ភ្នំពេញៈ គណៈមេធាវីបានបង្កើតបន្ទប់សម្រាប់មេធាវីនៅតាមបណ្ដាពន្ធនាគារនៅរាជធានី-ខេត្តទាំង ២៥ ដើម្បីឲ្យមេធាវីមានភាពងាយស្រួលក្នុងការជួបជាមួយកូនក្ដីឲ្យបានត្រឹមត្រូវ និងអាចរក្សាការសម្ងាត់រវាងមេធាវី និងកូនក្ដី សម្រាប់ដំណើរការនីតិវិធីនៅក្នុងរឿងក្ដីប្រកបដោយវិជ្ជាជីវៈ។
លោកស្រី មេធាវី លឹម ច័ន្ទលីដា ប្រធានគណៈកម្មការសាងសង់នៃគណៈមេធាវីបានថ្លែងឲ្យដឹងថា គណៈមេធាវីបានចំណាយថវិកាប្រមាណ ១៥ ម៉ឺនដុល្លារសហរដ្ឋអាមេរិក សម្រាប់សាងសង់បន្ទប់ ១ នៅក្នុងពន្ធនាគារនីមួយៗទាំង ២៥ រាជធានី-ខេត្ត ហើយរហូតមកដល់បច្ចុប្បន្ន បន្ទប់មេធាវីត្រូវបានសាងសង់ និងបំពាក់សម្ភាររួចរាល់ហើយនៅក្នុងពន្ធនាគារចំនួន ១៩ នៅតាមរាជធានី-ខេត្ត និងនៅសល់តែ ៦ បន្ទប់ប៉ុណ្ណោះមិនទាន់បានបំពាក់សម្ភារ។
លោកស្រីបានឲ្យដឹងថា ចំពោះសំណង់បន្ទប់មេធាវីសាងសង់រួចរាល់នោះរួមមាននៅក្នុងខេត្តកំពង់ស្ពឺ ត្បូងឃ្មុំ តាកែវ កំពត ព្រៃវែង ស្វាយរៀង កំពង់ឆ្នាំង បាត់ដំបង បន្ទាយមានជ័យ ឧត្តរមានជ័យ កំពង់ធំ ព្រះវិហារ មណ្ឌលកែប្រែ ម ១ មណ្ឌលកែប្រែ PJ ព្រះសីហនុក្រចេះ សៀមរាប ខេត្តស្ទឹងត្រែង និងខេត្តប៉ៃលិន។
ខណៈខេត្តដទៃទៀតនៅសល់ ១០ ភាគរយទៀតដែលត្រូវលាបថ្នាំជញ្ជាំង និងបំពាក់សម្ភារៈពីខាងគណៈមេធាវី។
លោកស្រី ច័ន្ទលីដា ថ្លែងថាពន្ធនាគារខ្លះមានកន្លែងសម្រាប់មេធាវីជួបកូនក្តីដែរតែមិនពេញលក្ខណៈ។ ពន្ធនាគារខ្លះទៀតគ្មានបន្ទប់សម្រាប់មេធាវីជួបកូនក្តីតែម្តងហើយពេលមេធាវីចុះទៅជួបកូនក្តីគឺជួបកូនក្តីនៅក្រោមដើមឈើក៏មានដែលមើលទៅមិនសមរម្យសម្រាប់មេធាវីទេ។ បន្ទប់សម្រាប់មេធាវីនេះមានទំហំ ៥ ម៉ែត្រគុណនឹង ៥ ម៉ែត្រ។ សំណង់បន្ទប់នេះប្រើកម្លាំងពលកម្មរបស់ទណ្ឌិត។
លោកស្រី ច័ន្ទលីដា ថ្លែងថា៖ «បន្ទប់មេធាវីក្នុងពន្ធនាគារខ្លះច្រកទ្វារមិនអាចរក្សាការសម្ងាត់រវាងមេធាវី និងកូនក្តីបាន»។
លោកស្រី មេធាវី បញ្ជាក់ថាសំណង់បន្ទប់មេធាវីនេះគ្រោងបញ្ចប់រួចរាល់នៅខែមិថុនា ឆ្នាំ ២០២០ ហើយអាចនឹងបើកការសម្ពោធជាផ្លូវការដោយមានលោក សួន វិសាល ប្រធានគណៈមេធាវី។ សំណង់បន្ទប់មេធាវីសម្រាប់ជួបកូនក្តីនៅតាមពន្ធនាគារទូទាំងប្រទេសគឺគណៈមេធាវីចាប់ផ្តើមធ្វើការសាងសង់តាំងពីខែសីហា ឆ្នាំ ២០១៨។ ក្រោយពីមើលឃើញថា កន្លងមកមេធាវីតែងជួបការលំបាកពេលចុះទៅជួបកូនក្តីក្នុងពន្ធនាគារព្រោះមិនមានបន្ទប់ត្រឹមត្រូវ។
លោក ស៊ឹង សែនករុណា មន្ត្រីជាន់ខ្ពស់នៃសមាគមសិទ្ធិមនុស្ស អាដហុក ធ្លាប់បានប្រាប់ភ្នំពេញប៉ុស្តិ៍ថា បន្ទប់សម្រាប់មេធាវីនេះបានផ្តល់ភាពសម្ងាត់សម្រាប់មេធាវីបានជួបពិគ្រោះយោបល់ជាមួយកូនក្តី។
លោកថ្លែងថា៖ «ខ្ញុំសង្ឃឹមថា ការសាងសង់បន្ទប់នេះនឹងអាចផ្តល់ផលប្រយោជន៍ដល់កូនក្តីក៏ដូចជាមេធាវីអាចជួបកូនក្តីគាត់ដោយមិនមានការជ្រៀតជ្រែក ឬមានការរឹតត្បិតអី្វផ្សេងៗ»៕