.jpg)
ពលករខ្មែរនៅច្រកអន្តរជាតិដូង កម្ពុជា-ថៃ ស្រុកកំរៀង ខេត្តបាត់ដំបង។ ហេង ជីវ័ន
ភ្នំពេញៈ អង្គការអន្តរជាតិទេសន្តរប្រវេសន៍ (IOM) និងមជ្ឈមណ្ឌលជាតិកម្ចាត់រោគរបេង និងហង់ស៊ិនហៅកាត់ថា CENAT កាលពីថ្ងៃព្រហស្បតិ៍សប្ដាហ៍មុន បានបើកសម្ពោធគម្រោងមួយមានរយៈពេល ៣ ឆ្នាំដើម្បីធ្វើការវិភាគរកមើលរោគរបេងក្នុងចំណោមពលករកម្ពុជាដែលបានចំណាកស្រុកទៅធ្វើការនៅប្រទេសថៃ។
អង្គការ IOM បានបញ្ជាក់ថា គម្រោងនេះត្រូវបានផ្ដល់ការគាំទ្រដោយមូលនិធិសកលសម្រាប់ជំងឺអេដស៍ របេង និងគ្រុនចាញ់។ គម្រោងនេះនឹងធ្វើការពិនិត្យ និងវិភាគរោគរបេងផ្ដល់ការអប់រំ និងការគាំទ្រទៅដល់ពលករចំណាកស្រុកប្រមាណ ១០ ម៉ឺននាក់ ក្នុងរយៈ ៣ ឆ្នាំ។ អង្គការ IOM បានឲ្យដឹងថា ពលករចំណាកស្រុកឆ្លងចូលទៅធ្វើការនៅប្រទេសថៃក្នុងចំនួនដ៏ច្រើន ហើយមានពលករជាច្រើនបានរស់នៅ និងធ្វើការក្នុងលក្ខខណ្ឌការងារដែលមិនល្អ និងទទួលបានការថែទាំសុខភាពតិចតួច។ ដូច្នេះហើយពួកគេងាយនឹងរងគ្រោះដោយសារជំងឺរបេង។
នៅក្នុងគម្រោងនេះពលករចំណាកស្រុកនឹងទទួលបាននូវការអប់រំអំពីជំងឺរបេង ការត្រួតពិនិត្យដោយប្រើកាំរស្មីអ៊ិច និងការគាំទ្រដល់អ្នកដែលសង្ស័យថាមានជំងឺរបេង និងទទួលបានការពិនិត្យរកមើលមេរោគយ៉ាងឆាប់រហ័ស។ គម្រោងនេះក៏នឹងធានាថា អ្នកជំងឺនឹងទទួលបានការព្យាបាលនៅមជ្ឈមណ្ឌលជាតិកម្ចាត់រោគរបេងនៅកន្លែងដែលពួកគេរស់នៅ។
គម្រោងនេះ គឺជាផ្នែកមួយនៃមូលនិធិសកលថ្នាក់តំបន់ដែលអនុវត្តនៅក្នុងប្រទេសអនុតំបន់ទន្លេមេគង្គ ដើម្បីដោះស្រាយបញ្ហាជំងឺរបេងសម្រាប់ពលករចំណាកស្រុក និងពលរដ្ឋដែលផ្លាស់ប្ដូរទីលំនៅច្រើន។ លើសពីនេះ គម្រោងនេះក៏ទទួលព្យាបាលដល់ពលរដ្ឋសហគមន៍នៅក្រុងប៉ោយប៉ែតផងដែរ។
លោក Patrick Duigan ទីប្រឹក្សាផ្នែកសុខភាពតំបន់នៃអង្គការ IOM បានថ្លែងថា៖ «គម្រោងនេះដែលសហការជាមួយមជ្ឈមណ្ឌលជាតិកម្ចាត់រោគរបេង និងហង់ស៊ិនមានសារៈសំខាន់ណាស់ក្នុងការធានាបានថា ពលករចំណាកស្រុក ជាពិសេសអ្នកដែលគ្មានឯកសារមិនត្រូវបានបំភ្លេចចោលក្នុងកិច្ចខិតខំប្រឹងប្រែងផ្នែកសុខភាពសកល ដើម្បីបញ្ចប់ជំងឺរបេងសម្រាប់ទាំងអស់គ្នា»។
លោកវេជ្ជបណ្ឌិត ម៉ៅ តាន់អ៊ាង នាយកមជ្ឈមណ្ឌលជាតិកម្ចាត់រោគរបេង និងហង់ស៊ិន បានថ្លែងថា សេវាសុខភាពសម្រាប់ពលករចំណាកស្រុកមានលក្ខណពិសេស និងឥតគិតថ្លៃសម្រាប់ពលករចំណាកស្រុក។ ពលរដ្ឋដែលរស់នៅជុំវិញមណ្ឌលសំចតចំណាកស្រុកប៉ោយប៉ែត ក៏អាចទទួលបានសេវាសុខភាពសម្រាប់ជំងឺនេះដែរ ពោលគឺពួកគេអាចមកពិនិត្យព្យាបាលបើសិនពួកគេក្អកជាង ២ សប្ដាហ៍ បែកញើសពេលយប់ ក្ដៅខ្លួន ឬស្រកគីឡូ។
លោកថ្លែងថា៖ «យើងមានទាំងធនធានមនុស្ស និងសម្ភារសម្រាប់ថ្នាំព្យាបាល ពួកគេអាចទទួលបាននៅមជ្ឈមណ្ឌលជាតិកម្ចាត់រោគរបេង និងហង់ស៊ិនទូទាំងប្រទេស។ បើសិនយើងរកឃើញថា អ្នកណាម្នាក់មានជំងឺរបេង គេអាចទៅទទួលថ្នាំនៅប៉ោយប៉ែត ហើយយើងអាចផ្ដល់ថ្នាំទៅពួកគេនៅនឹងកន្លែង យើងមានបណ្ដាញរបស់យើងដែលអាចយកថ្នាំទៅឲ្យពួកគាត់»។
លោក ម៉ៅ តាន់អ៊ាង បញ្ជាក់ថា អត្រាអ្នកស្លាប់ដោយជំងឺរបេងនៅកម្ពុជាមានការធ្លាក់ចុះ ៥៨ ភាគរយ រវាងឆ្នាំ ២០០០ ដល់ ២០១៨ ខណៈដែលអ្នកដែលមានជំងឺនេះក៏បានធ្លាក់ចុះក្នុងអត្រា ៤៨ ភាគរយដែរ។ កាលពីប្រមាណ ៥ ឆ្នាំមុន អ្នកជំងឺរបេងមានប្រមាណ ៥ ម៉ឺននាក់ ក្នុង ១ ឆ្នាំ ប៉ុន្តែ ២-៣ ឆ្នាំចុងក្រោយនេះអ្នកមានជំងឺរបេងមានតែប្រមាណ ៣ ម៉ឺននាក់ប៉ុណ្ណោះក្នុង ១ ឆ្នាំ។
លោកបានថ្លែងឲ្យដឹងផងដែរថា៖ «ស្ថានភាពជំងឺរបេងនៅកម្ពុជាវាស្រាលទេ បើប្រៀបធៀបទៅនឹងប្រទេសដែលមានជំងឺដូចគ្នា ពីព្រោះយើងបានខិតខំប្រឹងប្រែងប្រយុទ្ធប្រឆាំងនឹងជំងឺនេះ»៕
