.jpg)
ភ្នំពេញៈ លោកនាយករដ្ឋមន្ត្រី ហ៊ុន សែន នឹងបើកកិច្ចប្រជុំពេញអង្គគណៈរដ្ឋមន្ត្រីដើម្បីធ្វើការពិភាក្សាលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩ បន្ទាប់ពីឧត្តមក្រុមប្រឹក្សាពិគ្រោះយោបល់ដែលមានសមាសភាពមកពីគណបក្សចាញ់ឆ្នោតចំនួន ១៦ បានបើកកិច្ចប្រជុំពិភាក្សាលើសេចក្តីព្រាងច្បាប់នេះ។
សេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រីចុះថ្ងៃទី ២៤ ខែតុលា ឆ្នាំ២០១៨ បានឲ្យដឹងថាអង្គប្រជុំពេញអង្គគណៈរដ្ឋមន្ត្រីនឹងប្រព្រឹត្តទៅនៅថ្ងៃសុក្រ ទី ២៦ ខែតុលា នៅវិមានសន្តិភាពដើម្បីពិភាក្សាលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩ និងសេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ ២០១៧ ហើយសេចក្តីព្រាងច្បាប់ទាំង ២ នេះក៏ត្រូវបានឧត្តមក្រុមប្រឹក្សាពិគ្រោះយោបល់បើកកិច្ចប្រជុំពិភាក្សារួចមកហើយកាលពីថ្ងៃទី ២២ ខែតុលា ឆ្នាំ ២០១៨។
សេចក្តីប្រកាសព័ត៌មាននេះបញ្ជាក់ដូច្នេះថា៖ «ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុក៏បានធ្វើបទអន្តរាគមន៍ស្តីពីទិដ្ឋភាពគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈសម្រាប់ការរៀបចំសេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ ២០១៨។ ឯកឧត្តម វង្ស៊ី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុក៏បានផ្តល់បទអន្តរាគមន៍ស្តីពីបរិការណ៍ក្របខ័ណ្ឌ និងគោលនយោបាយនៃការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩»។
បើយោងតាមហ្វេសប៊ុករបស់លោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោកដែលបានបង្ហោះកាលពីថ្ងៃទី ២២ ខែតុលាបានឲ្យដឹងថា នៅក្នុងកិច្ចប្រជុំនៃឧត្តមក្រុមប្រឹក្សាពិគ្រោះ និងផ្ដល់យោបល់ស្តីពីសេចក្ដីព្រាងច្បាប់ថវិកាជាតិសម្រាប់ការគ្រប់គ្រងឆ្នាំ ២០១៩ នាវិមានសន្តិភាព កាលពីថ្ងៃទី ២២ ខែតុលាលោកបានស្នើសុំរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបង្កើនការចំណាយលើវិស័យកសិកម្ម និងសុំឲ្យប្រើប្រាស់ថវិកាជាតិឲ្យចំគោលដៅ ដែលចាំបាច់ និងសុំឲ្យកាត់បន្ថយការចំណាយថវិកាជាតិទៅលើមន្ត្រីដែលអសកម្ម។
លោកបញ្ជាក់ថា៖ «បង្កើនការចំណាយលើវិស័យកសិកម្ម ខណៈដែលកម្ពុជាជាប្រទេសមានវិស័យកសិកម្មជាអាទិភាព ដើម្បីជាយានលើកកម្ពស់សេដ្ឋកិច្ច ព្រោះកសិកម្មជាអនុវិស័យធំមួយក្នុងវិស័យសេដ្ឋកិច្ច។ ចាំបាច់គឺការពង្រឹងវិស័យកសិកម្មជាយន្តការដើម្បីទប់ទល់ក្នុងអន្តរកាលដែលបរទេសគំរាមផ្ដាច់ជំនួយ និងដកការអនុគ្រោះពន្ធ EBA លើប្រទេសកម្ពុជាដែលប៉ះពាល់ដល់វិស័យកសិកម្មយ៉ាងខ្លាំង»។
