កំពតៈ គណៈកម្មការអន្តរក្រសួង និងគណៈកម្មការបច្ចេកទេសរដ្ឋបាលខេត្តកំពតបានឯកភាពគ្នា ដាក់ចេញនូវផែនការរយៈពេល ១ ខែចាប់ពីថ្ងៃទី ១ ដល់ថ្ងៃទី ៣១ ខែ មីនា ឆ្នាំ ២០២១ ក្នុងការចុះផ្ទៀងផ្ទាត់ និងធ្វើបច្ចុប្បន្នភាពព្រៃកោងកាង ដែលនៅសល់ជាក់ស្តែងក្នុងខេត្តនេះ។ សង្គមស៊ីវិលយល់ថា ការចុះធ្វើការលើបញ្ហានេះ ហាក់យឺតយ៉ាវព្រោះតំបន់ព្រៃកោងកាងមួយចំនួនបានបាត់បង់រួចទៅហើយ។
លោក វិត វឌ្ឍនា នាយករដ្ឋបាលខេត្តកំពតប្រាប់ភ្នំពេញប៉ុស្តិ៍ពីម្សិលមិញថា គណៈកម្មការអន្តរក្រសួងដែលមានក្រសួងកសិកម្ម រុក្ខាប្រមាញ់ និងនេសាទ និងគណៈកម្មការបច្ចេកទេសរដ្ឋបាលខេត្តបានសម្រេចកែសម្រួលសមាសភាពក្រុមការងារដើម្បីចុះទៅផ្ទៀងផ្ទាត់ឡើងវិញ ឬធ្វើបច្ចុប្បន្នភាពព្រៃកោងកាងក្នុងរយៈពេល ១ ខែនៅទូទាំងខេត្ត។
ប៉ុន្តែការអនុវត្តជាក់ស្តែងក្នុងរយៈពេល ១ ខែនេះសម្រេចបានប៉ុន្មាននោះ គឺមិនទាន់ដឹងនោះទេ វាគ្រាន់តែជាផែនការដែលត្រូវបានដាក់ចេញប៉ុណ្ណោះ។ បន្ទាប់ពីក្រុមការងារចុះផ្ទៀងផ្ទាត់ និងធ្វើបច្ចុប្បន្នភាពព្រៃកោងកាងនេះរួចហើយ និងត្រូវលើកយកមកពិភាក្សាដើម្បីឯកភាពគ្នានៅក្នុងក្របខ័ណ្ឌគណៈកម្មការបច្ចេកទេសរបស់ខេត្ត និងគណៈកម្មការអន្តរក្រសួង ដើម្បីរៀបចំធ្វើផែនទី បោះបង្គោលព្រំ និងស្នើសុំចុះបញ្ជីជាកម្មសិទ្ធិរបស់រដ្ឋ។
លោក វិត វឌ្ឍនា ថ្លែងថា៖ «បន្ទាប់ពីមានការចុះបញ្ជីជាកម្មសិទ្ធិរបស់រដ្ឋហើយ បើសិនជាមានការរំលោភបំពាននឹងត្រូវអនុវត្តទៅតាមនីតិវិធីច្បាប់»។ ទោះជាយ៉ាងណា វិត វឌ្ឍនា បញ្ជាក់ថា ការចុះធ្វើការផ្ទៀងផ្ទាត់ និងធ្វើបច្ចុប្បន្នភាពព្រៃកោងកាងនេះ មិនមែនកិច្ចការថ្មីនោះទេ ពោលកិច្ចការនេះត្រូវបានធ្វើកន្លងមកម្តងរួចហើយ ប៉ុន្តែវាត្រូវបានខកខានមួយរយៈ ហើយមកដល់ពេលនេះក្រសួងបានរំឭកដើម្បីការអនុវត្តការងារបន្តទៀត។
បើតាមលោក វិត វឌ្ឍនា ព្រៃកោងកាងនៅក្នុងខេត្តកំពតមិនមានសក្តានុពលដូចទៅនឹងខេត្តកោះកុងទេ ប៉ុន្តែដោយសារកន្លងមកនេះមានក្រុមហ៊ុនវិនិយោគដែលមានការវិនិយោគនៅតំបន់ឆ្នេរ បានធ្វើឱ្យប៉ះពាល់ដល់ព្រៃកោងកាងមួយចំនួន ប៉ុន្តែក្រុមហ៊ុនទាំងនោះ សុទ្ធតែទទួលបានការអនុញ្ញាតពីក្រុមប្រឹក្សាអភិឌ្ឍន៍កម្ពុជា។
