The Phnom Penh Post Search

Search form




Logo of Phnom Penh Post newspaper Phnom Penh Post - គណៈកម្មការ​សភា​កោះ​ហៅ​រដ្ឋមន្ត្រី​សុខាភិបាល​ចូល​បំភ្លឺ

គណៈកម្មការ​សភា​កោះ​ហៅ​រដ្ឋមន្ត្រី​សុខាភិបាល​ចូល​បំភ្លឺ

លោក ម៉ម ប៊ុនហេង រដ្ឋមន្ត្រី​ក្រសួង​សុខាភិបាល​។
លោក ម៉ម ប៊ុនហេង រដ្ឋមន្ត្រី​ក្រសួង​សុខាភិបាល​។ ហេង ជីវ័ន

គណៈកម្មការ​សភា​កោះ​ហៅ​រដ្ឋមន្ត្រី​សុខាភិបាល​ចូល​បំភ្លឺ

ភ្នំពេញៈ គណៈកម្មការ​អង្កេត បោសសម្អាត និង​ប្រឆាំង​អំពើ​ពុករលួយ ​តាមរយៈ​ប្រធាន​ស្តីទី​រដ្ឋសភា បាន​ស្នើ​នាយករដ្ឋមន្រ្តី ចាត់ឲ្យ​រដ្ឋមន្រ្តី​ក្រសួង​សុខាភិបាល និង​សហការី ចូល​បំភ្លឺ​ករណី​អំពើ​ពុករលួយ​នៃ​ថវិកា​ជំនួយ​របស់​មូលនិធិ​សកល ការគ្រប់គ្រង និង​ភាព​មិន​ប្រក្រតី​​ពាក់ព័ន្ធ​នឹង​វិស័យ​សុខាភិបាល​នៅ​ថ្ងៃ​ទី​ ១០​ ខែ​មេសា​ ម៉ោង​ ៩ ព្រឹក នៅ​មន្ទីរ​រដ្ឋសភា។

សំណើ​អន្តរាគមន៍​ចាត់តាំង​ថ្នាក់ដឹកនាំ​ក្រសួង​សុខាភិបាល មក​បំភ្លឺ​នេះ​ធ្វើ​ឡើង​តាមរយៈ​លិខិត​ចុះ​ថ្ងៃ​ទី​ ២៧​ ខែ​មីនា របស់​ប្រធាន​គណៈកម្មការ​ទី​ ១០ ​​នៃ​រដ្ឋសភា លោក ហូរ វ៉ាន់ ដោយ​មាន​ហត្ថលេខា​ទទួល​ស្គាល់​ពី​ប្រធាន​ស្តីទី​រដ្ឋសភា លោក កឹម សុខា ចុះ​ថ្ងៃ​ទី​ ៣០ ខែ​មីនា ផ្ញើ​ជូន​​លោកនាយករដ្ឋមន្រ្តី លោក ហ៊ុន សែន ដើម្បី ឆ្លើយតប​ទៅ​នឹង​បណ្តឹង​មួយ​​ចំនួន​ ដែល​គណៈកម្មការ​នេះ​ទទួល​បាន​កន្លងមក​។

ក្នុង​លិខិត​នេះ​គណៈកម្មការ​ទី​ ១០ រដ្ឋសភា ​គ្រោង​ចោទសួរ​អំពី​ការបាត់បង់​ថវិកា​ជំនួយ​របស់​អង្គការ​មូលនិធិ​សកល​ក្នុង​មជ្ឈមណ្ឌល​ជាតិ​ប្រយុទ្ធ នឹង​​ជំងឺ​គ្រុនចាញ់ ប៉ារ៉ាស៊ីតសាស្រ្ត និង​បាណកសាស្ត្រ​, ការ​គ្រប់គ្រង​លើ​តម្លៃ និង​គុណភាព​ឱសថ ការដោះដូរ​ទីតាំង​មន្ទីរពេទ្យ​មួយ​ចំនួន​នៅ​ភ្នំពេញ, ការគ្រប់គ្រង​គ្រឿង​ឧបភោគ​បរិភោគ​​ដែល​ប៉ះពាល់​ដល់​សុខភាព​សាធារណៈ​ និង​ការគ្រប់គ្រង​ឱសថស្ថាន និង​គ្លីនិក​ជាដើម។

