.jpg)
លោក ឈុំ សុជាតិ អ្នកនាំពាក្យក្រសួងការពារជាតិ។ សហការី
ភ្នំពេញ: គណៈកម្មាធិការប្រយុទ្ធប្រឆាំងគ្រឿងញៀននៃក្រសួងការពារជាតិ ដែលទើបបង្កើតថ្មីបានបើកកិច្ចប្រជុំជាលើកដំបូងកាលពីថ្ងៃទី ២៨ ខែ ឧសភា ដោយគណៈកម្មាធិការនេះនឹងធ្វើការផ្សព្វផ្សាយអប់រំ និងប្រយុទ្ធប្រឆាំងគ្រឿងញៀននៅតាមអង្គភាពកងទ័ពទាំងអស់ ព្រមទាំងរួមសហការជាមួយនគរបាល ដើម្បីប្រយុទ្ធប្រឆាំងគ្រឿងញៀនផងដែរ។
លោក ទៀ បាញ់ រដ្ឋមន្ត្រីក្រសួងការពារជាតិ បានបង្កើតគណៈកម្មាធិការប្រយុទ្ធប្រឆាំងគ្រឿងញៀននេះឡើង កាលពីថ្ងៃទី ៣០ ខែ មេសា។
លោក ឈុំ សុជាតិ អ្នកនាំពាក្យក្រសួងការពារជាតិបានថ្លែងកាលពីម្សិលមិញថា កិច្ចប្រជុំរបស់គណៈកម្មាធិការប្រយុទ្ធប្រឆាំងគ្រឿងញៀននៃក្រសួងការពារជាតិដែលទើបតែត្រូវបានបង្កើតឡើង គឺដើម្បីផ្សព្វផ្សាយបទបញ្ជារបស់រដ្ឋាភិបាល និងសហការជាមួយក្រសួងមហាផ្ទៃ សម្រាប់អនុវត្តការប្រយុទ្ធប្រឆាំងគ្រឿងញៀន ជាពិសេសនៅតាមព្រំដែន និងត្រូវឲ្យកម្លាំងទាហានចូលរួមបង្រ្កាបដែរ។ លោកបានបន្តថា យើងមិនទាន់សន្និដ្ឋានថា ទាហានមិនប្រើប្រាស់គ្រឿងញៀននៅឡើយទេគឺយើងនៅធ្វើការស្រាវជ្រាវសិន ដើម្បីចាត់វិធានការតាមច្បាប់គ្រឿងញៀន។
លោកបញ្ជាក់ថា៖ «ប៉ុន្ដែឥឡូវនេះ ខ្ញុំមិនអាចនិយាយបានទេ ព្រោះយើងមិនអនុញ្ញាតឲ្យកងទ័ពប្រើប្រាស់ ឬពាក់ព័ន្ធគ្រឿងញៀនទេ ដោយសារពួកគាត់មានអាវុធ មានកាំភ្លើងក្នុងដៃ អ៊ីចឹងវាគ្រោះថ្នាក់ណាស់។ ទើបថ្នាក់ដឹកនាំយើង ដាក់បទបញ្ជាត្រួតពិនិត្យគ្រឿងញៀនតាមបណ្ដាអង្គភាពនីមួយៗ»។
លោកបន្ថែមថា វាជាការចាប់អារម្មណ៍របស់រដ្ឋាភិបាលដែលកម្ពុជាកំពុងមានបញ្ហា ២ នៅក្នុងសង្គមគឺបញ្ហាគ្រឿងញៀន និងបញ្ហាគ្រោះថ្នាក់ចរាចរណ៍ ហើយក្រសួងការពារជាតិក៏ចាប់ផ្ដើមធ្វើលើបញ្ហាគ្រឿងញៀនមុនគេដើម្បីកុំឲ្យវារាលដាលដល់កម្លាំងប្រដាប់អាវុធ។
លោកថា៖ «ដូច្នេះ យើងត្រូវតែធ្វើការពិនិត្យតាមអង្គភាពទ័ពជើងគោក ជើងអាកាស និងទ័ពភូមិភាគ ជាបន្តបន្ទាប់ ដើម្បីបោសសម្អាត (គ្រឿងញៀន) ឲ្យស្អាតចេញពីអង្គភាពទាហាន»។
បើតាមលោក ឈុំ សុជាតិ គណៈកម្មាធិការប្រយុទ្ធប្រឆាំងគ្រឿងញៀនថ្មីនេះ ត្រូវបានសម្រេចឲ្យលោក ចាយ សាំងយុន រដ្ឋលេខាធិការ ក្រសួងការពារជាតិ ជាប្រធាន និងអមដោយអនុប្រធាន ២ រូប គឺលោក ឥត សារ៉ាត់ អគ្គមេបញ្ជាការរង កងយោធពលខេមរភូមិន្ទ និងនាយសេនាធិការចម្រុះ និងរូបលោកព្រមទាំងមានសមាសភាពសមាជិកសរុបចំនួន ៩ រូបផ្សេងទៀត។
លោកបន្តថា តួនាទីភារកិច្ចរបស់គណៈកម្មាធិការប្រយុទ្ធប្រឆាំងគ្រឿងញៀនក្រសួងការពារជាតិរួមមាន ធ្វើជាសេនាធិការជូនរដ្ឋមន្ត្រីក្រសួងការពារជាតិលើសកម្មភាពប្រយុទ្ធប្រឆាំងគ្រឿងញៀន លើកយោបល់ស្នើសុំគោលការណ៍សម្រេចពីរដ្ឋមន្ត្រីក្រសួងការពារជាតិ ចាត់តាំងអប់រំផ្សព្វផ្សាយច្បាប់ ស្តីពីការត្រួតពិនិត្យគ្រឿងញៀន និងការប្រើប្រាស់ការជួញដូរ និងប្រយុទ្ធប្រឆាំងគ្រឿងញៀនតាមបណ្តាអង្គភាព។