លោក ចាន់ រិទ្ធិ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពតថ្លែងថា តាមតួលេខចាស់ ព្រៃកោងកាងនៅក្នុងខេត្តកំពតមានចំនួន ១ ៩៦៦ ហិកតា។ ប៉ុន្តែដោយមានការលួចចូលទៅកាប់ទន្ទ្រាន និងការលួចកាប់យកទៅប្រើប្រាស់បានធ្វើឱ្យព្រៃកោងកាងមានការបាត់បង់។ ដូច្នេះបានជាក្រុមការងារថ្នាក់ក្រសួង និងថ្នាក់ខេត្តបានសម្រួលសមាសភាពឡើងវិញដើម្បីចុះទៅផ្ទៀងផ្ទាត់ និងធ្វើបច្ចុប្បន្នឡើងវិញ។
លោកថ្លែងថា៖ «ឥឡូវយើងរៀបចំគណៈកម្មការឡើងវិញ ដោយសារឈ្មោះអ្នកខ្លះក៏ឈប់ និងមួយចំនួនទៀតក៏បានដូរចេញ។ បន្ទាប់ពីរៀបរួចឡើងវិញ យើងប្រជុំការងារ ចុះពិនិត្យមើលទៅតាមភាពជាក់ស្តែងរវាងគណៈកម្មការខេត្ត និងថ្នាក់ជាតិបូកទៅឃើញយ៉ាងម៉េចនឹងមានរបាយការណ៍ជាក់ស្តែងហើយ»។
បើតាមលោក ចាន់ រិទ្ធិ នៅពេលដែលមានការវាស់វែង និងមានការឯកភាពគ្នាចំពោះការធ្វើបច្ចុប្បន្នភាពនៃព្រៃកោងកាងរួចហើយនឹងត្រូវបោះបង្គោលព្រំ និងចុះបញ្ជីឱ្យមានភាពច្បាស់លាស់ដើម្បីឱ្យការគ្រប់គ្រងកាន់តែមានប្រសិទ្ធភាពជាងមុន។
លោក យន់ ផល្លី មន្ដ្រីសម្របសម្រួលអង្គការអាដហុកប្រចាំខេត្ដកំពតថ្លែងថា ការបង្កើតគណៈកម្មការដើម្បីចុះទៅផ្ទៀងផ្ទាត់ និងធ្វើបច្ចុប្បន្នភាពព្រៃកោងកាងនាពេលនេះ ហាក់បីដូចជាមានភាពយឺតយ៉ាវ ព្រោះតំបន់ព្រៃកោងកាងមួយចំនួនត្រូវបានបាត់បង់រួចទៅហើយ។ លោកពន្យល់ថា ការបាត់បង់ព្រៃកោងកាងនេះគឺដោយសារការចាក់ដីលុបឆ្នេរសមុទ្រមួយចំនួន ដើម្បីធ្វើការអភិវឌ្ឍ។
ព្រៃកោងកាងដុះនៅតាមតំបន់ឆ្នេរទឹករាក់ៗ ហើយនៅពេលដែលមានការចាក់ដីលុប វាបានធ្វើឱ្យបាត់បង់ និងមួយចំនួនទៀតក៏ត្រូវបានគ្រប់គ្រង ការពារ និងថែរក្សាព្រមទាំងមានការដាំបន្ថែមដោយសហគមន៍។ «ក្នុងការគ្រប់គ្រងព្រៃកោងកាងឱ្យមានប្រសិទ្ធភាពខ្ញុំគិតថា ព្រៃកោងកាង បច្ចុប្បន្ននេះមានការថែរក្សារបស់សហគមន៍ ហើយគួរតែឱ្យសហគមន៍គ្រប់គ្រង និងថែរក្សា។ យើងក៏ត្រូវមានការដាំបន្ថែមនៅតំបន់ឆ្នេរទឹករាក់។ នៅពេលដែលយើងការពារព្រៃកោងកាងនេះបាន វានឹងផ្តល់នូវជម្រកមច្ឆាចម្រុះដែលបង្កបង្កើនធនធានជលផលកាន់តែច្រើន»៕