.jpg)
ដំណើរការពិនិត្យច្បាប់ការពារវិនិយោគកាលពីថ្ងៃចន្ទ។ រដ្ឋសភា
ភ្នំពេញៈ សេចក្ដីព្រាងច្បាប់ចំនួន ៣ ទាក់ទងនឹងការការពារវិនិយោគរវាងកម្ពុជា និងសាធារណរដ្ឋប្រជាមានិតបង់ក្លាដែស សហភាពអារ៉ាប់អេមីរ៉េត និងសាធារណរដ្ឋតួកគី ត្រូវបានគណៈកម្មការជំនាញរដ្ឋសភានិងតំណាងរាជរដ្ឋាភិបាលលើកយកមកពិនិត្យសិក្សានៅវិមានរដ្ឋសភា មុនពេលបញ្ជូនទៅ គណៈកម្មាធិការអចិន្រៃ្តយ៍រដ្ឋសភាដើម្បីសម្រេចដាក់បញ្ចូលក្នុងរបៀបវារៈនៃប្រជុំពេញអង្គរដ្ឋសភា នាពេលខាងមុខ។
កាលពីថ្ងៃ ២៧ ឧសភា រដ្ឋសភាបានបង្ហាញពីសេចក្តីព្រាងច្បាប់ទាំង ៣ នេះ រួមមាន សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងរវាងព្រះរាជាណាចក្រកម្ពុជានិងប្រទេសទាំង៣ខាងលើ ស្តីពីការជំរុញ និងការការពារទៅវិញទៅមកនៃវិនិយោគ។
ជំនួបពិនិត្យសិក្សាសេចក្តីព្រាងច្បាប់នេះ ត្រូវបានលើកយកមកពិភាក្សាដោយភាគីគណៈកម្មការជំនាញរដ្ឋសភា រួមមាន គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក ដឹកនាំដោយ លោក ជា វ៉ាន់ដេត សហការជាមួយគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មានដឹកនាំដោយលោក ឈាង វុន ជាប្រធានគណៈកម្មការនេះ។
ចំណែកតំណាងរដ្ឋាភិបាលមាន លោក ជិន ប៊ុនស៊ាន ទេសរដ្ឋមន្ត្រីទទួលបន្ទុកបេសកកម្មពិសេសនិងជាអនុប្រធានក្រុមប្រឹក្សាអភិវឌ្ឍន៍កម្ពុជា និងលោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC)។
លោក ជិន ប៊ុនស៊ាន តំណាងរាជរដ្ឋាភិបាលបានថ្លែងប្រាប់រដ្ឋសភាថា សេចក្តីព្រាងខាងលើមានគោលបំណងជំរុញកិច្ចសហប្រតិបត្តិការសេដ្ឋកិច្ចរវាងប្រទេសកម្ពុជា និងប្រទេសជាមិត្តឱ្យកាន់តែទូលំទូលាយព្រមទាំងជាយន្តការមួយទាក់ទងនឹងលំហូរទុនវិនិយោគ រវាងកម្ពុជា និងអន្តរជាតិ។
លោកបន្ដថា៖ «សេចក្តីព្រាងទាំង៣នេះក៏នឹងផ្តល់នូវការធានាផ្លូវច្បាប់ដល់ការវិនិយោគបរទេសដែលចូលមកស្នាក់នៅក្នុងប្រទេសកម្ពុជា ហើយអ្នកវិនិយោគកម្ពុជាដែលចេញទៅរកស៊ីនៅក្នុងប្រទេសដៃគូដោយឈរលើមូលដ្ឋានស្មើភាព និងផ្តល់ផលប្រយោជន៍ឱ្យគ្នាទៅវិញទៅមក»។
លោក ជិន ប៊ុនស៊ាន បានពន្យល់ថា ភាគីជាប់កិច្ចសន្យាជាម្ចាស់ផ្ទះក៏មានភារកិច្ចផ្តល់នូវប្រព្រឹត្តកម្មត្រឹមត្រូវស្មើភាពដើម្បីឱ្យអ្នកវិនិយោគដែលកំពុងវិនិយោគលើទឹកដីរបស់ខ្លួនទទួលបាននូវការការពារ និងសន្តិសុខពេញលេញ ព្រមទាំងមិនធ្វើឱ្យខូចប្រយោជន៍ដល់ការគ្រប់គ្រង ការថែរក្សា ការប្រើប្រាស់ ការទទួលផល និងការចាត់ចែងការវិនិយោគដោយវិធានការមិនសមហេតុផលឬរើសអើងពីភាគីណាមួយឡើយ។
លោក ជា វ៉ាន់ដេត និង លោក ឈាង វុន បានបង្ហាញការឯកភាពទាំងស្រុងលើខ្លឹមសារ និងការតាក់តែងសេចក្តីព្រាងច្បាប់ទាំង ៣ នេះ។
លោក ឈាង វុន បានបញ្ជាក់ថា៖ «នឹងបញ្ជូនសេចក្ដីព្រាងច្បាប់ទាំង ៣ ខាងលើទៅគណៈកម្មាធិការអចិន្រៃ្តយ៍រដ្ឋសភាដើម្បីសម្រេចដាក់បញ្ចូលក្នុងរបៀបវារៈសម័យប្រជុំពេញអង្គរដ្ឋសភាធ្វើការពិភាក្សា និងអនុម័តនាពេលខាងមុខ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា បានថ្លែងថា ការបង្កើតសេចក្ដីព្រាងច្បាប់នេះគឺជាហេដ្ឋារចនាសម្ព័ន្ធមួយរបស់កម្ពុជាដើម្បីទាក់ទាញវិនិយោគិនអន្តរជាតិឲ្យមកកម្ពុជា ព្រោះកាលណាមានច្បាប់បែបនេះអាចជាផ្នែកសំខាន់មួយក្នុងការការពារអ្នកចង់មកវិនិយោគឱ្យទទួលបានសុខសុវត្ថិភាព។
លោកបន្ដថា៖ «បរទេសគេត្រូវការភាពរឹងមាំផ្នែកច្បាប់ដើម្បីការពារវិនិយោគិនរបស់គេ។ប៉ុន្ដែយើងមានច្បាប់ហើយ ត្រូវអនុវត្ដច្បាប់នោះឱ្យបានត្រឹមត្រូវ កុំឱ្យបរទេសមិនគោរពច្បាប់ជាតិយើង»។
ស្រដៀងគ្នានេះដែរ អ្នកវិភាគនយោបាយ និងសង្គម លោក ឡៅ ម៉ុងហៃ បានថ្លែងថា ច្បាប់ទាំងនេះ ឆ្លុះ បញ្ចាំងនូវគោលនយោបាយទាក់ទាញវិនិយោគទុនពីប្រទេសនានាឲ្យបានកាន់តែច្រើនតាមដែលអាចធ្វើទៅបាន។
លោកថា៖ «ទៅអនាគតគេអាចប្រមើលបានប្រហែលមានវិនិយោគទុនមកកម្ពុជាច្រើនជាងវិនិយោគទុនពីកម្ពុជា ទោះបីសហភាពអេមីរ៉ាតអារ៉ាប់អាចទាក់ទាញលំហូរទុនពីកម្ពុជាឬឆ្លងកាត់តាមកម្ពុជាក៏ដោយ។ គេអាចរំពឹងទុកថា សភានឹងអនុម័តច្បាប់ទាំង ៣ នេះ ជាមិនខាន»៕