លើសពីនេះ គណៈកម្មាធិការមានភារកិច្ចបណ្តុះបណ្តាលជនបង្គោល ដើម្បីអប់រំ ផ្សព្វផ្សាយ ទប់ស្កាត់ការប្រើប្រាស់ការជួញដូរ និងប្រយុទ្ធប្រឆាំងគ្រឿងញៀនតាមបណ្តាអង្គភាព និងបូកសរុបរបាយការណ៍ជូនរដ្ឋមន្ត្រីក្រសួងការពារជាតិប្រចាំខែ ត្រីមាស ឬឆ្នាំ។
លោក សុជាតិ បញ្ជាក់ថា៖ «អនុប្រធានគណៈកម្មាធិការ និងសមាជិក ត្រូវចូលរួមប្រជុំតាមការអញ្ជើញរបស់ប្រធានគណៈកម្មាធិការ។ បន្ថែមពីនេះ គណៈកម្មាធិការមានសិទ្ធិប្រើប្រាស់ត្រារបស់ក្រសួងការពារជាតិផងដែរ»។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានថ្លែងកាលពីម្សិលមិញថា ការបង្កើតឲ្យមានគណៈកម្មាធិការប្រយុទ្ធប្រឆាំងគ្រឿងញៀនក្នុងស្ថាប័នក្រសួងការពារជាតិនេះមិនមានអ្វីប៉ះពាល់ដល់ការងារអង្គភាពនគរបាលផ្នែកគ្រឿងញៀនទេ។
លោកថា លោកសាទរ ចំពោះកិច្ចការងារនេះ ព្រោះការប្រយុទ្ធប្រឆាំងគ្រឿងញៀន មិនមែនជាសមត្ថកិច្ចរបស់នគរបាលគ្រឿងញៀនតែមួយទេគឺទាមទារឲ្យមានការចូលរួមពីស្ថាប័នផ្សេងៗ និងពលរដ្ឋទាំងអស់គ្នាផងដែរ។
លោកបញ្ជាក់ថា៖ «ការបង្ក្រាបគ្រឿងញៀនមិនមែនមានតែសមត្ថកិច្ចក្រសួងមហាផ្ទៃតែឯងទេគឺនៅទីណាក៏ដោយ នៅក្នុងគ្រួសារយើងក៏ដោយ ក្នុងសហគមន៍ក៏ដោយ ឲ្យតែអាចបង្កើតបាន ក៏បង្កើតទៅ គឺយើងចូលរួមទាំងអស់គ្នា បើមានការចូលរួមពីប្រជាពលរដ្ឋច្រើន គឺវាជាជោគជ័យរបស់យើងហើយ។ ខ្ញុំសូមសាទរ ចំពោះការងារនេះ ហើយអំពាវនាវឲ្យមានការចូលរួមថែមទៀត»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក ក៏បានសាទរចំពោះការបង្កើតគណៈកម្មាធិការប្រយុទ្ធប្រឆាំងគ្រឿងញៀននៅក្រសួងការពារជាតិនេះផងដែរ ដោយថ្លែងថា បើចង់ឲ្យមន្ត្រីបំពេញការងារមានប្រសិទ្ធភាពគឺត្រូវមានសុខភាពល្អ ប៉ុន្ដែបើសុខភាពពួកគាត់ លាយឡំនឹងគ្រឿងញៀននោះ ការបំពេញការងារក៏គ្មានប្រសិទ្ធភាពដែរ។
លោកបន្តថា លើសពីនេះលោកក៏ចង់ឃើញស្ថាប័ន មន្ទីរផ្សេងៗទៀត ក៏ត្រូវពិនិត្យដូចគ្នាដែរដើម្បីពង្រឹងប្រសិទ្ធភាពការងារ ក្នុងនាមជាមន្ត្រីរាជការ។ «យើងមិនចង់ឃើញមន្ត្រីរាជការយើងជាប់ពាក់ព័ន្ធជាមួយគ្រឿងញៀនទេ គឺយើងចង់បានមន្ត្រីធ្វើការប្រសិទ្ធភាព មនុស្សមានគុណភាពមន្ត្រីជួយសង្គម និងមន្ត្រីជួយប្រទេសជាតិ»។
លោកបន្ថែមថា កន្លងមកគេឃើញមានបង្កើតគណៈកម្មការជាច្រើនពាក់ព័ន្ធការបង្ក្រាបគ្រឿងញៀនប៉ុន្ដែអ្វីដែលជាការអនុវត្ត គឺនៅតែមានបញ្ហាខ្វះចន្លោះ ដោយមិនទាន់បានទទួលលទ្ធផលល្អនៅឡើយ ជាពិសេសគ្រឿងញៀននៅតាមមូលដ្ឋាន នៅមិនទាន់ថមថយនៅឡើយ៕
