ភ្នំពេញៈ គណៈវិជ្ជាជីវៈសុខាភិបាលកម្ពុជាព្រមទទួលការបកស្រាយបំភ្លឺរបស់លោក គួច ម៉េងលី ដែលធ្លាប់រិះគន់ថាលោកមិនដែលជួបគ្រូពេទ្យណាអាក្រក់ដូចស្រុកខ្មែរខណៈលោកបានពន្យល់ថាអ្វីដែលបានលើកឡើងនេះជាបញ្ហាដែលធ្លាប់ជួបប្រទះកន្លងមកទើបស្ថាប័នរដ្ឋាភិបាលចាត់ទុកថាការបំភ្លឺជាការជួសជុល និងស្តារកិតិ្តយសអ្នកវិជ្ជាជីវៈសុខាភិបាលនៅកម្ពុជា។
នាយកក្រុមហ៊ុន Mengly J. Quach Holding និងជាម្ចាស់សាលាអន្តរទ្វីបអាមេរិកាំងលោក គួច ម៉េងលី កាលពីថ្ងៃទី ១៩ មករាបានសរសេរលិខិតបំភ្លឺមួយទៅគណៈវិជ្ជាជីវៈសុខាភិបាលកម្ពុជាថាអ្វីដែលលោកលើកឡើងគឺផ្អែកលើការជួបប្រទះផ្ទាល់ខ្លួននូវស្ថានភាពមួយចំនួន។
លិខិតបន្តថា លោកពុំបានរំពឹងថាការបកស្រាយពីការជួបប្រទះផ្ទាល់ខ្លួននេះធ្វើឲ្យប៉ះពាល់ដល់អ្នកប្រកបវិជ្ជាជីវៈសុខាភិបាលនោះទេ។ ទោះជាយ៉ាងណាលោកទទួលស្គាល់ថាមានពេទ្យមួយចំនួនប្រកបដោយសមត្ថភាព និងក្រមសីលធម៌ល្អច្រើនដែលបាននិងកំពុងបំពេញតួនាទីយ៉ាងសកម្មក្នុងការសង្គ្រោះជីវិតប្រជាពលរដ្ឋខ្មែរ។
ឆ្លើយតបនឹងការបកស្រាយនេះគណៈវិជ្ជាជីវៈសុខាភិបាលកម្ពុជាយល់ឃើញថាការបំភ្លឺរបស់វេជ្ជបណ្ឌិតនេះអាចជួយជួសជុលបានមួយកម្រិតនូវការខូចខាតកិត្តិយស និងសេចក្តីថ្លៃថ្នូររបស់អ្នកប្រកបវិជ្ជាជីវៈសុខាភិបាលនៅកម្ពុជា។
គណៈវិជ្ជាជីវៈសុខាភិបាលសង្ឃឹមថា ការខូចខាតនេះនឹងអាចស្ដារឡើងវិញតាមការបន្តស្វែងយល់ពីគ្នាក្នុងស្មារតីភាតរភាពនៃអ្នករួមវិជ្ជាជីវៈ។ គណៈវិជ្ជាជីវៈសុខាភិបាលក៏បានស្វាគមន៍ជាថ្មីនូវចេតនារបស់លោកវេជ្ជបណ្ឌិតក្នុងការចូលរួមចំណែកកែលម្អវិស័យសុខាភិបាលនៅកម្ពុជាផងដែរ។
កន្លងទៅគណៈវិជ្ជាជីវៈសុខាភិបាលកម្ពុជាបានចេញលិខិតមួយជូនលោក គួច ម៉េងលី ឲ្យសុំទោស។
លិខិតបញ្ជាក់ថា៖ «គណៈវិជ្ជាជីវៈសុខាភិបាលកម្ពុជាចាត់ទុកថាការលើកឡើងរបស់លោក (គួច ម៉េងលី) ជាការវាយតម្លៃដែលគ្មានមូលដ្ឋាន គ្មានវិជ្ជាជីវៈ គ្មានការទទួលខុសត្រូវ និងមានចរិតបំផ្លើស បន្តុះបង្អាប់ដែលប៉ះពាល់ធ្ងន់ធ្ងរដល់កិត្តិយស សេចក្តីថ្លៃថ្នូររបស់គ្រូពេទ្យ និងអ្នកវិជ្ជាជីវៈសុខាភិបាលកម្ពុជា»។
លិខិតបញ្ជាក់ថា៖ «ចំពោះការនិយាយបរិហារកេរ្តិ៍ និងប្រមាថជាសាធារណៈមកលើគ្រូពេទ្យ និងអ្នកវិជ្ជាជីវៈសុខាភិបាលគណៈវិជ្ជាជីវៈសុខាភិបាលសុំឲ្យលោកកែតម្រូវ និងសុំទោសចំពោះពាក្យសម្តីរបស់លោក»។ គណៈវិជ្ជាជីវៈសុខាភិបាលសង្កត់ធ្ងន់ថា «សូមលោក (គួច ម៉េងលី) កែតម្រូវ និងសុំទោសជាសាធារណៈជាចាំបាច់»។
