The Phnom Penh Post Search

Search form




Logo of Phnom Penh Post newspaper Phnom Penh Post - គណៈកម្មាធិការ​ ព្រម​ឲ្យ​សភា​ដក​តំណែង​ពី​លោក កឹម សុខា




គណៈកម្មាធិការ​ ព្រម​ឲ្យ​សភា​ដក​តំណែង​ពី​លោក កឹម សុខា

Content image - Phnom Penh Post
លោក ហេង សំរិន ប្រធានរដ្ឋសភា ចូលរួមកិច្ច​ប្រជុំ​កាល​ពី​ម្សិលមិញ។ ហេង ជីវ័ន

គណៈកម្មាធិការ​ ព្រម​ឲ្យ​សភា​ដក​តំណែង​ពី​លោក កឹម សុខា

ភ្នំពេញៈ គណៈកម្មាធិការ​អចិន្រៃ្តយ៍​រដ្ឋសភា​ដែល​ភាគច្រើន​មកពី​​ CPP ​​កាលពី​ម្សិលមិញ​បាន​សម្រេច​​ឲ្យ​សភា​ធ្វើ​វិសោធនកម្ម​ដក​តំណែង​​លោក​ កឹម សុខា ពី​​ប្រធាន​តំណាងរាស្រ្ត​សំឡេង​ភាគតិច​មាន​ឋានៈ​ស្មើ​នាយក​រដ្ឋមន្រ្តី​ជា​ការ​សម្រេច​ដែល​ស្នើ​​ដោយ​​​តំណាងរាស្រ្ត​​ CPP ​​៥២ ​រូប​​​តាម​គំនិត​ផ្តួចផ្តើម​​​ពី​លោក​ ហ៊ុន សែន ​នៅ​ប្រទេស​ស្វ៊ីស​កាលពី​សប្តាហ៍​មុន​ ឯ​ការ​ប្រជុំ​ពេញអង្គ​សភា​នឹង​ធ្វើ​នៅ​សប្ដាហ៍​ក្រោយ​។

ឆ្លើយតប​តាម​បំណង​​​លោក​នាយក​រដ្ឋមន្រ្តី​គណៈកម្មាធិការ​​អចិន្រៃ្តយ៍​នឹង​បញ្ជូន​សំណើ​​នេះ​ទៅ​ជជែក​ពិភាក្សា​​ និង​ធ្វើ​វិសោធនកម្ម​​មាត្រា​​​ ៤៨ ​ថ្មី (៣) ​​នៃ​​បទបញ្ជា​ផ្ទៃក្នុង​​របស់​រដ្ឋសភា​​​ទៅ​ក្នុង​​​មាត្រា​ ៤៨ ​ថ្មី​ (៤) ​​ដែល​មាន​ន័យ​ថា​​ដូច​​ទៅ​នឹង​មាត្រា​ ៤៨ ​​ចាស់​ (២) ​​ហើយ​រដ្ឋសភា​នឹង​បើក​សម័យ​ប្រជុំ​​ពេញអង្គ​​នៅ​ថ្ងៃ​ទី​ ៣១ ​មករា​ដើម្បី​លុប​តំណែង​របស់​លោក កឹម សុខា ​ពី​ប្រធាន​តំណាងរាស្រ្ត​សំឡេង​ភាគតិច​​នៅ​ក្នុង​​រដ្ឋសភា​​​។ ​​នេះ​បើ​តាម​​​អ្នក​នាំពាក្យ​​រដ្ឋសភា​ និង​​​តំណាងរាស្រ្ត​ CPP លោក ឈាង វុន កាលពី​ម្សិលមិញ។ ​

ប៉ុន្តែ​អ្នក​នាំពាក្យ​​​រដ្ឋសភា​លោក ឡេង ប៉េងឡុង បាន​ពន្យល់​​ថា​អត្ថន័យ​នៃ​មាត្រា​ ៤៨ (២) ចែង​អំពី​ក្រុម​តំណាងរាស្រ្ត​​​​ដែល​មាន​សិទ្ធិ​និយាយ​​​ក្នុង​រដ្ឋសភា​ហើយ​មាត្រា​​នេះ​តម្រូវ​​ឲ្យ​ក្រុម​តំណាងរាស្រ្ត​​​ត្រូវ​តែ​មាន​​តំណាងរាស្ត្រ​​ ១០ ​រូប​ដើម្បី​និយាយ​នៅ​ក្នុង​​សម័យ​ប្រជុំ។

