត្តដែរ…យើងដឹងរឿងច្រើន យើងកាន់តែពិបាកច្រើន។ យើងអាចនៅជាប់ផុងពាក់កណ្ដាលខ្លួន…»។
នៅពេលសួរថាតើគណបក្សលោកនឹងពិចារណាចូលរួមជាមួយស្ថាប័នថ្មីមួយនេះនៅពេលក្រោយទៀតឬយ៉ាងណា លោក ប៊ុនហន មានទុទ្ទិដ្ឋិនិយមថា៖«ឥឡូវហ្នឹង ព្រោះវាស្រមេមស្រមាមពេញហ្នឹង ខ្ញុំនឹងមិនទៅប្រឡាក់ប្រឡូកឡើយ»។
លោក យ៉ង សាំងកុមារ ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន(GDP)បានប្រាប់ភ្នំពេញប៉ុស្តិ៍នៅថ្ងៃទី២៩តុលានេះដែរថា កាលពីថ្ងៃទី ២១ ខែតុលា គណបក្សលោកបានប្រជុំគណៈកម្មាធិការនាយកដើម្បីសម្រេចជាផ្លូវការក្នុងការមិនចូលរួមជាមួយឧត្តមក្រុមប្រឹក្សាពិគ្រោះយោបល់។
លោកថ្លែងថា៖«យើងបានសម្រេចជាផ្លូវការថាយើងនឹងមិនចូលរួមជាសមាជិកឧត្តមក្រុមប្រឹក្សាទេតែយើងស្វាគមន៍ដោយរីករាយសន្ទនាមតិជាមួយគណបក្សនយោបាយផ្សេងៗទៀត ជាពិសេសរដ្ឋាភិបាលតាមយន្តការផ្សេងៗទៀត»។
បើទោះបីជាលោកយល់ថាស្មារតីនៃឧត្តមក្រុមប្រឹក្សានេះមានផ្នែកមួយនៃគោលនយោបាយបង្រួបបង្រួមជាតិដែលមានចែងក្នុង«សៀវភៅបៃតង»ដែលជាគោលនយោបាយគណបក្សក្ដី ក៏លោកថាគណបក្សរបស់លោកនៅមានការងារផ្សេងទៀតដែលត្រូវធ្វើ។
លោកសង្កត់ធ្ងន់ថា៖«ក្រៅពីឧត្តមក្រុមប្រឹក្សាក៏យើងអាចមានយន្តការផ្សេងៗដែលរដ្ឋាភិបាលធ្លាប់បានធ្វើជាមួយអង្គការសង្គមស៊ីវិល ធ្វើការជាមួយវិស័យឯកជននិងជាមួយបណ្ដាញសារព័ត៌មានជាដើមដែលធ្វើឡើងទៀងទាត់២ឬ៣ដងក្នុង១ឆ្នាំយើងនឹងចូលរួមក្នុងវេទិកាប្រភេទនេះ ដើម្បីបញ្ចេញទស្សនៈ ឬសន្ទនាមតិទៅលើគោលនយោបាយ ឬបញ្ហាប្រទេសជាតិ»។
លោកបន្ថែមថា៖«មួយវិញទៀត ជាពិសេសយើងចង់ចំណាយពេលវេលាដើម្បីធ្វើកិច្ចអ្វីដែលជួយដល់ពលរដ្ឋនៅតាមមូលដ្ឋានជាពិសេស យុវជនតាមរយៈគម្រោងតូចៗដែលចង់បង្កើតឲ្យមានឧទាហរណ៍ល្អ...ការជំរុញគំនិតល្អៗដល់ប្រជាពលរដ្ឋដែលជាមូលដ្ឋានគ្រឹះក្នុងការផ្សព្វផ្សាយការរបស់យើងបន្តទៅថ្ងៃមុខ»។
