.jpg)
តំណាងគណៈកម្មការទី ៧ នៃរដ្ឋសភា និងក្រសួងអប់រំពិភាក្សាបង្កើតប្រព័ន្ធអប់រំបែបឌីជីថលថ្ងៃទី ២៣ មិថុនា។ រូប រដ្ឋសភា
ភ្នំពេញៈ គណៈកម្មការទី ៧ នៃរដ្ឋសភាសហការគាំទ្រជាមូលដ្ឋានបច្ចេកទេសក្នុងការបង្កើត APP E-Learning ដល់ក្រសួងអប់រំ យុវជន និងកីឡា ដើម្បីបន្តលើការជំរុញ និងផ្តល់សម្រាប់ការអប់រំឌីជីថលដល់សិស្សានុសិស្សឱ្យកាន់តែមានប្រសិទ្ធភាពក្នុងកាលៈទេសៈដ៏លំបាកនៃការរីករាលដាលជំងឺកូវីដ ១៩ នេះ។
ការបន្តលើការជំរុញ និងផ្តល់ការអប់រំឌីជីថលដល់សិស្សានុសិស្សនេះបានធ្វើឡើងក្នុងកិច្ចប្រជុំរវាងលោក ហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការកិច្ចការសាសនា វប្បធម៌ និងទេសចរណ៍នៃរដ្ឋសភា (គណៈកម្មការទី ៧ នៃរដ្ឋសភា) និងលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡានៅទីស្ដីការក្រសួងអប់រំកាលពីថ្ងៃទី ២៣ ខែមិថុនា។
ក្រោយជំនួបប្រជុំក្នុងថ្ងៃដដែល លោក ហ៊ុន ម៉ានី បានសរសេរនៅលើហ្វេសប៊ុកផ្ទាល់ខ្លួនរបស់លោកថាក្នុងកាលៈទេសៈលំបាក ការអប់រំ មិនមែនជារឿងដាច់ដោយឡែកដែលតម្រូវឱ្យក្រសួងអប់រំ យុវជន និងកីឡាធ្វើការតែម្នាក់ឯងនោះទេ ប៉ុន្តែជារឿងរបស់សង្គម ហើយត្រូវការការចូលរួមពីសំណាក់គ្រប់ភាគីពាក់ព័ន្ធ។
លោកថា៖ «ថ្ងៃនេះ យើងទាំងអស់គ្នាបានប្រជុំគិតគូរ ពិភាក្សា និងផ្តល់ធាតុចូលបន្ថែមរួមគ្នាលើគម្រោងការបង្កើតឱ្យមានជា APP- E-Learning របស់ក្រសួងអប់រំ យុវជន និងកីឡា ដើម្បីធ្វើយ៉ាងណាជំរុញឱ្យការផ្តល់ការអប់រំឌីជីថលដល់សិស្សានុសិស្សកាន់តែមានប្រសិទ្ធភាព»។
លោកបន្ដថា៖ «ទន្ទឹមនឹងការខិតខំប្រឹងប្រែងទាំងអស់ យើងខ្ញុំសង្ឃឹមថា អាណាព្យាបាលសិស្សានុសិស្សទាំងអស់នឹងបន្តចូលរួមគាំទ្ររាល់ចំណាត់ការនានា និងសហការអនុវត្តតាមការណែនាំរបស់ក្រសួងជាបន្តបន្ទាប់»។
គណៈកម្មការទី ៧ នៃរដ្ឋសភាបានបង្ហាញតាមរយៈកិច្ចប្រជុំថា គណៈកម្មការនេះបានធ្វើការសហការគាំទ្រជាមូលដ្ឋានបច្ចេកទេសក្នុងការបង្កើតជា APP របស់ក្រសួងដើម្បីឆ្លើយតបនូវសំណូមពររបស់ក្រសួងអប់រំ។
គណៈកម្មការទី ៧ នៃរដ្ឋសភាលើកទឹកចិត្ត អាណាព្យាបាលគ្រប់ៗរូបបន្តផ្តល់ការយកចិត្តទុកដាក់ណែនាំកូនៗឱ្យស្វ័យសិក្សានៅផ្ទះ និងតាមរយៈមធ្យោបាយអនឡាញនានាស្របតាមការណែនាំរបស់ក្រសួងអប់រំផងដែរ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាថ្លែងពីថ្ងៃពុធថា ក្រសួងអប់រំផ្តោតលើការលើកកម្ពស់ការអប់រំតាមបែបឌីជីថលដូចមានចែងនៅក្នុងផែនការយុទ្ធសាស្ត្រវិស័យអប់រំ ២០១៩-២០២៣ និង នៅក្នុងផែនទីបង្ហាញផ្លូវគោលដៅអភិវឌ្ឍន៍ប្រកបដោយចីរភាពឆ្នាំ ២០៣០ ស្តីពីការអប់រំនៅកម្ពុជា។ ការអប់រំតាមបែបឌីជីថលមានគោលដៅចូលរួមជាមួយរាជរដ្ឋាភិបាលក្នុងការលើកកម្ពស់គុណភាពមូលធនមនុស្សសម្រាប់ចូលរួមអភិវឌ្ឍសេដ្ឋកិច្ចឌីជីថល។
លោកថា៖ «ជាក់ស្តែងក្រសួងអប់រំ យុវជន និងកីឡាបានលើកកម្ពស់កិច្ចសហការដែលមានស្រាប់ជាមួយគណៈកម្មការទី ៧ នៃរដ្ឋសភា និងគ្រប់តួអង្គពាក់ព័ន្ធ ដើម្បីបង្កើនវិសាលភាព និងប្រសិទ្ធភាពការអប់រំឌីជីថលដោយផ្តោតលើការគាំទ្របច្ចេកទេសសម្រាប់បង្កើត App E-learning របស់ក្រសួងអប់រំ យុវជន និងកីឡាជូនសិស្សានុសិស្ស»។
លោក ហង់ជួន ណារ៉ុន ថ្លែងក្នុងសន្និសីទសារព័ត៌មាននៃការបើកការដ្ឋានជួសជុល និងកែលម្អអគារ «មជ្ឈមណ្ឌលសម្រាប់ការអប់រំ ឌីជីថល និងការអប់រំពីចម្ងាយ» កាលពីថ្ងៃទី ២២ មិថុនា នៅវិទ្យាល័យព្រះស៊ីសុវត្ថិ ថា សិស្សនៅតាមសាលារៀនចំណេះដឹងទូទៅរបស់រដ្ឋទាំងអស់មាន ៣ លាននាក់។
ក្នុងចំណោមសិស្ស ៣ លាននាក់នេះ សិស្សប្រមាណ ១,៥ លាននាក់ប៉ុណ្ណោះ ដែលទទួលបានសេវាការសិក្សាតាមប្រព័ន្ធឌីជីថល (អនឡាញ)។ ឯសិស្ស ១,៥ លាននាក់ទៀត ដែលមិនទទួលបានការសិក្សាពេញលេញ ពួកគេត្រូវពឹងទៅលើការសិក្សាតាមសៀវភៅគោលសិក្សារបស់ក្រសួងអប់រំ៕
