.jpg)
អ្នកចូលរួមក្នុងសិក្ខាសាលាកាលពីម្សិលមិញ។ រូបថត សហការី
ភ្នំពេញៈ គណៈកម្មាធិការសិទ្ធិមនុស្សកម្ពុជាបានប្រារព្ធកិច្ចប្រជុំរយៈពេល ១ ថ្ងៃកន្លះ ជាមួយក្រសួង និងស្ថាប័នពាក់ព័ន្ធកាលពីថ្ងៃពុធ និងថ្ងៃព្រហស្បតិ៍ដើម្បីពិភាក្សា និងចែករំលែកអនុសាសន៍ ១៧៣ ដែលត្រូវបានទទួលយកក្នុងអំឡុងសន្និបាតពិនិត្យជាសកល (UPR) កាលពីខែមករានៅក្នុងទីក្រុងហ្សឺណែវ ប្រទេស ស៊្វីស។
លោក ជិន ម៉ាលីន អ្នកនាំពាក្យគណៈកម្មាធិការសិទ្ធិមនុស្សកម្ពុជាបានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា កិច្ចប្រជុំកាលពីថ្ងៃពុធមានការចូលរួមពីភាគីពាក់ព័ន្ធរួមមានពីស្ថានទូតផ្សេងៗ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា និងសង្គមស៊ីវិល។ ប៉ុន្តែកិច្ចប្រជុំកន្លះថ្ងៃកាលពីថ្ងៃព្រហស្បតិ៍ត្រូវបានចូលរួមតែពីមន្ត្រីរដ្ឋាភិបាលពីក្រសួង និងស្ថាប័នពាក់ព័ន្ធនៅកម្រិតបច្ចេកទេសដោយមានការពន្យល់ពីអ្នកជំនាញ។
លោក ម៉ាលីន បានថ្លែងថា៖ «អ្វីដែលយើងនឹងធ្វើនាពេលបន្ទាប់គឺថា គណៈកម្មាធិការសិទ្ធិមនុស្សនឹងបូកសរុបអនុសាសន៍ទៅក្រសួងនីមួយៗ។ បន្ទាប់មកយើងនឹងពិនិត្យ និងផ្ទៀងផ្ទាត់អនុសាសន៍ទាំងនោះដោយពិគ្រោះយោបល់ជាមួយស្ថាប័នទទួលខុសត្រូវទាំងនោះ។ ជំនាញបន្ទាប់ គឺត្រូវធ្វើការសម្រេចចុងក្រោយអំពីការបែងចែកអនុសាសន៍ទៅក្រសួង និងស្ថាប័ននីមួយៗ។ បន្ទាប់មកពួកគេត្រូវតែអនុវត្តអនុសាសន៍ទាំងនោះ ខណៈគណៈកម្មាធិការសិទ្ធិមនុស្សកម្ពុជានឹងតាមដានពួកគេ»។
លោក ម៉ាលីន បានថ្លែងបន្តថាលោកនាយករដ្ឋមន្ត្រី ហ៊ុន សែន នឹងបែងចែកការងារពីមុនពេលក្រសួង និងស្ថាប័ននីមួយៗចាប់ផ្តើមអនុវត្ត។ បន្ទាប់មក គណៈកម្មាធិការសិទ្ធិមនុស្សកម្ពុជានឹងធ្វើការជាមួយស្ថាប័នទាំងនោះអំពីផែនការ និងសូចនាករដើម្បីបំពេញតាមអនុសាសន៍។
កាលពីខែមករាប្រទេសកម្ពុជាបានទទួលអនុសាសន៍ចំនួន ១៩៨ ពីប្រទេសចំនួន ៧៣ ក្នុងអំឡុងសន្និបាតពិនិត្យជាសកលជុំទី ៣ នៅទីក្រុងហ្សឺណែវ។ ប៉ុន្តែប្រទេស កម្ពុជា បានសម្រេចកត់សម្គាល់អនុសាសន៍ចំនួន ២៥ ដោយនិយាយថា អនុសាសន៍ទាំងនោះមិនឆ្លុះបញ្ចាំងការពិត ឬអនុសាសន៍ទាំងនោះត្រូវបានធ្វើឡើងដោយហេតុផលនយោបាយ។
លោកស្រី ចក់ សុភាព នាយិកានៃមជ្ឈមណ្ឌលសិទ្ធិមនុស្សកម្ពុជាបានថ្លែងថា មជ្ឈមណ្ឌលសិទ្ធិមនុស្សកម្ពុជាបានចូលរួមសិក្ខាសាលា UPR ហើយលោកស្រីបានស្វាគមន៍កិច្ចសហការរបស់រដ្ឋាភិបាលជាមួយការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា និងអ្នកជំនាញដទៃៗទៀតដោយបង្ហាញពីការប្តេជ្ញាចិត្តចំពោះការអនុវត្តអនុសាសន៍ដែលធ្វើឡើងនៅក្នុងអំឡុងសន្និបាតពិនិត្យជាសកលជុំទី ៣ អំពីកម្ពុជា។
លោកស្រី ចក់ សុភាព បានថ្លែងឲ្យដឹងថា៖ «មជ្ឈមណ្ឌលសិទ្ធិមនុស្សកម្ពុជាបានស្វាគមន៍យ៉ាងកក់ក្តៅចំពោះការចូលរួមរបស់រដ្ឋាភិបាលជាមួយសង្គមស៊ីវិលតាមរយៈសិក្ខាសាលានេះ ហើយយើងសង្ឃឹមថារដ្ឋាភិបាលបន្តបើកចំហ និងមានតម្លាភាពនៅក្នុងរាល់ដំណើរការ UPR»។
លោកស្រី ចក់ សុភាព បានថ្លែងឲ្យដឹងផងដែរថា សិក្ខាសាលានោះនឹងធ្វើឲ្យមានសកម្មភាពរឹងមាំដោយក្រសួងពាក់ព័ន្ធចំពោះការអនុវត្តអនុសាសន៍ និងសង្គមស៊ីវិលនឹងទន្ទឹងរង់ចាំសង្កេត និងតាមដានដំណើរការរបស់ពួកគេ។
លោកស្រី ចក់ សុភាព បានបន្តលើកទឹកចិត្តរដ្ឋាភិបាលឲ្យពិចារណាដិតដល់អំពីការអនុវត្តអនុសាសន៍ ២៥ ដែលខ្លួនបានកត់សម្គាល់។
លោកស្រី ចក់ សុភាព បានថ្លែងឲ្យដឹងកាលពីម្សិលមិញថា៖ «ការអនុវត្តអនុសាសន៍កត់សម្គាល់ទាំងនេះនឹងបង្ហាញពីឆន្ទៈរបស់រដ្ឋាភិបាលក្នុងការគោរពតាមកាតព្វកិច្ចសិទ្ធិមនុស្សអន្តរជាតិដែលមានន័យស្តារលម្ហពលរដ្ឋ រក្សាការគោរពសេរីភាពមូលដ្ឋាន និងកែលម្អស្ថានភាពសិទ្ធិមនុស្សក្នុងប្រទេសកម្ពុជា»៕ PS
