.jpg)
ថ្ម និងដីត្រូវបានគេចាក់ចូលទៅក្នុងឆ្នេរសមុទ្រខេត្តព្រះសីហនុ កាលពីពេលថ្មីៗនេះ។ រូបថត ក្រសួងទេសចរណ៍
ព្រះសីហនុៈ គណៈកម្មាធិការជាតិគ្រប់គ្រង និងអភិវឌ្ឍឆ្នេរសមុទ្រកម្ពុជា បានចេញសេចក្តីប្រកាសព័ត៌មានមួយថា តំបន់ឆ្នេរសមុទ្រ «ពយកំពេញ» កំពុងត្រូវបានដំណើរការអភិវឌ្ឍដោយស្របច្បាប់ ដើម្បីបម្រើផលប្រយោជន៍សាធារណៈ និងបានបដិសេធចំពោះព័ត៌មានដែលថា មានក្រុមហ៊ុនឯកជនមួយចំនួនកំពុងចាក់ដីលុបឆ្នេរសមុទ្រដោយខុសច្បាប់។
តាមសេចក្តីប្រកាសព័ត៌មានចេញកាលពីថ្ងៃទី២៣ខែកញ្ញា ដែលភ្នំពេញបុស្ដិ៍ទទួលបានកាលពីម្សិលមិញ គណៈកម្មាធិការជាតិគ្រប់គ្រង និងអភិវឌ្ឍឆ្នេរសមុទ្រកម្ពុជា បានសរសេរថា តំបន់ឆ្នេរសមុទ្រ «ពយកំពេញ» ដែលកំពុងរៀបចំកសាងបណ្តាញផ្លូវបេតុង ប្រព័ន្ធលូ គម្រោងអភិវឌ្ឍនានា និងកែលម្អឆ្នេរថ្ម ឲ្យទៅជាឆ្នេរខ្សាច់ ដែលអាចឲ្យសាធារណជន និងភ្ញៀវទេសចរចេញចូលកម្សាន្តបាន គឺកំពុងដំណើរការរៀបចំ ដើម្បីប្រយោជន៍សាធារណៈ និងរួមចំណែកអភិវឌ្ឍន៍វិស័យទេសចរណ៍ ក៏ដូចជាសេដ្ឋកិច្ចជាតិទាំងមូល។
សេចក្តីប្រកាសនេះ បានបញ្ជាក់ថា៖«ផ្ទុយពីព័ត៌មានមួយចំនួន ដែលផ្សព្វផ្សាយនាពេលថ្មីៗនេះថា មានការចាក់ដីចូលឆ្នេរសមុទ្រនៅតំបន់ឆ្នេរ ពយកំពេញ»។
គណៈកម្មាធិការជាតិគ្រប់គ្រង និងអភិវឌ្ឍឆ្នេរសមុទ្រកម្ពុជា បានបញ្ជាក់តាមរយៈសេចក្ដីប្រកាសនេះទៀតថា ប្រជាពលរដ្ឋ ១០៣ គ្រួសារ ដែលបានរស់នៅ និងកាន់កាប់ដីជាក់ស្តែងតាំងពីឆ្នាំ ១៩៨៦ មក នៅតំបន់ពយកំពេញ ស្ថិតនៅភូមិ ១ សង្កាត់លេខ ៣ ក្រុងព្រះសីហនុ កាលពីខែសីហា ឆ្នាំ ២០១៦ រាជរដ្ឋាភិបាលបានសម្រេចធ្វើប្រទានកម្មដីនៅពយកំពេញនេះ ជូនប្រជាពលរដ្ឋទាំង ១០៣ គ្រួសារជាកម្មសិទ្ធិ។
