ភ្នំពេញៈ គណៈកម្មការដែលត្រូវបានបង្កើតឡើងដោយលោក ព្រុំ សុខា រដ្ឋមន្ដ្រីក្រសួងមុខងារសាធារណៈថ្មីកំពុងធ្វើការត្រួតពិនិត្យភាពមិនប្រក្រតីនៃការជ្រើសរើសមន្ដ្រីក្របខ័ណ្ឌពិសេសចំនួន ១៣៥ នាក់ដែលក្រសួងនេះធ្លាប់បានចេញប្រកាសជ្រើសរើសកាលពីថ្ងៃទី ១៨ ខែកុម្ភៈ ឆ្នាំ ២០២០។ នេះបើតាមលោក ឈឿន ប៊ុណ្ណារ័ត្ន អ្នកនាំពាក្យក្រសួងមុខងារសាធារណៈ។
ក្រសួងមុខងារសាធារណៈបានចេញសេចក្តីប្រកាសមួយចុះថ្ងៃទី ១៦ ខែមេសាដោយបាននិរាករណ៍ប្រកាសលេខ ៧៦៩ ចុះថ្ងៃទី ១៨ ខែកុម្ភៈ ឆ្នាំ ២០២០ ស្ដីពីការជ្រើសរើសមន្ដ្រីរាជការឲ្យចូលក្របខ័ណ្ឌក្រសួងនេះ និងប្រកាសលេខ ១៣៩៨ ចុះថ្ងៃទី ២៧ ខែមីនា ឆ្នាំ ២០២០ ស្ដីពីការទទួលស្គាល់ មន្ដ្រីរាជការក្របខ័ណ្ឌក្រសួងមុខងារសាធារណៈ។ ការប្រកាសស្ដីពីការនិរាករណ៍នេះគឺយោងតាមចំណារបស់លោកនាយករដ្ឋមន្ដ្រី ហ៊ុន សែន ចុះថ្ងៃទី ៣១ ខែមីនា ឆ្នាំ ២០២០ និងលិខិតលេខ ២២១៩ ចុះថ្ងៃទី ២៦ ខែមីនា ឆ្នាំ ២០២០ របស់ក្រសួងសេដ្ឋកិច្ច និងហិរញ្ញវត្ថុផងដែរ។
នៅថ្ងៃទី ២៣ ខែមេសា ក្រសួងមុខងារសាធារណៈបានរៀបចំកិច្ចប្រជុំពិនិត្យលើដំណើរការនៃការអនុវត្តប្រកាសស្តីពីការនិរាករណ៍ ការជ្រើសរើសមន្ត្រីក្របខ័ណ្ឌពិសេសចំនួន ១៣៥ នាក់។ «ជាលទ្ធផលនៃកិច្ចប្រជុំនេះក្រសួងសម្រេចបង្កើតគណៈកម្មការត្រួតពិនិត្យភាពមិនប្រក្រតីនៃករណីជ្រើសរើសមន្ត្រីក្របខ័ណ្ឌពិសេស ១៣៥ នាក់។ ស្របតាមស្មារតីសម្រេចរបស់រាជរដ្ឋាភិបាល និងគោលការណ៍របស់ក្រសួងសេដ្ឋកិច្ច និងហិរញ្ញវត្ថុ។ សំដៅធានាប្រសិទ្ធភាពនៃវិធានការគ្រប់គ្រងចំនួនបុគ្គលិកមន្ត្រីរាជការស៊ីវិល និងចំណាយបន្ទុកបុគ្គលិកឆ្នាំ ២០២០ និងឆ្លើយតបទៅនឹងស្ថានភាពជាក់ស្តែងដែលកម្ពុជាកំពុងប្រឈមនឹងបញ្ហាជំងឺកូវីដ ១៩»។