លោក នួន សុខាវី ប្រធានគណបក្សពន្លឺថ្មីបានប្រាប់ភ្នំពេញប៉ុស្តិ៍ថា កិច្ចប្រជុំឧត្តមក្រុមប្រឹក្សាពិគ្រោះយោបល់ក៏បានលើកឡើងអំពីបញ្ហាថវិកាធ្វើថ្នល់ ធ្វើស្ពាន និងការបាត់លុយព្រមទាំងការនាំទំនិញចេញចូលផងដែរ។
លោកបន្តថា៖ «គាត់ (ក្រសួងសេដ្ឋកិច្ច និងហិរញ្ញវត្ថុ) គ្រាន់តែបង្ហាញនូវសេចក្តីព្រាងច្បាប់ថវិកាជាតិឆ្នាំ ២០១៩ ហើយយើងធ្វើការពិចារណាទាំងអស់គ្នា...។ វាមានរយៈពេលខ្លី យើងមិនបានសិក្សាឲ្យបានច្រើនទេ។ អ្នកជំនាញគ្រាន់តែធ្វើការបង្ហាញឲ្យដឹងពីអត្ថប្រយោជន៍នៃសេចក្តីព្រាងច្បាប់ថវិកាជាតិឆ្នាំ ២០១៩។ វាមានរយៈពេលតែ ៤ ម៉ោងហើយសួរបានតែប៉ុន្មានសំណួរ។ យើងមិនបានសិក្សាឲ្យលម្អិតទេ»។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានសរសេរបង្ហោះនៅលើហ្វេសប៊ុករបស់លោកថា កិច្ចប្រជុំពេញអង្គនៅថ្ងៃសុក្រនឹងពិភាក្សាទៅលើកិច្ចព្រមព្រៀងស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូលរវាងកម្ពុជា-វៀតណាម និងកម្ពុជា-ឥណ្ឌូនេស៊ី និងសន្ធិសញ្ញារវាងព្រះរាជាណាចក្រកម្ពុជា និងសហព័ន្ធរុស្ស៊ីស្តីពីបត្យាប័នផងដែរ។
លោក ផៃ ស៊ីផាន បានបញ្ជាក់ប្រាប់ភ្នំពេញប៉ុស្តិ៍បន្ថែមពីម្សិលមិញថា៖ «នៅក្នុងអាណត្តិនេះក្រសួងកសិកម្មទទួលបានថវិកាច្រើនជាងឆ្នាំមុន... ហើយការលើកឡើងរបស់ឧត្តមក្រុមប្រឹក្សាពិគ្រោះយោបល់គ្រាន់តែជាចម្ងល់តែត្រូវពន្យល់យ៉ាងស៊ីជម្រៅ ហើយថារដ្ឋាភិបាលមានវិធានការក្នុងការកាត់បន្ថយការចំណាយ»។
លោក សន ជ័យ ជាប្រធានអង្គការសម្ព័ន្ធគណនេយ្យភាពសង្គមកម្ពុជាបានសម្តែងការព្រួយបារម្ភនៅពេលដែលសេចក្តីព្រាងច្បាប់នេះមិនត្រូវបានដាក់ឲ្យពិគ្រោះយោបល់ជាមួយអង្គការសង្គមស៊ីវិល ខណៈដែលរដ្ឋសភាជាសភាឯកបក្ស។
លោកបញ្ជាក់៖ «ព័ត៌មាននៃថវិកាមិនត្រូវបានដាក់ឲ្យមានការផ្តល់យោបល់ទូលំទូលាយទេ ស្របពេលដែលមានសភាឯកបក្សការអនុម័តសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩ ពីគណៈរដ្ឋមន្ត្រីរហូតដល់សភាមិនមានការពិគ្រោះយោបល់ជាសាធារណៈជាមួយសង្គមស៊ីវិល វានឹងធ្វើឲ្យមានមន្ទិលកាន់តែច្រើនទៅលើបញ្ហាថវិកាជាតិនេះ...យើងមានការបារម្ភច្រើន ផែនការដែលលើកឡើងវានឹងមិនឆ្លើយតបនឹងតម្រូវការជាក់ស្តែងនៃការអភិវឌ្ឍ»៕
