ភ្នំពេញៈ គណៈកម្មការចំពោះកិច្ច ដែលចាត់តាំងដោយលោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស បានបញ្ចប់ការស៊ើបអង្កេតករណីកងរាជអាវុធហត្ថខេត្តព្រៃវែង ដេញបាញ់ឡានដឹកស្រូវនិងប្រើអំពើហិង្សាលើអ្នកបើកឡាន រួមនឹងព្រូឡាន ខណៈមេបញ្ជាការកងរាជអាវុធហត្ថខេត្តនេះនឹងត្រូវផ្លាស់មកបញ្ជាការដ្ឋានកងរាជអាវុធហត្ថលើផ្ទៃប្រទេស។
ប្រធានគណៈកម្មការចំពោះកិច្ច ដែលបានចាត់តាំងដោយមេបញ្ជាការកងរាជអាវុធហត្ថលើផ្ទៃប្រទេស ទាក់ទិននឹងរឿងបាញ់រថយន្តដឹកស្រូវនេះ លោក ស៊ិន សូផាន្នី បានឲ្យដឹងពីម្សិលមិញថា គណៈកម្មការនេះ បានបញ្ចប់ការស៊ើបអង្កេតរបស់ខ្លួនហើយ និងបានកំណត់មុខសញ្ញាមន្ត្រីពាក់ព័ន្ធមួយចំនួន ប៉ុន្តែលោក សុំមិនផ្តល់ព័ត៌មានលម្អិតទេ។
លោកបានប្រាប់ថា៖ «យើងត្រូវធ្វើការបូកសរុបរបាយការណ៍ទាំងនេះ ដើម្បីឆ្លងទៅថ្នាក់លើជាមុនសិន ទើបអាចជូនជាព័ត៌មានលម្អិតបាន ដែលតាមគម្រោងនឹងមានសន្និសីទសារព័ត៌មានបញ្ជាក់ពីរឿងនេះ»។
ទាក់ទិនករណីមន្ត្រីកងរាជអាវុធហត្ថដេញតាមពីខេត្តត្បូងឃ្មុំ រហូតដល់ខេត្តព្រៃវែង និងបានបាញ់រះទៅលើរថយន្តដឹកស្រូវព្រមទាំងចាប់ចងអ្នកបើកឡានពីរនាក់ធ្វើទារុណកម្មយ៉ាងព្រៃផ្សៃ កាលពីយប់ថ្ងៃទី១៩ ខែមីនានោះ ក្នុងដំណាក់កាលនៃការស៊ើបអង្កេតកន្លងទៅមេបញ្ជាការកងរាជអាវុធហត្ថប្រចាំផ្ទៃប្រទេស លោក សៅ សុខា ធ្លាប់បានបញ្ជាក់ថា “រឿងនេះ វាមិនមែនពាក់ព័ន្ធ តែប៉េអឹម ៤ នាក់ទេ ពីព្រោះរឿងនេះតមកពីខេត្តត្បូងឃ្មុំ តើវាមានមនុស្សប៉ុន្មាននាក់ ដែលបានចូលរួម ហើយអ្នកណាខ្លះ...វាមានការពាក់ព័ន្ធគ្នាច្រើន វាមានអាវុធហត្ថ ហើយមិនមែនអាវុធហត្ថផង នៅក្នុងរឿងហ្នឹង»។
តាមប្រភពពីមន្ត្រីជាន់ខ្ពស់កងរាជអាវុធហត្ថលើផ្ទៃប្រទេសម្នាក់ឲ្យដឹងថា ដើម្បីកែសម្រួលការងារ មេបញ្ជាការ មេបញ្ជាការរងកងរាជអាវុធហត្ថ តាមបណ្តាខេត្តមួយចំនួន រួមនឹងមេបញ្ជាការរង និងជាស្នងការ ស្នងការរង ដែលមានមុខតំណែងពីរ នឹងត្រូវផ្លាស់ប្តូរ និងផ្ទេរភារកិច្ច ដើម្បីពង្រឹងការងាររបស់កងរាជអាវុធហត្ថ។
ក្នុងនោះ លោក សុខ គ្រីន មេបញ្ជាការកងរាជអាវុធហត្ថ ខេត្តព្រៃវែង ក៏ត្រូវបានស្នើផ្លាស់មកជានាយរងសេនាធិការ នៃសេនាធិការដ្ឋានកងរាជអាវុធហត្ថលើផ្ទៃប្រទេសវិញ។