លោក ហ៊ូ សិទ្ធី នាយខុទ្ទកាល័យ​លោកនាយករដ្ឋមន្រ្តី ហ៊ុន សែន បាន​ប្រាប់​ភ្នំពេញ​ប៉ុស្តិ៍​ពី​ម្សិលមិញ​ថា​លោក​មិន​ទាន់​បាន​ឃើញ​លិខិត​សុំ​អន្តរាគមន៍​នោះ​ទេ ដោយសារ​លោក​សម្រាក​ពី​ការងារ​ប៉ុន្មាន​​ថ្ងៃ​មក​ហើយ។ ជាមួយ​គ្នា​នេះ អគ្គនាយក​នៃ​អគ្គនាយកដ្ឋាន​បច្ចេកទេស​សុខាភិបាល និង​ជា​អ្នកនាំពាក្យ​ក្រសួង​សុខាភិបាល លោកស្រី ឱ វ៉ាន់ឌីន បាន​អះអាង​ថា មិន​ទាន់​ទទួល​បាន​លិខិត​កោះ​ហៅ​នេះ​នៅ​ឡើយ​។

លោកស្រី​ថា៖ «ខ្ញុំ​មិន​ទាន់​បាន​ឃើញ​លិខិត និង​ប្រធានបទ​នៃ​ការបំភ្លឺ​នោះ​នៅ​ឡើយ​ទេ ចឹង​ហើយ​ខ្ញុំ​អត់​មាន​អី អាច​អធិប្បាយ​បាន​ទេ»។

ទាក់ទិន​នឹង​ប្រធានបទ​ដែល​គ្រោង​នឹង​ចោទសួរ​នោះ ប្រធាន​គណៈកម្មការ​អង្កេត បោសសម្អាត​ និង​ប្រឆាំង​អំពើ​ពុករលួយ លោក ហូរ វ៉ាន់ បាន​គូស​បញ្ជាក់​ថា ៖ «អារឿង Global Fund រក​ឃើញ​ថា​ ប្រើ​លុយ​គេ​ក្នុង​អំពើ​ពុករលួយ​ជា​បណ្តាញ ហេតុម៉េច​ ក៏​អត់​មាន​​វិធានការ យើង​ចង់​ដឹង​ តើ​រដ្ឋមន្រ្តី​មាន​វិធានការ​បែប​ណា​ហើយ»​។

គួរ​រំឭក​ថា កាលពី​ថ្ងៃ​ទី​ ១៤ ខែ​វិច្ឆិកា​ ឆ្នាំ​ ២០១៣ មូលនិធិ​សកល Global Fund បាន​ចេញ​ផ្សាយ​របាយការណ៍​មួយ ដោយ​ធ្វើការ​ស៊ើបអង្កេត​ប្រាក់​ជំនួយ​​មូលនិធិ​របស់​ខ្លួន ជាង​​ ៨០ ​លាន​ដុល្លារ​​អាមេរិក​ ដែល​ផ្តល់​ឲ្យ​ស្ថាប័ន​ចំណុះ​ក្រសួង​សុខាភិបាល ដោយ​រកឃើញ​​នូវ​ភ័ស្តុតាង​សំខាន់ៗ​ជាច្រើន​ដែល​​​បញ្ជាក់​ថា​ការដេញថ្លៃ​​មួយ​ចំនួន​​មាន​ភាព​មិនប្រក្រតី​ការកិបកេង​​ប្រាក់ជំនួយ​ និង​ការប្រើប្រាស់​​ប្រាក់ជំនួយ​​នេះ​ខុស​គោលដៅ ដែល​ស្តែង​ចេញ​ពី​បណ្តាញ​ប្រព្រឹត្ត​អំពើពុករលួយ​មួយ។

អតីត​ប្រធាន​មជ្ឈមណ្ឌល​ជាតិប្រយុទ្ធ​នឹង​ជំងឺ​គ្រុនចាញ់ ប៉ារ៉ាស៊ីតសាស្ត្រ​បាណកសាស្ត្រ លោក ឌួង សុជាតិ ដែល​រង​ការចោទ​ថា ទទួល​ប្រាក់​សគុណ​ជិត​ ៥ ​សែន​ដុល្លារ​ពី​ក្រុមហ៊ុន​ផ្គត់ផ្គង់​មុង​ជា​ថ្នូរ​នឹង​កិច្ចសន្យា​ជាមួយ​ក្រសួង​សុខាភិបាល ធ្លាប់​ប្រាប់​​ថា របាយការណ៍​មូលនិធិសកល ដែល​ចោទប្រកាន់​ថា អំពើ​ពុករលួយ​បាន​កើតឡើង​ក្នុង​ដំណើរការ​ដេញ​​ថ្លៃ​នោះ គឺ​ត្រូវបាន​បោះពុម្ព​តែ​មួយ​ចំហៀង​មិន​បាន​លើក​ពី​សកម្មភាព​ទាំង​ស្រុង​នោះ​ទេ​។

