ភ្នំពេញៈ គណៈកម្មាធិការអចិន្រៃ្តយ៍នៃរដ្ឋសភាកាលពីម្សិលមិញបានអនុម័តទទួលយកសេចក្ដីព្រាងច្បាប់ចំនួន ៥ ដែលស្នើដោយរាជរដ្ឋាភិបាល ដើម្បីប្រគល់ទៅឱ្យគណៈកម្មការជំនាញរដ្ឋសភានីមួយៗយកទៅពិនិត្យ និងសិក្សា មុនដាក់ចូលទៅក្នុងរបៀបវារៈសម្រាប់កិច្ចប្រជុំពេញអង្គ។
សេចក្ដីព្រាងច្បាប់ទាំង ៥ នោះមាន៖
-សេចក្តីព្រាងច្បាប់ស្តីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ។
-សេចក្តីព្រាងច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។
-សេចក្តីព្រាងច្បាប់ស្តីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ។
-សេចក្តីព្រាងច្បាប់ស្តីពីកិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃម៉ាឡេស៊ី ស្តីពីការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការគេចវេះពន្ធ និងការចៀសវាងពន្ធ និងកិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋកូរ៉េស្តីពីការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការគេចវេះពន្ធ និងការចៀសវាងពន្ធ។
-សេចក្តីព្រាងច្បាប់ស្តីពីការអនុម័តយល់ព្រមឲ្យព្រះរាជាណាចក្រកម្ពុជាចូលជាភាគីនៃអនុសញ្ញាទីក្រុងប៊ែនស្តីពីកិច្ចការពារស្នាដៃអក្សរសាស្ត្រ និងសិល្បៈឆ្នាំ ១៨៨៦ និងវិសោធនកម្មឆ្នាំ ១៩៧៩។
លោក ឡេង ប៉េងឡុង អ្នកនាំពាក្យរដ្ឋសភាបានថ្លែងឲ្យដឹងនៅក្រោយកិច្ចប្រជុំនោះថា សេចក្ដីព្រាងច្បាប់ទាំងនោះត្រូវបានគណៈរដ្ឋមន្ត្រីអនុម័តកាលពីថ្ងៃទី ១៥ ឧសភា ហើយបានផ្ញើមកដល់រដ្ឋសភានៅថ្ងៃទី ១៩ ឧសភា ដែលរាជរដ្ឋាភិបាលបានចាត់ទុកជាការប្រញាប់។
លោក ប៉េងឡុង ថ្លែងបន្តថា គណៈកម្មាធិការអចិន្រៃ្តយ៍នៃរដ្ឋសភាទាំង ១៣ រូបដែលចូលរួមកិច្ចប្រជុំបានសម្រេចជាបន្ទាន់ ដោយប្រគល់សេចក្ដីព្រាងច្បាប់នីមួយៗទៅតាមគណៈកម្មការជំនាញនីមួយៗ ដើម្បីពិនិត្យ និងពិភាក្សា។
លោកថ្លែងថា៖ «គណៈកម្មការទាំងនោះនឹងចាប់ផ្ដើមធ្វើការជាប្រញាប់លើសេចក្ដីព្រាងច្បាប់ទាំងនោះដើម្បីរាយការណ៍ជូនគណៈកម្មាធិការអចិន្រៃ្តយ៍ដើម្បីចាត់ការបន្តទៀត»៕