The Phnom Penh Post Search

Search form

Logo of Phnom Penh Post newspaper Phnom Penh Post - គណបក្ស ៥ សន្យា​ផ្តល់​ប្រាក់​ខែ​ច្រើន​ជាង​មុន




គណបក្ស ៥ សន្យា​ផ្តល់​ប្រាក់​ខែ​ច្រើន​ជាង​មុន

គណបក្ស ៥ សន្យា​ផ្តល់​ប្រាក់​ខែ​ច្រើន​ជាង​មុន

ភ្នំពេញៈ បញ្ហា​ប្រាក់​ខែ​មន្រ្តី​រាជការ ត្រូវ​បាន​ផ្តោត​ការ​យក​ចិត្ត​ទុក​ដាក់ នៅ​ក្នុង​កិច្ច​ពិភាក្សា​របស់​គណបក្ស​នយោបាយ​ចំនួន​ប្រាំ​កាល​ពី​ម្សិលមិញ ដោយ​ពួក​គេ​បាន​ធ្វើ​ការ​សន្យា​ដំឡើង​ប្រាក់​ខែ​ច្រើន​ជាង​មុន ប្រសិន​បើ​ពួក​គេ​ជាប់​ឆ្នោត។

130722_06
លោក សុន ឆ័យ នៅក្នុងកិច្ចពិភាក្សាកាលពីម្សិលមិញ ហុង មិនា

គណបក្ស​ប្រជាជន បាន​អវត្តមាន​ពី​ការ​ជជែក​ពិភាក្សា ដែល​រៀបចំ​ឡើង ដោយ​សមាគម​មន្ត្រី​រាជការ​ស៊ីវិល​ឯករាជ CICA ដែល​មាន​ការ​ចូល​រួម​ពី​គណបក្ស​សញ្ជាតិ​កម្ពុជា គណបក្ស​សាធារណរដ្ឋ​ប្រជាធិបតេយ្យ គណបក្ស​ខ្មែរ​ឈប់​ក្រ គណបក្ស​ខ្មែរ​អភិវឌ្ឍ​សេដ្ឋកិច្ច និង​គណបក្ស​សង្គ្រោះ​ជាតិ។

លោក សុន ឆ័យ តំណាង​គណបក្ស​សង្គ្រោះ​ជាតិ បាន​ថ្លែង​ជា​ដដែល អំពី​ការ​សន្យា​របស់​គណបក្ស​លោក​ក្នុង​ការ​ដំឡើង​ប្រាក់​ខែ​ដល់​មន្រ្តី​រាជការ​យ៉ាង​តិច ២៥០ ដុល្លារ​ក្នុង​មួយ​ខែ។

លោក​បន្ត​ថា​៖ «យើង​នឹង​ដំឡើង​ប្រាក់​ខែ​ដល់​យ៉ាង​ហោច​ណាស់ ១ លាន​រៀល​សម្រាប់ គ្រូ​បង្រៀន និង​មន្រ្តី​រាជការ។ យើង​ធានា​ថា យើង​អាច​ធ្វើ​បាន​ទាំង​ស្រុង​»។ គណបក្ស​ប្រឆាំង​បាន​អះអាង​ជា​យូរ​មក​ហើយ​ថា ការ​ប្រមូល​មក​វិញ​នូវ​ថវិកា​ជាតិ​ដែល​បាត់​បង់​ដោយ​សារ​អំពើ​ពុករលួយ វា​នឹង​លើស​ពី​ចំនួន​ដែល​ត្រូវ​ដំឡើង​ប្រាក់​ខែ​ទៅ​ទៀត។

គណបក្ស តូចៗ​បាន​ធ្វើ​ការ​សន្យា​ស្រដៀង​គ្នា​ផង​ដែរ ប៉ុន្តែ​តំណាង​គណបក្ស​ខ្មែរ​ឈប់​ក្រ លោក ចាប ចាន់ដារ៉ា បាន​លើក​ឡើង​នូវ​វិធានការ​ដំឡើង​ប្រាក់​ខែ​រៀង​ចម្លែក​ពី​គេ​បន្តិច។

លោក​ថ្លែង​ថា​៖«យើង​មាន​គោល​នយោបាយ​ច្បាស់​មួយ​សម្រាប់​បក្ស​របស់​យើង ហើយ​យើង​មាន​សេដ្ឋី​ចំនួន ១២ នាក់ ដែល​នឹង​មក​ជួយ​ប្រជាជន​កម្ពុជា នៅ​ពេល​គណបក្ស​របស់​យើង​ឈ្នះ​ឆ្នោត»។

បើ​ទោះ​បី​ជា​គណបក្ស​ប្រជាជន​មិន​បាន​ចូល​រួម​នៅ​ក្នុង​ការ​ពិភាក្សា​កាល​ពី​ម្សិលមិញ​ក៏​ដោយ​ក៏​លោក សុខ ឥសាន តំណាង​គណបក្ស​កាន់​អំណាច​នេះ បាន​ការពារ​ចំណាត់​ការ​របស់​រដ្ឋាភិបាល ចំពោះ​ការ​ផ្តល់​ប្រាក់​ខែ​មន្រ្តី​រាជការ នៅ​ក្នុង​ការ​ពិភាក្សា ដែល​ត្រូវ​បាន​ចាក់​ផ្សាយ​តាម​ទូរទស្សន៍​កាល​ពី​សៅរ៍​។ «គណបក្ស​ប្រជាជន​គិត​គូរ​អំពី​មន្រ្តី​រាជការ​។ នោះ​ហើយ​ជា​មូល​ហេតុ​ដែល​ប្រាក់​ខែ​របស់​ពួក​គេ​បាន​ឡើង​ជា​បន្ត​បន្ទាប់»។

អ្នក​រៀបចំ​កម្មវិធី​ជជែក​ពិភាក្សា​នេះ លោក កៅ ពឿន នាយក​នៃ​សមាគម​មន្រ្តី CICA បាន​ថ្លែង​ថា គណបក្ស​ទាំង​អស់​ចំនួន ៨ ត្រូវ​បាន​អញ្ជើញ​ឲ្យ​ចូល​រួម ប៉ុន្តែ​គណបក្ស​បី​មិន​បាន​ចូល​រួម។

លោក រស់ វីរៈ គ្រូ​វិទ្យាល័យ​ម្នាក់ ក្នុង​ខេត្ត កណ្តាល ដែល​បាន​ចូល​រួម​ការ​ជជែក​ពិភាក្សា​បាន​ថ្លែង​ថា លោក​មាន​ការ​ជឿ​ជាក់​ចំពោះ​ការ​សន្យា​របស់​គណបក្ស​សង្គ្រោះ​ជាតិ ដោយ​សង្ឃឹម​ថា ប្រាក់​ខែ​របស់​លោក នឹង​មាន​ចំនួន​ច្រើន​ជាង​ទ្វេ​ដង ប្រសិន​បើ​គណបក្ស​នេះ​ឈ្នះ​ឆ្នោត​។

លោក វីរៈ បាន​ថ្លែង​បន្ត​ថា​៖ «សព្វ​ថ្ងៃ​ខ្ញុំ​ទទួល​បាន​ច្រើន​ជាង ៤០ ម៉ឺន​រៀល ឬ ១០០ ដុល្លារ​ក្នុង​មួយ​ខែ​។ នោះ​គឺ​មិន​គ្រប់​គ្រាន់​ទេ​សម្រាប់​ខ្ញុំ​ផ្គត់​ផ្គង់​គ្រួសារ​របស់​ខ្ញុំ»៕ PS

អត្ថបទគួរចាប់អារម្មណ៍