.jpg)
ការរៀបចំតែងលម្អ សម្រាប់ពិធីបុណ្យចូលឆ្នាំប្រពៃណីខ្មែរកាលពីឆ្នាំមុន។ ហុង មិនា
ភ្នំពេញៈ លោក គង់ សំអុល ប្រធានគណៈកម្មាធិការជាតិរៀបចំបុណ្យជាតិ និងអន្តរជាតិបានណែនាំពីការរៀបចំពិធីបុណ្យចូលឆ្នាំប្រពៃណីជាតិតាមប្រតិទិនដែលបានកំណត់ពីថ្ងៃទី ១៤-១៥ ខែមេសា បើទោះបីជាស្ថានភាពជំងឺកូវីដ ១៩ នៅតែបន្តរីករាលដាលជារៀងរាល់ថ្ងៃ។
លោក សេង សុភី ជំនួយការអមគណៈកម្មាធិការជាតិរៀបចំបុណ្យជាតិ និងអន្តរជាតិ ប្រាប់ ភ្នំពេញ ប៉ុស្តិ៍ ឱ្យដឹងថា ពិធីបុណ្យចូលឆ្នាំខ្មែររហូតមកដល់ពេលនេះ រាជរដ្ឋាភិបាលមិនទាន់ប្រកាសឱ្យមានការផ្អាកនៅឡើយទេ ហើយវាអាចនឹងប្រព្រឹត្តទៅតាមពេលវេលាកំណត់របស់ប្រតិទិនដដែល ប៉ុន្តែរាជរដ្ឋាភិបាលអាចថានឹងកំណត់នូវតំបន់ណាដែលមានបញ្ហាប្រឈមមិនអនុញ្ញាតឱ្យពលរដ្ឋទៅលេងនៅទីនោះ។
លោក សេង សុភី ថ្លែងថា៖ «សម្រាប់ឆ្នាំនេះ បញ្ហាជំងឺកូវីដ ១៩ កំពុងតែវាយលុកនៅក្នុងប្រទេស គណៈកម្មការក៏បានអំពាវនាវឱ្យពលរដ្ឋដែលចូលរួមពិធីបុណ្យចូលឆ្នាំនេះ ត្រូវមានការការពារជាសំខាន់តាមការណែនាំរបស់ក្រសួងសុខាភិបាល»។
យោងតាមសេចក្តីណែនាំរបស់គណៈកម្មាធិការជាតិបានឱ្យដឹងថា នៅតាមក្រសួងស្ថាប័ននានាត្រូវរៀបចំសម្អាតបំពាក់ភ្លើងគោម និងមានការតុបតែងភ្លើងពណ៌ផ្សេងៗ ទង់ជាតិ និងទង់សាសនាក្នុងនោះក៏ត្រូវមានការរៀបចំព្រះឆាយាល័ក្ខណ៍របស់ព្រះមហាក្សត្រ សម្តេចម៉ែ និងសម្តេចព្រះបរមរតនកោដ្ឋ និងដាក់ពាក្យស្លោកផ្សេងៗ និងសារជូនពរថ្នាក់ដឹកនាំផ្សេងៗទៀតផងដែរ។ ចាត់តាំងឱ្យមានការលេងល្បែងប្រជាប្រិយរបស់ជាតិតាមមណ្ឌលកម្សាន្តតាមរមណីយដ្ឋាននានា ឬ ទីតាំងណាដែលសមគួរ ហើយចៀសវាង និងទប់ស្កាត់ឱ្យបាននូវល្បែងណាដែលប្រាសចាកនឹងច្បាប់។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានថ្លែងថា នៅក្នុងស្ថានភាពបែបបច្ចុប្បន្ននេះមិនទាន់ដឹងថា ការរៀបចំពិធីបុណ្យចូលឆ្នាំនឹងប្រព្រឹត្តទៅបែបណានោះទេ ប្រជាពលរដ្ឋទាំងអស់គ្នាមានតែការប្រុងប្រយ័ត្នខ្ពស់ឱ្យបានគ្រប់គ្នាកុំឱ្យមានការឆ្លងនូវជំងឺកូវីដ ១៩។
លោកស្រី វណ្ណឌីន ថ្លែងថា៖ «ស្ថានភាពនៅក្នុងប្រទេសយើងបច្ចុប្បន្ននេះ យើងមិនអាចធ្វេសប្រហែសបានទេ និងត្រូវការការពារជាប់ជានិច្ច។ ចំពោះការផ្អាក ឬមិនផ្អាកពិធីបុណ្យចូលឆ្នាំខាងមុខនេះ ខ្ញុំមិនទាន់ហ៊ាននិយាយទេ។ ខ្ញុំគ្រាន់តែអំពាវនាវឱ្យមានការយកចិត្តទុកដាក់ការពារខ្លួនជានិច្ច»។
ដោយសារស្ថានភាពនៃការរីករាលដាលជំងឺកូវីដ ១៩ រាជរដ្ឋាភិបាលបានលុបចោលពិធីបុណ្យចូលឆ្នាំប្រពៃណីជាតិកាលពីឆ្នាំ ២០២០។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិនៃក្រសួងមហាផ្ទៃបានថ្លែងថា រហូតមកដល់ពេលនេះមិនទាន់មានវិធានក្នុងការរៀបចំសន្តិសុខសណ្ដាប់ធ្នាប់ពិសេសសម្រាប់កម្មវិធី រៀបចំបុណ្យជាតិនៅឡើយទេ។
លោក ឆាយ គឹមខឿន ថ្លែងថា៖ «ខ្ញុំមើល និងសិក្សាសិន»៕
