The Phnom Penh Post Search

Search form




Logo of Phnom Penh Post newspaper Phnom Penh Post - គណៈកម្មការ​ប្រឹក្សា​ការងារ​អនុម័ត​លើ​នីតិវិធី​យន្តការ​ពិភាក្សា​ការ​ដំឡើង​ប្រាក់​ឈ្នួល​កម្មករ

គណៈកម្មការ​ប្រឹក្សា​ការងារ​អនុម័ត​លើ​នីតិវិធី​យន្តការ​ពិភាក្សា​ការ​ដំឡើង​ប្រាក់​ឈ្នួល​កម្មករ

គណៈកម្មការ​ស្រាវជ្រាវ​ប្រាក់​ឈ្នួល​របស់​រដ្ឋាភិបាលជួប​ជាមួយ​អ្នក​បញ្ជាទិញ​អំពី​រឿង​ប្រាក់ឈ្នួលកម្មករ​​កាលពី​ខែ​ឧសភា​​​​។
គណៈកម្មការ​ស្រាវជ្រាវ​ប្រាក់​ឈ្នួល​របស់​រដ្ឋាភិបាលជួប​ជាមួយ​អ្នក​បញ្ជាទិញ​អំពី​រឿង​ប្រាក់ឈ្នួលកម្មករ​​កាលពី​ខែ​ឧសភា​​​​។ ផា លីណា

គណៈកម្មការ​ប្រឹក្សា​ការងារ​អនុម័ត​លើ​នីតិវិធី​យន្តការ​ពិភាក្សា​ការ​ដំឡើង​ប្រាក់​ឈ្នួល​កម្មករ

ភ្នំពេញៈ គណៈកម្មការ​ប្រឹក្សា​ការងារ​បាន​បើក​កិច្ច​ប្រជុំ​ពិភាក្សា​អនុម័ត​នីតិវិធី​និង​យន្តការ​ពិភាក្សា​លើ​ប្រាក់​ឈ្នួល​អប្បបរមា​ថ្មី​របស់​កម្មករ​ក្នុង​វិស័យ​កាត់​ដេរ​សម្លៀក​បំពាក់ និង​ដេរ​ស្បែក​ជើង នៅ​ក្រសួង​ការងារ កាល​ពី​ព្រឹក​ថ្ងៃ​ចន្ទ​ម្សិលមិញ។

លោក អ៊ិត សំហេង រដ្ឋ​មន្រ្តី​ក្រសួង​ការងារ​បាន​ថ្លែង​ក្រោយ​ការ​ប្រជុំ​ថា គណៈកម្មការ​ប្រឹក្សា​ការងារ​បាន​ពិភាក្សា​គ្នា រួច​ក៏​បាន​ធ្វើ​ការ​សម្រេច​លើ​គោល​ការណ៍​ចំនួន ៥ ចំណុច។

លោក​មាន​ប្រសាសន៍​ថា៖ «ក្រុម​ប្រឹក្សា​ការងារ​បាន​សម្រេច​កំណត់​យក​ដើម​ត្រីមាស ទី៣ នៃ​ឆ្នាំ​នីមួយៗ ជា​ការ​ចាប់​ផ្តើម​ពិភាក្សា និង​សិក្សា​ស្រាវជ្រាវ​លើ​ស្ថានភាព​ប្រាក់​ឈ្នួល​កម្មករ​អប្បបរមា ដើម្បី​លើក​យោបល់​ជូន​កិច្ច​ប្រជុំ​ពេញ​អង្គ​របស់​គណៈកម្មការ​ប្រឹក្សា​ការងារ​ពិនិត្យ​សម្រេច​យ៉ាង​យូរ នៅ​ចុង​ត្រីមាស ទី៣ នៃ​ឆ្នាំ​នោះ»។

លោក អ៊ិត សំហេង បន្ត​ទៀត​ថា គណៈកម្មការ​ក៏​បាន​កំណត់​យក​ដើម​ត្រី​មាស ទី៤ នៃ​ឆ្នាំ​នីមួយៗ ដើម្បី​ចេញ​ប្រកាស​ស្តី​ពី​ប្រាក់​ឈ្នួល​អប្បបរមា​សម្រាប់​ឆ្នាំ​បន្ទាប់ ដោយ​ចាប់​អនុវត្ត​ពី​ថ្ងៃ ទី១ ខែ​មករា នៃ​ឆ្នាំ​បន្ទាប់​ដើម្បី​ទុក​រយៈ​ពេល ៣ ខែ ជូន​ភាគី​ពាក់​ព័ន្ធ​ត្រៀម​អនុវត្ត។

ជាមួយ​គ្នា​ដែរ គណៈកម្មការ​ប្រឹក្សា​ការងារ​ក៏​បាន​សម្រេច​ជា​ឯកច្ឆន្ទ​ទទួល​យក​វិធីសាស្រ្ត​នៃ​ការ​អនុម័ត​សេចក្តី​សម្រេច​របស់​គណៈកម្មការ​ប្រឹក្សា​ការងារ ដោយ​យន្តការ​កុងសង់ស៊ីស (ឯកច្ឆន្ទ)។ ក្នុង​ករណី​ចំណុច​ណា​មួយ​មិន​ឯកភាព​គ្នា ២​ដង ក្នុង​កិច្ច​ប្រជុំ​ផ្សេង​គ្នា ត្រូវ​អនុវត្ត​ការ​យក​សំឡេង​ភាគ​ច្រើន តាម​ការ​បោះឆ្នោត​ជា​សម្ងាត់​ក្នុង​កិច្ច​ប្រជុំ​លើក ទី២។ ក្នុង​នោះ​ក៏​បាន​សម្រេច​ជា​ឯកច្ឆន្ទ​ទទួល​យក​លទ្ធផល​សិក្ខាសាលា​ពិគ្រោះ​យោបល់​ត្រី​ភាគី​ថ្នាក់​ជាតិ កាល​ពី​ថ្ងៃ ទី​២៤-២៥ ខែ​មេសា ស្តី​ពី​ការ​ពង្រឹង​ដំណើរការ​នៃ​ការ​កំណត់​ប្រាក់​ឈ្នួល​អប្បបរមា​នៅ​កម្ពុជា​ផង​ដែរ។

