កែបៈ គណៈបញ្ជាការឯកភាពស្រុកដំណាក់ចង្អើរបានចុះប្រតិបត្តិការវាយកម្ទេចរបងបេតុងមួយកន្លែង ដែលបានសាងសង់រំលោភចូលដីព្រៃលិចទឹករបស់រដ្ឋដោយខុសច្បាប់នៅចំណុចអូរកញ្ឆែតស្ថិតក្នុងភូមិ-ឃុំអង្គោល ស្រុកដំណាក់ចង្អើរ ខេត្តកែប។
លោកស្រី គឹម ចន្នី អភិបាលស្រុកដំណាក់ចង្អើរបានប្រាប់ភ្នំពេញប៉ុស្តិ៍ថា ខណៈអាជ្ញាធរគ្រប់លំដាប់ថ្នាក់កំពុងជាប់រវល់ចុះយុទ្ធនាការអប់រំផ្សព្វផ្សាយប្រជាពលរដ្ឋអំពីវិធានការបង្ការទប់ស្កាត់ការឆ្លងរីករាលដាលនៃជំងឺកូវីដ-១៩ ជនឱកាសនិយមមួយក្ដាប់តូចបានលួចបោះបង្គោល និងធ្វើរបងថ្មរឹងមាំព័ទ្ធយកដីព្រៃលិចទឹករបស់រដ្ឋដោយខុសច្បាប់ ពិសេសនៅចំណុចអូរកញ្ឆែត ស្ថិតក្នុងភូមិសាស្ត្រឃុំអង្កោល។
លោកស្រី ចន្នី បានបញ្ជាក់ថា៖ «នៅពេលនេះកម្លាំងសមត្ថកិច្ចយើង កំពុងចុះរុះរើបង្គោល និងរបងថ្មដែលបានសង់រំលោភចូលដីព្រៃលិចទឹករបស់រដ្ឋ និងបានចេញលិខិតជូនដំណឹងដល់ម្ចាស់ទីតាំងទាំងនោះឲ្យចូលខ្លួនមកដោះស្រាយនូវបញ្ហាទាំងនេះនៅក្រោយថ្ងៃបុណ្យចូលឆ្នាំថ្មី»។
បើតាមអះអាងរបស់លោកស្រី ចន្នី ករណីបោះបង្គោល និងសាងសង់របងថ្ម រំលោភលើដីព្រៃលិចទឹករបស់រដ្ឋក្នុងគោលបំណងទន្ទ្រានយកកាន់កាប់ជាសម្បត្តិឯកជននេះ មិនមែនទើបតែកើតឡើងនាពេលនេះទេ។ កាលពីចុងឆ្នាំមុនមានករណីចាក់ដីលុបព្រៃកោងកាង និង បោះបង្គោលហ៊ុមព័ទ្ធលើដីព្រៃកោងកាងផងដែរ តែត្រូវបានអាជ្ញាធរចាត់វិធានការទប់ស្កាត់ទាន់ពេលវេលា។
លោក ចក់ ស៊ីនាថ នាយផ្នែករដ្ឋបាលជលផលដំណាក់ចង្អើរបានប្រាប់ភ្នំពេញប៉ុស្តិ៍ថា នៅពេលនេះក្រុមគណៈកម្មការបច្ចេកទេសកំពុងធ្វើការវាស់វែង និងផ្ទៀងផ្ទាត់អំពីទំហំផ្ទៃដីដែលបានរងការខូចខាតពីការបោះបង្គោល និង ធ្វើរបងហ៊ុមព័ទ្ធលើដីព្រៃលិចទឹកទាំងនោះ ដើម្បីកសាងសំណុំរឿងបញ្ជូនទៅកាន់រដ្ឋបាលជលផលថ្នាក់ខេត្តពិនិត្យ និងចាត់វិធានការបន្តតាមនីតិវិធីច្បាប់។
លោក ស៊ីនាថ បានបញ្ជាក់ថា៖ «នៅពេលនេះយើងមិនទាន់មានការបូកសរុបផ្ទៃដីព្រៃលិចទឹកដែលរងការទន្ទ្រានកាន់កាប់ពីអ្នកភូមិ និង ក្រុមឈ្មួញមួយចំនួននោះនៅឡើយទេ ដោយសារតែករណីបោះបង្គោល និងធ្វើរបងថ្មរំលោភចូលព្រៃលិចទឹកនេះមាននៅច្រើនកន្លែងដាច់ដោយឡែកពីគ្នា»។
លោកបានបន្ថែមថាទោះយ៉ាងណាក៏ដោយមានម្ចាស់ទីតាំងមួយចំនួនបានចូលរួមសហការជាមួយសមត្ថកិច្ចជំនាញ និងអាជ្ញាធរមូលដ្ឋាននៅក្នុងការរុះរើកែសម្រួលបង្គោលរបងរបស់ពួកគេដែលបានដាំ ឬសង់លយចូលទៅក្នុងដីព្រៃលិចទឹករបស់រដ្ឋឡើងវិញជាបណ្ដើរផងដែរ។
លោក កែន សត្ថា អភិបាលខេត្តកែបបានថ្លែងថា អាជ្ញាធរខេត្តនឹងចាត់វិធានការតាមច្បាប់យ៉ាងតឹងរ៉ឹងបំផុត ចំពោះករណីលួចធ្វើសំណង់រំលោភយកដីរដ្ឋ ក៏ដូចជាដីសហគមន៍នេះព្រោះវាជារឿង «អាក្រក់បំផុត»។
លោកថ្លែងថា៖ «យើងត្រូវចាត់វិធានការឲ្យទាន់ពេលវេលាដោយវាយកម្ទេចចោលទាំងអស់នូវរាល់សំណង់ទាំងឡាយណា ដែលរំលោភបំពានច្បាប់។ ពិសេសការសង់របងថ្មព័ទ្ធយកដីសាធារណៈរបស់រដ្ឋនេះ»៕