ថ្លែង​ក្រោយ​​​កិច្ចប្រជុំ​គណៈកម្មាធិការ​​អចិន្រៃ្តយ៍​​ពី​ម្សិលមិញ​លោក ឈាង វុន ​បាន​អះអាង​ថា​មូលហេតុ​ដែល​​សម្រេច​លុប​​​តំណែង​​លោក កឹម សុខា ពី​​ប្រធាន​តំណាងរាស្រ្ត​សំឡេង​ភាគ​តិច​​គឺ​ដោយសារ CNRP ​​មិន​ស្មោះត្រង់​ក្នុង​ការ​ចរចា​។

លោក​បន្ត​ថា​៖«​​ក្នុង​យន្តការ​សន្ទនា​គឺ​​ភាព​ស្មោះត្រង់​​រហូត​មក​ដល់​ពេល​នេះ​មិន​ទាន់​មាន​ភាព​ស្មោះត្រង់​​។ ​​ភាព​មិន​ស្មោះត្រង់​នេះ​ជំរុញ​រហូត​ដល់​ថ្ងៃ​ណា​មួយ​អាច​ធ្វើ​ឲ្យ​​​រដ្ឋសភា​​របស់​យើង​​បំពាន​​អំណាច​តុលាការ»។

លោក​បញ្ជាក់​ថា​៖ «​សម្តេច​តេជោ​គឺជា​អ្នក​ផ្តួចផ្តើម​​ [មាត្រា​ ៤៨ ​(៣)] ​នេះ​ហើយ​ឥឡូវ​​សម្តេច​​ដែល​​ជា​អ្នក​ផ្តួចផ្តើម​​និយាយ​ថា​នេះ​មិន​អាច​ទៅ​រួច​យក​វា​ចេញ​ហើយ​យើង​​ទាំងអស់​គ្នា​យល់​​ដូច​សម្តេច​ដែរ​»។

ទោះ​យ៉ាង​ណា​តំណាងរាស្រ្ត​ CNRP លោក យ៉ែម បុញ្ញឫទ្ធិ មិន​​ធ្វើ​អត្ថាធិប្បាយ​​ទេ​តែ​ថា CPP ​ចោទ​ CNRP ​ថា​មិន​ស្មោះត្រង់​​នេះ​គឺ​ទុក​ឲ្យ​អ្នក​កាសែត​ មតិ​សាធារណៈ​ និង​ប្រជាជន​ខ្មែរ​វិនិច្ឆ័យ​ដោយ​ខ្លួនឯង។

លោក​បាន​ច្រាន​ចោល​​ការ​ចោទ​ដែល​ថា CNRP ​ជំរុញ​ឲ្យ​ CPP ​​​​បំពាន​ច្បាប់​​ដោយ​ថា CNRP​​​មាន​សំឡេង​ភាគតិច​​មិន​អាច​​ជំរុញ​ CPP ​​ដែល​មាន​សំឡេង​ភាគច្រើន​​ឲ្យ​ធ្វើ​អ្វី​ខុស​ច្បាប់​​បាន​ទេ​។

លោក យ៉ែម បុញ្ញឫទិ្ធ បាន​បន្ថែម​ថា​​ក្នុង​របៀបវារៈ​ដែល​ CNRP ​ដាក់​ទៅ​ CPP ​​​​ដើម្បី​ចរចា​​មិន​មាន​លក្ខខណ្ឌ​ទេ​គឺ​​គ្រាន់​តែ​ដាក់​​របៀបវារៈ​ពីរ​ដូចជា​ការ​ពិភាក្សា​អំពី​​សិទ្ធិ​ពលរដ្ឋ​​​ដែល​រស់នៅ​បរទេស​​អាច​បោះឆ្នោត​ និង​ការ​ពិភាក្សា​អំពី​​បរិយាកាស​នយោបាយ​​មុន​ការ​បោះឆ្នោត​។

អ្នក​វិភាគ​នយោបាយ​លោក អ៊ូ វីរៈ ​ប្រធាន​វេទិកា​អនាគត​បាន​ចាត់​ទុក​​ការ​ធ្វើ​វិសោធនកម្ម​​​បទបញ្ជា​ផ្ទៃក្នុង​នៃ​រដ្ឋសភា​ថា​ជា​​​ការ​មិន​សប្បាយ​ចិត្ត​របស់​លោក​នាយក​រដ្ឋមន្រ្តី​ជាមួយ​ CNRP ​ក្នុង​ការ​ចរចា​នយោបាយ​៕ PS

អត្ថបទគួរចាប់អារម្មណ៍