មេបញ្ជាការកងរាជអាវុធហត្ថខេត្តព្រៃវែង លោក សុខ គ្រីន ឲ្យដឹងថា លោកមិនខ្វល់នឹងការផ្លាស់ប្តូរនេះឡើយ ហើយលោក ក៏រំពឹងថា គណៈកម្មការចំពោះកិច្ច នឹងស្វែងរកការពិតពាក់ព័ន្ធនឹងរឿងរថយន្តដឹកស្រូវនោះ។
លោកបន្តថា៖ «ដូរក៏ដូរទៅករណីរឿងរថយន្តដឹកស្រូវនោះអ្នកណាថាអីថាទៅ ការពិតនៅតែជាការពិត ខ្ញុំគ្មានតវ៉ាអីទេ គណៈកម្មការបានស៊ើបអង្កេតហើយ ខ្ញុំគ្មានប្រតិកម្មទេ»។
ក្រៅពីលោក សុខ គ្រីន ក៏មានលោក ជួន ជឿន មេបញ្ជាការកងរាជអាវុធហត្ថខេត្តកំពង់ឆ្នាំងលោក កែវ ជា មេបញ្ជាការកងរាជអាវុធហត្ថខេត្តក្រចេះ និងលោក ទេព វណ្ណា មេបញ្ជាការកងរាជអាវុធហត្ថ ខេត្តកំពត ត្រូវបានស្នើជានាយរងសេនាធិការនៃសេនាធិការដ្ឋានកងរាជអាវុធហត្ថលើផ្ទៃប្រទេសផងដែរ។
លោក មាស សុវណ្ណ មេបញ្ជាការកងរាជអាវុធហត្ថ ខេត្តកណ្តាល ត្រូវបានស្នើជាមេបញ្ជាការកងរាជអាវុធហត្ថ ខេត្តកំពង់ឆ្នាំង លោក ម៉ែន ស៊ីប៊ន មេបញ្ជាការកងរាជអាវុធហត្ថ ខេត្តកំពង់ស្ពឺ ត្រូវបានស្នើជាមេបញ្ជាការកងរាជអាវុធហត្ថខេត្តព្រៃវែង លោក សាន្ត ប៊ុនថាន មេបញ្ជាការកងរាជអាវុធហត្ថខេត្តស្វាយរៀង ត្រូវបានស្នើជា មេបញ្ជាការកងរាជអាវុធហត្ថ ខេត្តក្រចេះ ចំណែក លោក ប៉ោ វណ្ណនិត មេបញ្ជាការរងកងរាជអាវុធរាជធានីភ្នំពេញត្រូវស្នើជាមេបញ្ជាការកងរាជអាវុធហត្ថ ខេត្តសៀមរាប។
ជាមួយគ្នានេះ លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស ត្រូវបានស្នើជា មេបញ្ជាការកងរាជអាវុធហត្ថខេត្តពោធិ៍សាត់ ចំណែកលោក អេង ហ៊ី នាយការិយាល័យអប់រំ ផ្សព្វផ្សាយ នឹងត្រូវស្នើមកជាអ្នកនាំពាក្យកងរាជអាវុធហត្ថលើផ្ទៃប្រទេសវិញ។
ទោះយ៉ាងណា អ្នកនាំពាក្យកងរាជអាវុធហត្ថលើផ្ទៃប្រទេស លោក ខេង ទីតូ បានឲ្យដឹងកាលពីម្សិលមិញថា ការស្នើសុំផ្លាស់ប្តូរនិងផ្ទេរភារកិច្ចនេះ គឺ ជាសំណើរបស់លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេសដើម្បីធ្វើការកែសម្រួលការងារ តាមការចាត់តាំងថ្មីនេះ។
លោកប្រាប់ថា៖ «ទាំងនេះជាសំណើមិនទាន់មានសេចក្តីសម្រេចពីថ្នាក់លើជាផ្លូវការនៅឡើយទេ បន្ទាប់ពីសម្រេចគឺនឹងមានពិធីប្រកាសតែងតាំង និងផ្លាស់ប្តូរនៅពេលឆាប់ៗខាងមុខនេះ»៕
