ភ្នំពេញ៖ គណៈកម្មការចំពោះកិច្ចសម្រាប់ការចាក់វ៉ាក់សាំងការពារវីរុសកូវីដ១៩នៅទូទាំងប្រទេស បានប្រកាសផ្អាកការចាក់វ៉ាក់សាំងសម្រាប់នៅរាជធានីភ្នំពេញរយៈពេល ៣ ថ្ងៃសិន គឺចាប់ពីថ្ងៃទី ១៧ ដល់ ១៩ ខែមេសា ឆ្នាំ ២០២១ នេះ។
លោកស្រី ឱ វណ្ណឌីន អ្នកនាំពាក្យនៃក្រសួងសុខាភិបាល និងជាប្រធានគណៈកម្មការចំពោះកិច្ចសម្រាប់ការចាក់វ៉ាក់សាំងការពារវីរុសកូវីដ១៩ បានថ្លែងនៅថ្ងៃសៅរ៍ ទី ១៧ ខែមេសា នេះថា យោងតាមការសម្រេចដ៏ខ្ពង់ខ្ពស់របស់លោកនាយករដ្ឋមន្ត្រី ហ៊ុន សែន គឺការចាក់វ៉ាក់សាំងការពារវីរុសកូវីដ១៩នៅរាជធានីភ្នំពេញត្រូវផ្អាកជាបណ្តោះអាសន្នដោយគិតចាប់ពីថ្ងៃទី ១៧ ខែមេសា ដល់ថ្ងៃទី ១៩ ខែមេសា។
លោកស្រីបានមានប្រសាសន៍ថា៖ «នៅថ្ងៃទី ២០ ខែមេសា ការចាក់វ៉ាក់សាំងការពារវីរុសកូវីដ១៩ នឹងដំណើរការចាក់ជាធម្មតាវិញ ហើយសម្រាប់បងប្អូនប្រជាពលរដ្ឋដែលមានបំណងធ្វើដំណើរមកកាន់រាជធានីភ្នំពេញ ដើម្បីចាក់វ៉ាក់សាំងនេះ សុំមេត្តាវិលត្រលប់ទៅកាន់កន្លែងដែលខ្លួនស្នាក់នៅវិញ»។
លោកស្រី ឱ វណ្ណឌីនថា ប្រជាពលរដ្ឋត្រូវរង់ចាំការជូនដំណឹងសាជាថ្មីដែលខាងគណៈកម្មការចំពោះកិច្ចសម្រាប់ការចាក់វ៉ាក់សាំងការពារវីរុសកូវីដ១៩ នឹងធ្វើការផ្សាយជូននៅពេលខាងមុខនេះ៕