ភ្នំពេញៈ លោក ហេង សំរិន ប្រធានរដ្ឋសភាកម្ពុជាកាលពីថ្ងៃម្សិលមិញបានដឹកនាំកិច្ចប្រជុំគណៈកម្មាធិការអចិន្រៃ្តយ៍រដ្ឋសភាដោយសម្រេចទទួលយកសេចក្ដីព្រាងច្បាប់ចំនួន ៣ ប្រគល់ជូនគណៈកម្មការជំនាញរដ្ឋសភាយកទៅពិនិត្យ និងសិក្សានិងធ្វើរបាយការណ៍ត្រឡប់មកគណៈកម្មាធិការអចិន្រៃ្តយ៍វិញ។
សេចក្ដីព្រាងច្បាប់ទាំង ៣ នោះរួមមាន សេចក្ដីព្រាងច្បាប់ស្ដីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ និងសេចក្ដីព្រាងច្បាប់ស្ដីពីការគ្រប់គ្រងល្បែងពាណិជ្ជកម្មដែលសេចក្ដីព្រាងច្បាប់ទាំង ២ នេះត្រូវបានប្រគល់ជូនគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មពិនិត្យ និងសិក្សា។
ចំណែកសេចក្ដីព្រាងច្បាប់មួយទៀតគឺស្ដីអំពីការអនុម័តយល់ព្រមលើសន្ធិសញ្ញាស្ដីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌរវាងកម្ពុជា និងប្រទេសកូរ៉េខាងត្បូង ត្រូវបានបញ្ជូនទៅគណៈកម្មការនីតិកម្ម និងយុត្តិធម៌នៃរដ្ឋសភា។
កាលពីថ្ងៃម្សិលមិញ ភ្នំពេញប៉ុស្ដិ៍មិនអាចសុំការបញ្ជាក់បន្ថែមពីលោក ឡេង ប៉េងឡុង អ្នកនាំពាក្យរដ្ឋសភាជុំវិញសេចក្ដីព្រាងច្បាប់ទាំង ៣ នេះទេ ដោយសារមិនមានអ្នកទទួលទូរស័ព្ទ។
សេចក្ដីព្រាងច្បាប់ស្ដីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ និងសេចក្ដីព្រាងច្បាប់ស្ដីពីការគ្រប់គ្រងល្បែងពាណិជ្ជកម្មគឺត្រូវទ្រឹស្ដីការគណៈរដ្ឋមន្ត្រីអនុម័តកាលពីដើមខែកក្កដា។
សេចក្ដីព្រាងច្បាប់ស្ដីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋគឺមាន ១២ ជំពូក និង ៩០ មាត្រាដែលរៀបចំឡើងដើម្បីពង្រឹងក្របខ័ណ្ឌច្បាប់ រចនាសម្ព័ន្ធស្ថាប័ន និងលើកកម្ពស់សមត្ថភាពស្ថាប័នក្នុងការគ្រប់គ្រងទ្រព្យសម្បត្តិរដ្ឋ។ ក្នុងនោះមាន ដីធ្លី ក្រោមដី ភ្នំ សមុទ្រ បាតសមុទ្រ ក្រោមបាតសមុទ្រ ឆ្នេរសមុទ្រ អាកាស កោះ ទន្លេ ព្រែក បឹងព្រៃឈើ ធនធានធម្មជាតិ មជ្ឈមណ្ឌលសេដ្ឋកិច្ចវប្បធម៌ មូលដ្ឋានការពារប្រទេស សំណង់ផ្សេងៗដែលបានកំណត់ថា ជារបស់រដ្ឋ។
ចំណែកសេចក្ដីព្រាងច្បាប់ស្ដីពីការគ្រប់គ្រងល្បែងពាណិជ្ជកម្មវិញមាន ១២ ជំពូក និង ៩៧ មាត្រាដែលគ្រប់គ្រងលើវិស័យកាស៊ីណូ និងល្បែងពាណិជ្ជកម្មដទៃទៀតយ៉ាងតឹងរ៉ឹង និងប្រកបដោយប្រសិទ្ធភាពខ្ពស់។ ច្បាប់នេះកំណត់ចំនួនទុនវិនិយោគអប្បបរមាសម្រាប់អាជីវកម្មកាស៊ីណូ ការកំណត់តំបន់ដែលគួរអនុញ្ញាត ឬមិនអនុញ្ញាតឲ្យមានល្បែងពាណិជ្ជកម្ម ការពង្រឹងសមត្ថភាពស្ថាប័ន និងការបំពាក់នូវបច្ចេកទេសសមស្របក្នុងការត្រួតពិនិត្យជាប្រចាំលើដំណើរការរបស់ប្រតិបត្តិករល្បែងនេះ ព្រមទាំងមានវិធានការតឹងរ៉ឹងចំពោះការលាងសម្អាតប្រាក់ និងហិរញ្ញប្បទានភេរវកម្មផងដែរ។
លោក ជិន ម៉ាលីន អ្នកនាំពាក្យក្រសួងយុត្តិធម៌បានប្រាប់ភ្នំពេញប៉ុស្ដិ៍ម្សិលមិញថា សេចក្ដីព្រាងច្បាប់មួយទៀតស្ដីអំពីការអនុម័តយល់ព្រមលើសន្ធិសញ្ញាស្ដីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌរវាងកម្ពុជា និងកូរ៉េខាងត្បូងដូចដែលកម្ពុជាបានធ្វើជាមួយបណ្ដាប្រទេសជាមិត្តទាំងអស់ក្នុងកិច្ចខិតខំប្រឹងប្រែងទប់ស្កាត់បទល្មើសឆ្លងដែន។
លោកថា៖ «ជាទូទៅ!ក្នុងវិស័យព្រហ្មទណ្ឌគឺមានការជួយគ្នាទៅវិញទៅមកផ្នែកច្បាប់ ដូចជា ការផ្ទេរទណ្ឌិត និងការធ្វើបត្យាប័នទប់ស្កាត់ និងបង្ក្រាប។ កិច្ចព្រមព្រៀងនេះដើម្បីពង្រឹងកិច្ចសហប្រតិបត្តិការផ្នែកព្រហ្មទណ្ឌដូចជា ទប់ស្កាត់បទល្មើសឆ្លងដែនក្នុងនោះមានការសហការគ្នាក្នុងការស្រាវជ្រាវ ដើម្បីបង្ក្រាបបទល្មើសឆ្លងដែន និងការផ្លាស់ប្ដូរព័ត៌មាន និងឯកសារគ្នាទៅវិញទៅមកដើម្បីដំណើរការតាមនីតិវិធីទៅតាមផ្លូវច្បាប់របស់ប្រទេសរៀងៗខ្លួន»៕