លោក គួច ម៉េងលី ប្រាប់ភ្នំពេញប៉ុស្តិ៍កាលពីម្សិលមិញថាការបំភ្លឺរបស់លោកនាពេលនេះអាចធ្វើឲ្យអ្នកទាំងសងខាងទទួលយកបាន និងបញ្ចប់រាល់ការយល់ច្រឡំមួយចំនួន។ តែលោកនៅតែរក្សាជំហរថាអ្វីដែលលោកលើកឡើងកន្លងទៅគឺជារឿងពិតទើបលោកមិនសុំទោសហើយចេញលិខិតបកស្រាយជំនួសវិញ។
លោកថា៖ «សុំទោសទាល់តែយើងធ្វើខុសតែបើយើងអត់ធ្វើខុសសុំទោសធ្វើអីតែការនិយាយរបស់យើងអាចឲ្យមហាជនគេយល់ច្រឡំហើយគេអាចយកឱកាសនេះវាយប្រហារថាគ្រូពេទ្យទាំងអស់អាក្រក់អ៊ីចឹងទៅធ្វើឲ្យមានការជ្រួលច្របល់អ៊ីចឹងចំណុចល្អដើម្បីផ្សះផ្សាគ្នាមានតែវិធីសាស្ត្រមួយនេះទេ»។
ទោះជាយ៉ាងណាលោកបញ្ជាក់ថាតាមពិសោធន៍ក្នុងការបង្រៀនសិស្ស និងការជួបប្រទះផ្ទាល់ខ្លួនផងនោះគឺពិតជាមានគ្រូពេទ្យមួយចំនួនបានគោរពវិជ្ជាជីវៈ និងមួយចំនួនប្រព្រឹត្តផ្ទុយពីក្រមសីលធម៌។
លោកជឿជាក់អ្វីដែលបានឆ្លងកាត់ប៉ុន្មានថ្ងៃមកនេះអាចជាការដាស់តឿនដល់វិស័យសុខាភិបាលគួរយកចិត្តទុកដាក់ខ្វាយខ្វល់ពីក្រមសីលធម៌ និងមានភាពទន់ភ្លន់ច្រើនជាងមុន និងមួយទៀតជាការពញ្ញាក់ស្មារតីពលរដ្ឋឲ្យហ៊ានតវ៉ាពេលពួកគេជួបស្ថានភាពពិត។
ក្នុងបទសម្ភាសជាមួយកាសែតភ្នំពេញប៉ុស្តិ៍កាលពីដើមឆ្នាំ ២០១៦ ក្រោមចំណងជើងថា «ពីក្មេងល្ងង់ខ្លៅក្រីក្រ ដើររើសចំណីតាមផ្លូវបរិភោគទៅជាសេដ្ឋីចិត្តធម៌» បានលើកឡើងថា «ខ្ញុំអត់ដែលជួបពេទ្យណាអាក្រក់សែនអាក្រក់ដូចពេទ្យនៅស្រុកខ្មែរយើងទេ»។ គាត់គ្មានវិជ្ជាជីវៈ គ្មានភាពទន់ភ្លន់ គ្មានមេត្ដាធម៌នេះខ្ញុំមិនមែននិយាយទាំងអស់ទេខ្ញុំនិយាយបើខ្ញុំបានជួប ១០ មានអាក្រក់ ៩។ បើមានអាកប្បកិរិយាមារយាទអំនួត អឿ ឈ្លើយ ម៉ាបាវ តើកូនខ្មែរយើងអភ័ព្វយ៉ាងម៉េចទៅ? ពេលគេទៅព្យាបាលម្ដងសឹងតែលុតជង្គង់អង្វរគាត់ (ពេទ្យ)។ ពេទ្យដែលគ្មានជំនាញវិជ្ជាជីវៈ ក្រមសីលធម៌ទាំងនោះហើយជាអ្នកសម្លាប់មនុស្ស។
ទាក់ទងនឹងសេវាសុខភាពនេះជាការកត់សម្គាល់អ្នកជំនួញ មន្ត្រីគណបក្សនយោបាយ និងមន្ត្រីធំៗមួយចំនួននៅស្រុកខ្មែរតែងតែទៅព្យាបាលនៅក្រៅប្រទេសរួមមាន សិង្ហបុរី ថៃ និងវៀតណាមជាដើម។ សូម្បីតែលោកនាយករដ្ឋមន្ត្រី ហ៊ុន សែន កាលពីថ្ងៃទី ១៨ មករា ក៏បានទៅសម្រាកព្យាបាលនៅប្រទេសសិង្ហបុរីតាមតម្រូវការរបស់គ្រូពេទ្យផងដែរ៕