លោក អ៊ិត សំហេង បាន​ថ្លែង​ថា៖ «ការ​ប្រជុំ​នៅ​ថ្ងៃ​នេះ គឺ​មិន​ទាន់​បាន​និយាយ​ទៅ​លើ​ចំនួន​ទេ តែ​សំខាន់​គឺ​ពិភាក្សា​ទៅ​លើ​អនុសាសន៍​របស់​សិក្ខាសាលា ហើយ​និង​នីតិវិធី​ដើម្បី​ធ្វើ​ការ​កំណត់»។

លោក អាត់ ធន់ ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា​ហៅ​ថា ស៊ីខៅឌូ មើល​ឃើញ​ថា ការ​ប្រជុំ​កាល​ពី​ម្សិលមិញ​នេះ​ទទួល​បាន​លទ្ធផល​ល្អ ដោយ​បាន​កំណត់​ជា​យន្តការ​ច្បាស់​លាស់​សម្រាប់​អនុវត្ត​ឬ​កំណត់​ប្រាក់​ឈ្នួល​អប្បបរមា​ជូន​កម្មករ​ដែល​ពី​មុន​មាន​ការ​កំណត់​ទៅ​តាម​តែ​ការ​នឹក​ឃើញ។

លោក​ថ្លែង​ថា៖ «នៅ​ក្នុង​ការ​កំណត់​នេះ​យើង​បាន​ធ្វើ​ច្បាស់​លាស់​ដោយ​ធ្វើ​ការ​ដំឡើង​ប្រាក់​ឈ្នួល​ជា​រៀង​រាល់​ឆ្នាំ។ ការ​ដំឡើង​ប្រាក់​ឈ្នួល​នេះ ដាច់​ខាត​ត្រូវ​តែ​យោង​ទៅ​លើ​ស្ថានភាព​ជីវភាព​រស់​នៅ​របស់​កម្មករ សេដ្ឋកិច្ច និង​សង្គម។ យើង​មិន​អាច​យោង​ទៅ​លើ​តែ​បញ្ហា​មួយ​បាន​ទេ»។

លោក អាត់ ធន់ បញ្ជាក់​ថា សម្រាប់ ឆ្នាំ​២០១៤ នេះ ជា​ឆ្នាំ​ដែល​ពិបាក​ក្នុង​ការ​ជជែក​គ្នា​តែ​សម្រាប់​ឆ្នាំ​បន្ត​បន្ទាប់​ទៀត​គឺ​មាន​ការ​យល់​ព្រម​ជា​គោល​ការណ៍​ហើយ ដែល​កម្មករ​នឹង​មិន​ព្រួយ​បារម្ភ​ថា ប៉ុន្មាន​ឆ្នាំ​ទៀត​ទើប​បាន​ដំឡើង​ប្រាក់​ឈ្នួល​នោះ​ទេ ប៉ុន្តែ កម្មករ​រំពឹង​បាន​ថា ប្រាក់​ឈ្នួល​នឹង​ត្រូវ​គេ​ដំឡើង​នៅ​ក្នុង​ឆ្នាំ​នេះ។

លោក អាត់ ធន់ លើក​ឡើង​ថា៖ «យើង​ជឿ​ថា ប្រាក់​ឈ្នួល​នឹង​មាន​ការ​ដំឡើង​ក្នុង​កម្រិត​មួយ​សមរម្យ ដោយ​សារ​យើង​មាន​ការ​ស្ទាប​ស្ទង់​ពី​ខាង​អ្នក​បញ្ជា​ទិញ​ផង ពី​ក្រុមហ៊ុន​មួយ​ចំនួន​ផង និង​បរិយាកាស​ពេល​បច្ចុប្បន្ន​ផង បើ​សិន​មិន​មាន​ការ​ដំឡើង​សមរម្យ មាន​ន័យ​ថា រាជ​រដ្ឋាភិបាល​មិន​អាច​ដោះស្រាយ​បញ្ចប់​ការ​មន្ទិល ឬ​ការ​មិន​សប្បាយ​ចិត្ត​របស់​កម្មករ​បាន​ទេ ហើយ​ក៏​មិន​អាច​ស្តារ​នូវ​ស្ថានភាព​នេះ​បាន»។

គណៈកម្មការ​ប្រឹក្សា​ការងារ​នឹង​បើក​ប្រជុំ​បន្ត​នៅ​ថ្ងៃ ទី៣០ មិថុនា ដើម្បី​ពិភាក្សា​អំពី​បញ្ហា​ប្រាក់​ឈ្នួល​កម្មករ​នេះ៕

អត្ថបទគួរចាប់អារម្មណ៍