ភ្នំពេញៈ គណៈមេធាវីនៃព្រះរាជាណាចក្រកម្ពុជា ប្តេជ្ញាបន្តពង្រីកវិសាលភាពនៃគោលនយោបាយស្តីពីការពិគ្រោះយោបល់ និងការការពារក្តីជូនជនក្រីក្រ ដោយឥតគិតកម្រៃឱ្យកាន់តែទូលំទូលាយជាងមុន និងអំពាវនាវដល់មេធាវីទូទាំងប្រទេសចូលរួមទាំងអស់គ្នា ដើម្បីរួមចំណែកក្នុងការបម្រើវិស័យយុត្តិធម៌សង្គមឱ្យកាន់តែប្រសើរ និងចូលរួមកាត់បន្ថយភាពក្រីក្រ។
សេចក្តីជូនដំណឹងរបស់គណៈមេធាវីស្តីពីគោលនយោបាយការពិគ្រោះយោបល់ និងការការពារ ក្តីជូនជនក្រីក្រដោយឥតគិតថ្លៃ ចុះថ្ងៃទី ៥ កុម្ភៈ ឱ្យដឹងថា នាពេលកន្លងមក គណៈមេធាវីកម្ពុជា តាមរយៈនាយកដ្ឋានការពារក្តីជូនជនក្រីក្របានអនុវត្តការងារយ៉ាងល្អប្រសើររួចមកហើយ។
ប៉ុន្តែដើម្បីធានា និងពង្រីកបន្ថែមនូវវិសាលភាពនៃនាយកដ្ឋានការពារក្តីជូនជនក្រីក្រក្នុងការចូលរួមចំណែកបម្រើវិស័យយុត្តិធម៌សង្គមឱ្យកាន់តែទូលំទូលាយបន្តទៀត ក៏ដូចជាដើម្បីលើកស្ទួយឧត្តមភាព និងកិត្យានុភាពនៃវិជ្ជាជីវៈមេធាវី គណៈមេធាវីកម្ពុជាដាក់ចេញនូវគោលនយោបាយមួយចំនួនបន្ថែមពីលើគោលនយោបាយដែលមានស្រាប់។
គោលនយោបាយនេះសំដៅលើការពង្រីកវិសាលភាព ក៏ដូចជាតួនាទីនៃនាយកដ្ឋានការពារក្តីជូនជនក្រីក្រក្នុងការចូលរួមបម្រើវិស័យយុត្តិធម៌សង្គម។ តាមរយៈនេះ នាយកដ្ឋាននឹងលើកយកយន្តការចំនួន ២ ដើម្បីធ្វើជាធាតុចម្បងនៃការពង្រីកវិសាលភាពរបស់ខ្លួន រួមមាន ការផ្តល់ការពិគ្រោះយោបល់ផ្នែកច្បាប់ជូនជនក្រីក្រ និងសាធារណជនទូទៅ និងការការពារជនក្រីក្រ ឬអ្នកខ្វះលទ្ធភាពដោយមិនគិតកម្រៃ។
ប្រធានគណៈមេធាវីកម្ពុជាលោក លី ច័ន្ទតុលា ប្រាប់ ភ្នំពេញ ប៉ុស្តិ៍ បន្ថែមថា៖ «ពីមុនយើងផ្តោតសំខាន់តែទៅលើជនជាប់ចោទក្នុងបទឧក្រិដ្ឋ និងអនីតិជននៅក្នុងបទមជ្ឈិម និងបទឧក្រិដ្ឋ។ ប៉ុន្តែឥឡូវយើងការពាររហូតដល់ជនរងគ្រោះផង ហើយក្នុងរឿងរដ្ឋប្បវេណីក៏យើងជួយដែរឱ្យតែគាត់ក្រីក្រ។ ប៉ុន្តែអ្វី ដែលជាគោលនយោបាយថ្មីនេះ គឺពង្រីកវិសាលភាពឱ្យទូលំទូលាយជាងមុន»។
ជាមួយគ្នានេះ ប្រធានគណៈមេធាវីបន្តអំពាវនាវដល់មេធាវីទាំងអស់ចូលរួមស្ម័គ្រចិត្តឱ្យបានច្រើន ដើម្បីបង្កលក្ខណៈងាយស្រួលក្នុងការដោះស្រាយសំណុំរឿងឱ្យបានឆាប់រហ័ស ខណៈបច្ចុប្បន្នមានមេធាវីស្ម័គ្រចិត្តចូលរួមចំនួន ៥០ នាក់ហើយ។
លោកថ្លែងថា៖ «ខ្ញុំអំពាវនាវឱ្យមេធាវីទាំងអស់ គឺផ្តល់ការប្រឹក្សាយោបល់ដោយឥតគិតថ្លៃ ហើយផ្តល់ម៉ោងពេលវេលាដល់គណៈមេធាវី ដើម្បីផ្សព្វផ្សាយ ហើយប្រជាពលរដ្ឋទាំងអ្នកមានទាំងអ្នកក្រ ដែលចង់ពិគ្រោះយោបល់ផ្លូវច្បាប់អាចទៅជួបមេធាវីទៅតាមទីតាំង និងពេលវេលានីមួយៗដែលមេធាវីស្ម័គ្រចិត្ត»។
