.jpg)
កិច្ចប្រជុំគណៈរដ្ឋមន្ត្រី កាលពីថ្ងៃទី ៩ ខែ តុលា ឆ្នាំ ២០២០។ រូបថត SPM
ភ្នំពេញ៖ អង្គគណៈរដ្ឋមន្រ្តីបានសម្រេចបញ្ជូនសេចក្ដីព្រាងច្បាប់ចំនួន ៤ ទៅសុំការអនុម័តពីរដ្ឋសភា និងបានឯកភាពលើសេចក្ដីព្រាងផែនការសកម្មភាពជាតិស្ដីពីការទប់ស្កាត់អំពើហិង្សាលើស្ត្រី (២០១៩-២០២៣) និងសេចក្ដីព្រាងកម្មវិធីវិនិយោគសាធារណៈ ៣ ឆ្នាំ រំកិល (២០២១-២០២៣)។ នេះបើតាមសេចក្តីប្រកាសព័ត៌មានរបស់ទីស្ដីការគណៈរដ្ឋមន្រ្តី ស្តីពីលទ្ធផលនៃសម័យប្រជុំពេញអង្គគណៈរដ្ឋមន្ត្រីកាលពីថ្ងៃទី ៩ ខែតុលា។
សេចក្តីព្រាងច្បាប់ទាំង ៤ ដែលគណៈរដ្ឋមន្រ្ដីសម្រេចបញ្ជូនទៅសុំការអនុម័តយល់ព្រមពីស្ថាប័ននីតិប្បញ្ញត្តិនោះរួមមាន ១. សេចក្តីព្រាងច្បាប់ស្តីពីការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោក រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម។
២.សេចក្តីព្រាងច្បាប់ស្តីពីការអនុម័តយល់ព្រមលើពិធីសារ ទី៣. ស្តីពីសិទ្ធិសហការលើជើងហោះហើរក្នុងស្រុកក្នុងរង្វង់ទឹកដីនៃប្រទេសជាសមាជិកអាស៊ានណាមួយ និងពិធីសារ ទី៤. ស្តីពីសិទ្ធិហោះហើរកូធ័រមីណល (Co-Terminal Rights) រវាងអាកាសយានដ្ឋាននៅក្នុងទឹកដីនៃប្រទេសជាសមាជិកអាស៊ាន។
៣. សេចក្តីព្រាងច្បាប់ស្តីពីការអនុម័តយល់ព្រមលើពិធីសារអនុវត្តកញ្ចប់កិច្ចសន្យាទី៩ និងទី១០ នៃសេវាកម្មដឹកជញ្ជូនតាមផ្លូវអាកាសក្រោមកិច្ចព្រមព្រៀងក្របខ័ណ្ឌអាស៊ានស្តីពីសេវាកម្ម និង៤. សេចក្តីព្រាងច្បាប់ស្តីពីការអនុម័តយល់ព្រមលើសន្ធិសញ្ញាស្តីពីការហាមឃាត់អាវុធនុយក្លេអ៊ែរ។
សេចក្តីប្រកាសព័ត៌មានដដែលបានឲ្យដឹងថា សេចក្តីព្រាងផែនការសកម្មភាពជាតិស្តីពីការទប់ស្កាត់អំពើហិង្សាលើស្ត្រី ២០១៩-២០២៣ កន្លងមក រាជរដ្ឋាភិបាលកម្ពុជាបានដាក់ចេញផែនការសកម្មភាពជាតិស្តីពីការទប់ស្កាត់អំពើហិង្សាលើស្ត្រីចំនួន ២ (ទី១ ឆ្នាំ ២០០៩-២០១៣ និងទី២ ឆ្នាំ ២០១៤-២០១៨)។ ប៉ុន្តែក៏នៅមានបញ្ហាសេសសល់ និងបញ្ហាប្រឈមថ្មីៗដែលបណ្តាលមកពីការរីកចម្រើនយ៉ាងឆាប់រហ័សរបស់សង្គមប្រព័ន្ធព័ត៌មានវិទ្យា និងសកលភាវូបនីយកម្ម។