ប៉ុន្តែលោក ពេជ្រ ស្រល់ ប្រធានគណបក្សយុវជនកម្ពុជាដែលបានចូលរួមជាមួយឧត្តមក្រុមប្រឹក្សាពិគ្រោះនិងផ្តល់យោបល់ នេះយល់ឃើញថាទោះបីជាក្រុមប្រឹក្សាទើបដំណើរការបានជាង ២ ខែក៏បានសម្រេចលទ្ធផលជាផ្លែផ្កាមួយចំនួនដែរដូចជាការកាយដីពីបឹងព្រែកត្រែងក្នុងខេត្តព្រះសីហនុនិងការចេញប្លង់កម្មសិទ្ធិដីធ្លីជូនពលរដ្ឋ៥៩គ្រួសារនៅខេត្តសៀមរាបនិងកិច្ចការមួយចំនួនទៀត។ ឯការប្រជុំនៅក្នុងឧត្តមក្រុមប្រឹក្សាក៏គ្មានការខ្វែងគំនិតគ្នាអ្វីដែរ។
លោកថា៖«ការសម្ដែងមតិ ចូល ឬមិនចូល វាជាសិទ្ធិរបស់ពួកគាត់។ មិនមានគណបក្សណាមួយឬបុគ្គលណាមួយបង្ខំទេ វាធ្វើឡើងដោយការស្ម័គ្រចិត្តរបស់សាមីគណបក្សនីមួយៗ…ហើយចំពោះមតិដែលថាឧត្តមក្រុមប្រឹក្សានេះមិនមានសក្កានុពលឬមិនមានលទ្ធភាពឲ្យគេធ្វើតាម ខ្ញុំសូមបដិសេធ ពីព្រោះពួកគាត់អត់បានមកចូលធ្វើផង ហើយនិយាយបែបនឹកឃើញអាហ្នឹងមិនមែនជាការត្រឹមត្រូវទេមិនធ្វើឲ្យមានការរីកចម្រើនទេ»។
ទោះយ៉ាងណាលោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីយល់ឃើញថាគណបក្សនយោបាយទាំងនោះមានសិទ្ធិក្នុងការចូលរួមឬមិនចូលរួមជាមួយ«ឧត្តមក្រុមប្រឹក្សាពិគ្រោះនិងផ្តល់យោបល់»។ លោកថាស្ថាប័ននេះកើតចេញពីការស្ម័គ្រចិត្តគណបក្សបន្ថែមដែលចង់ចូលរួមត្រូវតែដាក់ពាក្យស្នើសុំទៅនាយករដ្ឋមន្ត្រី។
លោកថាទោះបីគណបក្សទាំងនោះរក្សាជំហរមិនចូលរួមក៏វាគ្មានប៉ះពាល់ដល់ការងារឧត្តមក្រុមប្រឹក្សានេះដែរ។ លោកក៏បង្ហាញជំហរ មិនសោកស្ដាយណាមួយចំពោះការសម្រេចចិត្តរបស់មេដឹកនាំគណបក្សនយោបាយទាំងនោះទេ។
លោកថា៖«វាជាគោលការណ៍ស្ម័គ្រចិត្តក្នុងពេលកន្លងមកយើងអត់មានគណបក្សប្រឆាំងយើងអត់ឧត្តមក្រុមប្រឹក្សាពិគ្រោះនិងផ្តល់យោបល់យើងក៏នៅទទួលបានជោគជ័យទាំងសេដ្ឋកិច្ចសង្គមកិច្ច សន្តិសុខជាតិ។ ដូច្នេះការចូលរួមគ្រាន់តែជាកម្លាំងបន្ថែមទៅលើរាជរដ្ខាភិបាលក្នុងកិច្ចការជួយកសាងនិងធ្វើឲ្យគុណភាពការងារទាំងនេះរឹតតែខ្ពស់ជាងនេះទៅទៀត»។
លោកសង្កត់ធ្ងន់ថា៖«យើងគ្មានអ្វីត្រូវសោកស្ដាយទេ វាគឺជាគោលជំហររបស់ពួកគាត់»៕