រតនគិរីៈ គណៈកម្មាធិការគ្រប់គ្រងដីរដ្ឋបាលខេត្តរតនគិរីគ្រោងស្នើឱ្យរាជរដ្ឋាភិបាលកាត់ផ្ទៃដីចំនួនជិត ៩ សែនហិកតាចេញពីដីគម្របព្រៃឈើ ឆ្នាំ ២០០២ ជូនប្រជាពលរដ្ឋដែលអាស្រ័យផលជាក់ស្តែងនៅក្នុងស្រុកទាំង ៩ នៅក្នុងមូលដ្ឋានខេត្តរតនគិរី។
លោក ញ៉ែម សំអឿន អភិបាលរងខេត្តរតនគិរីប្រាប់ភ្នំពេញប៉ុស្តិ៍ពីម្សិលមិញថា ការស្នើសុំកាត់ដីគម្របព្រៃឈើនេះ បន្ទាប់ពីប្រមុខនៃរាជរដ្ឋាភិបាលឱ្យគណៈកម្មការចុះស្រាវជ្រាវ និងកំណត់ព្រំប្រទល់ចំពោះដីដែលប្រជាពលរដ្ឋ បានរុករានធ្វើជាកម្មសិទ្ធិ និងអាស្រ័យផលជាក់ស្តែង។
លោក ញ៉ែម សំអឿន ថ្លែងថា ប្រជាពលរដ្ឋដែលរស់នៅក្នុងខេត្តនេះបានកាប់ឆ្ការដីគម្របព្រៃឈើធ្វើជាកម្មសិទ្ធិយកទៅធ្វើជាចម្ការ ដើម្បីយកទៅដាំស្វាយ ស្វាយចន្ទី និងដាំកៅស៊ូជាដើម។ ជាមួយគ្នានេះក៏មានប្រជាពលរដ្ឋមួយចំនួនទៀតមិនបានរស់នៅក្នុងខេត្តនេះនោះទេ ប៉ុន្តែពួកគាត់មានដី និងដំណាំផ្សេងៗនៅក្នុងខេត្តនេះផងដែរ ដោយអ្នកខ្លះមានក្បាលដី ២ ទៅ ៣ ក្បាលដីដែលមានទំហំ ប្រមាណ ១ ទៅ ៣ ហិកតា ។
លោក សំអឿន ថ្លែងថា៖ «យើងមិនខ្វល់ទេ បើសិនជាប្រជាពលរដ្ឋទាំងនោះ កាន់កាប់ស្របច្បាប់មុនខែកក្កដា ឆ្នាំ ២០២០ ដែលសម្តេចដាក់ចេញឱ្យកាត់ជូនគាត់កុំឱ្យគាត់កាប់ទន្ទ្រានយកដីរដ្ឋទៀត»។
លោក ញ៉ែម សំអឿន បានអះអាងថា ដីគម្របព្រៃឈើគឺប្រភេទដីដែលដីរេចរឹល ព្រៃរបោះ ព្រៃពាក់កណ្តាលស្រោង ពោលមិនមានព្រៃច្រើនទេ ហើយជាដីដែលនៅជិតភូមិរបស់ប្រជាពលរដ្ឋរស់នៅដែលពួកគាត់ចេះតែរានយកធ្វើជាកម្មសិទ្ធិ ដោយធ្វើសកម្មភាពគាស់កាយ និងប្រកបមុខរបរដាំដំណាំផ្សេងៗ។
លោកបញ្ជាក់ទៀតថា នៅពេលរដ្ឋាភិបាលសម្រេចកាត់រួចហើយក្រុមការងារនឹងចុះទៅពិនិត្យឡើងវិញ ផ្ទៀងផ្ទាត់មើល បើត្រឹមត្រូវ ក្រុមការងារកាត់ជូនប្រជាពលរដ្ឋរួមជាមួយនឹងការបោះបង្គោលព្រំដីមិនឱ្យប្រជាពលរដ្ឋទាំងនោះបន្តរានយកដីទៀត។
លោក កុល ផាន់ណា ប្រធានមន្ទីរព័ត៌មាន និងជាអ្នកនាំពាក្យរដ្ឋបាលខេត្តរតនគិរីបានឱ្យដឹងថា កាលពីថ្ងៃទី ៥ ខែមីនា រដ្ឋបាលខេត្តបើកកិច្ចប្រជុំពិនិត្យ និងប្រមូលរបាយការណ៍ គណៈកម្មាធិការគ្រប់គ្រងដីរដ្ឋខេត្តរតនគិរីដែលគ្រោងនឹងស្នើទៅក្រសួងពាក់ព័ន្ធដើម្បីឱ្យប្រមុខរាជរដ្ឋាភិបាលកាត់ចេញពីដីគម្របព្រៃឈើឆ្នាំ ២០០២។
លោក កុល ផាន់ណា ថ្លែងថា លោកមិនទាន់បានរបាយការណ៍ដីគម្របព្រៃឈើនៅក្នុងខេត្តរតនគិរីទាំងមូលថាមានប៉ុន្មានហិកតា និងប្រជាពលរដ្ឋមានចំនួនប៉ុន្មានគ្រួសារដែលនឹងត្រូវទទួលបានដីដែលត្រូវកាត់ចេញពីដីគម្របព្រៃឈើនេះដែរ។
លោក ឌិន ខន្នី មន្ត្រីសម្របសម្រួល អង្គការអាដហុក ខេត្តរតនគិរី បានសម្តែងការស្វាគមន៍ចំពោះកិច្ចខិតខំប្រឹងប្រែងរបស់រដ្ឋបាលខេត្ត និងស្ថាប័នពាក់ព័ន្ធក្នុងការកំណត់ និងកាត់ឆ្វៀលដីគម្របព្រៃឈើនៅក្នុងខេត្តនេះជូនប្រជាពលរដ្ឋឱ្យមានបណ្ណកម្មសិទ្ធិ គឺជាចំណុចល្អមួយ ដើម្បីកុំឱ្យមានវិវាទដីធ្លីបន្តទៀត។
លោក ឌិន ខន្នី បញ្ជាក់ថា នៅក្នុងខេត្តរតនគិរីនេះមានបញ្ហាជម្លោះដីធ្លី និងមានស្ថានភាពស្មុគស្មាញរវាងប្រជាពលរដ្ឋ និងអ្នកមានអំណាច។ ជាមួយគ្នានោះក៏មានប្រជាពលរដ្ឋ និងអ្នកមានអំណាចមួយចំនួនទៀតបានចូលទៅកាប់ទន្ទ្រានដីគម្របព្រៃឈើ និងមួយចំនួនទៀតក៏មានប្រជាពលរដ្ឋបានកាន់កាប់ដីគម្របព្រៃឈើនេះយូរណាស់មកហើយ ទាំងមុន និងក្រោយច្បាប់ភូមិបាលចូលជាធរមាន។
លោក ឌិន ខន្នី ថ្លែងថា៖ «ពួកគាត់ទាំងអស់គ្នាមិនទាន់មានបណ្ណកម្មសិទ្ធិនៅឡើយទេ ដែលធ្វើឱ្យពួកគាត់ងាយស្រួលធ្លាក់ចូលទៅក្នុងវិវាទ។ នៅពេលដែលមានការកំណត់ការចុះបញ្ជីឱ្យពួកគាត់បានច្បាស់លាស់ ដីណាជាដីឯកជន និងដីណាជារបស់រដ្ឋនឹងលែងមានវិវាទ និងងាយការពារ»៕