The Phnom Penh Post Search

Search form




Logo of Phnom Penh Post newspaper Phnom Penh Post - គណៈកម្មការ​ប្រឹក្សា​ការងារ សម្រេច​ឱ្យ​បើក​ដំណើរការ​ឡើង​វិញ​រោងចក្រ សហគ្រាស ដោយ​មាន​ការ​បែងចែក​វេន​ធ្វើ​ការ​របស់​កម្មករ និយោជិត




គណៈកម្មការ​ប្រឹក្សា​ការងារ សម្រេច​ឱ្យ​បើក​ដំណើរការ​ឡើង​វិញ​រោងចក្រ សហគ្រាស ដោយ​មាន​ការ​បែងចែក​វេន​ធ្វើ​ការ​របស់​កម្មករ និយោជិត

Content image - Phnom Penh Post
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណ:កម្មការប្រឹក្សាការងារ​ ដឹកនាំកិច្ចប្រជុំគណៈកម្មការប្រឹក្សាការងារ​ អាណត្តិទី១០ លើកទី១ តាមប្រព័ន្ធអនឡាញ (Zoom) កាលពីម្សិលមិញ។ រូបថត ក្រសួងការងារ

គណៈកម្មការ​ប្រឹក្សា​ការងារ សម្រេច​ឱ្យ​បើក​ដំណើរការ​ឡើង​វិញ​រោងចក្រ សហគ្រាស ដោយ​មាន​ការ​បែងចែក​វេន​ធ្វើ​ការ​របស់​កម្មករ និយោជិត

ភ្នំពេញ៖ គណៈកម្មការ​ប្រឹក្សា​ការងារ​នៃ​ក្រសួងការងារ និង​បណ្តុះបណ្តាល​វិជ្ជាជីវៈ បាន​សម្រេច​ឱ្យ​បើក​ដំណើរការ​សកម្មភាព​អាជីវកម្ម​ឡើង​វិញ របស់​រោងចក្រ​សហគ្រាស ដោយ​បែងចែក​កម្មករ​និយោជិត​ចំនួន ៥០% នៃ​កម្មករ​និយោជិត​សរុប ឱ្យ​ធ្វើ​ការ​ផ្លាស់វេន​គ្នា​រៀង​រាល់ ២ សប្តាហ៍​ម្តង ប៉ុន្តែ​ការ​ផ្លាស់វេន​នេះ​អាច​លើកលែង​ចំពោះ​រោងចក្រ ដែល​មាន​កម្មករ​និយោជិត​យ៉ាង​តិច ៨០% នៃ​ចំនួន​សរុប​បាន​ទទួល​វ៉ាក់សាំង​ការពារ​ជំងឺ​កូវីដ ១៩ គ្រប់​ដូស។

ការ​សម្រេច​នេះ ត្រូវ​បាន​ធ្វើ​ឡើង បន្ទាប់​ពី​គណៈកម្មការ​ប្រឹក្សា​ការងារ បាន​បើក​កិច្ច​ប្រជុំ​អាណត្តិ​ទី១០ លើក​ទី១ តាម​ប្រព័ន្ធ​អនឡាញ (Zoom) ដែល​មាន​សមាសភាព​ចូលរួម ២៨ រូប ដើម្បី​ពិភាក្សា​លើ​វិធាន​អនាម័យ និង​សុវត្ថិភាព​ការងារ នៅ​ពេល​បើក​ដំណើរការ សកម្មភាព អាជីវកម្ម​ឡើង​វិញ របស់​រោងចក្រ សហគ្រាស ក្រោយ​បញ្ចប់​ការ​បិទ​ខ្ទប់​ដោយ​វិធានការ​រដ្ឋបាល។