លោក ឈឿន ប៊ុណ្ណារ័ត្ន បានថ្លែងប្រាប់ភ្នំពេញប៉ុស្តិ៍កាលពីថ្ងៃចន្ទម្សិលមិញថា ទាក់ទងនឹងការបង្កើតគណៈកម្មការត្រួតពិនិត្យភាពមិនប្រក្រតីនៃការជ្រើសរើសមន្ដ្រីក្របខ័ណ្ឌពិសេសចំនួន ១៣៥ នាក់ ត្រឹមថ្ងៃចន្ទម្សិលមិញគណៈកម្មការកំពុងដំណើរការភារកិច្ចរបស់ខ្លួន ពិនិត្យលើរឿងនេះ។ លោកបន្តថា៖ «ចំពោះលទ្ធផលយ៉ាងណានោះមិនទាន់ដឹងនៅឡើយទេ។ សូមរង់ចាំលទ្ធផលជាផ្លូវការរបស់គណៈកម្មការសិន»។
លោក អូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី ២០ ខែ មេសា ឆ្នាំ ២០២០ បានផ្ញើលិខិត ១ ច្បាប់ទៅរដ្ឋមន្ត្រីក្រសួងមុខងារសារធាណៈលើករណីវិធានការគ្រប់គ្រងចំនួនបុគ្គលិកមន្ត្រីរាជការស៊ីវិល និងចំណាយបន្ទុកប្រចាំឆ្នាំ ២០២០ ផងដែរ ដោយយោងតាមចំណារបស់លោកនាយករដ្ឋមន្ដ្រីខាងលើ។
លោក អូន ព័ន្ធមុនីរ័ត្ន បញ្ជាក់ថា៖ «ខ្ញុំសូមជម្រាបជូនឯកឧត្ដមរដ្ឋមន្ដ្រីជ្រាបថាតាមចំណារឯកភាពដ៏ខ្ពង់ខ្ពស់ចុះថ្ងៃទី ៣១ ខែមីនា ឆ្នាំ ២០២០ សម្ដេចតេជោ នាយករដ្ឋមន្ដ្រីបានផ្ដល់ការសម្រេចដូចខាងក្រោមក្នុងបរិការណ៍ដែលកម្ពុជាកំពុងទទួលរងផលប៉ះពាល់ធ្ងន់ធ្ងរពីការរីករាលដាលនៃជំងឺកូវីដ១៩, និរាករណ៍នូវប្រកាសលេខ ៧៦៩ មស.ប្រក ចុះថ្ងៃទី ១៨ ខែ កុម្ភៈ ឆ្នាំ ២០២០ ស្ដីពីការជ្រើសរើសមន្ដ្រីរាជការចំនួន ១៣៥ នាក់ ឲ្យចូលក្របខ័ណ្ឌក្រសួងមុខងារសាធារណៈ»។
លោកឲ្យដឹងទៀតថា លោកនាយករដ្ឋមន្ត្រីក៏បានផ្ដល់ការសម្រេចផ្ដល់គោលការណ៍រួមរបស់រាជរដ្ឋាភិបាលឲ្យផ្អាកការផ្ដល់ក្របខ័ណ្ឌពិសេសដែលលើសពីចំនួនមន្ត្រីរាជការចូលនិវត្តន៍ដល់គ្រប់ក្រសួងស្ថាប័នដទៃទៀតទាំងអស់នៅក្នុងឆ្នាំ ២០២០។ លើសពីនេះស្នើសុំផ្អាកការផ្ដល់ក្របខ័ណ្ឌពិសេសដែលលើសចំនួនមន្ត្រីចូលនិវត្ដន៍ដល់គ្រប់ក្រសួងស្ថាប័នទាំងអស់សម្រាប់ឆ្នាំ ២០២១ ដល់ឆ្នាំ ២០២៣ ផងដែរ។
ក្រសួងមុខងារសាធារណៈកាលពីថ្ងៃទី ២៣ ខែមេសា បានចេញសេចក្ដីប្រកាសព័ត៌មានដល់សាធារណជនថា ដោយផលប៉ះពាល់ពីវិបត្ដិជំងឺកូវីដ ១៩ ការជ្រើសរើសក្របខ័ណ្ឌថ្មីសម្រាប់ឆ្នាំ ២០២០ ឲ្យចូលបម្រើការការងារជាមន្ដ្រីរាជការនៅតាមក្រសួង ស្ថាប័ន អង្គភាពនៅថ្នាក់ជាតិ និងថ្នាក់ក្រោមជាតិត្រូវបានផ្អាកជាបណ្ដោះអាសន្នរហូតដល់មានការជូនដំណឹងជាថ្មី៕