លោកមេធាវី លឹម សម្បត្តិ នៃក្រុមមេធាវីវណ្ណាសហភាតាដែលធ្លាប់ការពារក្តីជូនជនក្រីក្រកន្លងមក បានសម្តែងការគាំទ្រចំពោះយន្តការពង្រីកវិសាលភាពការពារក្តីជូនជនក្រីក្រដោយមិនយកកម្រៃ។ លោកចាត់ទុកគោលនយោបាយនេះ ពិតជាមានសារៈសំខាន់ណាស់សម្រាប់ប្រជាពលរដ្ឋក្រីក្រដែលខ្វះចំណេះដឹង និងមិនមានលទ្ធភាពពឹងពាក់មេធាវី ដើម្បីការពារក្តីនៅតុលាការ។
លោកថ្លែងថា៖ «ជាក់ស្តែងគ្រប់មេធាវីទាំងអស់ នៅពេលចុះកម្មសិក្សា គឺមានកាតព្វកិច្ចត្រូវការពារក្តីជូនជនក្រីក្រមុនពេលក្លាយជាមេធាវីពេញសិទ្ធិ ហើយការពង្រីកវិសាលភាពការពារក្តីជូនជនក្រីក្រនាពេលនេះនឹងរឹតតែបង្កើនប្រសិទ្ធភាពបន្ថែមទៀតជួយដល់ជនក្រីក្រដែលខ្វះលទ្ធភាព។ ខ្ញុំក៏ធ្លាប់បានការពារក្តីជូនជនក្រីក្រនៅខេត្តកំពង់ឆ្នាំងដែរ ពាក់ព័ន្ធបញ្ហាដីធ្លី។ យើងបានពន្យល់គាត់ច្រើនពីនីតិវិធីផ្លូវច្បាប់ដើម្បីគាត់មានភាពក្លាហានឆ្លើយនៅពេលសាកសួរ»។
បើតាមសេចក្តីជូនដំណឹងរបស់គណៈមេធាវីកម្ពុជាប្រភេទនៃអ្នកអាចទទួលសេវាកម្ម ក៏ដូចជាទទួលបានការពិគ្រោះយោបល់ផ្នែកច្បាប់ រួមមានជនសង្ស័យត្រូវចោទ ឬជនជាប់ចោទ ជាជនក្រីក្រហើយជាប់ចោទពីបទឧក្រិដ្ឋ ជនសង្ស័យត្រូវចោទ ឬជនជាប់ចោទជាអនីតិជនហើយជាប់ចោទពីបទឧក្រិដ្ឋ ឬមជ្ឈិម ជនរងគ្រោះក្នុងបទឧក្រិដ្ឋ និងបទមជ្ឈិម គ្មានលទ្ធភាពរកមេធាវីការពារខ្លួន កម្មករ-កម្មការិនី ស្ត្រី និងកុមារដែលជាជនសង្ស័យ ឬជនរងគ្រោះ។ ក្រៅពីនេះសាធារណជនគ្រប់ស្រទាប់វណ្ណៈដែលមានបំណងទទួលយកសេវាកម្មប្រឹក្សាយោបល់ផ្នែកច្បាប់។
ជាមួយគ្នានេះដែរ នាយកដ្ឋានការពារក្តីជូនជនក្រីក្រស្នើសុំឱ្យមេធាវីទាំងអស់ចូលរួមដោយស្ម័គ្រចិត្តក្នុងការការពារក្តី។ មេធាវីស្ម័គ្រចិត្តទាំងអស់ត្រូវផ្តល់ឈ្មោះមេធាវីដែលស្ម័គ្រចិត្ត និងចំនួនរឿងក្តីដែលស្ម័គ្រចិត្តជួយ និងទីតាំងនៃតុលាការណាមួយដែលស្ម័គ្រចិត្តជួយ ជូនមកគណៈមេធាវីដើម្បីឱ្យគណៈមេធាវីធ្វើការរៀបចំបញ្ជីឈ្មោះបញ្ចូលបន្ថែមក្នុងបញ្ជីឈ្មោះប្រតិភូ ដែលតាំងនៅតាមបណ្តា រាជធានី ខេត្ត សាលាឧទ្ធរណ៍ និងតុលាការកំពូល។
ការពិគ្រោះយោបល់ផ្នែកច្បាប់ដោយឥតគិតថ្លៃមានទាំងតាមប្រព័ន្ធទូរស័ព្ទបន្ទាន់ Hotline 1281 រៀងរាល់ម៉ោងធ្វើការ និងពិគ្រោះយោបល់ផ្ទាល់នៅគណៈមេធាវីកម្ពុជា រាជធានីភ្នំពេញ និងទីតាំងមួយចំនួនទៀតទូទាំងប្រទេស។
នាយកដ្ឋានការពារក្តីជូនជនក្រីក្រកន្លងមកបានអនុវត្តការងាររបស់ខ្លួន ដូចជា ការពារជនជាប់ចោទជាជនក្រីក្រ ហើយជាប់ចោទពីបទឧក្រិដ្ឋ ជនជាប់ចោទជាអនីតិជន ហើយជាប់ចោទពីបទឧក្រិដ្ឋ ឬមជ្ឈិម។ ជនរងគ្រោះស្រី្តជាអនីតិជន បទរំលោភសេពសន្ថវៈ ហិង្សាក្នុងគ្រួសារ និងការជួញដូរក្នុងបទឧក្រិដ្ឋ ឬបទមជ្ឈិម គ្មានលទ្ធភាពរកមេធាវីការពារសិទ្ធិខ្លួនឯងបាន៕
វីដេអូ៖