.jpg)
ទីធ្លាសាលារៀន នៅក្នុងវិទ្យាល័យព្រះស៊ីសុវត្ថិ។ ភ្នំពេញ ប៉ុសិ៍្ត
ភ្នំពេញៈ ក្រសួងបរិស្ថានបានស្នើឡើងគម្រោងគំរូដើម្បីបង្កើតភាពធន់ទៅនឹងអាកាសធាតុ សម្រាប់សាលារៀនគោលដៅចំនួន ៥ នៅក្នុងតំបន់ទីប្រជុំជនក្នុងរាជធានីភ្នំពេញដើម្បីកាត់បន្ថយ និងផ្ស៊ាំទៅនឹងផលប៉ះពាល់នៃការប្រែប្រួលអាកាសធាតុ ដូចជាកម្តៅនៅទីប្រជុំជន។ សាលាគោលដៅទាំងនោះមានដូចជា ១-វិទ្យាល័យព្រះស៊ីសុវត្ថិ ២-អនុវិទ្យាល័យចតុមុខ ៣-អនុវិទ្យាល័យសម្តេច ហ៊ុន សែន ព្រៃវែង ៤-វិទ្យាល័យ ហ៊ុន សែន ប៊ុនរ៉ានី អរុណវតី ៥-សាលាបឋមសិក្សាភ្លើងឆេះរទេះ។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានប្រាប់ភ្នំពេញប៉ុស្តិ៍កាលពីថ្ងៃអង្គារថា គម្រោងគំរូនេះត្រូវបានរៀបចំឡើងដើម្បីបង្ហាញទៅដល់សាលារៀន និងសហគមន៍ផ្សេងៗឱ្យយល់ដឹង ក៏ដូចជាទាញយកនូវបទពិសោធ និងការអនុវត្តល្អៗពាក់ព័ន្ធនឹងភាពសុំាអាកាសធាតុសម្រាប់អនុវត្តនៅក្នុងសាលារៀន និងសហគមន៍។
លោក នេត្រ ភក្ត្រា ថ្លែងថា៖ «មានន័យថា ពិភពលោកមានការប្រែប្រួលអាកាសធាតុ។ កម្ពុជារបស់យើងក៏ទទួលរងនូវផលប៉ះពាល់ដែលចេញពីការប្រែប្រួលអាកាសធាតុហ្នឹងដែរ។ អ៊ីចឹងគឺថា តើយើងត្រូវធ្វើម៉េចដើម្បីបន្សុំាខ្លួនទៅនឹងការប្រែប្រួលអាកាសធាតុហ្នឹង? អ៊ីចឹងមានតាំងពីការរស់នៅរបស់យើង ការគ្រប់គ្រងបរិស្ថាន ការគ្រប់គ្រងធនធានធម្មជាតិ ការដាំដើមឈើ ដាំអី នៅជុំវិញហ្នឹង ក៏ជាផ្នែកមួយនៃការជួយឱ្យមានការកាត់បន្ថយនៃការប្រែប្រួលអាកាសធាតុក៏ដូចជាការផ្ស៊ាំ។ បើសិនជាវាក្តៅ យើងមានដើមឈើសម្រាប់ជ្រក សម្រាប់អីអ៊ីចឹង»។
លោក នេត្រ ភក្ត្រា ថ្លែងថា នៅតាមសាលារៀន ក្រសួងជំរុញឱ្យមានភាពបៃតងដោយមានដើមឈើដើម្បីផ្តល់មេត្រីភាពបរិស្ថានទៅឱ្យសិស្សនៅក្នុងការរស់នៅ។ លោក បន្តថា ក្រសួងបានអនុវត្តគម្រោងនេះជាបន្តបន្ទាប់ដោយមានកិច្ចសហការជាមួយដៃគូរបស់ក្រសួង ហើយនៅតែបន្តអនុវត្តជាបន្តបន្ទាប់ទៀត។ ក្រសួងក៏បានបង្ហាញលទ្ធផលសំខាន់ៗនៃគម្រោងនេះកាលពីថ្ងៃចន្ទតាមរយៈហ្វេសប៊ុក ថាគម្រោងបានឆ្លើយតបចំពោះតម្រូវការរបស់សាលារៀន ដែលបានជ្រើសរើសដែលអាចកាត់បន្ថយ និងផ្ស៊ាំទៅនឹងផលប៉ះពាល់ទាំងនោះ។