លោក​ថា ការពិត​នោះ​ការដេញថ្លៃ​ធ្វើ​យ៉ាង​ត្រឹមត្រូវ​ និង​ថោក​បំផុត​ ដែល​នាំឲ្យ​ក្រុមហ៊ុន​ទាំង​ពីរ​នោះ​ទទួល​បាន​សិទ្ធិ​ផ្គត់ផ្គង់ ហើយ​លោក​​មិន​បាន​កេងប្រវ័ញ្ច ឬ​ទទួល​ប្រាក់​កម្រៃ​ជា​ថ្នូរ​នៃ​កិច្ចសន្យា​ពី​ក្រុមហ៊ុន​ទាំងនោះ​ទេ​។

ភ្នំពេញ​ប៉ុស្តិ៍​មិន​អាច​សុំ​ការឆ្លើយតប​ពី​ប្រធាន​អង្គភាព​ប្រឆាំង​អំពើ​ពុករលួយ​ លោក ឱម យ៉ិនទៀង ​បាន​ទេ​ កាលពី​ម្សិលមិញ​។ កន្លង​ទៅ​អង្គភាព​នេះ​ធ្លាប់​អះអាង​ថា​ ខ្លួន​កំពុង​ស៊ើបអង្កេត​ការចោទប្រកាន់​​នោះ ប៉ុន្តែ​រហូត​មក​ទល់​ពេល​នេះ​មិន​ទាន់​ចេញ​ផ្សាយ​របាយការណ៍​ ឬ​លទ្ធផល​នៅ​ឡើយ​។

បើ​តាម​លោក ហូរ វ៉ាន់ ទន្ទឹម​នឹង​រឿង​នេះ​សាធារណជន​ក៏​នៅ​មាន​ភាព​ងឿងឆ្ងល់​ពី​ភាព​មិន​ប្រក្រតី​នៃ​ការគ្រប់គ្រង​របស់​ក្រសួង​សុខាភិបាល​លើ «រឿង​ថ្នាំពេទ្យ​ ដែល​នាំ​ចូល​មក​ដោយ​ខូច​គុណភាព ត្រូវ​​បាន​គេ​ផ្សាយ​បន្តបន្ទាប់ ប៉ះពាល់​អាយុជីវិត​របស់​អ្នក​ជំងឺ...ទីតាំង​ពេទ្យ​មួយ​ចំនួន​ត្រូវ​បាន​ដោះដូរ តែ​បែរ​ជា​បាត់​ដូចជា​ពេទ្យបង្អែក​ចំការមន មិន​ដឹង​ជា​ទៅ​ណា​បញ្ហា​នៃ​ការគ្រប់គ្រង​ម្ហូបអាហារ​ ពលរដ្ឋ​មាន​ការភ័យខ្លាច ដោយសារ​បន្លែ ផ្លែឈើ និង​សាច់សុទ្ធ តែ​មាន​ជាតិ​គីមី»។

លោក​បន្ថែម​ថា៖ «ជំនួប​នេះ​នឹង​លើក​បញ្ហា​គួរ​ឲ្យ​បារម្ភ​រឿង​គ្លីនិក​ អ្នក​ខ្លះ​អត់​បាន​រៀនសូត្រ​អី​ផង ចេះ​លក់ និង​ផ្សំ​ថ្នាំ​ឲ្យ​គេ​លេប​ទាំង​គ្មាន​វិជ្ជាជីវៈ ក្រសួង​សុខាភិបាល​ ត្រូវ​ទទួល​ខុសត្រូវ...បញ្ហា​ឆ្លង​មេរោគអេដស៍​នៅ​ឃុំ​រកា ស្រុក​សង្កែ ខេត្ត​បាត់ដំបង»។

ករណី​ឆ្លង​មេរោគ​អេដស៍​ជាង​ ២០០ ​នាក់ ​ក្នុង​ឃុំ​រកា ក្រៅពី​គ្រូពេទ្យ​ភូមិ លោក យ៉ែម ជ្រិន ដែល​សង្ស័យ​មាន​ចេតនា​ចម្លង​មេរោគ​អេដស៍​នោះ រដ្ឋមន្រ្តី​ក្រសួង​សុខាភិបាល​បាន​បង្ហើប​​ថា នៅ​មាន​អ្នក​ពាក់ព័ន្ធ​ផ្សេង​ទៀត តែ​លោក​មិន​បាន​បង្ហាញ​ថា ជា​នរណា​ទេ?​ហើយ​រហូត​មក​ទល់​ពេល​នេះ​ក៏​នៅ​មិន​ទាន់​មាន​សេចក្តី​រាយការណ៍​ពី​អ្នក​ពាក់ព័ន្ធ​នោះ​នៅ​ឡើយ​ដែរ​៕

អត្ថបទគួរចាប់អារម្មណ៍