នៅ​ក្នុង​សេចក្តី​ថ្លែងការណ៍​រួម​នៃ​គណៈកម្មការ​ប្រឹក្សា​ការងារ កាល​ពី​ថ្ងៃទី ០៤ ខែ​ឧសភា បាន​ឱ្យ​ដឹង​ថា ក្រសួង​ការងារ និង​បណ្តុះបណ្តាល​វិជ្ជាជីវៈ បាន​ស្នើសុំ​គោលការណ៍​ទៅ​រាជរដ្ឋាភិបាល ដើម្បី​កំណត់​នូវ​លក្ខណៈ​វិនិច្ឆ័យ​ក្នុង​ការ​ផ្អាក​ជា​បណ្តោះអាសន្ន និង​ការ​បើក​ដំណើរការ​ឡើង​វិញ​នូវ​រោងចក្រ សហគ្រាស ដែល​មាន​កម្មករ​និយោ​ជិត​ឆ្លង​ជំងឺ​កូវីដ ១៩។

សេចក្តី​ថ្លែងការណ៍​បាន​លើក​ឡើង​ថា៖ «ក្រោយ​បញ្ចប់​ការ​បិទ​ខ្ទប់​ដោយ​វិធានការ​រដ្ឋបាល នៅ​ពេល​បើក​ដំណើរការ​សកម្មភាព​អាជីវកម្ម​ឡើង​វិញ រោងចក្រ សហគ្រាស​ទាំង​នោះ ត្រូវ​អនុវត្តន៍​នូវ​វិធានការ​ដោយ​បែងចែក​កម្មករ​និយោជិត​ចំនួន ៥០% នៃ​កម្មករ​និយោជិត​សរុប​ឱ្យ​ធ្វើ​ការ​ផ្លាស់វេន​គ្នា​រៀងរាល់ ២ សប្តាហ៍​ម្តង»។

ចំពោះ​ការ​ជ្រើសរើស​កម្មករ​និយោជិត​ដែល​ត្រូវ​ចូល​ធ្វើ​ការ​វេន​ទី១ (២ សប្តាហ៍​ដំបូង) គឺ​ត្រូវ​ផ្តល់​អាទិភាព​ទៅ​លើ​កម្មករ​និយោជិត​ដែល​បាន​ចាក់​វ៉ាក់សាំង​ការពារ​ជំងឺ​កូវីដ ១៩ ដូស​ទី១និង​ទី២ ហើយ មិន​ស្ថិត​នៅ​ក្នុង​តំបន់​ដែល​តម្រូវ​ឱ្យ​ផ្តល់​សំណាក ដើម្បី​វិភាគ​រក​មេរោគ​កូវីដ ១៩ ឬ​បាន​ផ្តល់​សំណាក ដើម្បី​វិភាគ​រក​មេរោគ​កូវីដ ១៩ រួច​ហើយ​ដោយ​មាន​ការ​បញ្ជាក់​ពី​ក្រុម​គ្រូពេទ្យ​មាន​សមត្ថកិច្ច​យក​សំណាក ឬ​ពេទ្យ​ការងារ​នៃ​ក្រសួង​ការងារ។

ជាមួយ​គ្នា​នេះ​ដែរ ម្ចាស់​រោងចក្រ សហគ្រាស​ត្រូវ​ផ្តល់​ប្រាក់​ឈ្នួល​ចំនួន ៥០% នៃ​ប្រាក់​ឈ្នួល​អប្បបរមា (ប្រាក់​ឈ្នួល​អប្បបរមា បូក​នឹង​ប្រាក់​អតីតភាព​ការងារ និង​ប្រាក់​អត្ថប្រយោជន៍​ប្រចាំ​ខែ​ផ្សេងៗ ដែល​កម្មករ​និយោជិត​ធ្លាប់​ទទួល​បាន​នាពេល​កន្លង​មក) ដោយ​រក្សា​ទុក​នូវ​អត្ថប្រយោជន៍​ប្រចាំ​ខែ និង​អត្ថប្រយោជន៍​ផ្សេងៗ​ដូច​ជា ការ​ថែម​ម៉ោង​ជាដើម។

