ភ្នំពេញ៖ គណៈកម្មាធិការសិទ្ធិមនុស្សកម្ពុជា ចាត់ទុករបាយការណ៍របស់អង្គការ Amnesty International Report 2020/2021 “ពាក់ព័ន្ធនឹងកម្ពុជាបានរំលោភសិទ្ធិមនុស្សយ៉ាងធ្ងន់ធ្ងរនៅក្នុងប្រទេស ដែលមានការរិតត្បិតទៅលើគណបក្សប្រឆាំង សង្គមស៊ីវិល និងប្រព័ន្ធផ្សព្វផ្សាយ" ថា ជាការបំផ្លើសអំពីបញ្ហាសិទ្ធិមនុស្សនៅកម្ពុជា។
លោក ជិន ម៉ាលីន អនុប្រធាន និងជាអ្នកនាំពាក្យគណៈកម្មាធិការសិទ្ធិមនុស្សកម្ពុជា បា្រប់ ភ្នំពេញ ប៉ុស្តិ៍ថា របាយការណ៍របស់អង្គការលើកលែងទោសអន្តរជាតិ Amnesty International រាយការណ៍អំពីសិទ្ធិមនុស្សនៅកម្ពុជា គ្មានអ្វីថ្មីនោះទេ ពោលគឺ សឹងតែទាំងអស់យកចេញពីការផ្សាយរបស់វិទ្យុបរទេសដែលមាននិន្នាការប្រឆាំងនឹងរដ្ឋាភិបាល និងចម្លងចែកចាយតៗគ្នាពីរបាយការណ៍របស់ក្រុមអង្គការសង្គមស៊ីវិលក្នុងស្រុកមួយក្តាប់តូច ដែលគេផ្តល់លុយឱ្យដើម្បីធ្វើសកម្មភាពនយោបាយក្រោមរូបភាព និងហេតុផលសិទ្ធិមនុស្ស នេះបើពិនិត្យលើឯកសារយោងក្នុងរបាយការណ៍នេះ។
លោក ជិន ម៉ាលីន ថ្លែងថា៖ «យើងឃើញថា របាយការណ៍នេះ យោងទៅលើព័ត៌មានបរទេសនៅក្រៅស្រុកដែលមាននិន្នាការប្រឆាំងនឹងរាជរដ្ឋាភិបាលប៉ុណ្ណោះ»។
លោកបន្ថែមថា ចំណែកឯរបាយការណ៍ និងឯកសារផ្លូវការ ការពន្យល់ បកស្រាយ និងឆ្លើយតបបំភ្លឺ របស់រដ្ឋាភិបាលជាសាធារណៈនាពេលកន្លងមក មិនត្រូវបានគេយកមកពិចារណាបន្តិចណាសោះឡើយ។ លោក ជិន ម៉ាលីន បានចោទជាសំនួរថា តើពួកបរទេសទាំងនេះគេចង់បានអ្វីឱ្យពិតប្រាកដ ពីការចេញរបាយការណ៍បំផ្លើសខុសពីការពិតបែបនេះ?។
អង្គការ Amnesty International កាលពីថ្ងៃទី ៧ ខែមេសា បានចេញរបាយការណ៍របស់ខ្លួនស្តីអំពី ស្ថានភាពសិទ្ធិមនុស្សនៅកម្ពុជាក្នុងឆ្នាំ ២០២០ មានស្ថានភាពធ្ងន់ធរ ពាក់ព័ន្ធនឹងការរំលោភបំពានពីអាជ្ញាធរកម្ពុជាទៅលើប្រជាពលរដ្ឋ គណបក្សប្រឆាំង សង្គមស៊ីវិល និងប្រព័ន្ធផ្សព្វផ្សាយ។ ចំណែកប្រព័ន្ធយុត្តិធម៌ និងតុលាការ ត្រូវបានប្រើប្រាស់ដោយមិនត្រឹមត្រូវ ដើម្បីអនុវត្តយុទ្ធនាការបង្ក្រាបលើការបញ្ចេញមតិរិះគន់ និងឯករាជ្យទៅលើរដ្ឋាភិបាល។
លោក អំ សំអាត នាយករងអង្គការលីកាដូ (LICADHO) បានថ្លែងថា របាយការណ៍នេះ បានសំអាងទៅឆ្នាំ ២០២០ មានការចាប់ខ្លួនទៅលើសកម្មជនអតីតបក្សប្រឆាំង សកម្មជនបរិស្ថាន ឬក្រុមយុវជន ដោយចោទក្រោមបទញុះញង់ជាដើម។ ការចាប់ខ្លួនភាគច្រើនយោងទៅលើ ការប្រើប្រាស់បណ្តាញសង្គមក្នុងការបញ្ចេញមតិរបស់ក្រុមសកម្មជនទាំងនោះ ត្រូវបានគេយកមកធ្វើជាភ័ស្តុតាង ក្នុងការដាក់បន្ទុកដល់ពួកគេ។
លោក អំ សំអាត បន្តថា មួយទៀតមានការរិតត្បិតទៅលើអង្គការសង្គមស៊ីវិល និងសហគមន៍ផ្សេង មិនឱ្យមានការជួបជុំ (មិនទាន់មានការផ្ទុះខ្លាំងនូវជំងឺកូវិដ ១៩) ប្រមូលផ្ដុំ និងការបញ្ចេញមតិ ឬចូលសកម្មភាពនានានោះ ក៏ធ្វើឱ្យអង្គការ Amnesty Internal ចាត់ទុកជាការរំលោភបំពាន និងផ្អែកលើបទដ្ឋានអន្តរជាតិស្តីពីសិទ្ធិមនុស្សដែរ។
លោកថ្លែងថា៖ «ទោះជាយ៉ាងណា រាជរដ្ឋាភិបាលបានអះអាង ការចាប់ខ្លួន ឬការឃុំខ្លួន អនុវត្តទៅតាមច្បាប់របស់កម្ពុជា ប៉ុន្តែអង្គការអន្តរជាតិ និងអ្នកជំនាញសិទ្ធិមនុស្ស ក្រុមប្រឹក្សាសិទ្ធិមនុស្សរបស់អង្គការសហប្រជាជាតិយល់ឃើញថា ការចាប់ខ្លួនដែលពាក់ព័ន្ធនឹងមតិសកម្មជនបក្សប្រឆាំង សកម្មជនបរិស្ថាន ឬការបញ្ចេញមតិរបស់ពលរដ្ឋ គឺការបំពានទៅលើសិទ្ធមនុស្ស។ ដូច្នេះបានជាអង្គការអន្តរជាតិគេលើកឡើងថា ជាការរិតត្បិតនៃការបញ្ចេញមតិ និងការរំលោភសិទ្ធិ»៕