អ្វីដែលក្រសួងបានប្រកាសថា គម្រោងអាចកាត់បន្ថយផលប៉ះពាល់ទាំងនោះ ធ្វើឡើងតាមរយៈការដាំដើមឈើដើម្បីបង្កើតឲ្យមានបរិស្ថានបៃតងល្អស្អាត ការដំឡើងប្រព័ន្ធផលិតថាមពលអគ្គិសនីសូឡាដើម្បីបង្កើនប្រសិទ្ធផលនៃការប្រើប្រាស់ថាមពល ការធ្វើអាងត្រងទឹកភ្លៀង ការត្រៀមខ្លួនរៀបចំទៅជាសាលាមេត្រីបរិស្ថាន ការសាកល្បងប្រើប្រាស់ទោចក្រយានយន្តប្រើប្រាស់ថាមពលអគិ្គសនី (Ebike) សម្រាប់មន្រ្តីរដ្ឋបាលរបស់ក្រសួងបរិស្ថាន។
ក្រសួងប្រកាសថា ការដែលមន្ត្រីក្រសួងបរិស្ថានសាកល្បងប្រើប្រាស់ទោចក្រយានយន្ត គឺដើម្បីបង្ហាញពីការប្រើមធ្យោបាយដឹកជញ្ជូនប្រកបដោយបច្ចេកវិទ្យាដែលប្រើកាបូនតិច ដើម្បីចូលរួមចំណែកក្នុងការរៀបចំគោលនយោបាយនៃផលប៉ះពាល់ពីឧស្ម័នផ្ទះកញ្ចក់និងការបំពុលខ្យល់ក្នុងបរិយាកាស។
លោក ស ម៉ូរី អនុប្រធានបណ្តាញយុវជនកម្ពុជា បានប្រាប់ភ្នំពេញប៉ុស្តិ៍ កាលពីថ្ងៃអង្គារ៍ថា តាមការកត់សម្គាល់របស់លោកបានឲ្យដឹងថាយន្តការរបស់ក្រសួងបរិស្ថានក្នុងការផ្ស៊ាំការប្រែប្រួលអាកាសធាតុនេះ ដោយសារសាលារៀនភាគច្រើននៅប្រទេស កម្ពុជា មិនសូវមានដើមឈើនោះទេ ហើយធ្វើឱ្យមានបរិយាកាសក្តៅ។ ដោយមើលឃើញដូចនេះ ទើបរបាយការណ៍អន្តរជាតិមួយបានផ្តល់អនុសាសន៍ថា ប្រទេស កម្ពុជា គួរចាប់ផ្តើមប្រយុទ្ធប្រឆាំង និងផ្ស៊ាំការ ប្រែប្រួលដោយចាប់ផ្តើមពីសាលារៀនមុនគេ។
លោក ស ម៉ូរី បានបញ្ជាក់ថា៖ «ខ្ញុំគិតថា ការចាប់ផ្តើមសាកល្បងរបស់ក្រសួងបរិស្ថានជាចំណុចមួយល្អដែលក្រសួងបរិស្ថានគិតគូរពីការធ្វើម៉េចដាំដើមឈើនៅក្នុងសាលារៀននៅក្នុងប្រទេស កម្ពុជា យើងឱ្យក្លាយទៅជាសាលាបៃតង។ ប៉ុន្តែការចាប់ផ្តើមគម្រោងហ្នឹងគឺទាល់តែមានការប្តេជ្ញាចិត្តមែនទែន ជាពិសេសត្រូវតែធ្វើការថែទាំដើមឈើដែលបានដាំហ្នឹង។ ការស្រោចទឹក ការថែទាំធ្វើម៉េចកុំឱ្យដើមឈើហ្នឹងស្លាប់។ កន្លងមក យើងឃើញមានគម្រោងរបស់អង្គការសង្គមស៊ីវិលមួយចំនួនដែលដាំដើមឈើក្នុងសាលាអីហ្នឹងមិនសូវជាបានជោគជ័យទេ»៕