ប៉ុន្តែ លោក សុខសុវណ្ណ វឌ្ឍនាសាប៊ុង សមាជិកឧត្តមក្រុមប្រឹក្សាពិគ្រោះ និងផ្តល់យោបល់ ដែលជាប្រធានគណបក្សខ្មែរក្រោក ដែលបានចុះទៅសិក្សា ចំពោះករណីការចាក់ដីរំលោភឆ្នេរសមុទ្រ នៅក្រុងព្រះសីហនុ តំបន់ព្រែកត្រែង និងតំបន់ពយកំពេញនេះ បានលើកឡើងថា គណៈកម្មាធិការជាតិគ្រប់គ្រង និងអភិវឌ្ឍឆ្នេរសមុទ្រ ត្រូវតែបង្ហាញពីបទដ្ឋានគតិយុត្តិ នៃការអភិវឌ្ឍនោះ មិនមែនបង្ហាញសេចក្ដីប្រកាសព័ត៌មាន ស្ដីអំពីការចាត់ចែងដីធ្លីជូនពលរដ្ឋនោះឡើយ។
លោកបានសរសេរបង្ហោះ នៅលើទំព័រហ្វេសប៊ុករបស់លោកថ្ងៃនេះដោយទាមទារ ឲ្យបង្ហាញជាសាធារណៈ ពីគម្រោងអភិវឌ្ឍតំបន់ឆ្នេរពយកំពេញ ថាតើត្រូវប្រគល់ឲ្យក្រុមហ៊ុនណាអភិវឌ្ឍ? «អភិវឌ្ឍន៍ដោយឈរលើច្បាប់អ្វី ទើបអាចចាក់ថ្មលុបសមុទ្របែបនេះ? ហើយករណីលុបឆ្នេរនេះ ពុំមានទាក់ទងអ្វីដល់ពលរដ្ឋជាង ១០០ គ្រួសារទេ។ វាដាច់ដោយឡែកពីគ្នា»។
លោក សាប៊ុង បញ្ជាក់ថា៖«ទាក់ទងតែម្យ៉ាងគត់ គឺវាមិនស៊ីសង្វាក់គ្នា និងសារាចរណ៍ណែនាំជាពិសេស ការកំណត់ថា ត្រូវអភិវឌ្ឍន៍យ៉ាងតិច ១០០ មែ៉ត្រពីឆ្នេរ»។
លោកបានចោទសួរបន្ថែមថា តើតំបន់ឆ្នេរពយកំពេញ នៅតែជាឆ្នេរសាធារណៈរបស់រដ្ឋ ឬក៏ត្រូវបានលក់ឲ្យក្រុមហ៊ុនឯកជន? លោកសាប៊ុងបាននិយាយទៀតថា៖«ប្រសិនជា មិនបង្ហាញបានទេ ដោយយោងតាមព្រះរាជក្រឹត្យស្ដីពីការរៀបចំ និងការប្រព្រឹត្តទៅ នៃឧត្តមក្រុមប្រឹក្សាពិគ្រោះ និងផ្ដល់យោបល់ ពីគណបក្សខ្មែរក្រោក នឹងប្រើសិទ្ធិរបស់ខ្លួន សហការស្រាវជ្រាវ រកនូវឯកសារបទដ្ឋានគតិយុត្តិនេះ ដល់ស្ថាប័នដែលពាក់ព័ន្ធ និងករណី ចាក់ដី ចាក់ថ្ម លុបសមុទ្រនេះ បន្តទៅទៀត»។
យ៉ាងណាក្តី លោក យន់ មីន អភិបាលខេត្ដព្រះសីហនុ បានថ្លែងប្រាប់ភ្នំពេញបុស្ដិ៍នៅថ្ងៃទី២៤ ខែកញ្ញានេះថា ពាក្យថា អភិវឌ្ឍមួយម៉ាត់ គឺមិនអាចនៅនឹងថ្កល់បានទេ គឺត្រូវតែមានការកែសម្រួលខ្លះហើយ។
លោកបន្ដថា៖«ធម្មតាការអភិវឌ្ឍ តែងមានការប្រែប្រួល ពីស្ថានភាពនេះ ទៅស្ថានភាពនោះខ្លះហើយ ចំពោះការអភិវឌ្ឍនោះ។ ថ្មវាទៅជាខ្សាច់ៗទៅជាបេតុងអីខ្លះចឹងហើយ»៕