សេចក្តី​ថ្លែងការណ៍​នេះ​បាន​បញ្ជាក់​ថា រោងចក្រ សហគ្រាស ត្រូវ​ផ្តល់​ម៉ាស់​យ៉ាង​តិច​ចំនួន ១ ដល់​កម្មករ​ក្នុង​ម៉ោង​ការងារ រៀបចំ​ឱ្យ​មាន​ការ​បាញ់​អាល់កុល​លើ​ដៃ និង​ដង​ខ្លួន ព្រម​ទាំង​ការ​វាស់​កម្តៅ​មុន​ពេល​ចូល​ធ្វើ​ការ និង​ក្រោយ​ពេល​អាហារ​ថ្ងៃត្រង់ ត្រូវ​គ្រប់គ្រង​ប្រព័ន្ធ​ខ្យល់​ចេញ​ចូល​ក្នុង​ទីតាំង ផលិតកម្ម​ឱ្យ​បាន​ល្អ បម្រុង​ទុក​នូវ​ឧបករណ៍​យក​សំណាក ដើម្បី​វិភាគ​រក​មេរោគ​កូវីដ ១៩ ដែល​ទទួល​ស្គាល់​ដោយ​ក្រសួង​សុខាភិបាល​ចំនួន ១០% នៃ​កម្មករ​និយោ​ជិត​សរុប​របស់​រោងចក្រ។

ក្រសួង​ការងារ​ក៏​តម្រូវ​ឱ្យ​រោងចក្រ សហគ្រាស ត្រូវ​យក​សំណាក ដើម្បី​វិភាគ​រក​មេរោគ​កូវីដ ១៩ រៀង​រាល់​សប្តាហ៍​ចំពោះ​កម្មករ​និយោជិត​ដែល​ធ្វើ​ការ​ចល័ត​ពី​អគារ​មួយ​ទៅ​អគារ​មួយ កម្មករ​និយោជិត​ដែល​ប្រាស្រ័យ​ទាក់ទង​ជាមួយ​បុគ្គល​ខាង​ក្រៅ ជា​ពិសេស​បុគ្គល​ដែល​មាន​ប្រវត្តិ​ធ្វើ​ដំណើរ​ទៅ​ក្រៅ​ប្រទេស កម្មករ​និយោជិត​ដែល​ធ្វើ​ការ​​នៅ​អាហារដ្ឋាន សន្តិសុខ ឬ​អ្នក​អនាម័យ ដែល​ផ្តល់​សេវា​ឆ្លង​អគារ កម្មករ​និយោជិត​ដែល​ទទួល​បន្ទុក​បាញ់​សម្លាប់​មេរោគ និង​វាស់​កម្ដៅ។

ទន្ទឹម​នឹង​នេះ​ដែរ គណៈកម្មការ​ប្រឹក្សា​ការងារ ក៏​បាន​ស្នើសុំ​រាជរដ្ឋាភិបាល ជួយ​ផ្តល់​ការ​ឧបត្ថម្ភ​គ្រឿង​ឧបភោគ​បរិភោគ​ជូន​បងប្អូន​កម្មករ​និយោជិត​នៅ​ក្នុង​អំឡុង​ពេល​ផ្អាក​សកម្មភាព​អាជីវកម្ម ឬ​ពេល​កំពុង​សម្រាក​ព្យាបាល​ជំងឺ​កូវីដ ១៩ ឬ​ពេល​ធ្វើ​ចត្តាឡីស័ក​តាម​ការ​កំណត់​របស់​អាជ្ញាធរ​មាន​សមត្ថកិច្ច។