សេចក្ដីប្រកាសបញ្ជាក់ថា ស្ត្រីកម្ពុជាមួយចំនួននៅតែប្រឈមមុខនឹងអំពើហិង្សាផ្លូវកាយ ផ្លូវចិត្ត និងផ្នែក សេដ្ឋកិច្ចទាំងនៅក្នុងផ្ទះនៅកន្លែងធ្វើការ និងក្នុងសហគមន៍ ដោយមិនគិតពីកម្រិតប្រាក់ចំណូល កម្រិតវប្បធម៌ និងចំណេះដឹងឡើយ ខណៈដែលមូលហេតុចម្បងត្រូវបានទទួលស្គាល់ជាទូទៅថា បណ្តាលមកពីវិសមភាពយេនឌ័រ និងការរើសអើង។
បើតាមសេចក្ដីប្រកាសព័ត៌មាន សេចក្តីព្រាងនេះ គឺជាផែនការលើកទី៣ ដែលត្រូវបានរៀបចំឡើង ដើម្បីជាផែនទីតម្រង់ទិសសម្រាប់បណ្តាក្រសួងស្ថាប័ន អ្នកពាក់ព័ន្ធទាំងថ្នាក់ជាតិ និងថ្នាក់ក្រោមជាតិ អង្គការសង្គមស៊ីវិល វិស័យឯកជន និងប្រព័ន្ធផ្សព្វផ្សាយក្នុងការបន្តអនុវត្តការងារបង្ការ ទប់ស្កាត់ ឆ្លើយតប និងដោះស្រាយអំពើហិង្សាលើស្ត្រីឲ្យកាន់តែមានប្រសិទ្ធភាព និងភាពស័ក្តិសិទ្ធិខ្ពស់។
សេចក្តីព្រាងផែនការនេះមានគោលបំណងឆ្ពោះទៅកាត់បន្ថយរាល់ទម្រង់នៃអំពើហិង្សាលើស្ត្រីដែលនឹងរួមចំណែកលើកកម្ពស់តម្លៃសីលធម៌សង្គម តម្លៃស្ត្រី និងគ្រួសារខ្មែរ សំដៅលើកកម្ពស់សមធម៌ រិយាប័ន្ន និងភាពសុខដុមរមនាសង្គម។ វាក៏នឹងផ្តល់លទ្ធភាពគ្រប់គ្រាន់ដល់ស្ត្រីអាចប្រើប្រាស់សក្ដានុពលរបស់ខ្លួនជាអតិបរមា ដើម្បីចូលរួមក្នុងដំណើរការអភិវឌ្ឍប្រទេសជាតិ។ សេចក្តីព្រាងនេះត្រូវបានរៀបចំឡើងដោយមាន ៧ ជំពូក ហើយត្រូវបានសម្រេចឯកភាពដោយកិច្ចប្រជុំពេញអង្គគណៈរដ្ឋមន្ត្រី។
លោកនាយករដ្ឋមន្ត្រីបានថ្លែងក្នុងកិច្ចប្រជុំពេញអង្គគណៈរដ្ឋមន្ត្រីនេះថា៖ «ក្នុងបរិបទនៃវិបត្តិជំងឺកូវីដ ១៩ ប្រទេសកម្ពុជា នៅរក្សាបាននូវការគ្រប់គ្រងហិរញ្ញវត្ថុក្នុងស្ថានភាពល្អប្រសើរ បើធៀបនឹងបណ្តាប្រទេសមួយចំនួន។
ជាក់ស្ដែងរាជរដ្ឋាភិបាលនៅមានលទ្ធភាពគ្រប់គ្រាន់ ដើម្បីបញ្ចេញកញ្ចប់ថវិកា សម្រាប់ចំណាយចរន្តក្នុងការបើកបៀវត្សរ៍រៀងរាល់ ២ សប្តាហ៍ម្តងជូន មន្ត្រីរាជការទូទាំងប្រទេស និងបន្តកម្មវិធីឧបត្ថម្ភសាច់ប្រាក់ជូនប្រជាពលរដ្ឋក្រីក្រ និងងាយរងគ្រោះដោយសារផលប៉ះពាល់នៃជំងឺកូវីដ ១៩ ព្រមទាំងគាំទ្រដល់កម្មវិធីវិនិយោគសាធារណៈជាអាទិ៍ ការកសាងហេដ្ឋារចនាសម្ព័ន្ធ ផ្លូវថ្នល់ ប្រឡាយទឹក និងគម្រោងខ្នាតតូចនៅតាមសហគមន៍មូលដ្ឋាន»៕