នៅ​ក្នុង​នេះ​ដែរ ក្រសួង​ការងារ​បាន​កំណត់​ផង​ដែរ នូវ​លក្ខខណ្ឌ​នៃ​ការ​បែងចែង​វេន​ការងារ​រៀង​រាល់ ២ សប្តាហ៍​ម្តង ត្រូវ​បាន​លើកលែង​ចំពោះ​រោងចក្រ ដែល​មាន​កម្មករ​និយោជិត​យ៉ាង​តិច ៨០% នៃ​ចំនួន​កម្មករ​និយោជិត​សរុប​បាន​ទទួល​វាក់សាំង​ការពារ​ជំងឺ​កូវីដ ១៩ គ្រប់​ដូស ឬ​ប្រភេទ រោងចក្រ ដែល​មាន​វិធានការ​សុខភាព និង​សុវត្ថិភាព​ការងារ​តឹងរ៉ឹង​ក្នុង​ការ​ការពារ​កម្មករ​និយោជិត​ពី​ការ​កើត ឬ​ឆ្លង​ជំងឺ​កូវីដ ១៩ និង​ទទួល​បាន​ការ​អនុញ្ញាត​ពី​អធិការ​ការងារ។

កម្មករ​និយោជិត ដែល​ស្នាក់​នៅ​ក្នុង​ភូមិសាស្ត្រ​ដែល​ត្រូវ​បាន​បិទ​ខ្ទប់ ដោយ​វិធានការ​រដ្ឋបាល​មិន​ត្រូវ​បាន​អនុញ្ញាត​ឱ្យ​មក​បំពេញ​ការងារ​នៅ​ក្នុង​រោងចក្រ សហគ្រាស​ដូច​បាន​កំណត់​ខាង​លើ​បាន​ឡើយ។

លោក ហ្វា សាលី ប្រធាន​សម្ព័ន្ធ​សហជីពជាតិ​បាន​ប្រាប់​ ភ្នំពេញ ប៉ុស្តិ៍ នៅ​ថ្ងៃ​នេះ​ថា លោក​មាន​ការ​បារម្ភ​ទាក់ទង​នឹង​ការ​វិល​ត្រលប់​ចូល​ធ្វើ​ការងារ​វិញ​របស់​កម្មករ​និយោជិត ក្នុង​ពេល​ដែល​ករណី​នៃ​ការ​ឆ្លង​រាលដាល​នៃ​វីរុស​កូវីដ ១៩ មិន​ទាន់​បាន​ធូរ​ស្រាល​នៅ​ឡើយ។

លោក​បាន​ថ្លែង​ថា៖ «ខ្ញុំ​បារម្ភ​លើ​ការ​វិល​ចូល​ធ្វើ​ការ​វិញ​របស់​កម្មករ ហើយ​ខ្ញុំ​សុំ​ឱ្យ​ក្រសួង​ក៏​ដូចជា​រោងចក្រ​សហគ្រាស​នៅ​ក្នុង​ទីក្រុង​ភ្នំពេញ និង​ក្រុង​តាខ្មៅ ពិចារណា​ឡើង​វិញ ដើម្បី​បញ្ចៀស​នូវ​ការ​ឆ្លង​រីក​រាលដាល​ឡើង​វិញ ចំពោះ​បងប្អូន​កម្មករ​យើង»។

ជាមួយ​គ្នា​នេះ​ដែរ គណៈកម្មការ​ប្រឹក្សា​ការងារ​បាន​ស្នើសុំ​រាជរដ្ឋាភិបាល​បន្ត​ផ្តល់​អាទិភាព​ក្នុង​ការ​ទទួល​បាន​វ៉ាក់សាំង​ការពារ​ជំងឺ​កូវីដ ១៩ ដល់​កម្មករ​និយោជិត ជា​ពិសេស​កម្មករ និយោជិត រោងចក្រ អ្នក​ដឹក​ជញ្ជូន​កម្មករ​និយោជិត និង​អ្នក​រត់​កង់បី អ្នក​ស្នាក់នៅ​តំបន់​ផ្ទះ​ជួល អ្នក​លក់ដូរ​ជុំវិញ​រោងចក្រ អាជីវករ​នៅ​តាម​ផ្សារ​នានា បុគ្គលិក​បម្រើ​ការ​នៅ​តាម​ភោជនីយដ្ឋាន រមណីយដ្ឋាន និង​សណ្ឋាគារ៕

អត្ថបទគួរចាប់អារម្មណ៍